Ezekiyeli

10 Mu ndzidzi ukhayangʼanisa ine, ndaona cinthu cakulandana na mwala wa safira padzulu pa akerubhi, padzulu pa mbuto ikhali padzulu pa misolo yawo, cinthu ceneci cikhaoneka ninga mpando waumambo.+ 2 Iye apanga munthu adabvala nguwo za linyu:+ “Ndoko pakati pa maroda+ pantsi pa akerubhi, dzadza manja ako mawiri ene na makala a moto+ adabuluswa pakati pa akerubhi, pontho aponye mu nzinda.”+ Natenepa, iye apita mu ndzidzi ukhayangʼanisa ine.

3 Mu ndzidzi udapita munthu unoyu, akerubhi akhali kukhundu yamadyo ya templo, pontho khole ikhadadzala nʼkhonde yankati. 4 Mbiri ya Yahova+ yathukuka padzulu pa akerubhi, mbienda pansuwo wa templo, pontho, mwapangʼono-pangʼono khole yadzala mu templo;+ khonde yonsene mbidzala na kuyetimira kwa mbiri ya Yahova. 5 Kulira kwa maphapido a akerubhi mbakudakwanisa kubveka pa thando yakunja; kulira kwa maphapido kukhali ninga fala ya Mulungu Wamphambvu Zonsene angalonga.+

6 Penepo iye apanga munthu adabvala nguwo za linyu: “Bulusa moto pakati pa maroda, pakati pa akerubhi,” natenepa, iye apita, mbalimira pakhundu pa roda. 7 Buluka penepo, kerubhi mʼbodzi afuthula djanja yace pa makala a moto akuti akhali pakati pa akerubhi.+ Abulusa makala mangasi a moto, mbaaikha mʼmanja mawiri ene a munthu adabvala nguwo za linyu,+ iye aatambira mbabuluka. 8 Pantsi pa maphapido+ a kerubhi anewa pakhali na pinthu pikhaoneka ninga manja a munthu.

9 Mu ndzidzi ukhayangʼanisa ine, ndaona maroda manai nʼkhundu mwa akerubhi, roda ibodzi na ibodzi ikhali pakhundu pa kerubhi mʼbodzi na mʼbodzi, pontho maroda anewa akhayetimira ninga mwala wa krizolito.+ 10 Maroda manai ene akhali na maonekero mabodzi ene, ninga kuti roda ibodzi ikhali nkati mwa roda indzace. 11 Mu ndzidzi ukhafamba iwo, mbadakwanisa kuenda kukhundu ibodzi na ibodzi mwa makhundu manai, nee kuzungunuka, thangwi maroda akhaenda kudayangʼana nkhope za akerubhi, nee kuzungunuka. 12 Manungo awo onsene, misana yawo, manja awo na maphapido awo, akhadadzala na maso mʼmakhundu onsene. Akerubhi anai ene, mʼbodzi na mʼbodzi akhali na roda pakhundu pace, yakuti ikhadadzalambo na maso adazungulira mʼmakhundu onsene.+ 13 Ine ndabva fala ikhalonga mwakugaluza, mbipanga maroda kuti: “Fambani!”

14 Mʼbodzi na mʼbodzi wa iwo* akhali na nkhope zinai. Nkhope yakutoma ikhali ya kerubhi, nkhope yaciwiri ikhali ya munthu, nkhope yacitatu ikhali ya nkhalamu, nkhope yacinai ikhali ya capungu.+

15 Akerubhi anewa akhathukuka kuenda kudzulu, iwo ndi aanju abodzi ene adaona ine dhuzi na nkulo wa Kebhari.+ 16 Pikhafamba akerubhi anewa, maroda akhafambambo pakhundu pawo; akerubhi pikhalamusa iwo maphapido awo toera kuthukuka pa dziko yapantsi, maroda nee akhazungunuka, pontho nee akhathauka pakhundu pawo.+ 17 Mu ndzidzi ukhalimira iwo, maroda akhalimirambo; mu ndzidzi ukhathukuka iwo, maroda akhathukukambo pabodzi na iwo, thangwi nzimu ukhatsogolera aanju anewa ukhalimbo mʼmaroda.

18 Buluka penepo, mbiri ya Yahova+ yabuluka padzulu pansuwo wa templo, mbilimira padzulu pa akerubhi.+ 19 Penepo akerubhi alamusa maphapido awo mbathukuka buluka pantsi mu ndzidzi ukhayangʼanisa ine. Pidabuluka iwo, maroda aendambo pakhundu pawo. Iwo alimira cifupi na nsuwo wa templo ya Yahova wa kukhundu yakumabulukiro a dzuwa, pontho mbiri ya Mulungu wa Izraeli ikhali padzulu pawo.+

20 Anewa akhali aanju abodzi ene adaona ine pantsi pa Mulungu wa Izraeli dhuzi na nkulo wa Kebhari,+ na thangwi ineyi, ine ndadzindikira kuti iwo akhali akerubhi. 21 Mʼbodzi na mʼbodzi wa aanju anewa, akhali na nkhope zinai na maphapido manai, pontho pantsi pa maphapido awo+ pakhali na manja ninga a munthu. 22 Nkhope zawo zikhadalandana na nkhope zidaona ine dhuzi na nkulo wa Kebhari.+ Mʼbodzi na mʼbodzi wa iwo akhaenda kutsogolo.+