Mudabuluswa Mitawiro ya Umaso Wathu Wacikristu na Utumiki
© 2023 Watch Tower Bible and Tract Society of Pennsylvania
SUMANA 6-12 YA NOVEMBRO
MPFUMA ZA MAFALA A MULUNGU | YOBE 13-14
“Kodi Munthu Angafa, Anakwanisa Kukhala Pontho na Umaso?”
Sentinela 15/10/99 tsa. 3 ndima 1-3
Cifuno Cathu Cakukhala Kwenda na Kwenda
NGAKHALE lero, ndi anthu akucepa anapokanya kuti umaso ndi wa ndzidzi wakucepa, maseze mafala anewa alembwa pyaka 3.500 nduli. Anthu asaona kuti nee ndi pyakutsandzayisa kukhala na umaso mu ndzidzi wakucepa, buluka penepo mbakalamba na kufa. Na thangwi ineyi, kutomera kale anthu asasaka njira zakuthimizira umaso wawo.
Mu ndzidzi wa Yobe, Aejitu akhadya matangala a pinyama na cifuno cakukhala pontho aphale. Mukupita kwa ndzidzi, anthu anango ayesera kucita ntombwe wakuti mbudacitisa anthu kukhala na umaso mu ndzidzi uzinji. Azinji mwa anthu anewa akhakhulupira kuti ouro wakucitwa na anthu mbudacitisa kukhala na umaso wakukhonda mala, pontho kudyera m’maparato a ouro mbakudathimizira ndzidzi wa umaso. Anthu a uphemberi wakale ku Xina ukhacemerwa Taoismo akhanyerezera kuti kunyerezera mwacidikhodikho, masendzekero akubulusa muya nkanwa, kukhonda kudya maningi mbakudakwanisa kucinja manungo a munthu mbakhala na umaso wa kwenda na kwenda.
Nyakucita maulendo wa ku Espanya, Juan Ponce de León asadziwika thangwi yakusaka kwace njira zakukhala pontho m’phale. Dotoro unango wa mu pyaka 1800 alonga mu bukhu yace ikhacemerwa Hermippus Redivivus kuti amiyali akhafunika kuikhwa nkwartu ing’ono mu ndzidzi wa khoni, pontho muya wawo ukhafunika kuikhwa m’magarafa toera uphatisirwe ninga ntombwe wakuthimizira umaso. Nee cibodzi mwa pinthu pyenepi pyaphata basa.
Ncenjezi 15/4/15 tsa. 32 ndima 1-2
Muti Ungagwandwa Unakwanisa Kuphukira Pontho?
MWAKULANDANISWA na miti ya sedro ya ku Libano, mulivera ukulu usaoneka ninga nee ndi wakudzumisa kakamwe. Mbwenye milivera iri na makhaliro akuti asaphedza toera kupirira makhaliro akunentsa. Milivera inango isalongwa kuti iri na pyaka 1.000 pya umaso. Mitcitci ya kutawa kakamwe ya milivera isaphedza toera kuphukira muti upswa, maseze muti wace ungagwandwa. Khala mitcitci iciri maso, iwo unadzaphukira pontho.
Yobe akhali na cinyindiro cakuti angafa, mbadakhala pontho na umaso. (Yobe 14:13-15) Iye aphatisira muti toera kupangiza cinyindiro cace cakuti Mulungu ali na luso ya kumulamusa muli akufa. Panango muti ukhalonga iye ukhali mulivera. Yobe alonga: ‘Muti ene uli na cidikhiro. Ungatemwa, unaphwetera pontho mbutawisa nthawi zipswa. Muti wenewu ungasalikira tsinde na mitcitci ya kale basi pantsi pace, male ungabvumbirwa pang’ono basi, unaphwetera pontho ninga muti upswa.’—Yobe 14:7-9.
Sentinela 1/3/11 tsa. 22 ndima 5
“Munadzatsuwa Basa ya Manja Anu”
Mafala a Yobe asatipfundzisa kuti Yahova asatsalakana ale anan’nyindira ninga pidacita Yobe, mbatawira kutsogolerwa na iye toera akhale akutawirika kuna Iye. (Izaiya 64:8) Yahova asakomerwa kakamwe na atumiki ace akukhulupirika. Na thangwi ineyi, iye asatsuwa atumiki ace akukhulupirika adafa. Nyakufufudza unango alonga kuti fala ineyi Yacihebheri idathumburuzwa kuti kutsuwa “isapangiza mabvero a munthu anatsuwa kakamwe ndzace.” Mwandimomwene, Yahova nee asakumbuka basi ene atumiki ace adafa, mbwenye asafunambo kakamwe kualamusa muli akufa.
Mpfuma Zauzimu
Perspicaz vol. 1 tsa. 492
Dotha
Dotha ikhaphatisirwambo toera kulonga cinthu cakusowa basa. Mwacitsandzo, Abhrahamu alonga kuna Yahova kuti “ine ndine pfumbi na dotha.” (Gen. 18:27; onanimbo Iza. 44:20; Yobe 30:19.) Pontho Yobe alonga kuti mafala adalonga axamwali ace akuipa ndi “akusowa basa ninga dotha.”—Yobe 13:12.
SUMANA 13-19 YA NOVEMBRO
MPFUMA ZA MAFALA A MULUNGU | YOBE 15-17
“Lekani Kutowezera Elifaji Pakubalangaza Anango”
Sentinela 15/9/05 tsa. 26 ndima 4-5
Calirani Manyerezero Akuipa!
