Ezekiyeli
8 Pa ntsiku yacixanu ya mwezi wacitanthatu, wa caka cacitanthatu, pikhali ine nawa panyumba panga mu ndzidzi wakuti akulu-akulu* a ku Yuda akhali nawa patsogolo panga, mphambvu* ya Yahova, Mbuya Wankulu Kakamwe yatoma kuphata basa muna ine. 2 Mu ndzidzi ukhayangʼanisa ine, ndaona cinthu cakulandana na munthu wakuti akhaoneka ninga moto; kutomera ncunu mwace+ kuenda pantsi, akhaoneka ninga moto, pontho kutomera ncunu mwace kuenda kudzulu akhali wakucena ninga utale wakuyetimira.+ 3 Penepo iye afuthula cinthu cikhaoneka ninga manja, mbaphata tsisi yanga, kubulukira mʼmasomphenya a Mulungu, nzimu wandithukula mpaka pakati pa dziko na kudzulu, mbundiendesa ku Yerusalemu, mpaka pansuwo wa thando yankati+ wa khundu yakunkwiriro kwa templo, pakuti pakhali dzimunthu yaulambiri inasosa ukali wa Mulungu.+ 4 Ine ndaona penepo mbiri ya Mulungu wa Izraeli,+ ninga mbiri idaona ine pikhali ine ku gowa.+
5 Penepo iye andipanga: “Iwe mwana wa munthu, ndaphata miyendo, yangʼana kukhundu yakunkwiriro.” Natenepa, ine ndayangʼana kukhundu yakunkwiriro, kukhundu ineyi yakunkwiriro ya nsuwo unaenda ku guwa ya ntsembe, pansuwo unoyu pakhali dzimunthu yaulambiri inasosa ukali wa Mulungu. 6 Iye andibvundza: “Iwe mwana wa munthu, uli kuona pinthu pyakuipa na pyakunyanyasa pinacita Aizraeli pano,+ pinthu pinandicitisa kuti ndikhale kutali na mbuto yanga yakucena?+ Mbwenye iwe unadzaona pinthu pinango pyakunyanyasa kakamwe kupiringana pyenepi.”
7 Buluka penepo, iye andikwata mpaka pansuwo unaenda kuthando ya templo, pidayangʼana ine, ndaona benga pa pfufu. 8 Iye andipanga: “Iwe mwana wa munthu, ndaphata miyendo, thimizira benga ineyi iri pa pfufu.” Ine ndathimizira benga ineyi, mbandiona nsuwo. 9 Iye andipanga: “Pita toera uone pinthu pyakuipa na pyakunyanyasa pinacita iwo pano.” 10 Natenepa ine ndapita, mbandiyangʼana, pontho mwenemu ine ndaona madzimunthu a mitundu yonsene ya pinyama pinafamba na mimba, a pinyama pyakunyanyasa+ na madzimunthu onsene akunyanyasa a mbumba ya Izraeli;+ madzimunthu anewa akhadalembwa pa pfufu mʼmakhundu onsene. 11 Patsogolo pa madzimunthu anewa pakhali akulu-akulu* 70 a mbumba ya Izraeli, mʼbodzi wa iwo akhali Yazaniya mwana wa Safani.+ Mʼbodzi na mʼbodzi wa iwo akhadaphatirira combo cakupisira naco insenso, pontho utci wa insenso ukhakwira kudzulu.+ 12 Iye andibvundza: “Iwe mwana wa munthu, uli kuona pinacita akulu-akulu a mbumba ya Izraeli ncidima? Mʼbodzi na mʼbodzi ali nkwartu yace, munagumanika madzimunthu awo. Thangwi iwo asalonga: ‘Yahova nee ali kutiona, Yahova abuluka mu dziko ino.’”*+
13 Iye athimiza: “Iwe unadzaona pinthu pinango pyakunyanyasa kakamwe pinacita iwo.” 14 Natenepa, iye andikwata mpaka kufika pansuwo wa kukhundu yakunkwiriro ya nyumba ya Yahova, ine ndaona penepo akazi akhali nawa, pontho iwo akhalira mulungu Tamuzi.
15 Penepo iye andibvundza pontho: “Iwe mwana wa munthu, uli kuona pyenepi? Iwe unadzaona pinthu pinango pyakunyanyasa kakamwe kupiringana pyenepi.”+ 16 Natenepa, iye andikwata mpaka pakhonde yankati ya nyumba ya Yahova.+ Penepo, pansuwo wa templo ya Yahova, pakati pakhonde na guwa ya ntsembe, pakhali amuna 25 akuti akhadapasira nkhodolo templo ya Yahova, nkhope zawo zikhadayangʼana kumabulukiro a dzuwa; iwo akhagodamira dzuwa kukhundu yakumabulukiro a dzuwa.+
17 Iye andibvundza: “Iwe mwana wa munthu, uli kuona pyenepi? Kodi mbumba ya Yuda isanyerezera kuti nee ndi pyakuipa kucita pinthu pyenepi pyakunyanyasa, mbadzadza dziko ino na uphanga,+ pontho mbapitiriza kunditsukwalisa? Iwo asalamusa nthawi* mbaithonyeza pa mphuno yanga. 18 Na thangwi ineyi, ine ndinadzapangiza ukali wanga. Ine nkhabe kudzaabvera ntsisi+ nee kuatsalakana. Maseze iwo andikhuwire mwakugaluza kakamwe, ine nkhabe kudzaabvesera.”+