Ezekiyeli

46 “Ipi ndi pidalonga Yahova, Mbuya Wankulu Kakamwe: ‘Nsuwo ukulu wa thando yankati, udayangʼanira kukhundu yakumabulukiro a dzuwa,+ usafunika upitirize kukhala wakufungwa+ mu ntsiku zitanthatu za basa.+ Mbwenye pa ntsiku ya Sabudu na pa ntsiku ya phwando yakubalwa kwa mwezi, usafunika kufungulwa. 2 Ntsogoleri anadzapita na pakhonde ya nsuwo ukulu,+ pontho anadzalimira pakhundu pansuwo ukulu. Anyantsembe anadzapereka ntsembe yakupiswa na ntsembe toera kupereka takhuta zinafuna iye kubweresa, pontho iye anadzagodama pa mbuto ya nsuwo ukulu, angamala anadzabuluka. Mbwenye nsuwo ukulu nee usafunika kufungwa, mpaka kudoka kwa dzuwa. 3 Mbumba ya dziko ineyi inadzagodamambo pamaso pa Yahova pa mbuto ya nsuwo ukulu unoyu mʼMasabudu na mʼmaphwando akubalwa kwa mwezi.+

4 “‘Ntsembe yakupiswa inafuna kupereka ntsogoleri kuna Yahova pa ntsiku ya Sabudu, isafunika ikhale ya anamabira atanthatu akusowa cilema, na bira ibodzi yakusowa cilema.+ 5 Ntsembe ya pyakudya inafuna iye kupereka, inadzakhala ya nʼdida ubodzi wa efa toera kuipereka pabodzi na bira ibodzi, kuphatanizambo anamabira, mwakubverana na pinakwanisa iye kubulusa, kusiyapo malitru matatu na hafu* a mafuta a azeti toera kuapereka pabodzi na nʼdida ubodzi na ubodzi wa efa.+ 6 Pa ntsiku ya phwando yakubalwa kwa mwezi, ntsembe inadzakhala ya mwanangʼombe wakusowa cilema, anamabira atanthatu na bira ibodzi; pyonsene pisafunika pikhale pyakusowa cilema.+ 7 Mwanangʼombe asafunika kumpereka pabodzi na ntsembe ya pyakudya, ya nʼdida ubodzi wa efa, bira isafunika kuperekwa pabodzi na ntsembe ya pyakudya ya nʼdida ubodzi wa efa, pontho anamabira asafunika kuperekwa pabodzi na ntsembe ya pyakudya, mwakubverana na pinakwanisa iye. Ntsembe ibodzi na ibodzi ya pyakudya, ya nʼdida ubodzi wa efa, isafunika kuperekwa pabodzi na malitru matatu na hafu* a mafuta a azeti.

8 “‘Ntsogoleri angapita, asafunika apite na pakhonde ya nsuwo ukulu, pontho asafunika kubuluka na njira ibodzi ene.+ 9 Mbumba ya dziko ingapita toera kuenda pamaso pa Yahova mʼmidzidzi ya maphwando,+ ule anapita na pansuwo ukulu wakunkwiriro+ toera kulambira, asafunika kubuluka na pansuwo ukulu wakunterero;+ pontho ule anapita na pansuwo ukulu wakunterero, asafunika kubuluka na pansuwo ukulu wakunkwiriro. Nkhabe munthu anafunika kubwerera na pansuwo ukulu udapita na iye, thangwi onsene asafunika kubuluka na pansuwo ukulu uli kutsogolo kwawo. 10 Ntsogoleri wakuti ali pakati pawo, asafunika apite pabodzi na iwo, mbabuluka pabodzi na iwo. 11 Mʼmaphwando na mʼmidzidzi ya maphwando, mwanangʼombe asafunika kuperekwa pabodzi na ntsembe ya pyakudya ya nʼdida ubodzi wa efa; bira isafunika kuperekwa pabodzi na ntsembe ya pyakudya, ya nʼdida ubodzi wa efa. Pontho anamabira asafunika kuperekwa pabodzi na ntsembe ya pyakudya, mwakubverana na pinakwanisa iye; ntsembe ibodzi na ibodzi ya pyakudya ya nʼdida ubodzi wa efa,+ isafunika kuperekwa pabodzi na malitru matatu na hafu* a mafuta a azeti.

