Kronika Waciwiri
2 Salomoni apanga anthu kuti amange nyumba toera kupasa mbiri dzina ya Yahova,+ pontho amange nyumba ya mambo+ Salomoni. 2 Salomoni asankhula anyakuthukula mitolo* 70.000, anyakuswa miyala m’mapiri+ 80.000, pontho asankhula amuna 3.600 toera kuonera anthu akhaphata basa.+ 3 Kusiyapo pyenepi, Salomoni atumiza mphangwa izi kuna Iramu+ mambo wa ku Tiro: “Ndicitireni sawasawa na pidacitira imwe pai wanga Dhavidhi pidampasa imwe matabwa a sedhro toera amange nyumba ikhafuna iye kukhala.+ 4 Cincino ine ndisafuna kumanga nyumba toera kupasa mbiri dzina ya Yahova Mulungu wanga na kuicenesa kuti ikhale yace, toera kupisiramo insenso yakununkhira+ pamaso pace, pontho toera kupereka mikate+ ya ntsembe na ntsembe zakupiswa namacibese, namaulo,+ m’Masabudu,+ pa ntsiku yakubalwa kwa mwezi+ na m’midzidzi ya maphwando+ a Yahova Mulungu wathu. Unoyu ndi ntemo wakwenda na kwenda kuna Aizraeli. 5 Nyumba inafuna ine kumanga inadzakhala ikulu, thangwi Mulungu wathu ndi wankulu kupiringana alungu anango onsene. 6 Mbani anakwanisa kum’mangira nyumba? Thangwi nee kudzulu, kudzulu kakamwe, nkhabe kwana toera iye akhaleko.+ Mphapo ndine ani ine toera ndim’mangire nyumba? Basi ene ndinam’mangira nyumba toera kuperekamo ntsembe zakupiswa. 7 Natenepa, nditumizireni mesiri waluso wakuti asakwanisa kusasanya pinthu pya ouro, pya parata, pya nkuwa,+ pya utale, nguwo zakucitwa na maweya a mabira akukhwazwa pinthu pyakufuirira, usalu wakufuirira na usalu wa bhurumu, pontho akhale mesiri wakuti asadziwa kulemba pinthu pakusema.* Iye anadzaphata basa ku Yuda na ku Yerusalemu pabodzi na amesiri anga aluso adasankhulwa+ na babanga Dhavidhi. 8 Kusiyapo pyenepi, nditumizireni matabwa a miti yakusiyana-siyana ya ku Libhano, ninga sedhro, junipero+ na nsantha,+ thangwi ndisadziwa mwadidi kuti atumiki anu ali na maluso adidi a kugwanda miti ya ku Libhano.+ Atumiki anga anadzaphata basa pabodzi na atumiki+ anu, 9 toera andikhunganyire matabwa mazinji kakamwe thangwi nyumba inafuna ine kumanga inadzakhala ikulu kakamwe. 10 Ndinadzapereka cakudya kuna atumiki+ anu, anyakuceka matabwa: Makoro* 20.000 a tirigu, makoro 20.000 a sevadha, mabhato* 20.000 a vinyu na mabhato 20.000 a mafuta a azeti.”
11 Natenepa, Iramu mambo wa ku Tiro alemba mphangwa izi mbazitumiza kuna Salomoni: “Nakuti Yahova asafuna mbumba yace, iye akusankhulani toera mukhale mambo wawo.” 12 Iramu athimiza: “Mbasimbwe Yahova Mulungu wa Aizraeli, adacita kudzulu na dziko yapantsi, thangwi apereka mwana waudziwisi+ kuna Mambo Dhavidhi, wakuti ali na ndzeru na luso yakubvesesa pinthu,+ iye anadzamanga nyumba ya Yahova na nyumba yace ninga mambo. 13 Ndikutumiza Iramu-Abhi+ mesiri waluso na waudziwisi, 14 mai wace ndi wa dzindza ya Dhani, babace ndi wa ku Tiro. Iye asakwanisa kusasanya pinthu pya ouro, pya parata, pya nkuwa, pya utale, pya miyala, pya matabwa, nguwo zakucitwa na maweya a mabira akukhwazwa pinthu pyakufuirira, usalu wa bhurumu, nguwo zadidi kakamwe na usalu wakufuirira.+ Iye asadziwa kulemba pinthu pya ntundu onsene pakusema na kuphata mabasa akusiyana-siyana anapaswa iye.+ Iye anadzaphata basa na amesiri anu aluso pabodzi na amesiri aluso a mbuyanga Dhavidhi, pai wanu. 15 Natenepa mbuyanga, mwakubverana na pidalonga imwe, tumizani tirigu, sevadha, mafuta a azeti na vinyu kuna atumiki+ anu. 16 Ife tinadzagwanda miti mizinji ya ku Libhano+ ninga munafunira imwe, tinaimanga mbatikutumizirani na m’bara mpaka ku Jope,+ buluka penepo, imwe munaikwata mbamuenda nayo ku Yerusalemu.”+
17 Penepo Salomoni alengesa amuna onsene a madziko anango akhali mu Izraeli,+ ninga pidacita Dhavidhi pai wace.+ Amuna anewa akhali 153.600. 18 Amuna 70.000 aapasa basa yakuthukula mitolo, amuna 80.000 aapasa basa yakuswa miyala+ m’mapiri, pontho amuna 3.600 aapasa basa yakuonera anthu akhaphata basa.+