Ezekiyeli
3 Penepo iye andipanga: “Iwe mwana wa munthu, usafunika kudya ciri patsogolo pako. Dya tsamba iyi, buluka penepo ndoko, panga mbumba ya Izraeli.”+
2 Natenepa, ine ndafungula mulomo wanga, iye mbandidyesa tsamba ineyi. 3 Iye athimiza: “Iwe mwana wa munthu, dya tsamba inakupasa ine, mbudzadza mimba yako.” Penepo ine ndatoma kuidya, nkanwa mwanga iyo ikhatapira ninga uci.+
4 Iye andipanga: “Iwe mwana wa munthu, pita pakati pa mbumba ya Izraeli mbuapanga mafala anga. 5 Thangwi iwe nee uli kutumwa toera kuenda kuna mbumba ya cilongero cakukhonda bveka peno cilongero cakukhonda dziwika, mbwenye uli kuenda kuna mbumba ya Izraeli. 6 Nee uli kutumwa toera kuenda kuna mbumba za pilongero pyakukhonda bveka peno za pilongero pyakukhonda dziwika, zakuti mafala awo nee unakwanisa kuabvesesa. Thangwi mbudatumwa kuna mbumba zenezi, iwo mbadakubvesera.+ 7 Mbwenye mbumba ya Izraeli nee inatawira kukubvesera, thangwi iwo nee asafuna kundibvesera.+ Mbumba yonsene ya Izraeli ndi anthu akuuma nsolo na akuuma ntima.+ 8 Bvesera! Ine ndinadzaumisa ntima wako mbukhala wakuuma ninga mitima yawo, pontho ndinadzaumisa nkhope yako mbikhala yakuuma ninga nkhope zawo.+ 9 Ine ndacitisa nkhope yako kukhala ninga dhiamanti, mbikhala yakuuma kakamwe kupiringana mwala.+ Leka kuagopa, pontho leka kugopa maonekero a nkhope zawo,+ thangwi iwo ndi mbumba yakukhonda bvera.”
10 Iye apitiriza kundipanga: “Iwe mwana wa munthu, bvesera mafala anga onsene anakupanga ine, pontho akoye muntima mwako. 11 Pita pakati pa mbumba yako yakuti iri mu ubitcu,+ mwakukhonda tsalakana khala anatawira kukubvesera peno nkhabe,+ apange kuti: ‘Ipi ndi pidalonga Yahova, Mbuya Wankulu Kakamwe.’”
12 Buluka penepo, nzimu wa Mulungu wandikwata,+ pontho ine ndabva nduli mwanga fala yamphambvu kakamwe idalonga kuti: “Mbisimbwe mbiri ya Yahova kubulukira pa mbuto yace.” 13 Ine ndabvambo kulira kwa maphapido a aanju akuti akhagwentsana inango na indzace,+ kutitimira kwa maroda akuti akhali nʼkhundu mwawo,+ na kudhima kukulu. 14 Nzimu wa Mulungu wandilamusa mbundibulusa penepo, ine ndaenda mwakutsukwala, pontho ndikhali wakuipirwa muntima. Mbwenye mphambvu ya nzimu wa Yahova yatoma kuphata basa mwakuwanga muna ine. 15 Natenepa, ine ndaenda kuna mbumba idaendeswa ku ubitcu yakuti ikakhala ku Tele-Abhibhe, cifupi na nkulo wa Kebhari,+ mbandikhala ku mbuto ikakhala iwo. Ndakhala kweneko mu ntsiku zinomwe,+ ine ndikhali wakudzumatirwa pakati pawo.
16 Pidapita ntsiku zinomwe zenezi, ine ndatambira mafala awa a Yahova:
17 “Iwe mwana wa munthu, ine ndakusankhula toera ukhale nyakuonera wa mbumba ya Izraeli;+ iwe ungabva fala inabuluka pamulomo panga, usafunika kuadziwisa cenjezo yanga.+ 18 Ine ndingapanga munthu wakuipa kuti: ‘Mwandimomwene iwe unadzafa,’ iwe ungakhonda kundziwisa, mbukhonda kulonga na munthu unoyu wakuipa toera uncenjeze kuti asiye pinthu pyakuipa pinacita iye toera apitirize na umaso,+ iye anadzafa thangwi ya madawo ace, thangwi yakukhala munthu wakuipa,+ mbwenye ine ndinadzakupasa mulando thangwi ya ciropa cace.*+ 19 Mbwenye iwe ungacenjeza munthu unoyu wakuipa, iye mbakhonda kusiya* pinthu pyakuipa pinacita iye na makhaliro ace akuipa, iye anadzafa thangwi ya madawo ace, mbwenye iwe mwandimomwene unadzapulumusa umaso wako.+ 20 Munthu wakulungama angasiya kucita pinthu pyadidi, mbacita pinthu pyakuipa, ine ndinadzaikha mwala wakugwegwedusa patsogolo pace, pontho iye anadzafa. Iwe ungakhonda kuncenjeza, iye anadzafa thangwi ya madawo ace,+ pinthu pyakulungama pidacita iye nee pinadzakumbukirwa, mbwenye ine ndinadzakupasa mulando thangwi ya ciropa cace.*+ 21 Mbwenye iwe ungacenjeza munthu wakulungama toera akhonde kudawa, iye mbakhonda kudawa, mwandimomwene iye anadzapitiriza na umaso thangwi iye acenjezwa,+ pontho iwe unadzapulumusa umaso wako.”
22 Mphambvu ya nzimu wa Yahova yabwera pana ine pa mbuto ineyi, pontho iye andipanga: “Lamuka, ndoko mpaka ku gowa, ine ndinadzalonga na iwe kweneko.” 23 Natenepa ine ndalamuka mbandienda ku gowa, kweneko+ ine ndaona mbiri ya Yahova ninga mbiri yace idaona ine pikhali ine cifupi na nkulo wa Kebhari;+ penepo ine ndakotamisa nkhope yanga mpaka pantsi. 24 Buluka penepo, nzimu wa Mulungu wapita muna ine mbundilimirisa dzololo,+ pontho iye andipanga:
“Ndoko kafungirike nʼnyumba mwako. 25 Iwe mwana wa munthu, iwo anadzakumanga na nkhambala toera ukhonde kwanisa kufamba mbuenda kuna iwo. 26 Ine ndinadzacitisa kuti lirimi yako iphatirire padzulu nkanwa mwako, pontho unadzakhala bewewe mbucimwana kuasandika, thangwi iwo ndi mbumba yakukhonda bvera. 27 Mbwenye ine ndingalonga na iwe, ndinadzafungula mulomo wako, pontho iwe unadzaapanga kuti:+ ‘Ipi ndi pidalonga Yahova, Mbuya Wankulu Kakamwe.’ Ule anafuna kubva mbabve,+ ule wakuti nkhabe funa kubva, mbaleke kubva, thangwi iwo ndi mbumba yakukhonda bvera.+