M’maulendo matatu, Elifaji alonga kuti Mulungu asaphemba pizinji kakamwe, pontho pyonsene pinacita atumiki ace nkhabe kunkomeresa. Elifaji apanga Yobe: “Iye nkhabe kunyindira atumiki ace, pontho asaona madodo kuna aanju ace.” (Yobe 4:18) Mukupita kwa ndzidzi Elifaji alonga tenepa thangwi ya Mulungu: “Ona! Iye nkhabe kunyindira aanju ace, nee kudzulu si kwakucena tayu pamaso pace.” (Yobe 15:15) Pontho iye abvundza: “Kodi Wamphambvu Zonsene anapyonji khala ndiwe wakulungama?” (Yobe 22:3) Bhildhadhe akhaphedzerambo maonero anewa, thangwi iye alonga: “Nee mwezi si wakuyetimira tayu kuna iye, nyenyezi si zakucena tayu pamaso pa [Mulungu].”—Yobe 25:5.
Ife tisafunika kucalira manyerezero anewa. Thangwi iwo anakwanisa kuticitisa kunyerezera kuti Mulungu asaphemba pizinji kakamwe kuna ife. Pontho manyerezero anewa anafudza uxamwali wathu na Yahova. Kusiyapo pyenepi, tingakhala na manyerezero anewa, nee tinakhala na maonero adidi tingasandikwa. M’mbuto mwakutawira uphungu mwakucepeseka, panango ‘tinaipirwa na Yahova,’ pontho panango tinapitiriza na kuipirwa kweneku. (Misangani 19:3) Mwakukhonda penula, pyenepi pinafudza uxamwali wathu na Yahova!
Ncenjezi 15/2/15 tsa. 9 ndima 16
Towezerani Kucepeseka na Kukoma Ntima Kwa Yezu
16 Mafala athu adidi. Kukoma ntima kwathu kusatikulumiza toera ‘kubalangaza ale anafewa m’mitima yawo.’ (1 Ates. 5:14) Tinalonganji toera kuwangisa anthu anewa? Tinakwanisa kuasimba na kupangiza citsalakano cathu candimomwene kwa iwo. Tinakwanisa kuaphedza toera kuona maluso na makhaliro awo adidi. Tinakwanisa kuakumbusa kuti Yahova aaphedza toera kudziwa undimomwene, natenepa, iwo ndi akufunika kakamwe pamaso pace. (Jwau 6:44) Tinakwanisa kuapasa cinyindiro cakuti Yahova asatsalakana kakamwe atumiki ace akuti ali ‘akutsukwala’ peno ale ‘adataya cipapo’ cawo. (Sal. 34:18) Mafala athu adidi anakwanisa kukhuya kakamwe ale akuti asafuna cibalangazo.—Mis. 16:24.
Mpfuma Zauzimu
Sentinela 15/3/06 tsa. 14 ndima 11
Ntsonga Zikulu za Bukhu ya Yobe
Yobe 7:9, 10; 10:21; 16:22—Kodi mafala a Yobe asapangiza kuti nee akhakhulupira kulamuswa kwa anthu muli akufa? Mafala anewa asapangiza pinthu pikhafuna kucitikira Yobe. Mphapo iye akhafuna kulonganji? Panango akhafuna kulonga kuti angafa, anthu adakhala pabodzi na iye nee mbadamuonabve. M’maonero awo, Yobe nee mbadabwererabve panyumba pace, pontho nee mbadadzindikirwa mpaka ndzidzi udakhazikisa Mulungu. Panango Yobe akhafuna kulongambo kuti nkhabepo munthu anakwanisa kubuluka mu Nthumbi ekhene. Lemba ya Yobe 14:13-15 isapangiza pakweca kuti Yobe akhali na cidikhiro cakulamuswa muli akufa.
SUMANA 20-26 YA NOVEMBRO
MPFUMA ZA MAFALA A MULUNGU | YOBE 18-19
“Lekani Kusiya Alambiri Andzanu”
Ncenjezi 01.22 tsa. 16 ndima 9
Tinapfundzanji Thangwi ya Kulira Kwa Yezu?
9 Imwe munakwanisa kuphedza anthu adaferwa. Kusiyapo kulira kudacita Yezu na Mariya pabodzi na Marta, iye aabvesera mu ndzidzi ukhalonga iwo mbaabalangaza. Ife tinakwanisambo kucita pibodzi pyene kuna ale adaferwa. Dan, nkulu wa mpingo wa ku Australia alonga: “Pidaferwa ine na nkazanga ndikhafuna kakamwe ciphedzo. Abale azinji pabodzi na akazawo, ndzidzi onsene akhali dzololo toera kundibvesera. Iwo akhandisiya kulonga thangwi ya kutsukwala kwanga, pontho nee akhapasika manyadzo mu ndzidzi ukhalira ine. Kusiyapo pyenepi iwo akhandiphedza toera kucita mabasa anango, ninga kutsuka karu yanga, kugula pinthu na kuphika mu ndzidzi wakuti nee ndikhakwanisa kucita pyenepi. Pontho ndzidzi onsene akhacita phembero pabodzi na ine. Iwo apangiza kuti akhali axamwali andimomwene, pontho akhali dzololo toera kundiphedza ‘midzidzi ya nyatwa.’ ”—Mis. 17:17.
Ncenjezi 09.21 tsa. 30 ndima 16
Musafunika Kucitanji Khala Munthu Anafuna Imwe Asiya Kutumikira Yahova?
