Masomphenya Adaoneswa Juwau

10 Ine ndaona anju unango wamphambvu akhatcita buluka kudzulu, iye akhadabvala* khole, pontho akhali na utawaleza* munsolo mwace, nkhope yace ikhali ninga dzuwa,+ miyendo yace ikhali ninga mphanda* zakuwanga, pontho ikhaoneka ninga moto, 2 anju unoyu akhali na bukhu* ingʼono mʼmanja mwace yakuti ikhadafungulwa. Iye aikha mwendo wace wamadyo mʼbara, mbwenye wabzwere auikha kuntunda, 3 iye akhuwa mwakugaluza ninga kulira kwa nkhalamu.+ Pidakhuwa iye, njazi zinomwe+ zatoma kulonga.

4 Pidalonga njazi zinomwe, penepo pene ine ndikhafuna kulemba, mbwenye ndabva fala ikhabuluka kudzulu,+ mbilonga: “Koya ncibisobiso pinthu pidalongwa na njazi zinomwe, leka kupilemba.” 5 Anju adaona ine wakuti akhadalimira padzulu pa bara na kuntunda, alamusa nkono wace wamadyo mbaukwiza kudzulu, 6 iye adumbira mu dzina ya Ule wakuti ali na umaso kwenda na kwenda,+ adacita kudzulu na pinthu piri kweneko, dziko yapantsi na pinthu piri mwenemu,+ bara na pinthu piri mwenemu: “Iye nkhabe kudzadembukabve. 7 Mbwenye mu ntsiku zakuti anju wacinomwe+ anadzafuna kuliza tuluka yace,+ mwandimomwene cinadzakwanirisika cibisobiso cakucena+ cidalonga Mulungu ninga mphangwa zadidi kuna atumiki ace, akuti ndi aprofeta.”+

8 Penepo ndabva fala ikhabuluka kudzulu+ mbilonga pontho na ine kuti: “Ndoko, kwata bukhu yakufungulwa iri mʼmanja mwa anju adalimira padzulu pa bara na kuntunda.”+ 9 Ine ndaenda kuna anju unoyu, mbandimpanga toera andipase bukhu ingʼono. Iye andipanga: “Ikwate udye,+ iyo inadzacitisa mʼmimba mwako kuwawa, mbwenye nkanwa mwako, iyo inadzakhala yakutapira ninga uci.” 10 Ine ndakwata bukhu ingʼono mʼmanja mwa anju, mbandiidya;+ nkanwa mwanga iyo ikhatapira ninga uci,+ mbwenye pidamala ine kuidya, mʼmimba mwanga mukhawawa. 11 Iwo andipanga: “Usafunika kulonga pontho maprofesiya thangwi ya pinthu pinafuna kucitika kuna mbumba, madzindza, pilongero na amambo azinji.”