Ezekiyeli

47 Buluka penepo iye andibweza ku nsuwo wa templo,+ penepo ine ndaona madzi akhabuluka pa mbuto ya pansuwo wa templo,+ akuti akhawewa kuenda kukhundu yakumadokero a dzuwa, thangwi kutsogolo kwa templo kukhadayangʼanira kukhundu yakumabulukiro a dzuwa. Madzi anewa akhabuluka pantsi kukhundu yamadyo ya templo, mbapita na kukhundu yakunterero kwa guwa ya ntsembe.

2 Buluka penepo iye andibulusa kunja na pansuwo ukulu wakunkwiriro,+ mbandizungulirisa na kunja mpaka pansuwo ukulu wakunja udayangʼanira kumabulukiro a dzuwa,+ penepo ine ndaona madzi akhawewa buluka kukhundu yamadyo ya nsuwo ukulu.

3 Pidabuluka mamuna unoyu mbaenda kukhundu yakumabulukiro a dzuwa na nkhambala yakupima nayo mʼmanja,+ apima makhono 1000, mbandipanga toera ndiwambuke madzi; madzi anewa akhadafika mphundupundu mwanga.

4 Buluka penepo iye apima pontho makhono 1000, mbandipanga toera ndiwambuke madzi; madzi anewa akhadafika mʼbondo mwanga.

Iye apima makhono anango akukwana 1000, mbandipanga toera ndiwambuke, pontho madzi akhadafika ncunu mwanga.

5 Pidapima iye makhono anango akukwana 1000, madzi akhali nkulo wakuti ine nee mbidakwanisa kuuwambuka na miyendo, thangwi madzi akhadazika kakamwe kwakuti munthu akhafunika kusambirira toera kuwambuka, akhali madzi akuti munthu nee mbadakwanisa kuwambuka na miyendo.

6 Iye andibvundza: “Iwe mwana wa munthu, waona pyenepi?”

Penepo iye anditsogolera, mbandibweza kuntunda kwa nkulo unoyu. 7 Pidabwerera ine, ndaona kuti mʼmakhundu mawiri ene a nkulo unoyu mukhali na miti mizinji kakamwe.+ 8 Buluka penepo iye andipanga: “Madzi awa ali kuwewa kuenda kucisa ca kumabulukiro a dzuwa, asatcitira ku Arabha+ mbagwera mʼbara.+ Angafika mʼbara, anadzacitisa kuti madzi a mʼbara akhale adidi. 9 Mu mbuto zinafuna kupita na madzi anewa, pikwi na pikwi pya pinyama pya mʼmadzi pinadzakwanisa kukhala na umaso. Kunadzaoneka ntsomba zizinji,* thangwi madzi anewa anadzawewa kuenda kweneko. Madzi a mʼbara anadzakhala adidi, pontho pinthu pyonsene piri mu mbuto zinafuna kupita na madzi anewa pinadzakhala na umaso.

10 “Anyamakokota anadzakhala nʼkhundu mwace kutomera ku Eni-Jedhi+ mpaka ku Eni-Egalaimu, kwakuti kunadzakhala na mbuto toera kuumisa makokota. Kunadzaoneka ntsomba zizinji* za mitundu yakusiyana-siyana, ninga ntsomba za mʼBara Ikulu.*+

11 “Kweneko kunadzaoneka mathawala na magowa, mbwenye nee anadzakhala na madzi adidi. Iwo anapitiriza kukhala na madzi a munyu.+

12 “Mitundu yonsene ya miti yakubala misapo yakudyiwa inadzakula mʼmakhundu mawiri ene a nkulo unoyu. Masamba a miti ineyi nkhabe kudzabunyala, pontho miti ineyi inapitiriza kubala misapo. Inadzabala misapo miyezi yonsene, thangwi iyo isathirirwa na madzi anabuluka pa mbuto yakucena.+ Misapo yace inadzakhala cakudya, mbwenye masamba ace ndi toera kuwangisa anthu.”+

13 Ipi ndi pidalonga Yahova, Mbuya Wankulu Kakamwe: “Ineyi ndi dziko yakuti munadzaigawana ninga unthaka pa madzindza 12 a Izraeli, mbwenye dzindza ya Zuze inadzakhala na makhundu mawiri.+ 14 Imwe munadzaipaswa ninga unthaka wanu, pontho phindi inafuna kupaswa mʼbodzi na mʼbodzi inadzakhala sawasawa na ya ndzace. Ine ndadumbira kuti mbidapereka dziko iyi kuna ambuyanu,+ cincino imwe munadzaigawana ninga unthaka.

15 “Awa ndi madire a dziko ineyi kukhundu yakunkwiriro: Iwo atoma ku Bara Ikulu mbapita na nseu wa ku Etiloni,+ mbaenda kukhundu ya Zedhadhi,+ 16 Amati,+ Bherota+ na Sibhraimu, cakuti ndi cisa ciri pakati pacisa ca Dhamasku na cisa ca Amati; madire anewa asapitiriza mpaka ku Azeri-Atikoni cakuti ndi cisa ciri cifupi na madire a Aurani.+ 17 Natenepa, madire anewa atoma ku bara mpaka ku Azari-Enani,+ nʼkhundu-nʼkhundu mwa madire a Dhamasku kukhundu yakunkwiriro na madire a Amati.+ Anewa ndi madire a kunkwiriro.

18 “Kukhundu yakumabulukiro a dzuwa, madire anapita na pakati pa Aurani na Dhamasku, mbapitiriza na nʼkhundu-nʼkhundu mwa nkulo wa Yordani pakati pa Jiliyadhi+ na dziko ya Izraeli. Musafunika kupima nsindzo buluka ku madire a kunkwiriro mpaka ku bara* yakumabulukiro a dzuwa. Anewa ndi madire a kumabulukiro a dzuwa.

19 “Madire a kunterero anatoma ku Tamara mpaka ku madzi a Meribhati-Kadhesi,+ buluka kweneko anaenda mpaka ku Gowa ya madzi a ku Ejitu, pontho anadzafika ku Bara Ikulu.+ Anewa ndi madire a kunterero.

20 “Kukhundu yakumadokero a dzuwa, madire anadzakhala Bara Ikulu, kutomera mʼmadire a kunterero mpaka pa mbuto iri kutsogolo kwa Lebho-Amati.+ Anewa ndi madire a kumadokero a dzuwa.”

21 “Imwe musafunika kugawana dziko ineyi pakati pa madzindza 12 a Izraeli. 22 Imwe musafunika kuigawana ninga unthaka pakati panu, pabodzi na anthu a madzindza anango akuti asakhala na imwe, ale adabala ana pakati panu. Kuna imwe, iwo anadzakhala sawasawa na anthu a dzindza ya Izraeli. Iwo anadzatambira unthaka pabodzi na imwe pakati pa madzindza a Izraeli. 23 Munthu wa dzindza inango musafunika kumpasa unthaka mucisa ca dzindza idamanga iye nyumba yace,” alonga Yahova, Mbuya Wankulu Kakamwe.