Khalani Na Cikhulupiro Cakuwanga Ku Umambo

“Cikhulupiro ndi cidikhiro candimomwene ca pinthu pinadikhirwa.”​—AHEB. 11:1, Tradução do Novo Mundo.

Mu Kuphatisira Bokosi “Mulungu Anadzakwanirisa Tani Cifuniro Cace,” Bwerezerani . . .

pikiro ya mu Edeni.

cibverano ca Abrahamu na cibverano ca Dhavidhi.

cibverano cakukhala nyantsembe ninga Melkisedeke.

1, 2. Ninji cinafuna kuwangisa cinyindiro cathu cakuti Umambo unadzakwanirisa cifuniro ca Mulungu kwa anthu, thangwi yanji? (Onani cithundzithundzi cakutoma.)

NINGA Mboni za Yahova, ife tisamwaza mphangwa mbatilonga kuti Umambo wa Mulungu ndiwo basi unafuna kumalisa nyatwa zathu zonsene, pontho tisaphedza anthu toera kubvesesa undimomwene unoyu wa Bhibhlya. Ife tisagumanambo cibalangazo kubulukira mu cidikhiro ca Umambo. Kodi tiri na cinyindiro cakuwanga cakuti Umambo wa Mulungu unadzakwanirisa cifuniro cawo? Thangwi yanji tinakwanisa kukhala na cikhulupiro cakuwanga ku Umambo?​—Aheb. 11:1.

² Umambo Waumesiya ndi masasanyiro adakhazikiswa na Mulungu Wamphambvu Zonsene toera kukwanirisa cifuniro cace kwa anthu. Cifuniro ca Umambo unoyu ndi kuthema kwa Yahova toera kutonga. Makhundu akufunika a Umambo​—ntongi wace, anyakutonga andzace, anthu na pinthu pinafuna kudzatonga iwo—​pyonsene pyakhazikiswa na Yahova mukuphatisira pibverano, peno masasanyiro akuti asaphataniza Mulungu peno Mwanace, Yezu Kristu. Kudinga mwacidikhodikho pibverano pyenepi kunadzathimizira kubvesesa kwathu pikiro ya Mulungu na kukhala na cinyindiro cakuti Umambo unoyu ndi wakuwanga.​—Lerini Aefesi 2:12.

3. Tinadzadinganji mu nsolo uno na unatowerera?

³ Bhibhlya isafokotoza pibverano pitanthatu pyakufunika kakamwe pinalonga pya Umambo Waumesiya wakuti uli m’manja mwa Yezu Kristu. Pibverano pyenepi ndi (1) cibverano ca Abrahamu, (2) cibverano ca Mwambo, (3) cibverano ca Dhavidhi, (4) cibverano cakukhala nyantsembe ninga Melkisedeke, (5) cibverano cipswa, na (6) cibverano ca Umambo. Tendeni tidinge kuti pibverano pyenepi pisalonganji thangwi ya Umambo na pisakwanirisa tani cifuniro ca Mulungu na dziko yapantsi pabodzi na anthu.​—Onani bokosi “Mulungu Anadzakwanirisa Tani Cifuniro Cace.”

PIKIRO INAPANGIZA KUTI CIFUNIRO CA MULUNGU CINADZAKWANIRISIKA TANI

4. Mwakubverana na bukhu ya Genesi, ndi midida ipi idakhazikisa Yahova thangwi ya anthu?

⁴ Yahova acita dziko yapantsi toera anthu akhale mwenemu, buluka penepo Iye akhazikisa midida iyi: Mulungu mbadacita anthu mwakulandana na iye, anthu akhafunika kucitisa dziko yonsene kukhala Paradizu na kuidzadza na anawo akulungama, pontho anthu nee akhafunika kudya nsapo wa muti wakudziwa pyadidi na pyakuipa. (Gen. 1:26, 28; 2:16, 17) Midida ineyi ndi pyonsene pikhafunika toera kukwanirisa cifuniro ca Mulungu kwa anthu na dziko yapantsi. Mphapo thangwi yanji Mulungu adzakhazikisa pibverano?

5, 6. (a) Kodi Sathani ayesera tani kupingiza cifuniro ca Mulungu? (b) Kodi Yahova atawira tani upomokeri wa Sathani mu Edeni?