16 Pitirizani kuphedza acibale akukhulupirika a munthu adabuluswa mu mpingo. Mu ndzidzi unoyu, iwo asafuna kakamwe kuti mupangize ufuni kuna iwo na kuawangisa. (Aheb. 10:24, 25) Midzidzi inango, acibale a munthu adabuluswa mu mpingo asaona kuti abale na alongo anango mu mpingo nee asacedza nawo. Pyenepi pisaacitisa kupibva ninga abuluswambo mu mpingo. Mbwenye ife nee tisafuna kuti iwo akhale na mabvero anewa. Ife tisafunika kusimba na kuwangisa aphale na atsikana akuti anyakubalawo asiya undimomwene. Maria wakuti mamunace abuluswa mu mpingo mbansiya alonga: “Axamwali anga anango abwera kunyumba kwanga, andiphedza kuphika cakudya, pontho andiphedza kupfundza Bhibhlya pabodzi na ananga. Iwo akhabvesesa kutsukwala kwanga, pontho akhalira pabodzi na ine. Iwo akhanditsidzikiza mu ndzidzi ukhandilonga anthu anango mwakuipa. Mwandimomwene, iwo andiwangisa kakamwe.”—Aroma 12:13, 15.
Sentinela 1/9/90 tsa. 22 ndima 20
Kodi Imwe Musawangisira Toera Kukhala na Miyai Yakutumikira?
20 Nsoka wa akulu a mpingo usafunika kubvesesa kuti kusiya kutumikira ninga nkulu wa mpingo peno ntumiki wakutumikira panango kunakhala kwakutsukwalisa kakamwe, ngakhale kuti munthu asankhula ekha kucita pyenepi. Khala nee abuluswa mu mpingo, pontho khala akulu a mpingo aona kuti iye atsukwala, asafunika kum’phedza mwaufuni. (1 Atesalonika 5:14) Iwo asafunika kum’phedza toera abvesese kuti iye ndi wakufunika mu mpingo. Ngakhale kuti apaswa uphungu, khala ndi wakucepeseka na wakupereka takhuta, panango nee panafunika kupita ndzidzi uzinji toera apaswe pontho miyai yakutumikira.
Mpfuma Zauzimu
Sentinela 1/10/94 tsa. 32
Mphambvu ya Mafala Adidi
Mu ndzidzi ukhafuna Yobe ciwangiso, Elifaji na axamwali ace nee alonga mafala adidi. Iwo apasa mulando Yobe thangwi ya nyatwa zikhatamba iye, mbalonga kuti panango iye acita pinthu pyakuipa mwacibisobiso. (Yobe 4:8) Bhibhlya inango inacemerwa Interpreter yalonga: “Yobe basi ene akhafuna kubverwa ntsisi na anthu. Mbwenye iwo ampanga pinthu pizinji pyauphemberi na mafala akusowa basa.” Natenepa Yobe adzudzumika kakamwe na mafala a Elifaji na andzace mbalonga mwakutsukwala: “Mpaka lini munapitiriza kunditsukwalisa, mbamundiphekesa na mafala?”—Yobe 19:2.
Nee tisafunika kutsukwalisa m’bale peno mulongo na mafala analonga ife mwakukhonda nyerezera. (Onani Dheuteronomyo 24:15.) Bhibhlya isaticenjeza: “Lirimi iri na mphambvu yakupha na yakupasa umaso; ale anakomerwa na kuphatisira lirimi anadzadya misapo yace.”—Misangani 18:21.
SUMANA 27 YA NOVEMBRO–3 YA DEZEMBRO
MPFUMA ZA MAFALA A MULUNGU | YOBE 20-21
“Kukhala Wakulungama Nee Kusanyindira Mpfuma”
Sentinela 1/8/07 tsa. 29 ndima 12
Kodi Imwe Ndimwe “Wakupfuma Kuna Mulungu”?
12 Yezu alonga kuti kukhala wakupfuma kuna Mulungu ndi pyakusiyana na kukhala na pinthu pizinji pyakumanungo. Natenepa, mafalace asapangiza kuti nee tisafunika kudzudzumika na kugumanya mpfuma peno kukomerwa na pinthu piri na ife. M’mbuto mwace, tisafunika kuphatisira mpfuma zathu munjira yakuti tinawangisa uxamwali wathu na Yahova. Tingacita pyenepi tinakhala akupfuma kuna Mulungu. Thangwi yanji? Thangwi pinatiphedza toera kutambira nkhombo zizinji za Yahova. Bhibhlya isalonga: “Nkhombo za Yahova zisapfumisa, pontho iye nkhabe kuthimizirapo nyatwa.”—Misangani 10:22.
Mpfuma Zauzimu
Sentinela 1/1/95 tsa. 9 ndima 19
Kukunda Sathani na Mabasa Ace
19 Ntumiki wa Mulungu Yobe athimbana na ‘manyerezero akudzudzumisa’ adabweresa Sathani mukuphatisira Elifaji na Sofari. (Yobe 4:13-18; 20:2, 3) Natenepa Yobe ‘athabuka’ mbalonga “mafala akuphonyeka” thangwi ya pinthu “pyakugopswa” pikhanyerezera iye. (Yobe 6:2-4; 30:15, 16) Eliyu abvesera mwadidi Yobe mbamphedza toera adzindikire maonero a Yahova thangwi ya nyatwa zace. Munjira ibodzi lero, akulu a mpingo anapangiza kuti asatsalakana ale adatsukwala mukukhonda thimizira nyatwa zawo. Ninga Eliyu, iwo asaabvesera mwakupirira, buluka penepo mbaphatisira Mafala a Mulungu toera kuabalangaza. Natenepa onsene anadzudzumika na pinthu pidaacitikira na pidakhonda kuacitikira, peno ‘anagopeswa na ndoto na masomphenya’ ninga pidacitikira Yobe, anakwanisa kugumana cibalangazo m’Mafala a Mulungu na mu mpingo.—Yobe 7:14; Tiyago 4:7.
