Ezekiyeli

7 Yahova alonga pontho na ine, mbandipanga: 2 “Iwe mwana wa munthu, ipi ndi pidalonga Yahova, Mbuya Wankulu Kakamwe kuna dziko ya Izraeli: ‘Kumala kwafika! Inde, kumala kwafika mu dziko ino yonsene.* 3 Cincino wafika ndzidzi wakufudzwa kwanu, ine ndinadzapangiza ukali wanga kuna imwe. Ndinakutongani mwakubverana na macitiro anu, pontho ndinakutcunyusani mwakubverana na pinthu pyonsene pyakunyanyasa pinacita imwe. 4 Ine nkhabe kudzakubverani ntsisi+ nee kukutsalakanani, ndinadzakutcunyusani thangwi ya macitiro anu. Imwe munadzathabuka thangwi ya pinthu pyakunyanyasa pinacita imwe.+ Natenepa, imwe munadzadziwa kuti ine ndine Yahova.’+

5 “Ipi ndi pidalonga Yahova, Mbuya Wankulu Kakamwe: ‘Onani, iri kufika nyatwa, nyatwa yakusiyana na zonsene.+ 6 Kumala kuli kufika; kumala kunafika; iko kunafika kuna imwe. Onani, kumala kuli kufika. 7 Imwe anthu anakhala mu dziko ino! Kufudzwa kwanu kwafika, ndzidzi uli kufika, ntsiku iri dhuzi.+ Anthu ali kudzudzumika mʼmapiri, nkhabe anakhuwa mwakutsandzaya.

8 “‘Mwakukhonda dembuka, ine ndinadzapangiza ukali wanga kuna imwe.+ Ndinakutongani+ mwakubverana na macitiro anu, pontho ndinakutcunyusani mwakubverana na pinthu pyonsene pyakunyanyasa pinacita imwe. 9 Ine nkhabe kudzakubverani ntsisi nee kukutsalakanani.+ Ndinadzakutcunyusani thangwi ya macitiro anu, pontho imwe munadzathabuka thangwi ya pinthu pyakunyanyasa pinacita imwe. Natenepa, imwe munadzadziwa kuti ine Yahova, ndiri kukutcunyusani.+

10 “‘Onani, ntsiku iri kufika!+ Iyo iri dhuzi! Kufudzwa kwanu kwafika; ndodo inafuna kukutcunyusani na ine iri pano, kudzikuza kwathimizirika. 11 Uphanga wakula, mbudzakhala ndodo yakutcunyusa nayo uipi.*+ Iwo, mpfuma zawo, mbumba zawo na kubvekera kwawo nkhabe kudzapulumuka. 12 Ndzidzi uli kubwera, ntsiku inadzafika. Nyakugula mbaleke kukomerwa, nyakugulisa mbaleke kutsukwala, thangwi ukali wanga uli kubwera kuna mwinji wawo onsene.*+ 13 Nyakugulisa nee anabwerera pa mbuto idagulisa iye, maseze akhonde kuphiwa. Thangwi pinthu pidapangizwa mʼmasomphenya anewa pinadzacitikira mwinji onsene. Thangwi ya madawo awo, nkhabe munthu anafuna kubwerera, nee kupulumuka.

14 “‘Iwo aliza tuluka,+ pontho onsene ali akukhunganyika, mbwenye nkhabe munthu anaenda kunkhondo, thangwi ine ndiri wakuipirwa na mwinji onsene.+ 15 Ale ali kunja kwa nzinda+ anadzaphiwa na supada, ale ali mu nzinda anadzafa na njala, pontho na utenda. Ule ali kunja kwa nzinda anadzaphiwa na supada, ule ali nkati mwa nzinda+ anadzafa na njala, pontho na utenda. 16 Ale anafuna kupulumuka mbakwanisa kuthawa, anadzaenda ku mapiri, ninga nkhangaiwa za nʼgowa, mʼbodzi na mʼbodzi anadzalira thangwi ya madawo ace.+ 17 Onsene anadzafewa manungo, pontho mabondo awo anadzacuca madzi.*+ 18 Iwo abvala masakha+ mbakundwa na kugopa. Onsene anadzapaswa manyadzo, pontho misolo yawo inadzacingwa mpala.*+

19 “‘Iwo anadzataya parata yawo mʼmiseu, pontho anadzanyanyasirwa na ouro yawo. Nee parata yawo, nee ouro yawo inadzaapulumusa pa ntsiku ya ukali wa Yahova.+ Iwo nee anadzakhuta, pontho nee anadzadzadza mimba zawo, thangwi parata yawo na ouro yawo pinadzaadawisa. 20 Iwo asadzikuza thangwi yakubalika kwa pinthu pyawo pyakubalikisa napyo manungo; pontho na pinthu pyenepi,* iwo asasanya madzimunthu awo akunyanyasa na alungu awo akunyanyasa.+ Na thangwi ineyi, ine ndinadzacitisa kuti anyanyasirwe na parata yawo na ouro yawo. 21 Ine ndinadzapipereka* kuna anthu a madziko anango ninga pinthu pidatapatwa, ninga pinthu pidatapatwa kuna anthu akuipa pa dziko yapantsi, pontho iwo anadzapipswipisa.

22 “‘Ine ndinadzaapasira nkhodolo,+ pontho iwo anadzapswipisa mbuto yanga yakubisalika,* mambava anadzapita mwenemu, mbaipswipisa.+

23 “‘Cita maunyolo,*+ thangwi dziko yadzala na ciropa ca ale adatongwa mwakukhonda kulungama mbaphiwa,+ pontho nzinda wadzala na uphanga.+ 24 Ine ndinadzabweresa mbumba yakuipa kakamwe+ pakati pa mbumba zonsene, mbumba ineyi inadzakukwatirani nyumba zanu.+ Ine ndinadzamalisa kudzikuza kwa anyamphambvu, pontho mbuto zawo zaulambiri zinadzapswipiswa.+ 25 Nyatwa ingafika, iwo anadzasaka ntendere, mbwenye nee anadzaugumana.+ 26 Inadzaoneka nyatwa padzulu pa nyatwa inango, mphangwa padzulu pa mphangwa zinango, pontho anthu anadzasaka masomphenya kuna aprofeta,+ mbwenye mwambo unadzamala kuna anyantsembe, pontho uphungu unadzamala kuna akulu.+ 27 Mambo anadzabvala nguwo zaciliro,+ ntsogoleri anadzakhala wakusowa cidikhiro, manja a mbumba ya dziko ino anadzatetemera thangwi yakugopa. Ine ndinadzaatcunyusa mwakubverana na macitiro awo, pontho ndinadzaatonga ninga mudatongera iwo andzawo. Natenepa, iwo anadzadziwa kuti ine ndine Yahova.’”+