Ezekiyeli

6 Yahova alonga pontho na ine, mbandipanga: 2 “Iwe mwana wa munthu, yangʼana ku mapiri a Izraeli, mbulonga maprofesiya thangwi ya iwo. 3 Apange kuti: ‘Imwe mapiri a ku Izraeli, bveserani mafala a Yahova, Mbuya Wankulu Kakamwe: Ipi ndi pidalonga Yahova, Mbuya Wankulu Kakamwe kuna mapiri, nthunda, mikulo na magowa: “Ine ndinadzabweresa supada kuna imwe, pontho ndinadzafudza mbuto zanu zaulambiri. 4 Maguwa anu a ntsembe anadzagomolwa,+ maguwa anu akupisira insenso anadzanyedzwa, pontho manungo a anthu anafuna kuphiwa, ine ndinadzaaponya patsogolo pa madzimunthu anu akunyanyasa.*+ 5 Ndinadzaponya manungo a anthu akufa a mbumba ya Izraeli patsogolo pa madzimunthu awo akunyanyasa, pontho ndinadzamwaza magogodo anu nʼkhundu mwa maguwa anu.+ 6 Mu mbuto zonsene zinakhala imwe, mizinda yanu inadzafudzwa;+ mbuto zanu zaulambiri zinadzagomolwa, mbazikhala madembe.+ Maguwa anu a ntsembe anadzagomolwa, mbanyedzwa-nyedzwa; madzimunthu anu akunyanyasa anadzafudzwa, maguwa anu akupisira insenso anadzagwiswa, pontho pinthu pidacita imwe na manja anu pinadzafudzwa. 7 Ale anafuna kuphiwa, anadzagwa pakati panu,+ natenepa, imwe munadzadziwa kuti ine ndine Yahova.+

8 “‘“Mbwenye ine ndinadzasiya kuti anango apulumuke, thangwi anango a imwe nee anadzaphiwa na supada mungadzabalaliswa pakati pa madzindza a madziko anango.+ 9 Ale anafuna kupulumuka, anadzandikumbuka pakati pa madzindza a mbuto zinafuna kuendeswa iwo ku ubitcu.+ Iwo anadzadzindikira kuti ine ndatsukwala thangwi ya mitima yawo yakukhonda kukhulupirika idasiya kundibvera,+ pontho thangwi ya maso awo akuti asasirira kakamwe madzimunthu awo akunyanyasa.+ Iwo anadzapasika manyadzo, mbanyanyasirwa na pinthu pyonsene pyakuipa na pyakunyanyasa pidacita iwo.+ 10 Iwo anadzadziwa kuti ine ndine Yahova, pontho kuti kuathusa kudaacita ine kuti mbidaabweresera nyatwa, nee kukhali kwapezi.”’+

11 “Ipi ndi pidalonga Yahova, Mbuya Wankulu Kakamwe: ‘Imba manja, dhima pantsi na miyendo yako, mbutsukwala thangwi ya pinthu pyonsene pyakuipa na pyakunyanyasa pidacita mbumba ya Izraeli, thangwi iwo anadzaphiwa na supada, anadzafa na njala, pontho anadzafa na utenda.+ 12 Ule ali dhuzi anadzafa na utenda, ule ali kutali anadzaphiwa na supada, ule anafuna kupulumuka mbakhonda kuphiwa na pinthu pyenepi, anadzafa na njala. Ine ndinadzapangiza ukali wanga onsene kuna iwo.+ 13 Imwe munadzadziwa kuti ine ndine Yahova,+ anyakufa anu angadzakhala phwataku-phwataku pakati pa madzimunthu anu akunyanyasa, nʼkhundu mwa maguwa anu,+ nʼnthunda zonsene, padzulu pa mapiri onsene, pantsi pa miti mikulu yonsene ya masamba akubithimira na pantsi pa nthawi za miti mikulu, zakuti ndi mbuto zonsene zikhapereka iwo ntsembe za khwema yakununkhira mwadidi, toera kukhurudza mitima ya madzimunthu awo onsene akunyanyasa.+ 14 Ine ndinadzafuthula djanja yanga toera kuatcunyusa, mbandicitisa dziko yawo kukhala yakusowa anthu, pontho mbuto zonsene zinakhala iwo zinadzakhala zakusowa anthu kupiringana thando yakuti iri cifupi na Dhibhla. Penepo iwo anadzadziwa kuti ine ndine Yahova.’”