SUMANA 4-10 YA DEZEMBRO
MPFUMA ZA MAFALA A MULUNGU | YOBE 22-24
“Kodi Pinakwanisika Kuti Munthu Akhale Wakufunika Kuna Mulungu?
Sentinela 15/9/05 tsa. 27 ndima 1-3
Calirani Manyerezero Akuipa!
Maonero anango akulandana na maonero akuti Mulungu asaphemba pizinji kuna atumiki ace ndi akuti iye asaona anthu ninga akusowa basa. Paulendo wacitatu udalonga iye, Elifaji abvundza: “Kodi pinakwanisika kuti munthu akhale wakufunika kuna Mulungu? Munthu waluso anakwanisa kuphedza Mulungu?” (Yobe 22:2) Mafala a Elifaji akhapangiza kuti anthu ndi akusowa basa kuna Mulungu. Kusiyapo pyenepi, Bhildhadhe alonga: “Pinakwanisika tani kuti munthu akhale wakulungama pamaso pa Mulungu? Peno pinakwanisika tani kuti munthu adabalwa na nkazi akhale wakusowa mulando?” (Yobe 25:4) Mwakubverana na mafala anewa, Yobe mbadanyerezera kuti nee mbadakwanisa kukhala wakulungama pamaso pa Mulungu.
Anthu anango lero asakhala na manyerezero akuipa thangwi ya iwo. Panango iwo asakhala na manyerezero anewa thangwi ya njira idakuzwa iwo, nyatwa zidathimbana na iwo peno kusankhulana thangwi yakusiyana kwa madzindza. Kusiyapo pyenepi, Sathani na madimonyo ace asakomerwa kakamwe na kuthabusa anthu. Munthu anakhala na manyerezero anewa anatsukwala, pontho anapibva kuti pyonsene pinacita iye ndi pyakusowa basa kuna Mulungu Wamphambvu Zonsene. Mukupita kwa ndzidzi, panango iye anasiya kutumikira Mulungu wa m’maso.—Ahebheri 2:1; 3:12.
Kukalamba na nyatwa za ungumi pisatipingiza toera kucita pizinji. Basa inacitira ife Yahova panango tinaiona ninga yakucepa tingailandanisa na ikhacita ife mu ndzidzi ukhali ife aphale, aungumi wadidi na amphambvu. Ndi pyakufunika kakamwe kudzindikira kuti Sathani na madimonyo ace asafuna tipibve kuti pinacita ife ndi pyakusowa basa kuna Mulungu! Natenepa tisafunika kucalira manyerezero anewa.
Sentinela 15/2/95 tsa. 27 ndima 6
Tisapfundzanji Khala Tiri Kuthimbana na Nyatwa?
Axamwali atatu a Yobe antsukwalisa pidalonga iwo maonero awo m’mbuto mwakulonga udziwisi wa Mulungu. Elifaji alonga kuti ‘Mulungu nkhabe kunyindira atumiki ace,’ pontho Iye nkhabe napyo basa khala Yobe akhali wakulungama peno nkhabe. (Yobe 4:18; 22:2, 3) Mwakukhonda penula, mafala anewa akhali akutsukwalisa kakamwe. Na thangwi ineyi, Yahova asandika Elifaji na axamwali ace thangwi ya mafala adalonga iwo. Iye alonga: “Imwe nee mwalonga undimomwene wa ine.” (Yobe 42:7) Mbwenye iwo alonga pinthu pinango pyakutsukwalisa kakamwe.
Sentinela 15/4/03 tsa. 14-15 ndima 10-12
Aphale na Atsikana Anakomeresa Ntima wa Yahova
10 Mphangwa zenezi zidalembwa m’Bhibhlya zisapangiza kuti Sathani nee asapenula basi ene kukhulupirika kwa Yobe, mbwenye asapenula kukhulupirika kwa atumiki onsene a Mulungu, kuphatanizambo imwe. Mu ndzidzi udalonga iye thangwi ya anthu onsene, Sathani apanga Yahova: “Khanda na khanda. Munthu anapereka pyonsene piri na iye toera kupulumusa umaso wace.” (Yobe 2:4) Kodi musaona kuti pidalonga Sathani pisakukhuyanimbo? Mwakubverana na Misangani 27:11, Yahova asalonga kuti pana cinthu cakuti munakwanisa kucicita toera iye akwanise kutawira ule anampambizira, Sathani. Nyerezerani basi. Ntongi Wakudzulu na pa Dziko Yapantsi asakuphembani toera mum’phedzere pakutawira uthambi wa Sathani. Unoyu ndi mwai, pontho ndi basa ikulu kakamwe! Kodi munakwanisa kucita pinakuphembani Yahova ninga pidacita Yobe? (Yobe 2:9, 10) Yezu na anthu anango azinji kuphatanizambo aphale na atsikana, akwanisa. (Afilipi 2:8; Apokalipse 6:9) Imwe munakwanisambo. Mbwenye citani mphole-mphole, thangwi pinthu pinacita imwe pinakwanisa kupangiza khala musaphedzera Sathani peno Yahova.
Yahova Asakutsalakanani!
11 Kodi cisankhulo cinacita imwe ndi cakufunikadi kuna Mulungu? Kodi anthu adakhala akukhulupirika nee akwana toera iye atawire Sathani? Ndimomwene kuti pyaoneka pakweca kuti mafala adalonga Sathani kuti anthu nee asatumikira Yahova thangwi ya ufuni ndi authambi, mbwenye Yahova asafuna kuti muphedzere utongi wace thangwi asakutsalakanani. Yezu alonga: “Babanga wakudzulu nkhabe funa kuti m’bodzi wa anthu awa akucepeseka atayike.”—Mateu 18:14.