⁵ Toera kupingiza kukwanirisika kwa cifuniro ca Mulungu, Sathani Dyabo atsogolera upanduki. Iye acita pyenepi mu kucitisa anthu kukhonda bvera Mulungu. Iye anyengerera Eva nkazi wakutoma toera kudya nsapo wa muti wakudziwa pyadidi na pyakuipa. (Gen. 3:1-5; Apok. 12:9) Mukucita pyenepi, Sathani apangiza kuti Mulungu nee athema kutonga pidacita Iye. Mukupita kwa ndzidzi, Sathani apambizira anthu kuti akhatumikira Mulungu thangwi ya maphindu akhatambira iwo.​—Yobe 1:9-11; 2:4, 5.

⁶ Kodi Yahova mbadatawira tani upomokeri wa Sathani mu Edeni? Mbadafudza anyakupandukira, mwandimomwene mbadamalisa kupandukira kwawo. Mbwenye pyenepi pisabvekambo kuti cifuniro ca Mulungu ca kudzadza dziko yapantsi na anthu akubulukira kwa Adhamu na Eva nee mbacidakwanirisika. Mbuto mwa kuafudza, Yahova atawira upomokeri wa Sathani mukukhazikisa profesiya ikulu kakamwe, pikiro ya mu Edeni​—toera kupangiza kuti mapikiro ace onsene thangwi ya dziko yapantsi na anthu mbadakwanirisika.​—Lerini Genesi 3:15.

7. Kodi pikiro ya mu Edeni isatipasa cinyindiro canji thangwi ya nyoka na mbeu yace?

⁷ Kubulukira mu pikiro ya mu Edeni, Yahova atonga nyoka na mbeu yace, pyenepi pisabveka​—Sathani Dyabo na onsene akhafuna kusankhula kukhala kukhundu yace toera kupingiza kuthema kwa Mulungu toera kutonga. Mulungu wandimomwene apasa mphambvu mbeu ya nkazi toera kufudza Sathani. Natenepa, pikiro ya mu Edeni nee yagomezera basi ene kufudzwa kwa ale adatsogolera upanduki mu Edeni na nyatwa zonsene zidabweresa iwo, mbwenye isapangizambo njira yakuti pyenepi mbipidacitwa tani.

8. Tisapfundzanji kubulukira ku cidzindikiro ca nkazi na mbeu yace?

⁸ Kodi mbeu ya nkazi mbadakhala ani? Nakuti mbeu ya nkazi isafunika kuphwanya nsolo wa nyoka, peno “kufudza” Sathani Dyabo, mbeu ineyi ikhafunika kukhala munthu wauzimu. (Aheb. 2:14) Natenepa, nkazi akhafuna kubala mbeu ineyi akhafunikambo kukhala wauzimu. Mu ndzidzi wakuti mbeu ya nyoka ikhanjipa, mbeu na nkazi apitiriza nee kudziwika mu pyaka 4000 kubulukira padacita Yahova pikiro ya mu Edeni. Mu ndzidzi unoyu, Yahova acita pibverano pizinji pyakuti pisapangiza mbeu ya nkazi, pontho pisapasa cinyindiro atumiki Ace cakuti mbeu mbidaphatisirwa na Mulungu toera kufudza nyatwa zidabweresa Sathani kwa anthu.

CIBVERANO CINAPANGIZA MBEU

9. Cibverano ca Abrahamu ninji, na catoma lini kuphata basa?

⁹ Mudapita pyaka 2000 pakumala kucita pikiro ya mu Edeni, Yahova aphemba Abrahamu toera kusiya nyumba yace ku Uri mu dziko ya Mesopotamya toera kuenda ku dziko ya Kanani. (Mach. 7:2, 3) Yahova ampanga: ‘Siya dziko yako, siya mbumba yako na nyumba ya babako; ndoko ku dziko inadzakupangiza ine. Ndinadzakucita mbumba ikulu, ndinadzakupasa nkhombo, mbandidzakuza dzina yako, iwembo mbudzakhala nkhombo kuli anango. Ndinadzapasa nkhombo ale anakupasa nkhombo, ndinadzaonesa nyatwa ale anakuonesa nyatwa. Mbumba yonsene yapantsi inadzapaswa nkhombo kubulukira mwa iwe.’ (Gen. 12:1-3) Anewa ndi mafala akutoma a cibverano ca Abrahamu​—cibverano cidacita Yahova Mulungu na Abrahamu. Mwandimomwene caka cidacita Yahova cibverano ceneci na Abrahamu nkhabe dziwika. Mbwenye ico catoma kuphata basa mu caka 1943 M.N.W., pa ndzidzi udabuluka Abrahamu ku Harani mbawambuka Nkulo wa Eufrate mukhakhala iye na pyaka 75 pyakubalwa.

