Ezekiyeli
4 “Iwe mwana wa munthu, kwata tijolo uiikhe patsogolo pako. Pontho lemba penepo nzinda wa Yerusalemu. 2 Zungulira nzinda unoyu,+ manga mpanda mbuzungulira nzinda+ toera kufungira anthu. Sasanya nthunda toera kumenyerapo nkhondo,+ manga misasa ya anyankhondo, zungulira nzinda onsene na pida pyakugomola napyo mpanda.+ 3 Kwata combo cakuotcera naco ca utale, mbuciikha ninga mpanda pakati pa iwe na nzinda unoyu. Buluka penepo, zungunusa nkhope yako mbuyangʼana nzinda unoyu, sangizira pinafuna kudzacita anyamalwa angadzafungira nzinda unoyu. Pyenepi pinadzakhala cidzindikiro kuna mbumba ya Izraeli.+
4 “Buluka penepo, gonera kukhundu yako yabzwere, mbuikha madawo a mbumba ya Izraeli padzulu pako.+ Unadzathukula mulando wawo* mu ntsiku zonsene zinafuna iwe kugonera kukhundu yako yabzwere. 5 Ine ndinakuphemba toera ucite pyenepi mu ntsiku 390, mwakubverana na pyaka pya mulando wawo.*+ Pontho iwe unadzathukula mulando wa mbumba ya Izraeli. 6 Ungamalisa ntsiku zenezi,
“Iwe unadzagonerambo kukhundu yako yamadyo, mbuthukula madawo a mbumba ya Yuda+ mu ntsiku 40. Ntsiku ibodzi isaimirira caka cibodzi, ntsiku ibodzi isaimirira caka cibodzi, unoyu ndi ndzidzi udakuphemba ine. 7 Unadzazungunusa nkhope yako mbuyangʼana Yerusalemu+ adazungulirwa, unadzafunya nkono wa nguwo yako toera nkono wako ukhale panja, pontho usafunika kulonga profesiya yakutcunyuswa kwa nzinda unoyu.
8 “Bvesera! Ine ndinadzakumanga na nkhambala toera ukhonde kwanisa kuzungunuka mbugonera kukhundu yako inango, mpaka zingamala ntsiku zako zinafuna iwe kusangizira kuzungulirwa kwa nzinda unoyu.
9 “Usafunika kukwata tirigu, sevadha, nyemba,* lentilya, aveya na ervilya, pibvungaze mu combo cibodzi cene, mbucita nkate wako. Unadzadya nkate unoyu+ mu ntsiku zonsene zinafuna iwe kugonera kukhundu yako yabzwere mu ntsiku 390. 10 Unadzapima masiklo* 20 a cakudya toera cikhale cakudya cako pa ntsiku. Iwe unadzadya cakudya ceneci mʼmidzidzi idakhazikiswa.
11 “Madzi anafuna iwe kumwa usafunika kuapima, makopo mawiri* pa ntsiku. Iwe usafunika kuamwa mʼmidzidzi idakhazikiswa.
12 “Iwe unadzadya nkate wako ninga nkate wa sevadha; iwe usafunika kuuphika pamaso pawo, mbuphatisira matubzwi akuuma a anthu ninga nkhuni zakuphika nazo.” 13 Yahova athimiza: “Munjira ibodzi ene, Aizraeli anadzadya nkate wakukhonda cena pakati pa mbumba zinafuna kuabalalisa ine.”+
14 Penepo ine ndalonga: “Pyenepi tayu Yahova, Mbuya Wankulu Kakamwe! Kutomera uwana wanga mpaka lero, ine ndidzati kupswipisika thangwi yakudya nyama ya cinyama cidagumaniwa cakufa peno cidalumwa na cikala,+ pontho pamulomo panga+ padzati kupita nyama yakukhonda cena.”
15 Penepo iye andipanga: “Nkhabe pinthu, ndinakutawirisa kuti ukhonde kuphatisira matubzwi a anthu, mbwenye uphatisire matubzwi a ngʼombe toera kuphika nawo nkate wako.” 16 Buluka penepo iye andipanga: “Iwe mwana wa munthu, ine ndinadzacitisa kuti cakudya cisoweke mu Yerusalemu,+ thangwi ya kudzudzumika na kusoweka kwa pyakudya, iwo anadzawandzira mikate yawo;+ thangwi ya kudzudzumika na kusoweka kwa madzi, iwo anadzawandzira madzi awo.+ 17 Pyenepi pinadzacitika toera iwo angasowa cakudya na madzi, ayangʼanisane unango na ndzace mwakutsukwala, mbathabuka* thangwi ya madawo awo.