Dhanyeli
1 Mu caka cacitatu ca utongi wa Mambo Yeowakimu+ wa ku Yuda, Mambo Nabhukodhonozore wa ku Bhabhilonya afika ku Yerusalemu mbazungulira nzinda unoyu.+ 2 Yahova apereka Mambo Yeowakimu wa ku Yuda mʼmanja mwace,+ pabodzi na pyombo pinango pya nʼnyumba ya Mulungu wandimomwene, pontho Nabhukodhonozore aenda napyo ku dziko ya Sineari+ mbapiikha nʼnyumba ya mulungu wace, iye aikha pyombo pyenepi mʼmbuto yakukoyera mpfuma ya mulungu wace.+
3 Buluka penepo, mambo apanga Aspenazi nkulu wa atsogoleri a panyumba ya mambo toera abwerese Aizraeli* angasi, kuphatanizambo ana a mambo na ana a anthu a pidzo.+ 4 Iwo akhafunika kukhala aphale akusowa cilema, a maonekero adidi, akudzala na udziwisi, andzeru, akunyerezera mwadidi,+ pontho akuti anakwanisa kutumikira panyumba ya mambo. Iye akhafunika kuapfundzisa kulonga na kulemba cilongero ca Akaldheya. 5 Kusiyapo pyenepi, mambo apereka ntemo wakuti ntsiku zonsene, iwo akhafunika kupaswa cakudya cinadya iye na vinyu inamwa iye. Iwo akhafunika kupfundziswa* mu pyaka pitatu, pontho kunkhomo kwa pyaka pyenepi, iwo mbadatumikira mambo.
6 Mwa aphale anewa, anango akhali a dzindza* ya Yuda: Dhanyeli,*+ Ananiya,* Mizaeli* na Azariya.*+ 7 Nkulu wa atsogoleri a panyumba ya mambo aapasa madzina anango;* Dhanyeli ampasa dzina yakuti Bheltisezari,+ Ananiya ampasa dzina yakuti Sadhrake, Mizaeli ampasa dzina yakuti Mezaki, pontho Azariya ampasa dzina yakuti Abhedhinego.+
8 Mbwenye Dhanyeli atonga muntima mwace toera kukhonda kupswipisika na cakudya ca mambo peno na vinyu ikhamwa mambo. Natenepa, Dhanyeli aphemba nkulu wa atsogoleri a panyumba ya mambo toera antawirise kukhonda kudya pyakudya pyakuti mbapidampswipisa. 9 Mulungu wandimomwene acitisa nkulu wa atsogoleri a panyumba ya mambo toera akomere ntima Dhanyeli na kumbvera ntsisi.+ 10 Mbwenye nkulu wa atsogoleri a panyumba ya mambo apanga Dhanyeli: “Ine ndisagopa mbuyanga mambo, ule adapereka ntemo toera ndikupaseni pinthu pinadya iye na pinamwa iye. Ndiye tani iye angaona kuti iwe waonda kakamwe kupiringana aphale* anango a thunga yako? Iwe unandicitisa* kukhala na mulando pamaso pa mambo.” 11 Mbwenye Dhanyeli apanga nyakuonera wakuti nkulu wa atsogoleri a panyumba ya mambo akhadanʼkhazikisa toera kuonera Dhanyeli, Ananiya, Mizaeli na Azariya: 12 “Taphata miyendo, yeserani atumiki anu mu ntsiku khumi, tipaseni pyathu pyakudya pyakulimwa na madzi toera kumwa; 13 buluka penepo landanisani manungo athu na a aphale* anadya pyakudya pya mambo, pontho citani kuna atumiki anu mwakubverana na pire pinaona imwe.”
14 Natenepa nyakuonera atawira maonero awo mbaayesera mu ntsiku khumi. 15 Pidamala ntsiku khumi, maonekero awo akhali adidi kakamwe, pontho ungumi wawo ukhali wadidi* kupiringana aphale* akhadya cakudya ca mambo. 16 Natenepa nyakuonera akhapitiriza kuapasa pyakudya pyakulimwa, mʼmbuto mwakuapasa cakudya na vinyu ya mambo. 17 Mulungu wandimomwene apasa aphale* anewa anai ndzeru na luso yakubvesesa ntundu onsene wa malembero, pontho aapasa udziwisi; mbwenye Dhanyeli apaswa luso yakubvesesa ntundu onsene wa masomphenya na ndoto.+
18 Pidafika ndzidzi udakhazikisa mambo toera iwo aendeswe kuna iye,+ nkulu wa atsogoleri a panyumba ya mambo, aakwata mbaenda nawo kuna Nabhukodhonozore. 19 Mambo pidalonga iye na iwo, nee mʼbodzi pa nsoka akhali ninga Dhanyeli, Ananiya, Mizaeli na Azariya;+ pontho iwo apitiriza kutumikira mambo. 20 Ndzidzi onsene mambo angaabvundzisa pinthu pyakuti pikhaphemba udziwisi na kubvesesa, iye akhaona kuti iwo akhali na ndzeru kakamwe kupiringana anyantsembe onsene akulotera na anyakucita masalapita+ onsene a mu umambo wace. 21 Dhanyeli apitiriza kweneko mpaka caka cakutoma ca Mambo Siro.+