Kronika Wakutoma

27 Awa ndi Aizraeli akuti akhali atsogoleri a mbumba, atsogoleri a anthu 1.000, atsogoleri a anthu 100+ na akulu a anyankhondo akhatumikira mambo+ m’mabasa onsene akhaphata misoka yakuti ikhacinjana miyezi yonsene pa caka. Nsoka ubodzi na ubodzi ukhali na amuna 24.000.

2 Yasobhiamu+ mwana wa Zabhidhieli akhali ntsogoleri wa nsoka wakutoma ukhatumikira pa mwezi wakutoma, mu nsoka wace mukhali amuna 24.000. 3 Mwa ana a Peresi,+ iye akhali nkulu wa atsogoleri onsene a misoka idasankhulwa toera kutumikira pa mwezi wakutoma. 4 Dhodhai+ wa dzindza ya Aoi+ akhali nkulu wa nsoka waciwiri ukhatumikira pa mwezi waciwiri, Mikiloti akhali ntsogoleri wawo, mu nsoka wace mukhali amuna 24.000. 5 Bhenaya+ mwana wa Yeoyadha+ nkulu wa anyantsembe, akhali ntsogoleri wa nsoka wacitatu udasankhulwa toera kutumikira pa mwezi wacitatu; mu nsoka wace mukhali amuna 24.000. 6 Bhenaya unoyu akhali m’bodzi wa anyankhondo 30 amphambvu, pontho iye akhali nkulu wa anyankhondo 30 anewa; ntsogoleri wa nsoka wace akhali mwanace akhacemerwa Amizabhadhi. 7 Azaeli+ m’bale wace Yoabhe+ akhali ntsogoleri wa nsoka wacinai ukhatumikira pa mwezi wacinai, mwanace akhacemerwa Zebhadhiya akhali waciwiri; mu nsoka wace mukhali amuna 24.000. 8 Samuti wa dzindza ya Iziraiya akhali ntsogoleri wa nsoka wacixanu ukhatumikira pa mwezi wacixanu; mu nsoka wace mukhali amuna 24.000. 9 Ira+ mwana wa Ikesi wa ku Tekoa+ akhali ntsogoleri wa nsoka wacitanthatu ukhatumikira pa mwezi wacitanthatu; mu nsoka wace mukhali amuna 24.000. 10 Elezi+ wa ku Peloni wa dzindza ya Efraimu akhali ntsogoleri wa nsoka wacinomwe ukhatumikira pa mwezi wacinomwe; mu nsoka wace mukhali amuna 24.000. 11 Sibhekai+ wa ku Usa wa dzindza ya Zera+ akhali ntsogoleri wa nsoka wacisere ukhatumikira pa mwezi wacisere; mu nsoka wace mukhali amuna 24.000. 12 Abhiezeri+ wa ku Anatote+ wa dzindza ya Bhenjamini akhali ntsogoleri wa nsoka wacipfemba ukhatumikira pa mwezi wacipfemba; mu nsoka wace mukhali amuna 24.000. 13 Marai+ wa ku Netofa wa dzindza ya Zera+ akhali ntsogoleri wa nsoka wacikhumi ukhatumikira pa mwezi wacikhumi; mu nsoka wace mukhali amuna 24.000. 14 Bhenaya+ wa ku Piratoni wa dzindza ya Efraimu akhali ntsogoleri wa nsoka wacikhumi na ubodzi ukhatumikira pa mwezi wacikhumi na ubodzi; mu nsoka wace mukhali amuna 24.000. 15 Eldhai wa ku Netofa wa dzindza ya Otiniyeli akhali ntsogoleri wa nsoka wacikhumi naciwiri ukhatumikira pa mwezi wacikhumi naciwiri; mu nsoka wace mukhali amuna 24.000.

16 Awa akhali atsogoleri a madzindza a Izraeli: Eliezeri mwana wa Zikri akhali ntsogoleri wa dzindza ya Rubheni; wa dzindza ya Simeoni akhali Sefatiya mwana wa Maaka; 17 wa dzindza ya Levi akhali Asabhiya mwana wa Kemuweli; wa dzindza ya Aroni akhali Zadhoke; 18 wa dzindza ya Yuda akhali Eliyu+ m’bale wace Dhavidhi; wa dzindza ya Isakari akhali Omiri mwana wa Mikaeli; 19 wa dzindza ya Zebhuloni akhali Ijimaya mwana wa Obhadhiya; wa dzindza ya Nafitali akhali Yerimoti mwana wa Azrieli; 20 wa dzindza ya Efraimu akhali Ozeya mwana wa Azaziya; wa hafu ya dzindza ya Manase akhali Yoeli mwana wa Pedhaya; 21 wa hafu ya dzindza ya Manase wa ku Jiliyadhi akhali Idho mwana wa Zakariya; wa dzindza ya Bhenjamini akhali Yasiyeli mwana wa Abhineri;+ 22 wa dzindza ya Dhani akhali Azareli mwana wa Yeroamu. Anewa akhali atsogoleri a madzindza a Izraeli.

23 Dhavidhi nee alengesa anthu akuti akhadzati kufikisa pyaka 20 pyakubalwa, thangwi Yahova akhadapikira kuti ananjipisa kakamwe Aizraeli ninga nyenyezi zakudzulu.+ 24 Yoabhe mwana wa Zeruya akhadatoma kulembera mbumba, mbwenye nee amalisa. Thangwi ya kulengeswa kweneku, Mulungu aipirwa na Aizraeli, natenepa ale adalengeswa+ nee alemberwa m’bukhu ya pinthu pidacitika mu ndzidzi wa Mambo Dhavidhi.

25 Nyakuonera mpfuma ya mambo+ akhali Azimaveti mwana wa Adhiyeli. Yonatani mwana wa Uziya akhaonera nyumba zinakoyerwa pinthu kunja kwa nzinda, m’mizinda, mupisa na n’nyumba za ndzulu. 26 Ezri mwana wa Kelubhi akhaonera ale akhaphata basa m’munda. 27 Simei wa ku Rama akhaonera minda ya mauva. Zabhidhi wa ku Sifimoti akhaonera nyumba zinakoyerwa vinyu ikhacitwa na mauva akhabuluswa m’munda. 28 Bhaale-Anani wa ku Jedheri akhaonera milivera na miti ya nsambvu+ ikhali ku Sefela.+ Yowasi ndiye akhaonera mbuto zinakoyerwa mafuta a azeti. 29 Sitirai wa ku Saroni+ ndiye akhaonera ng’ombe zikhadyeswa ku Saroni. Safati mwana wa Adhilai akhali nyakuonera ng’ombe zikhadya m’magowa. 30 Obhile wa dzindza ya Ijimaeli akhaonera makamelo; Yedheiya wa ku Meroti akhaonera maburu. 31 Yazizi wa dzindza ya Agarite akhaonera mabira. Anewa akhali atsogoleri onsene akhaonera pinthu pya mambo Dhavidhi.

32 Yonatani+ mwana wa m’bale wace Dhavidhi akhali mamuna waluso yakubvesesa pinthu, phungu na mulembi. Jeiyeli mwana wa Akimoni ndiye akhaonera ana a mambo.+ 33 Aitofeli+ akhali phungu* wa mambo; Uzai+ Muareki akhali xamwali wa mambo. 34 Buluka Aitofeli, unango akhali Yeoyadha mwana wa Bhenaya+ na Abhiyatari.+ Yoabhe+ akhali nkulu wa anyankhondo a mambo.