Ezekiyeli

43 Buluka penepo, iye andiendesa pansuwo ukulu wa kukhundu yakumabulukiro a dzuwa.+ 2 Penepo ine ndaona mbiri ya Mulungu wa Izraeli ikhabwera buluka kumabulukiro a dzuwa,+ pontho fala yace ikhabveka ninga kutitima kwa madzi amphambvu;+ natenepa, dziko yapantsi yamwanikirwa na mbiri yace.+ 3 Pinthu pidaona ine, pikhali ninga masomphenya adaona ine mu ndzidzi udabwera ine* toera kufudza nzinda,* ninga pidaona ine cifupi na nkulo wa Kebhari;+ penepo ine ndagodama, mbandikotamisa nkhope yanga mpaka pantsi.

4 Buluka penepo, mbiri ya Yahova yapita mu templo na pansuwo ukulu udayangʼanira kumabulukiro a dzuwa.+ 5 Nzimu wakucena* wandikwata, mbundiendesa pa thando yankati, pontho ine ndaona kuti templo ikhadadzala na mbiri ya Yahova.+ 6 Penepo ine ndabva munthu akhali mu templo mbakalonga na ine, munthu unoyu abwera, mbalimira pakhundu panga.+ 7 Iye andipanga:

“Iwe mwana wa munthu, iyi ndi mbuto ya mpando wanga waumambo,+ pontho ndi mbuto inaikhira ine miyendo yanga,+ mbuto inafuna ine kukhala na mbumba ya Izraeli kwenda na kwenda.+ Mbumba ya Izraeli nee inadzapswipisa pontho dzina yanga yakucena,+ nee iwo nee amambo awo, thangwi ya uputa wawo wauzimu, pontho na manungo akufa a amambo awo. 8 Iwo aikha mbuto zawo za nsuwo dhuzi na mbuto yanga ya nsuwo, pontho iwo aikha maaro awo a nsuwo pakhundu pa maaro anga a nsuwo, mbatipambulana na pfufu ibodzi basi pakati pa iwo na ine.+ Natenepa, iwo apswipisa dzina yanga yakucena thangwi ya pinthu pyakunyanyasa pidacita iwo; na thangwi ineyi, ine ndaafudza onsene thangwi ya ukali wanga.+ 9 Mphapo cincino, mbasiye uputa wawo wauzimu,* pontho mbaikhe kutali na ine manungo akufa a amambo awo; natenepa, ine ndinadzakhala pakati pawo kwenda na kwenda.+

10 “Iwe mwana wa munthu, fokotozera mbumba ya Izraeli+ kuti templo yakhala tani, toera iwo apasike manyadzo thangwi ya madawo adacita iwo.+ Pontho iwo asafunika kupfundza* midida ya templo, toera adziwe kuti yakhala tani. 11 Iwo angapasika manyadzo thangwi ya pyonsene pidacita iwo, apangize midida ya templo, kuti makhundu ace akhala tani, misuwo yakubuluka nayo na yakupita nayo.+ Apangize midida yace yonsene na mitemo yace, midida yace na miyambo yace, lemba pinthu pyenepi pyonsene pamaso pawo, toera aone midida yace, mbabvera matongero ace.+ 12 Uyu ndi mwambo wa templo. Mbuto yonsene yakuti iri nʼkhundu mwa ntsonga ya phiri, ndi mbuto yakucena kakamwe.+ Inde, unoyu ndi mwambo wa templo.