12 Mwakukhonda penula, Yahova asaona cisankhulo cinacita imwe. Kusiyapo pyenepi, iye asakhuyiwambo na cisankhulo canu. Bhibhlya isapangiza kuti Yahova asakhuyiwa kakamwe na pisankhulo pyadidi peno pyakuipa pinacita anthu. Mwacitsandzo, mu ndzidzi ukhacita Aizraeli pinthu pyakuipa mwakubwereza-bwereza, Yahova ‘atsukwala.’ (Masalmo 78:40, 41) Mu ndzidzi wakuti Madzi Makulu akhadzati kuoneka mu ntsiku za Nowa, pontho “kuipisa kwa anthu kukhadakula pa dziko yapantsi,” Yahova “atsukwala muntima mwace.” (Genesi 6:5, 6) Pyenepi pisabvekanji? Mungacita cisankhulo cakuipa munatsukwalisa Nciti wanu. Pyenepi nee pisabveka kuti Mulungu ndi wakusowa mphambvu peno asatsogolerwa na mabvero. Mbwenye iye asakufunani, pontho asafuna kuti mukhale na umaso wadidi. Kusiyapo pyenepi, mungacita pinthu pyadidi, munakomeresa ntima wa Yahova. Iye nee anatsandzaya basi ene thangwi anakwanisa kutawira Sathani, mbwenye thangwi anakwanisambo kukupasani nkhombo. Pontho iye asafuna kakamwe kucita pyenepi. (Ahebheri 11:6) Mwandimomwene Yahova ndi Baba waufuni kakamwe!
Mpfuma Zauzimu
Sentinela 15/7/04 tsa. 21-22
Khazikisani Pifuno Pyauzimu Toera Kusimba Nciti Wanu
Nyerezerani njira idacita Yahova kudzulu na dziko yapantsi. Na mafala akuti “aoneka masiku, mbaoneka macibese,” Yahova acitisa kuti paoneke midzidzi miwiri yakusiyana. (Genesi 1:5, 8, 13, 19, 23, 31) Pakutoma kwa ntsiku ibodzi na ibodzi, iye akhadziwa mwadidi cifuniro ca ntsiku ineyi. Pontho Mulungu akwanirisa cifuniro cace cakucita pinthu. (Apokalipse 4:11) Yobe alonga: “[Yahova] angafuna kucita cinthu, iye asacicita.” (Yobe 23:13) Mwandimomwene Yahova atsandzaya kakamwe pidaona iye kuti “pinthu pyonsene pidacita iye pikhali mwadidi kakamwe”!—Genesi 1:31.
Toera cifuniro cathu cikwanirisike tisafunika kukhala na cifuno cakuwanga. Ninji pinafuna kutiphedza toera kukhala na cifuno ceneci? Ngakhale mu ndzidzi wakuti Yahova akhadzati malisa kucita dziko yapantsi, iye akwanisa kuona kuti dziko mbidakhala yakubalika kakamwe mbimpasa mbiri na cilemedzo. Munjira ibodzi ene, toera kukwanirisa cifuno cathu tisafunika kunyerezera pinthu pyadidi pinafuna kucitika tingakwanirisa cifuno ceneci. Ndi pyenepi pidacitikira m’phale unango wa pyaka 19 anacemerwa Tony. Iye cipo aduwala pinthu pidaona iye paulendo wakutoma udaenda iye kaona bheteli ya Mboni za Yahova ya ku Europa Ocidental. Kutomera pa ntsiku ineyi, akhabvundzika: ‘Umaso wanga unakhala tani ndingatumikira pa mbuto ineyi?’ Tony apitiriza kuwangisira toera akwanise kutumikira ku bheteli. Mwakutsandzayisa, pidapita pyaka pingasi iye acemerwa toera akatumikire ku bheteli!
SUMANA 11-17 YA DEZEMBRO
MPFUMA ZA MAFALA A MULUNGU | YOBE 25-27
“Nee Tisafunika Kukhala Aungwiro Toera Tikhale Akukhulupirika”
Perspicaz vol. 1 tsa. 1235 ndima 7
Kukhulupirika
Yobe. Yobe akhala m’maso pidamala kufa Zuze, pontho Mose mbadzati kukhala ntsogoleri wa Aizraeli. Bhibhlya isalonga kuti iye “akhali munthu wakulungama na wakukhulupirika; iye akhagopa Mulungu mbacalira pinthu pyakuipa.” (Yobe 1:1) Mafala adalonga Sathani kuna Yahova kudzulu asapangiza kuti kukhulupirika kwa anthu ndi kwakufunika kakamwe kuna Yahova. Sathani apambizira Yobe mbalonga kuti iye akhatumikira Yahova thangwi ya pinthu pikhafuna iye. Natenepa iye apenula kukhulupirika kwa Yobe kuna Mulungu. Maseze Sathani atawiriswa kufudza mpfuma ya Yobe na kupha anace, nee akwanisa kufudza kukhulupirika kwa Yobe. (Yobe 1:6–2:3) Buluka penepo Sathani alonga kuti Yobe akwanisa kupirira kufudzwa kwa anace na mpfuma zace, mbwenye iye nee akhafuna kufa. (Yobe 2:4, 5) Buluka penepo iye aphatwa na utenda wakugopswa kakamwe, akakamizwa na nkazace toera akhonde Mulungu, pontho atikanwa na axamwali ace akuti akhalonga mwakuipa midida ya Mulungu na cifuniro cace. (Yobe 2:6-13; 22:1, 5-11) Ngakhale tenepo, Yobe apitiriza kukhala wakukhulupirika. Iye alonga: “Mpaka kufa kwanga, ine nee ndinasiya kukhala munthu wakukhulupirika! Ndinapitiriza na ulungami wanga, mbandikhonda kuusiya; ntima wanga nee unandipasa mulando mu ndzidzi unapitiriza ine na umaso.” (Yobe 27:5, 6) Kukhulupirika kwace kwapangiza kuti Sathani ndi nyauthambi.
