Kronika Waciwiri
31 Pidamala iwo kucita pyenepi, Aizraeli onsene akhali penepo aenda m’mizinda ya ku Yuda, iwo agomola mizati yakulambirwa yakucitwa na miyala,+ mbagwanda miti yakulambirwa,*+ pontho iwo afudza mbuto zaulambiri+ na maguwa a ntsembe+ mu dziko yonsene ya Yuda na ku Bhenjamini kuphatanizambo ku Efraimu na ku Manase+ mpaka kuafudza onsene. Buluka penepo, Aizraeli onsene abwerera m’mizinda yawo, m’bodzi na m’bodzi aenda kunyumba kwace.
2 Natenepa, Ezekiya agumanya anyantsembe m’misoka+ yawo na Alevi m’misoka+ yawo toera iwo aphate mabasa awo,+ toera apereke ntsembe zakupiswa na ntsembe toera kupereka takhuta, toera atumikire, apereke takhuta na kusimba pa misuwo mikulu ya pa thando* ya templo ya Yahova.+ 3 Khundu inango ya pinthu pya mambo, pyaperekwa toera piphatisirwe ninga ntsembe zakupiswa,+ kuphatanizambo ntsembe za macibese na za kumaulo,+ pabodzi na ntsembe zakupiswa za m’Masabudu,+ za ntsiku yakubalwa kwa mwezi+ na za m’maphwando+ mwakubverana na pidalembwa mu Mwambo wa Yahova.
4 Kusiyapo pyenepi, iye apanga mbumba ikakhala mu Yerusalemu kuti ipereke pinthu pyakuthema kuna anyantsembe na Alevi+ toera abvere mwadidi mwambo wa Yahova. 5 Pidalongwa mafala anewa, Aizraeli abweresa pinthu pizinji kakamwe pidatoma iwo kubvuna, vinyu ipswa, mafuta a azeti,+ uci na pinthu pinango pyonsene pya m’minda+ yawo; iwo abweresa pinthu pizinji kakamwe pya khundu yacikhumi ya pyonsene.+ 6 Mbumba ya Izraeli na ya Yuda yakuti ikakhala m’mizinda ya Yuda yabweresambo khundu yacikhumi ya ng’ombe, mabira na khundu yacikhumi ya pinthu pyakucena+ pidaperekwa kuna Yahova Mulungu wawo. Iwo apibweresa mbapigumanya m’mikuku mizinji. 7 Pa mwezi wacitatu,+ iwo atoma kugumanya pyakupereka pyawo, mbamalisa kupigumanya pa mwezi wacinomwe.+ 8 Pidafika Ezekiya na atsogoleri mbaona mikuku ineyi, iwo asimba Yahova, mbaphemba Mulungu toera apase nkhombo mbumba yace ya Izraeli.
9 Ezekiya abvundzisa anyantsembe na Alevi kuti miyoni ineyi yonsene yabuluka kupi, 10 Azariya nyantsembe wankulu wa panyumba ya Zadhoke antawira: “Kubulukira pa ntsiku idatoma iwo kubweresa miyoni panyumba ya Yahova,+ mbumba isadya mbikhuta, cakudya mbacisala, thangwi Yahova asapasa nkhombo mbumba yace. Pontho cakudya ici consene ndi cidasala.”+
11 Penepo, Ezekiya aapanga toera asasanyire mbuto zakukoyera pinthu*+ n’nyumba ya Yahova, natenepa iwo azisasanyira. 12 Mwakukhulupirika iwo akhabweresa miyoni, makhundu acikhumi+ na pinthu pidaceneswa; Mulevi Konaniya asankhulwa toera akhale muyang’aniri wa pinthu pyenepi pyonsene, pontho m’bale wace anacemerwa Simei akhali pa mbuto yaciwiri. 13 Jeiyeli, Azaziya, Naati, Azaeli, Yerimoti, Yozabhadhi, Eliyeli, Ijimakiya, Maati na Bhenaya akhaphedzera Konaniya na m’bale wace akhacemerwa Simei, thangwi akhadapangwa na Mambo Ezekiya; pontho Azariya akhali muyang’aniri wa panyumba ya Mulungu wandimomwene. 14 Kore mwana wa Imina, Mulevi wakuti ndi nyakuonera nsuwo ukulu wakumabulukiro a dzuwa,+ akhayang’anira miyoni ikhaperekwa+ panyumba ya Mulungu wandimomwene na kugawa pinthu pikhaperekwa kuna Yahova+ kuphatanizambo miyoni yakucena kakamwe.+ 15 M’mizinda ya anyantsembe+ iye akhatsogolera Edheni, Miniyamini, Yesuwa, Semaya, Amariya na Sekaniya. Iwo akhali anthu akunyindirika toera kugawa sawasawa cakudya kuna abale awo akuti akhali m’misoka+ yawo, mwakukhonda tsalakana khala munthu ndi wankulu peno wang’ono. 16 Kusiyapo pyenepi, anthu akhagawirambo amuna akhabwera ntsiku zonsene kudzatumikira panyumba ya Yahova, mbacita mabasa a misoka yawo. Anthu adalemberwa m’madzindza mwawo akhaphataniza a pyaka pitatu pyakubalwa kwenda ntsogolo.
17 Kulemberwa kwa anyantsembe kukhacitwa mwakubverana na madzindza awo,+ pikhacitikambo pibodzi pyenepi kuna Alevi a pyaka 20 pyakubalwa kwenda ntsogolo,+ mwakubverana na mabasa a misoka+ yawo. 18 Kulemberwa kwa Alevi kukhaphataniza akazawo, anawo amuna na akazi na anang’ono ene, yakuti ndi mbumba yonsene, thangwi iwo akhapitiriza kuceneseka ku pinthu pyakucena thangwi ya basa yawo yakunyindirika, 19 kuphatanizambo anthu a dzindza ya Aroni, akuti ndi anyantsembe akakhala mu mbuto zakudyesera pifuyo n’khundu mwa mizinda+ yawo. M’mizinda yonsene mukhadasankhulwa amuna toera apase cakudya amuna onsene a m’mabanja a anyantsembe na onsene adalemberwa mu dzindza ya Alevi.
20 Ezekiya acita pyenepi mu dziko yonsene ya Yuda, pontho iye apitiriza kucita pinthu pyadidi na pyakulungama pamaso pa Yahova Mulungu wace, mbakhala wakukhulupirika kuna iye. 21 Pontho pinthu pyonsene pidacita iye toera kutumikira* Mulungu wace, pidacita iye panyumba ya Mulungu wandimomwene+ peno pidacita iye toera kubvera Mwambo na matongero, iye acita pinthu pyenepi na ntima wace onsene, pontho pyonsene pyanfambira mwadidi.