13 “Iyi ndi midida ya guwa, idapimwa na makhono,+ (khono ibodzi na ibodzi ikhadathimizirwa ugugumi wa djanja).* Cengo ca guwa ya ntsembe buluka pantsi mpaka padzulu, cikhali ca khono ibodzi, ugugumi wa nʼkhundu mwace ukhali wa khono ibodzi. Nʼkhundu mwace ikhadazungulirwa na cinthu ca nyakatanga* mʼbodzi wa ugugumi. Anewa ndi makhaliro a pantsi pa guwa. 14 Kutomera pantsi mpaka padzulu pa mbuto ingʼono ndi makhono mawiri, ugugumi wace ndi wa khono ibodzi. Buluka pa mbuto ineyi ingʼono mpaka pa mbuto ikulu yapadzulu ndi makhono manai, ugugumi wace ndi wa khono ibodzi. 15 Cakuikhira moto pa guwa ciri na makhono manai a cengo, pontho nyanga zinai+ zatoma pa cakuikhira moto pa guwa kuenda ndzulu. 16 Cakuikhira moto pa guwa cikhali na makhundu manai a midida ibodzi ene, makhono 12 aulaphi na makhono 12 augugumi.+ 17 Makhundu manai a mbuto ineyi yapadzulu, ibodzi na ibodzi ikhali na makhono 14 aulaphi na makhono 14 augugumi; nʼkhundu mwace ndi hafu ya khono, pontho pantsi pace, khundu ibodzi na ibodzi iri na khono ibodzi.

“Pontho masikada a pa guwa ayangʼanira kukhundu yakumabulukiro a dzuwa.”

18 Penepo iye andipanga: “Iwe mwana wa munthu, ipi ndi pidalonga Yahova, Mbuya Wankulu Kakamwe: ‘Ipi ndi pitsogolero pinafunika kutowezerwa guwa ingamangwa, toera kuperekapo ntsembe zakupiswa na kuwazirapo ciropa.’+

19 “‘Kuna anyantsembe akuti ndi Alevi a dzindza ya Zadhoke,+ ale anandifendedzera toera kunditumikira, usafunika kupereka kuna iwo mwanangʼombe ninga ntsembe toera kulekererwa madawo,’+ alonga Yahova, Mbuya Wankulu Kakamwe. 20 ‘Usafunika kukwata pangʼono ciropa cace, mbuciikha pa nyanga zinai za guwa ya ntsembe, mu nkhomo zinai za mbuto yapadzulu na pa cinthu cidaikhwa nʼkhundu mwace monsene, toera kucenesa madawo a guwa na kuiperekera ntsembe yakuphimbira madawo.+ 21 Buluka penepo, kwata mwanangʼombe wa ntsembe yakulekerera madawo toera umpise pa mbuto ya mu templo, idasankhulwa toera kucitira pyenepi, kunja kwa mbuto yakucena.+ 22 Pa ntsiku yaciwiri, iwe unadzapereka bokho ninga ntsembe toera kulekererwa madawo; natenepa, guwa ya ntsembe inadzaceneswa madawo, ninga mudaceneswa iyo madawo na ciropa ca mwanangʼombe.’

23 “‘Ungamala kuicenesa madawo, iwe unadzapereka mwanagʼombe wamamuna wakusowa cilema na mwanabira wamamuna wakusowa cilema. 24 Usafunika kuabweresa pamaso pa Yahova, pontho anyantsembe asafunika kuaawazira munyu,+ mbaapereka kuna Yahova ninga ntsembe yakupiswa. 25 Mu ntsiku zinomwe, iwe unadzapereka bokho ibodzi pa ntsiku ninga ntsembe toera kulekererwa madawo;+ unadzaperekambo mwanagʼombe wamamuna na mwanabira wamamuna, unadzapereka pinyama pyakusowa cilema. 26 Mu ntsiku zinomwe, iwo anadzapereka ntsembe yakuphimbira madawo a guwa ya ntsembe; pontho asafunika kuicenesa, buluka penepo iwo anakwanisa kuiphatisira. 27 Ntsiku zenezi zingamala, kutomera pa ntsiku yacisere kuenda kutsogolo,+ anyantsembe anadzapereka ntsembe zanu zakupiswa pa guwa, pabodzi na ntsembe zanu toera kupereka takhuta. Natenepa, ine ndinadzakomerwa na imwe,’+ alonga Yahova, Mbuya Wankulu Kakamwe.”