10. (a) Kodi Abrahamu apangiza tani cikhulupiro cakuwanga ku mapikiro a Mulungu? (b) Ndi mphangwa zipi zakufunika zidapereka Yahova mwapang’ono pang’ono thangwi ya mbeu ya nkazi?

¹⁰ Yahova alonga mwakubwereza-bwereza pikiro ineyi kuna Abrahamu mbathimizira mphangwa zinango. (Gen. 13:15-17; 17:1-8, 16) Mudapangiza Abrahamu cikhulupiro cakuwanga ku mapikiro a Mulungu mu kuperekeka toera kupereka mwanace m’bodzi ekha ninga ntsembe, Yahova atsidzikiza cibverano cace mbagomezera kuti pikiro yace mbidakwanirisika. (Lerini Genesi 22:15-18; Ahebere 11:17, 18.) Mudatoma cibverano ca Abrahamu, mwapang’ono pang’ono Yahova apereka mphangwa zakufunika kakamwe thangwi ya mbeu ya nkazi. Mbeu ineyi mbidabulukira kwa Abrahamu, mbidanjipa, mbidakhala atongi, mbidafudza anyamalwa onsene, na mbidakhala nkhombo kwa anthu azinji.

11, 12. Kodi Bhibhlya isapangiza tani kuti cibverano ca Abrahamu cinadzakwanirisika munjira ikulu kakamwe, pyenepi pisabvekanji kwa ife?

¹¹ Pikiro ya cibverano ca Abrahamu, pakutoma yakwanirisika mudapita dzindza ya Abrahamu mu Dziko Yakupikirwa, mbwenye Bhibhlya isapangiza kuti mafala a cibverano ceneci anakwanirisikambo mwauzimu. (Agal. 4:22-25) Kukwanirisika kukulu kweneku, ninga mudafokotoza mpostolo Paulu, khundu yakutoma ya dzindza ya Abrahamu ndi Kristu, khundu yaciwiri ndi Akristu akudzodzwa akukwana 144.000. (Agal. 3:16, 29; Apok. 5:9, 10; 14:1, 4) Nkazi adabala mbeu ndi “Yerusalemu wakudzulu”​—khundu yakudzulu ya gulu ya Yahova yakuti isaphataniza aanju akukhulupirika a Mulungu. (Agal. 4:26, 31) Ninga pidapikirwa mu cibverano ca Abrahamu, mbeu ya nkazi mbidabweresa nkhombo kwa anthu.

¹² Cibverano ca Abrahamu cisapereka thangwi yakutawirika yakukhazikiswa kwa Umambo wa Mulungu, na cisafungula njira toera Mambo na ale anafuna kutonga na iye atambire Umambo unoyu. (Aheb. 6:13-18) Kodi cibverano ceneci cinadzaphata basa mpaka papi? Lemba ya Genesi 17:7 isalonga kuti ndi ‘cibverano cakukhala na kukhala.’ Ico cisaphata basa mpaka Umambo Waumesiya ufudze anyamalwa a Mulungu na kupasa nkhombo anthu onsene pa dziko yapantsi. (1Akor. 15:23-26) Mwandimomwene, ale anafuna kudzakhala pa dziko yapantsi anadzaphindula kwenda na kwenda. Cibverano ca Mulungu na Abrahamu cisapangiza kuti Yahova atonga kukwanirisa cifuniro cace cakuti dziko yapantsi ‘idzale na anthu’ akulungama!​—Gen. 1:28.

CIBVERANO TOERA KUPANGIZA KUTI UMAMBO NDI WAKWENDA NA KWENDA

13, 14. Kodi cibverano ca Dhavidhi cisapereka cinyindiro canji thangwi ya utongi Waumesiya?