Ncenjezi 02.19 tsa. 3 ndima 3-5
Pitirizani Kukhala Akukhulupirika!
3 Kodi atumiki a Mulungu asapangiza tani kuti ndi akukhulupirika? Iwo asapangiza kuti ndi akukhulupirika angatumikira Yahova basi, mbawangisira ndzidzi onsene kucita pinafuna iye. M’Bhibhlya fala Yacihebheri yakuti “kukhulupirika” isapangiza makhaliro a cinthu cakusowa cilema, caungumi wadidi, peno cakusowa midonthi. Mwacitsandzo, Mwambo ukhalonga kuti pinyama pikhafuna kupereka Aizraeli ninga ntsembe kuna Yahova, pikhafunika kukhala pyakusowa cilema na pyaungumi wadidi. (Lev. 22:21, 22) Atumiki a Mulungu nee akhatawiriswa kupereka ntsembe ya cinyama cakusowa mwendo, khutu, diso peno cakuduwala. Yahova akhafuna kuti anthu apereke ntsembe ya cinyama cakusowa cilema, caungumi wadidi, peno cakusowa midonthi. (Mal. 1:6-9) Toera tibvesese kuti thangwi yanji Yahova asafuna anthu a makhaliro adidi akuti asawangisira kucita pinafuna iye, tendeni tinyerezere pinacita ife tingafuna kugula nsapo peno feramentu. Ife nkhabe gula nsapo wakubvunda peno feramentu yakudinganyika. M’mbuto mwace, ife tisagula cinthu cadidi na cakusowa cilema. Yahova asadikhira kuti ticitembo pibodzi pyene pakupangiza ufuni peno kukhulupirika kwathu kuna iye. Iye asafuna kuti tikhale akhulupirika mu pinthu pyonsene.
4 Kodi tisafunika kukhala aungwiro toera tikhale akukhulupirika? Kusiyapo pyenepi, panango ife tinakwanisa kupibva kuti tisadawa kazinji kene. Mbwenye tisafunika kukumbuka pinthu piwiri pyakufunika. Cakutoma, Yahova nee asayan’gana madodo athu. Bhibhlya isalonga: ‘Yahova, mbadayang’ana basi ene madado athu, mbani akhafuna kuntumikira?’ (Masal. 130:3) Iye asadziwa kuti ndife anthu akusowa ungwiro na akudawa, ndi thangwi yace asatilekerera na ntima onsene. (Masal. 86:5) Caciwiri, Yahova asadziwa pinthu pinacimwana ife kucita, pontho nee asadikhira kuti ticite pinthu pizinji pyakuti nee tinapikwanisa. (Lerini Masalmo 103:12-14.) Mphapo, ndi munjira ipi iye asadikhira kuti tikhale akukhulupirika peno akutawirika pamaso pace?
5 Kuna atumiki a Yahova, cinthu cinaacitisa kukhala akukhulupirika ndi ufuni. Ufuni wathu kuna Mulungu na kuperekeka kwathu kwa iye ninga Babathu wakudzulu kusaticitisa kukhala akukhulupirika kwa iye peno akusowa midonthi. Tingakhala na ufuni maseze tithimbane na pinentso tisakhala akukhulupirika. (1 Pya Dziko. 28:9; Mat. 22:37) Nyerezerani pontho pidacitikira Mboni zitatu zidalonga ife pakutoma. Thangwi yanji iwo akhala akukhulupirika? Kodi ntsikana nee akhafuna kusendzeka na andzace? M’phale akhafuna kuti apaswe manyadzo na ndzace wakuxikola? Kodi mamuna akhafuna kuti aluze basa yace? Nkhabe. M’mbuto mwace, iwo akhadziwa kuti Yahova ali na midida ya makhaliro adidi, ndi thangwi yace iwo akhafuna kunkomeresa. Ufuni wawo waacitisa kunyerezera Yahova mbadzati kucita cisankhulo. Munjira ineyi iwo apangiza kuti akhali akukhulupirika.
Mpfuma Zauzimu
Ncenjezi 11.16 tsa. 10 ndima 3
Kukhala Maso Mwakubverana na Mafala a Mulungu
3 Tingayang’ana pinthu pidacita Yahova, tisaona kuti iye ndi Mulungu wakucita pinthu munjira yadidi. Yahova ‘akhazikisa dziko yapantsi mwandzeru. Iye acita kudzulu mwaudziwisi.’ (Misangani 3:19) Pana pinthu pizinji pidacita Yahova pyakuti ife nkhabe kupidziwa. Mwandimomwene, ‘pinabva ife thangwi ya iye ndi ninga mafala aciwerewere.’ (Yobe 26:14) Mbwenye pyakucepa pinadziwa ife thangwi ya kudzulu na pantsi pisatiphedza kuona kuti Yahova ndi Mulungu wakucita pinthu munjira yadidi. (Masalmo 8:3, 4) Mamiliyau a nyenyezi zisafamba kudzulu na maplaneta mbakazungulira dzuwa mwakukhonda kudhimana. Pinthu pyenepi pisakwanisika thangwi Yahova acita maplaneta na nyenyezi munjira yadidi. Iye acita ‘kudzulu mwaudziwisi’ na dziko yapantsi. Natenepa, Yahova athema kusimbwa na kulambirwa, pontho tisafunika kukhala akukhulupirika kwa iye.—Masalmo 136:1, 5-9.
