Ezekiyeli
12 Yahova alonga pontho na ine, mbandipanga: 2 “Iwe mwana wa munthu, uli kukhala pakati pa mbumba yakukhonda bvera. Iwo ali na maso toera kuona, mbwenye nkhabe kuona, iwo ali na makutu toera kubva, mbwenye nkhabe kubva,+ thangwi iwo ndi mbumba yakukhonda bvera.+ 3 Mbwenye iwe mwana wa munthu, khunganya ntolo wako toera uende ku ubitcu. Ndoko ku ubitcu namasikati, iwo mbakakuona. Buluka panyumba pako mbuenda ku mbuto inango, ninga munthu wakuti ali kuenda ku ubitcu, iwo mbakakuona. Panango iwo anabvesesa kuti pyenepi pisabvekanji, maseze iwo ndi mbumba yakukhonda bvera. 4 Namasikati iwo mbakaona, bulusa ntolo wako kunja, ninga usafuna kuenda ku ubitcu. Buluka penepo, mu ndzidzi unadoka dzuwa, usafunika kubuluka ninga munthu wakuti ali kuendeswa ku ubitcu, iwo mbakaona.+
5 “Fungula benga pa pfufu iwo mbakaona, pontho bulusa kunja pinthu pyako na penepo.+ 6 Thukula pinthu pyako paphewa, mbubuluka napyo ncidima, iwo mbakaona. Phimbira nkhope yako toera ukhonde kuona pantsi, thangwi ine ndiri kukuphatisira toera ukhale cidzindikiro kuna mbumba ya Izraeli.”+
7 Ine ndacita pyonsene pidapangwa ine. Namasikati ndabulusa kunja ntolo wanga, ninga ntolo wa munthu anaenda ku ubitcu. Pikhadoka dzuwa, ine ndafungula benga pa pfufu na manja anga. Pidadoka dzuwa, ine ndabulusa pinthu pyanga kunja, mbandipithukula paphewa, iwo mbakaona.
8 Namacibese, Yahova alonga pontho na ine, mbandipanga: 9 “Iwe mwana wa munthu, kodi mbumba ya Izraeli yakuti ndi yakukhonda bvera, nee yakubvundza kuti: ‘Uli kucitanji?’ 10 Apange kuti: ‘Ipi ndi pidalonga Yahova, Mbuya Wankulu Kakamwe: “Mphangwa izi zisalonga pya ntsogoleri+ wa mu Yerusalemu pabodzi na mbumba yonsene ya Izraeli iri mu nzinda.”’
11 “Apange kuti iwe ndiwe cidzindikiro kuna iwo,+ pidacita iwe ndipyo pinafuna kuacitikira. Iwo anadzaenda ku ubitcu, inde ku ubitcu.+ 12 Ntsogoleri wakuti ali pakati pawo, anadzafamba ncidima mbakathukula pinthu pyace paphewa. Anadzafungula benga pa mpanda, mbabulusa pinthu pyace na penepo.+ Iye anadzaphimbira nkhope yace toera akhonde kuona pantsi. 13 Ine ndinadzanteyera nsampha, pontho iye anadzamangwa na nsampha wanga.+ Penepo ine ndinadzankwata toera kuenda naye ku Bhabhilonya, ku dziko ya Akaldheya, mbwenye iye nee anadzaiona, pontho anadzafera kweneko.+ 14 Onsene anafuna kugumanika nʼkhundu mwace, ale anamʼphedzera, pabodzi na anyankhondo ace, ine ndinadzaabalalisa konsene kwene,+ pontho ndinadzabulusa supada toera kuatowerera.+ 15 Iwo anadzadziwa kuti ine ndine Yahova, ndingadzaabalalisa mʼmadzindza anango na mʼmadziko anango. 16 Mbwenye anango a iwo, ine nee ndinadzaapha na supada, na njala peno na utenda, toera kule kunafuna iwo kuenda, alonge pakati pa anthu a madzindza anango pinthu pyonsene pyakunyanyasa pidacita iwo; penepo iwo anadzadziwa kuti ine ndine Yahova.”
17 Yahova alonga pontho na ine, mbandipanga: 18 “Iwe mwana wa munthu, usafunika kudya nkate wako mwakugopa, mbumwa madzi ako mwakugopa na mwakudzudzumika.+ 19 Panga mbumba ya dziko ino kuti: ‘Ipi ndi pidalonga Yahova, Mbuya Wankulu Kakamwe kuna anthu a mu Yerusalemu anakhala mu dziko ya Izraeli: “Iwo anadzadya nkate wawo mwakudzudzumika, mbamwa madzi awo mwakugopa, thangwi dziko yawo inadzakhala madembe,+ thangwi ya uphanga unacita anthu onsene anakhala mwenemu.+ 20 Mizinda inakhala anthu inadzafudzwa, dziko ino inadzakhala thando,+ penepo imwe munadzadziwa kuti ine ndine Yahova.”’”+
21 Yahova alonga pontho na ine, mbandipanga: 22 “Iwe mwana wa munthu, ndi nsangani wanji unoyu unalongwa mu Izraeli kuti: ‘Ntsiku ziri kupita, mbwenye pinthu pidaoniwa mʼmasomphenya pidzati kucitika’?+ 23 Natenepa, apange kuti: ‘Ipi ndi pidalonga Yahova, Mbuya Wankulu Kakamwe: “Ine ndinadzamalisa nsangani unoyu, pontho iwo nee unadzalongwabve mu Izraeli.”’ Apangembo kuti: ‘Ntsiku ziri kufika,+ pontho pinthu pyonsene pidaoniwa mʼmasomphenya pinadzacitika.’ 24 Thangwi nee anadzaonekabve aprofeta authambi peno anyakulotera akunyengeza pakati pa mbumba ya Izraeli.+ 25 ‘“Thangwi ine Yahova ndinadzalonga. Pinthu pyonsene pinafuna ine kulonga pinacitika mwakukhonda kudembuka.+ Imwe mbumba yakukhonda bvera, mu ntsiku zanu,+ ine ndinadzalonga pinthu mbapicitika,” alonga Yahova, Mbuya Wankulu Kakamwe.’”
26 Yahova alonga pontho na ine, mbandipanga: 27 “Iwe mwana wa munthu, ipi ndi pinalonga mbumba ya Izraeli: ‘Pinthu pinaoneswa iye mʼmasomphenya nee pinacitika cincino, iye ali kulonga maprofesiya a pinthu pinafuna kucitika kutsogolo kakamwe.’+ 28 Natenepa, apange kuti: ‘Ipi ndi pidalonga Yahova, Mbuya Wankulu Kakamwe: “‘Nkhabe cinthu cinalonga ine cakuti cinadzacitika mwakudembuka; pyonsene pinalonga ine pinadzacitika,’ alonga Yahova, Mbuya Wankulu Kakamwe.”’”