Kronika Waciwiri
21 Pakumalisa, Yosafate afa ninga pidacita ambuyace, mbaikhwa munthumbi pabodzi na iwo mu Nzinda wa Dhavidhi; mwanace akhacemerwa Yeoramu adzakhala mambo pa mbuto yace.+ 2 Abale ace akuti akhali ana a Yosafate akhali Azariya, Jeiyeli, Zakariya, Azariya, Mikaeli na Sefatiya; anewa akhali ana a Yosafate Mambo wa Izraeli. 3 Babawo aapasa miyoni mizinji ya parata, ya ouro na pinthu pya ntengo ukulu pabodzi na mizinda yakutsidzikizwa na mipanda ku Yuda;+ mbwenye iye apereka umambo kuna Yeoramu,+ thangwi iye akhali mwanace wakutoma.
4 Pidatoma Yeoramu kutonga mu umambo wa pai wace, toera kutsidzikiza utongi wace, iye apha abale ace onsene+ na supada kuphatanizambo atsogoleri a Izraeli. 5 Yeoramu akhali na pyaka 32 pyakubalwa mu ndzidzi udakhazikiswa iye ninga mambo, pontho iye atonga pyaka pisere mu Yerusalemu.+ 6 Iye afamba munjira za amambo a Izraeli,+ ninga pidacita anthu a panyumba ya Akabu, thangwi iye akhadasemba mwana wa Akabu;+ pontho iye apitiriza kucita pinthu pyakuipa pamaso pa Yahova. 7 Mbwenye Yahova nee akhafuna kufudza nyumba ya Dhavidhi thangwi ya cibverano cikhadacita iye na Dhavidhi,+ thangwi iye akhadampikira kuti ndzidzi onsene mbadaoneka munthu wa dzindza yace toera kutonga.*+
8 Mu ntsiku za Yeoramu, Aedhomi asandukira Yuda+ mbakhazikisa mambo wawo.+ 9 Natenepa Yeoramu na atsogoleri a anyankhondo ace aenda kweneko na ngolo zawo zonsene za nkhondo, iye alamuka namasiku, atoma kumenya nkhondo na Aedhomi akuti akhadanzungulira, mbaakunda, kuphatanizambo atsogoleri a ngolo za nkhondo. 10 Aedhomi asapitiriza kusandukira Ayuda mpaka lero. Pa ndzidzi unoyu, Libhina+ asandukirambo Ayuda, thangwi iye akhadasiya Yahova Mulungu wa ambuyace.+ 11 Yeoramu amangambo mbuto zaulambiri+ m’mapiri a ku Yuda toera kupeusa anthu a ku Yerusalemu kuti acite ulukwali wauzimu,* natenepa iye apeusa anthu a ku Yuda.
12 Pakumalisa, iye atambira mphangwa zakulembwa zidabuluka kuna mprofeta Eliya,+ zikhalonga tenepa: “Ipi ndi pidalonga Yahova Mulungu wa mbuyako Dhavidhi: ‘Iwe nee wafamba munjira za pai wako Yosafate+ nee munjira za Mambo Aza+ wa ku Yuda. 13 Mbwenye iwe wafamba munjira za amambo a Izraeli+ mbucitisa anthu a ku Yuda na a ku Yerusalemu kucita ulukwali+ wauzimu ninga ulukwali unacitwa panyumba ya Akabu,+ pontho wapha abale ako,+ anthu a panyumba ya pai wako, akuti akhali adidi kakamwe kupiringana iwe. 14 Na thangwi ineyi, Yahova anadzatcunyusa mbumba yako, anako, akazako, mbatapata pinthu pyako pyonsene. 15 Iwe unadzathabuka na mautenda mazinji, kuphatanizambo utenda wa mautumbo wakuti unathimizirika ntsiku zonsene mpaka mautumbo ako kubuluka kunja.’”
16 Penepo Yahova acitisa+ kuti Afilisti+ na anthu a ku Arabhya+ akakhala cifupi na anthu a ku Etiopya atcunyuse Yeoramu. 17 Natenepa, iwo amenya nkhondo mu dziko ya Yuda, apita mbakwata pinthu pyonsene pidagumana iwo n’nyumba ya mambo,+ kuphatanizambo anace na akazace; mwanace m’bodzi basi adasala ndi Yeowazi,*+ wakuti akhali mwanace wang’ono. 18 Pidamala kucitika pinthu pyenepi, Yahova atcunyusa Yeoramu na utenda wakukhonda wanga wa mautumbo.+ 19 Buluka penepo, pidapita pyaka piwiri, mautumbo ace abuluka kunja thangwi ya utenda wace, iye afa mu ndzidzi ukhathabuka iye kakamwe na utenda wace. Pontho mbumba yace nee yagasa moto toera kumulemedza ninga pidacitira iwo ambuyawo.+ 20 Yeoramu akhali na pyaka 32 pyakubalwa pidatoma iye kutonga, iye atonga pyaka pisere mu Yerusalemu. Pidafa iye, nkhabe munthu adatsukwala. Penepo iwo amuikha munthumbi mu Nzinda wa Dhavidhi,+ mbwenye nee amuikha munthumbi za amambo.+