Ezekiyeli
29 Pa ntsiku 12 ya mwezi wacikhumi, wa caka cacikhumi, ine ndatambira mafala awa a Yahova: 2 “Iwe mwana wa munthu, yangʼana kuna Farau mambo wa ku Ejitu, mbulonga profesiya thangwi ya iye, pontho thangwi ya dziko yonsene ya Ejitu.+ 3 Longa mafala awa: ‘Ipi ndi pidalonga Yahova, Mbuya Wankulu Kakamwe:
“Ine ndine nyamalwa wako, iwe Farau mambo wa ku Ejitu,+
Iwe ndiwe cikala cikulu ca mʼbara cidagona pakati pa madzi a mu Nkulo wa Nilo,*+
Iwe usalonga: ‘Nkulo wa Nilo ndi wanga.
Ine ndaucita toera ukhale wanga.’+
4 Mbwenye ine ndinadzamanga ntsaya zako na cimedzo, mbandicitisa kuti ntsomba* za mu Nkulo wako wa Nilo ziphatirire mʼmakoko ako.
Ine ndinadzakubulusa mu Nkulo wako wa Nilo pabodzi na ntsomba zonsene za mu Nkulo wa Nilo zinafuna kuphatirira mʼmakoko ako.
5 Iwe pabodzi na ntsomba zonsene za mu Nkulo wako wa Nilo, ndinadzakusiyani nʼthando.
Iwe unadzagwa pantsi pakati pa tsanga, pontho iwe nee unadzakwatwa toera kuikhwa munthumbi.+
Ndinadzakupereka ninga cakudya kuna pinyama pya ntsanga na kuna mbalame.+
6 Natenepa, anthu onsene a ku Ejitu anadzadziwa kuti ine ndine Yahova,
Thangwi ninga ntsigiriro, Aejitu akhali ninga ntete wakuuma kuna mbumba ya Izraeli.+
7 Pidaphata iwo manja ako, iwe wakhumuka,
Pontho phewa yawo yagudumuka.
Pikakuphata iwo toera kutsigiririka, iwe wanyedzeka,
Pontho iwe wacitisa kuti miyendo yawo igoboke.”+
8 “‘Natenepa, ipi ndi pidalonga Yahova, Mbuya Wankulu Kakamwe: “Ine ndinabweresa supada kuna iwe,+ pontho ndinadzapha pakati pako anthu na pinyama pyene. 9 Dziko ya Ejitu inadzafudzwa mbikhala yakusowa anthu;+ penepo iwo anadzadziwa kuti ine ndine Yahova, thangwi iwe walonga: ‘Nkulo wa Nilo ndi wanga, ndine adaucita.’+ 10 Na thangwi ineyi, ine ndine nyamalwa wako, pontho ndine nyamalwa wa Nkulo wako wa Nilo. Ine ndinadzacitisa kuti dziko ya Ejitu ifudzwe mbikhala yakuuma,+ inadzakhala thando yakusowa anthu, kutomera ku Migidholi+ mpaka ku Siyeni,+ mpaka kufika kumadire a dziko ya Etiopya. 11 Pinyama na anthu, nee pinadzapita na mwenemu na miyendo,+ pontho nee munadzakhala na anthu mu pyaka 40. 12 Ine ndinadzacitisa dziko ya Ejitu kukhala yakusowa anthu kupiringana madziko anango, pontho mu pyaka 40+ mizinda yace inadzakhala yakusowa anthu kupiringana mizinda inango; ine ndinadzamwaza Aejitu pakati pa anthu a madzindza anango, mbandiabalalisa mʼmadziko anango.”+
13 “‘Thangwi ipi ndi pidalonga Yahova, Mbuya Wankulu Kakamwe: “Pyaka 40 pingamala, ine ndinadzagumanya Aejitu buluka pakati pa mbumba zidabalaliswa iwo;+ 14 Aejitu adaendeswa ku ubitcu, ine ndinadzaabweza ku Patrosi,+ ku dziko idabuluka iwo, kweneko iwo anadzakhala umambo wakusowa mphambvu. 15 Dziko ya Ejitu inadzakhala yakusowa mphambvu kuna maumambo anango, pontho iyo nee inadzatongabve madzindza anango,+ ine ndinadzaacepesa kakamwe, pontho iwo nee anadzakwanisabve kukunda madzindza anango.+ 16 Dziko ya Ejitu nee inadzanyindirwabve na mbumba ya Izraeli,+ basi ene inadzaakumbusa madawo awo thangwi yakuphemba ciphedzo kuna iwo. Penepo iwo anadzadziwa kuti ine ndine Yahova, Mbuya Wankulu Kakamwe.”’”
17 Pa ntsiku yakutoma ya mwezi wakutoma wa caka 27, ine ndatambira mafala awa a Yahova: 18 “Iwe mwana wa munthu, Nabhukodhonozore+ mambo wa ku Bhabhilonya aphatisa basa yakuwanga anyankhondo ace pakumenyana na Tiro.+ Tsisi ya anyankhondo onsene yamala kwedzeka, pontho mapewa awo amala swaruka. Mbwenye iye pabodzi na anyankhondo ace, nee atambiriswa cinthu thangwi ya basa idaphata iwo pakumenyana na Tiro.
19 “Na thangwi ineyi, ipi ndi pidalonga Yahova, Mbuya Wankulu Kakamwe: ‘Ine ndinapereka dziko ya Ejitu kuna Nabhukodhonozore mambo wa ku Bhabhilonya,+ iye anadzakwata mpfuma mwenemu, pontho anadzatapata pinthu pizinji; iye anadzaphatisira pinthu pyenepi toera kulipa napyo anyankhondo ace.’
20 “‘Ine ndinampasa dziko ya Ejitu toera kumulipa thangwi ya nkhondo idamenya iye na Tiro, thangwi basa ineyi iwo aiphatira ine,’+ alonga Yahova, Mbuya Wankulu Kakamwe.
21 “Pa ntsiku ineyi, ine ndinadzacitisa kuti paoneke munthu wamphambvu pakati pa mbumba ya Izraeli,*+ pontho ine ndinadzatawirisa kuti iwe ulonge pakati pawo; penepo iwo anadzadziwa kuti ine ndine Yahova.”