Ezekiyeli
25 Yahova alonga pontho na ine, mbandipanga: 2 “Iwe mwana wa munthu, yangʼana kukhundu ya dzindza ya Amoni,+ pontho longa profesiya thangwi ya pinthu pinafuna kuacitikira.+ 3 Panga dzindza ya Amoni kuti: ‘Bveserani mafala a Yahova, Mbuya Wankulu Kakamwe. Ipi ndi pidalonga Yahova, Mbuya Wankulu Kakamwe: “Nakuti pidapswipiswa mbuto yanga yakucena imwe mwaseka mbamulonga kuti: ‘Aha, pyakoma!” Pontho mwalonga pibodzi pyene pidafudzwa dziko ya Izraeli na pidaendeswa mbumba ya Yuda ku ubitcu, 4 ine ndinadzakuperekani kuna anthu a Kumabulukiro a Dzuwa. Iwo anadzamanga misasa yawo pakati panu, pontho anadzamanga makumbi awo penepo. Iwo anadzadya misapo yanu, mbamwa nkaka wanu. 5 Ine ndinadzacinja nzinda wa Rabha,+ mbudzakhala mbuto yakudyesera makamelo; dziko ya Aamoni inadzakhala mbuto yakupumisa mabira; natenepa, imwe munadzadziwa kuti ine ndine Yahova.”’”
6 “Thangwi ipi ndi pidalonga Yahova, Mbuya Wankulu Kakamwe: ‘Nakuti imwe mwaimba manja,+ mwadhima pantsi na miyendo yanu, pontho mwakomerwa thangwi ya nyatwa idagwera dziko ya Izraeli, mbamupangiza kupwaza kukulu,+ 7 ine ndinadzafuthula djanja yanga kuna imwe, toera kukuperekani kuna anthu a madzindza anango ninga pinthu pyakutapatwa. Ine ndinadzakumalisani pakati pa mbumba zinango, mbandikufudzani pakati pa madziko anango.+ Ine ndinadzakumalisani; natenepa, imwe munadzadziwa kuti ine ndine Yahova.’
8 “Ipi ndi pidalonga Yahova, Mbuya Wankulu Kakamwe: ‘Nakuti Moabhe+ na Seiri+ alonga kuti: “Onani, mbumba ya Yuda ndi sawasawa na mbumba zinango zonsene,” 9 mizinda ya mʼmadire a Moabhe ndinadzaisiya yakusowa citsidzikizo, yakuti ndi mizinda yakubalika ya dziko ineyi, ninga Bheti-Jesimoti, Bhaale-Meoni mpaka ku Kiriyataimu.+ 10 Ine ndinadzaipereka pabodzi na dzindza ya Amoni kuna anthu a Kumabulukiro a Dzuwa,+ toera dzindza ya Amoni ikhonde kukumbukirwa pontho pakati pa madzindza anango.+ 11 Ine ndinadzatcunyusa anthu a ku Moabhe;+ natenepa, iwo anadzadziwa kuti ine ndine Yahova.’
12 “Ipi ndi pidalonga Yahova, Mbuya Wankulu Kakamwe: ‘Edhomi atcunyusa dzindza ya Yuda, mbakhala na mulando ukulu thangwi ya kuatcunyusa kudacita iwo;+ 13 na thangwi ineyi, ipi ndi pidalonga Yahova, Mbuya Wankulu Kakamwe: ‘Ine ndinadzafuthulambo djanja yanga toera kutcunyusa Edhomi, pontho ndinadzapha pakati pace, anthu na pifuyo pyene, mbandicitisa dziko ineyi kukhala madembe.+ Iwo anadzaphiwa na supada+ kutomera ku Temani mpaka ku Dhedhani. 14 ‘Ine ndinadzaphatisira mbumba yanga ya Izraeli+ toera kutcunyusa Edhomi. Iwo anadzapangiza kuipirwa kwanga na ukali wanga kuna Edhomi, toera iwo aone kuti ine ndiri kuatcunyusa;’+ alonga Yahova, Mbuya Wankulu Kakamwe.”’
15 “Ipi ndi pidalonga Yahova, Mbuya Wankulu Kakamwe: ‘Thangwi yakuipa kwawo mitima, Afilisti asaka kubwezera pyakuipa Aizraeli na kuafudza, iwo akhadadzala na pifuno pyakuipa.+ 16 Natenepa, ipi ndi pidalonga Yahova, Mbuya Wankulu Kakamwe: “Ine ndinadzafuthula djanja yanga toera kutcunyusa Afilisti,+ ndinadzamalisa dzindza ya Akereti;+ pontho anthu anakhala nʼkhundu mwa bara, ndinadzafudza ale anafuna kusalikira.+ 17 Ine ndinadzaatcunyusa kakamwe, mbandiatsuka nsolo mwakuipirwa; natenepa, ndingadzaatcunyusa, iwo anadzadziwa kuti ine ndine Yahova.”’”