12 “‘Ntsogoleri angabulusa ntsembe yakupiswa+ peno ntsembe toera kupereka takhuta, ninga ntsembe inapereka munthu mwakufuna kwace kuna Yahova, iye anadzafungulirwa nsuwo ukulu udayangʼanira kukhundu yakumabulukiro a dzuwa; pontho iye anadzabulusa ntsembe yace yakupiswa, pabodzi na ntsembe zace toera kupereka takhuta ninga pinacita iye pa ntsiku ya Sabudu.+ Iye angabuluka, nsuwo ukulu usafunika kufungwa.+

13 “‘Ntsiku zonsene, usafunika kubulusa mwanabira wakusowa cilema wa caka cibodzi, toera aperekwe kuna Yahova ninga ntsembe yakupiswa.+ Usafunika kucita pyenepi ntsiku zonsene namacibese. 14 Ntsiku zonsene namacibese, pakupereka mwanabira usafunika kupereka ntsembe ya pyakudya, ya makilu mawiri a ufa wadidi kakamwe, pontho usafunika kupereka mafuta a azeti akupiringana litru ibodzi* toera kuwazira ufa wadidi kakamwe wa ntsembe ya pyakudya, inaperekwa kuna Yahova mwakukhonda phonya. Unoyu ndi ntemo wakwenda na kwenda. 15 Ntsiku zonsene namacibese, iwo asafunika kubulusa mwanabira, ntsembe ya pyakudya na mafuta a azeti ninga ntsembe yakupiswa inaperekwa mwakukhonda phonya.’

16 “Ipi ndi pidalonga Yahova, Mbuya Wankulu Kakamwe: ‘Ntsogoleri angapereka muoni kuna mʼbodzi na mʼbodzi wa anace ninga unthaka, iwo unadzakhala unthaka wa anace. Cinthu ceneci cinadzakhala cawo ninga unthaka. 17 Mbwenye iye angapereka khundu ya unthaka wace ninga muoni kuna ntumiki wace, khundu ineyi inadzakhala ya ntumiki wace mpaka pa caka ca ufulu,+ buluka penepo, khundu ineyi inadzakhala pontho ya ntsogoleri. Basi ene unthaka unapereka iye kuna anace, unadzakhala wawo kwenda na kwenda. 18 Ntsogoleri nee asafunika kukwata unthaka wa mbumba, mbaakakamiza toera abuluke mu mbuto zawo, basi ene iye asafunika kupereka mbuto yace ninga unthaka kuna anace, toera akhonde kuoneka munthu anafuna kubulusirwa unthaka wace pakati pa mbumba yanga.’”

19 Buluka penepo, iye andipitisa na pansuwo+ ukhali pakhundu pansuwo ukulu unapita na anthu kuenda ku masala akudyera adaceneswa, akuti ndi a anyantsembe; nsuwo unoyu ukhadayangʼanira kukhundu yakunkwiriro,+ penepo ine ndaona mbuto ikhali kukhundu yankati kumabulukiro a dzuwa. 20 Iye andipanga: “Iyi ndi mbuto yakuti anyantsembe anadzaphikira nyama inaperekwa thangwi ya mulando na nyama ya ntsembe inaperekwa toera kulekererwa madawo. Pontho ndi penepo panafuna kuphikira iwo ntsembe za pyakudya.+ Natenepa, iwo nee anadzakwata cinthu mbabuluka naco kunja, pa thando yakunja, thangwi angacita pyenepi, iwo anacenesa mbumba.”+

21 Iye andibulusa kunja, pa thando yakunja, mbandipitisa na mu nkhomo zinai za thando, pontho ine ndaona thando inango pankhomo ibodzi na ibodzi ya thando yakunja. 22 Mu nkhomo zinai za thando, mukhali na mathando mangʼono akuti akhali na makhono* 40 aulaphi na makhono 30 augugumi. Mathando manai ene akhali na midida ibodzi ene. 23 Pakhali na mbuto zidacitwa na miyala, zakuti zikhali mʼmakhundu onsene; pantsi pa mbuto zenezi pakhali na mbuto zakuphikira nyama zinaperekwa ninga ntsembe. 24 Penepo iye andipanga: “Izi ndi mbuto zakuti ale anatumikira mu templo, asaphikiramo nyama za ntsembe zinapereka mbumba.”+