¹³ Pikiro ya mu Edeni na cibverano ca Abrahamu pisapangiza ntsonga yakuti utongi wa Yahova usatsogolerwa na midida yace yakulungama. Natenepa, Umambo Waumesiya wakhazikiswa mwakubverana na midida yace yakulungama. (Sal. 89:14) Kodi Umambo Waumesiya unadzakhala wakuipa buluka penepo mbufudzwa? Cibverano cinango cakutawirika cisapasa cinyindiro cakuti pyenepi nkhabe kudzacitika.

¹⁴ Onani pidapikira Yahova kuna Mambo Dhavidhi wa Israele wakale kubulukira mu cibverano ca Dhavidhi. (Lerini 2 Samwele 7:12, 16.) Yahova acita cibverano ceneci na Dhavidhi mu ndzidzi ukhatonga iye mu Yerusalemu, mbapikira kuti Mesiya mbadabalwa mu dzindza ya Dhavidhi. (Luka 1:30-33) Munjira ineyi, Yahova apereka mphangwa zakuthimizirika za dzindza ikhafuna kudzabala Mesiya. Yahova alonga kuti mwana wa Dhavidhi mbadakhala na ‘mwai wakutawirika’ toera kukhala pa mpando wa Umambo Waumesiya. (Ezek. 21:25-27) Kubulukira mwa Yezu, umambo wa Dhavidhi ‘unadzakhala wakuwanga kwenda na kwenda.’ Inde, dzindza ya Dhavidhi ‘inathimiza pa kukhaliratu; umambo wace unakhalikira ninga dzuwa.’ (Sal. 89:34-37) Tiri na cinyindiro cakuti utongi Waumesiya cipo unadzakhala wakuipa peno kufudzwa, mbwenye unadzabweresa maphindu akukhonda mala!

CIBVERANO CAKUKHALA NYANTSEMBE

15-17. Mwakubverana na cibverano cakukhala nyantsembe ninga Melkisedeke, ndi basa ipi inango inafuna kudzacita mbeu? Thangwi yanji?

¹⁵ Cibverano ca Abrahamu na cibverano ca Dhavidhi pyapereka cinyindiro cakuti mbeu ya nkazi mbadaphata basa ninga ntongi. Mbwenye basa ineyi yokha nee mbidabweresa nkhombo kwa anthu a madzindza onsene. Toera kukhala na nkhombo yakukwana, iwo akhafunika kusudzulwa m’madawo na kuphatanizwa m’banja ya alambiri a Yahova yakudzulu na pantsi. Toera kukwanirisa pyenepi, mbeu ya nkazi ikhafunikambo kukhala nyantsembe. Natenepa, Yahova acita pyenepi kubulukira m’masasanyiro anango akutawirika, cibverano cakukhala nyantsembe ninga Melkisedeke.

¹⁶ Kubulukira mu Mambo Dhavidhi, Yahova apangiza kuti Iye mbadacita cibverano na Yezu na pifuniro piwiri: toera iye “akhale kunkono wamadyo wa [Mulungu]” mpaka kufudza anyamalwa ace, na kukhala ‘nyantsembe kwenda na kwenda sawasawa ninga Melkisedeke.’ (Lerini Masalmo 110:1, 2, 4.) Thangwi yanji kukhala ‘sawasawa ninga Melkisedeke’? Thangwi kale kakamwe dzindza ya Abrahamu mbidzati kupita mu Dziko Yakupikirwa, Melkisedeke, mambo wa dziko ya Salemi, atumikira ninga “nyantsembe wa Mulungu Wankulu Kakamwe.” (Aheb. 7:1-3) Iye akhadasankhulwa na Yahova toera kucita mabasa anewa. M’malemba Acihebere, ndiye basi analongwa kuti atumikira ninga mambo na nyantsembe. Kusiyapo pyenepi, nakuti iye nee apita pa mbuto ya munthu unango, pontho nkhabe adapita pa mbuto yace, iye anakwanisa kucemerwa ‘nyantsembe wa midzidzi yonsene,’ peno wakwenda na kwenda.

