Kronika Waciwiri
1 Salomoni mwana wa Dhavidhi akhapitiriza kukhala wakuwanga mu umambo wace, pontho Yahova Mulungu wace akhali na iye, mbancitisa kukhala wamphambvu kakamwe!+
2 Salomoni acemeresa Aizraeli onsene, atsogoleri a anthu 1.000, atsogoleri a anthu 100, anyakutonga miseru, na atsogoleri onsene a madzindza a Izraeli pabodzi na atsogoleri a mbumba. 3 Buluka penepo, Salomoni na mbumba yonsene aenda ku Jibheyoni+ pa mbuto yakucena ikhali pa nthunda, thangwi ndi kweneko kukhali nsasa wa nsonkhano wa Mulungu wandimomwene, wakuti ndi nsasa udacitwa n’thando na Mose ntumiki wa Yahova. 4 Mbwenye Dhavidhi akhadabweresa Bokosi ya Mulungu wandimomwene buluka ku Kiriyati-Jearimu+ mbaenda nayo ku mbuto idakhunganya iye toera kuiikha; iye akhadaimangira nsasa mu Yerusalemu.+ 5 Pontho guwa ya nkuwa+ idacitwa na Bhezaleli+ mwana wa Uri ndzukulu* wa Huri ikhadaikhwa kutsogolo kwa tabhernakulo ya Yahova; Salomoni na mbumba yonsene akhacita phembero kutsogolo kwa guwa ineyi.* 6 Salomoni apereka ntsembe penepo pamaso pa Yahova; iye apereka pinyama 1.000 ninga ntsembe zakupiswa pa guwa ya nkuwa+ pa nsasa wa nsonkhano.
7 Pa ntsiku ineyi namasiku, Mulungu aonekera kuna Salomoni, mbampanga: “Ndiphembe pinafuna iwe kuti ndikupase.”+ 8 Penepo Salomoni apanga Mulungu: “Imwe mwapangiza ufuni ukulu kuna babanga Dhavidhi+ ntumiki wanu, pontho imwe mwandikhalisa mambo pa mbuto yace.+ 9 Cincino Yahova Mulungu, citani pidapikira imwe+ kuna babanga Dhavidhi, thangwi imwe mwandikhalisa mambo wa mbumba yakunjipa kakamwe ninga pfumbi ya pa dziko yapantsi.+ 10 Na thangwi ineyi, ndipaseni udziwisi na cidziwiso*+ toera nditsogolere mbumba iyi, thangwi mbani anafuna kwanisa kutonga mbumba yanu,+ yakuti ndi ikulu maningi?”
11 Penepo Mulungu apanga Salomoni: “Nakuti ndi pyenepi pinafuna iwe muntima mwako, pontho nee wandiphemba mpfuma, nee pinthu pizinji, nee waphemba kuti ale anakuida aphiwe, pontho nee waphemba toera kukhala na umaso mu pyaka pizinji, mbwenye waphemba udziwisi na cidziwiso toera kutonga mbumba yanga, idakusankhulira ine toera ukhale mambo,+ 12 ine ndinakupasa udziwisi na cidziwiso, mbwenye ndinakupasambo mpfuma, pinthu pizinji na mbiri, pyakuti nee m’bodzi akhala napyo nduli mwako, pontho nee m’bodzi anadzakhala napyo kutsogolo kwako.”+
13 Natenepa, Salomoni abwerera buluka ku mbuto yakucena ikhali pa nthunda ku Jibheyoni+ kutsogolo kwa nsasa wa nsonkhano, mbaenda ku Yerusalemu; iye atonga Izraeli. 14 Salomoni apitiriza kugumanya ngolo za nkhondo na makavalo;* iye akhali na ngolo za nkhondo 1.400 na makavalo*+ 12.000, iye akhapikoya m’mizinda ya ngolo+ za nkhondo na ku Yerusalemu+ cifupi na mambo. 15 Mambo acitisa kuti parata na ouro ikhale yakunjipa kakamwe ninga miyala+ mu Yerusalemu; pontho acitisa kuti matabwa a sedhro anjipe kakamwe ninga miti ya misambvu* ya ku Sefela.+ 16 Makavalo a Salomoni akhagulwa ku Ejitu.+ Pontho anyamalonda a mambo akhagula mikumbi ya makavalo na ntengo udakhazikiswa.+ 17 Ngolo ibodzi na ibodzi ya ku Ejitu ikhagulwa na masiklo 600 a parata, pontho kavalo ibodzi ikhagulwa na masiklo* 150; buluka penepo, iwo akhaenda kaagulisira amambo onsene a dzindza ya Eti na amambo a ku Sirya.