SUMANA 18-24 YA DEZEMBRO
MPFUMA ZA MAFALA A MULUNGU | YOBE 28-29
“Kodi Imwe Muli na Makhaliro Adidi Ninga Yobe?”
Sentinela 15/5/02 tsa. 22 ndima 19
Pangizani Ufuni Kuna Ale Anafuna Ciphedzo
19 Mphangwa zidapfundza ife zisapangiza kuti tisafunika kupangiza ufuni kuna ale anafuna ciphedzo. Mwacitsandzo, toera dzindza yace ipitirize, Abhrahamu akhafuna ciphedzo ca Bhetuweli. Toera magogodo ace akwatiwe mpaka ku Kanani, Yakobe akhafuna ciphedzo ca Zuze. Pontho toera kukhala na mwana wakuti mbadatambira unthaka, Naomi akhafuna ciphedzo ca Rute. Abhrahamu, Yakobe na Naomi nee mbadakwanisa kucita pinthu pyenepi mbadasowa ciphedzo. Munjira ibodzi ene lero, ife tisafunika kupangiza ufuni makamaka kuna ale anafuna ciphedzo. (Misangani 19:17) Ife tisafunika kutowezera citsandzo ca Yobe wakuti aphedza “nyakutcerenga wakuti akhakhuwa mbaphemba ciphedzo, kuphatanizambo mwana waumphawi na ule akhasowa munthu wakum’phedza” kuphatanizambo “ule wakuti akhali dhuzi toera kufa.” Yobe ‘akhatsandzayisambo ntima wa nzice,’ pontho akhali ‘ninga maso kuna boliboli, ninga miyendo kuna anyakulamala miyendo.’—Yobe 29:12-15.
Perspicaz vol. 2 tsa. 1193 ndima 9
Nguwo
Malemba mazinji asalonga nguwo munjira yakuphipirisa. Ninga uniforme peno nguwo yakupambulika inapangiza kuti munthu asacita khundu ya gulu peno asaphedzera nsoka, nguwo zakuphiphirisa zinalongwa m’Bhibhlya zisapangiza makhaliro a munthu peno pinthu pinacita iye ninga pinalongwa mu nsangani wa Yezu thangwi ya nguwo za phwando yakumanga banja. (Mat. 22:11, 12) Pa Apokalipse 16:14, 15, Mbuya Yezu Kristu acenjeza ale anagona mwauzimu mbadula cipangizo ca umboni wakukhulupirika kuna Mulungu wandimomwene. Pyenepi ndi pyakugopswa mu ndzidzi wakuti tiri dhuzi na “nkhondo inafuna kucitika pa ntsiku ikulu ya Mulungu Wamphambvu Zonsene.”
Sentinela 1/2/09 tsa. 15 ndima 3-4
Madzina Ali na Mabvekero?
Ife nee tinakwanisa kusankhula tekha dzina tingabalwa. Mbwenye tinakwanisa kusankhula makhaliro anafuna ife kupangiza. (Misangani 20:11) Natenepa bvundzikani: ‘Kodi Yezu na apostolo mbadakhala na mwai wakundipasa dzina, mbadandipasa dzina ipi? Ndi dzina ipi yakuti isabverana mwadidi na makhaliro anga?’
Ndi pyakufunika kakamwe kunyerezera mbvundzo unoyu. Thangwi yanji? Mambo Salomoni alemba: “Mphyadidi kukhala na dzina yadidi kupiringana kukhala na mpfuma zizinji.” (Misangani 22:1) Mwandimomwene, tingadziwika na dzina yadidi peno makhaliro adidi pacisa ndi pyadidi kakamwe kupiringana mpfuma zizinji. Mbwenye cakufunika kakamwe ndi cakuti tingadziwika na dzina yadidi kuna Mulungu, tinakhala na mpfuma zakukhonda mala. Munjira ipi? Mulungu apikira kuti anadzalemba madzina a ale anang’opa ‘m’bukhu yakuti iri na madzina a ale anafuna kukumbukirwa,’ pontho iye anapasa anthu anafuna kulembwa mwenemu mwai wakukhala m’maso kwenda na kwenda.—Malakiya 3:16; Apokalipse 3:5; 20:12-15.
Mpfuma Zauzimu
Despertai! 8/7/00 tsa. 11 ndima 3
Kumwetulira Kunakuphedzani!
Kodi kumwetulira kusaphedza? Musakumbuka ndzidzi wakuti munthu akumwetulirani mbamukhala wakukhurudzika na wakusudzuka? Peno mu ndzidzi wakuti munthu nee akumwetulirani mbamugopa peno mbamunyerezera kuti nee asafuna kucedza na imwe? Mwandimomwene, kumwetulira kusaphedza. Kusaphedza munthu anamwetulira kuphatanizambo ule anamwetulirwa. Yobe alonga tenepa thangwi ya anyamalwa ace: “Pikhaamwetulira ine, iwo nee akhatawira kuti ndine akhacita pyenepi; iwo akhawangiswa angaona nkhope yanga yakutsandzaya.” (Yobe 29:24) Panango nkhope ya Yobe ikhapangiza kutsandzaya kwace.