¹⁷ Yezu asankhulwa toera kukhala nyantsembe kubulukira mu cibverano ceneci cidacita Yahova na iye. Yezu anadzapitiriza kukhala ‘nyantsembe kwenda na kwenda sawasawa ninga Melkisedeke.’ (Aheb. 5:4-6) Pyenepi pisapangiza kuti Yahova anadzaphatisira Umambo Waumesiya toera kukwanirisa cifuniro cace kwa anthu na dziko yapantsi.

PIBVERANO NDI PFULI YAKUTAWIRIKA YA UMAMBO

18, 19. (a) Kodi pibverano pidadinga ife mpaka pano pisapangizanji thangwi ya Umambo? (b) Ninji pinafuna kudzadinga ife mu nsolo unatowerera?

¹⁸ Tinganyerezera pibverano pidadinga ife, tinakwanisa kuona kuti ipyo pisagomezera Umambo Waumesiya, pontho kuti Umambo wakhazikiswa mwakubverana na masasanyiro akutawirika. Pikiro ya mu Edeni isapangiza kuti Yahova anadzakwanirisa cifuniro cace kwa anthu na dziko yapantsi kubulukira mwa mbeu ya nkazi. Kodi mbeu ineyi mbadakhala ani, pontho mbadakhala na basa yanji? Cibverano ca Abrahamu cisafokotoza pyonsene.

¹⁹ Cibverano ca Dhavidhi cisapangiza pakweca dzindza ikhafuna kudzabala Mesiya​—khundu yakutoma ya mbeu ya nkazi, pontho cisampasambo mphambvu yakutonga dziko yapantsi toera pinafuna kudzakwanirisa Umambo pikhale kwenda na kwenda. Cibverano cakukhala nyantsembe ninga Melkisedeke cisatawirisa kuti mbeu ya nkazi aphate basa ninga nyantsembe. Mbwenye Yezu nee anadzakhala ekha m’basa yakuphedza anthu toera kukhala aungwiro. Anango asadzodzwa toera kutumikira ninga atongi na anyantsembe. Kodi iwo mbadabuluka kupi? Tinadzadinga pyenepi mu nsolo unatowerera.

[Bokosi pa tsamba 15]

MULUNGU ANADZAKWANIRISA TANI CIFUNIRO CACE

Pikiro ya mu Edeni isapangiza kuti Mulungu anadzaphatisira Umambo toera kukwanirisa cifuniro cace cakutoma kwa anthu na dziko yapantsi. Ipi ndi pibverano pitanthatu pinakwanirisa cifuniro ca Mulungu:

CIBVERANO CA ABRAHAMU

ANYAKUCITA KHUNDU: Yahova na Abrahamu

CIFUNIRO: Kupereka cinyindiro cakutawirika toera ‘mbeu’ ya “nkazi” inalongwa pa Genesi 3:15 atonge mu Umambo

CIBVERANO CA MWAMBO

ANYAKUCITA KHUNDU: Yahova na dzindza ya Israele

CIFUNIRO: Kutsidzikiza ‘mbeu’ na kutsogolera anthu toera kudzindikira Mesiya

CIBVERANO CA DHAVIDHI

ANYAKUCITA KHUNDU: Yahova na Dhavidhi

CIFUNIRO: Kupangiza kuti Umambo Waumesiya unadzabulukira mu dzindza ya Dhavidhi, pontho pinafuna kudzakwanirisa Umambo pinadzakhala kwenda na kwenda

CIBVERANO CAKUKHALA NYANTSEMBE NINGA MELKISEDEKE

ANYAKUCITA KHUNDU: Yahova na Yezu

CIFUNIRO: Kupereka mathangwi akutawirika toera Yezu​—khundu yakutoma ya ‘mbeu’ ya nkazi—​akhale mambo na nyantsembe kwenda na kwenda

CIBVERANO CIPSWA

ANYAKUCITA KHUNDU: Yahova na Israele wauzimu

CIFUNIRO: Kupereka thangwi yakutawirika toera Akristu akukwana 144.000 akhale ninga ana a Mulungu na kucita khundu yaciwiri ya ‘mbeu’ ya nkazi

CIBVERANO CA UMAMBO

ANYAKUCITA KHUNDU: Yezu na Israele wauzimu

CIFUNIRO: Mwakutawirika cisaphataniza Akristu akudzodzwa na Kristu toera kutonga ninga atongi na kutumikira ninga anyantsembe kudzulu