SUMANA 25-31 YA DEZEMBRO
MPFUMA ZA MAFALA A MULUNGU | YOBE 30-31
“Yobe Apitiriza Tani Kukhala na Makhaliro Adidi?”
Sentinela 15/4/10 tsa. 21 ndima 8
Peusani Maso Anu Toera Akhonde Kuona Pinthu Pyakusowa Basa
8 Akristu andimomwene asathimbanambo na pinasirirwa na manungo na pinasirirwa na maso. Na thangwi ineyi Mafala a Mulungu asatipanga toera tikhale akudzitonga mu pinthu pinaona ife na pinafuna ife. (1 Akor. 9:25, 27; lerini 1 Juwau 2:15-17.) Mamuna wakulungama Yobe adzindikira kuti ife tinakwanisa kusirira pinthu pinaona ife. Iye alemba: “Ine ndacita cibverano na maso anga. Mphapo, ndinakwanisa tani kuyang’ana mwali na cifuno ca kunsirira?” (Yobe 31:1) Yobe nee akhafuna kuphata nkazi munjira yaulukwali, pontho nee akhafuna kunyerezera pyenepi. Yezu agomezera kuti nee tisafunika kukhala na manyerezero aulukwali mu ndzidzi udalonga iye kuti: “Munthu anapitiriza kuyang’anisa nkazi mbansirira, acita naye kale upombo muntima mwace.”—Mat. 5:28.
Sentinela 1/9/08 tsa. 11 ndima 4
Nyerezerani Pinafuna Kukucitikirani
Mbamudzati kucita thanyo yakutoma, bvundzikani: ‘Kodi njira ineyi inanditsogolera kupi?’ Kunyerezera pinthu pinafuna kucitika panango kunakuphedzani toera kucita pisankhulo pyadidi. Thangwi munthu anacita cisankhulo mbadzati kunyerezera anakwanisa kukhala na SIDA na mautenda anango anathapulwa thangwi yakupita m’mabonde, kukhala na mimba mwakukhonda funa, kutaya mimba, kufudza mabanja na kukhala na cikumbuntima cakulemera. Mpostolo Paulu alonga pakweca pinthu pinafuna kudzacitikira ale anacita ulukwali. Iwo “nkhabe kudzapita mu Umambo wa Mulungu.”—1 Akorinto 6:9, 10.
Sentinela 15/11/10 tsa. 5-6 ndima 15-16
Aphale na Atsikana, Tsogolerwani na Mafala a Mulungu
15 M’maonero anu, kukhulupirika kwanu kuna Mulungu kusayeserwa kazinji kene mungakhala mwekha peno mungakhala pabodzi na anango? Panango mungakhala kuxikola peno kubasa musakwanisa kakamwe kutsidzikiza cikhulupiro canu. Imwe musadzindikira pinthu pyakuti pinaikha pangozwi uxamwali wanu na Yahova. Mbwenye mungakhonda kucita mphole-mphole, pinakhala pyakukhonda nentsa kuna imwe kucita pinthu pyakuipa.
16 Thangwi yanji musafunika kubvera Yahova ngakhale muli mwekhene? Kumbukani kuti imwe munakwanisa kutsukwalisa Yahova peno kuntsandzayisa. (Gen. 6:5, 6; Mis. 27:11) Pinthu pinacita imwe pisakhuya Yahova thangwi “iye asakutsalakanani.” (1 Ped. 5:7) Iye asafuna kuti mum’bvere toera pinthu pikufambireni mwadidi. (Iza. 48:17, 18) Mu ndzidzi udasiya Aizraeli anango kubvera Yahova, iwo antsukwalisa. (Mas. 78:40, 41) Mbwenye Yahova akhafuna kakamwe mprofeta Dhanyeli, thangwi anju m’bodzi ampanga kuti ndi “munthu wakufunika kakamwe.” (Dhan. 10:11) Thangwi yanji? Thangwi Dhanyeli apitiriza kukhala wakukhulupirika kuna Mulungu mu ndzidzi ukhali iye pamwinji na mu ndzidzi ukhali iye ekhene.—Lerini Dhanyeli 6:10.
Mpfuma Zauzimu
Sentinela 15/11/05 tsa. 11 ndima 3
Luso Yakubvesera Anango Mwaufuni
Axamwali ace Yobe ambvesera basi ene maulendo khumi. Ngakhale tenepo, Yobe alonga: “Mbadaoneka munthu toera kundibvesera!” (Yobe 31:35) Thangwi yanji Yobe alonga mafala anewa? Thangwi ale akhambvesera nee am’balangaza. Iwo nee atsalakana Yobe, pontho nee akhafuna kubvesesa mabvero ace. Mwandimomwene iwo nee ambvesera mwaufuni. Mbwenye mpostolo Pedhru apereka uphungu wakuti: “Monsene khalani na manyerezero mabodzi ene, khalani akubvera ntsisi, akufuna abale, acitsalakano kakamwe na akucepeseka.” (1 Pedhru 3:8) Tinabvera tani ntsisi anango? Njira ibodzi ndi kuwangisira toera kupangiza citsalakano na kubvesesa mabvero a munthu. Kulonga mafala ninga akuti “pyenepi ndi pyakutsukwalisa kakamwe” peno “panango anthu nee abvesesa pidalonga imwe peno pidacita imwe” ndi ibodzi mwa njira zakupangiza kuti tisatsalakana anango. Njira inango ndi kulongambo mafala adalonga munthu, thangwi pyenepi pinapangiza kuti tabvesesa pidalonga iye. Kubvesera anango mwaufuni kusabveka kubvesera mwadidi mafala analonga munthu na mabvero anapangiza iye.