NSOLO KHUMI NACIWIRI
Khalani Maso Munjira Inakomeresa Mulungu
Munakwanisa tani kukhala xamwali wa Mulungu?
Kupomokera kwa Sathani kusakukhuyani tani?
Ndi makhaliro api anakhonda komeresa Yahova?
Munakhala tani maso munjira inakomeresa Mulungu?
1, 2. Perekani pitsandzo pingasi pya anthu adaona Yahova ninga axamwali ace apantima.
KODI mbamudasankhula munthu wa ntundu wanji ninga xamwali? Mwandimomwene mbamudafuna kucita uxamwali na munthu wakuti ali na maonero, pifuno na makhaliro ninga anu. Imwe mbamudafuna kukhala padhuzi na munthu wa makhaliro adidi, ninga wakuona ntima na wakukoma ntima.
2 M’mbiri ya anthu, Mulungu asasankhula anthu anango kuti akhale axamwali ace apantima. Mwacitsandzo, Yahova acemera Abrahamu ninga xamwali wace. (Lerini Izaiya 41:8; Tyago 2:23.) Mulungu alonga Dhavidhi ninga “munthu wanga wa pa ntima” thangwi iye akhali na makhaliro akhafuna Yahova. (Machitiro 13:22) Yahova aona mprofeta Dhanyeli ninga munthu ‘wakufunika!’—Danyele 9:23.
3. Thangwi yanji Yahova asasankhula anthu anango kuti akhale axamwali ace?
3 Thangwi yanji Yahova aona Abrahamu, Dhavidhi, na Dhanyeli ninga axamwali ace? Iye apanga Abrahamu: “Watawira fala yanga.” (Genesi 22:18) Natenepa Yahova asafendedzera kuna ale akuti mwakucepeseka asacita pinaphemba iye. Iye apanga Aisraele kuti: ‘Ndibvereni, toera ndikhale Mulungu wanu, imwembo mukhale mbumba yanga.’ (Yeremiya 7:22) Mungabvera Yahova, munadzakhalambo xamwali wace!
YAHOVA ASAPHEDZA AXAMWALI ACE
4, 5. Kodi Yahova asaphedza tani mbumba yace?
4 Nyerezerani maphindu akukhala xamwali wa Mulungu. Bhibhlya isalonga kuti Yahova asasaka njira ‘toera kuphedza ale anan’khulupira.’ (2 Pya dziko ya Israele 16:9) Kodi Yahova anakuphedzani tani? Njira ibodzi isalongwa pa Masalmo 32:8, panaleri ife tenepa: ‘Ine Yahova, ndinakupangiza njira inatongwa iwe kutoweza; ndinakupfundzisa mbandikuonera.’
5 Anewa ndi mafala akukhuya ntima anapangiza citsalakano ca Yahova! Iye anadzakupasani pitsogolero pyakufunika, pontho anakutsidzikizani mu ndzidzi unapiphatisira imwe. Mulungu asafuna kukuphedzani kuti mupembere munayeserwa imwe. (Lerini Masalmo 55:22.) Natenepa mungatumikira Yahova na ntima wanu onsene, munakhala na cinyindiro ninga nyamasalmo adalonga: ‘Kwenda na kwenda ndisabva kuti ndiri dhuzi na Yahova; sinadzudzumika tayu thangwi ali cifupi.’ (Masalmo 16:8; 63:8) Yahova anakuphedzani kuti mukhale maso munjira inankomeresa. Mbwenye, ninga musadziwa, alipo nyamalwa wa Mulungu wakuti asafuna kukupingizani kucita pyenepi.
KUPOMOKERA KWA SATHANI
6. Kodi Sathani apambizira tani anthu?
6 Nsolo 11 wa bukhu ino wafokotoza njira idapomokerera Sathani Dyabo utongi ukulu wa Mulungu. Sathani apambizira Mulungu kukhala wauthambi na ayesera kupangiza kuti Yahova nee acita mwadidi kukhondesa Adhamu na Eva kusankhula okhene cadidi na cakuipa. Mudamala Adhamu na Eva kudawa na kutoma kudzadza dziko yapantsi na mbeu yawo, Sathani apokanya mathangwi anacitisa anthu onsene kukhulupirika kwa Mulungu. Sathani alonga: ‘Anthu nkhabe tumikira Mulungu thangwi asanfuna.’ Iye athimiza: ‘Ndipase ndzidzi, ndinapeusa anthu onsene kwa Mulungu.’ Pidacitikira Yobe pisapangiza kuti Sathani akhakhulupira pyenepi. Kodi Yobe mbani, na iye akhuiwa tani na kupomokera kwa Sathani?
7, 8. (a) Ndi ninji cidacitisa Yobe kusiyana na anthu a ndzidzi wace? (b) Kodi Sathani apokanya tani mathangwi akhacitisa Yobe kutumikira Mulungu?
7 Yobe akhalapo mu pyaka cifupi 3.600 ndulimu. Iye akhali munthu wadidi, na thangwi ineyi Yahova alonga: “Pantsi ponsene nkhabepo munthu wadidi na wa ulinganiri wakulandana na iye. Iyembo asagopa Mulungu mbakhonda njira zakuipa.” (Yobe 1:8) Yobe akhakomeresa Mulungu.
8 Sathani apokanya mathangwi akhacitisa Yobe kutumikira Mulungu. Dyabo alonga kwa Yahova: ‘Waikha malinga n’khundu mwa Yobe na nyumba yace na upfumi wace onsene. Wapasa cidzo mabasa ace, mikumbi yacembo yadzalambo mu dziko. N’thabuse mphapo na pire pina iye, unadzaona kuti iye anadzakuxola.’—Yobe 1:10, 11.
9. Yahova atawira tani kupomokera kwa Sathani, na thangwi yanji?
9 Natenepa, Sathani alonga kuti Yobe akhatumikira Mulungu thangwi iye akhaphindula na pyenepi. Dyabo alongambo kuti Yobe angayeserwa anasandukira Mulungu. Yahova atawira tani kupomokera kwa Sathani? Nakuti nkhani ineyi ikhaphataniza pifuno pya Yobe, Yahova asiya kuti Sathani ayesere Yobe. Munjira ineyi, mbapidapangizika pakweca kuti Yobe akhafuna Mulungu peno nkhabe.
YOBE AYESERWA
10. Ndi mayesero api adatamba Yobe, na iye acitanji?
10 Mwakukhonda dembuka Sathani ayesera Yobe munjira zakusiyana-siyana. Pifuyo pinango pya Yobe pyabiwa, pinango pyaphiwa. Anyabasace azinji aphiwa. Pyenepi pyabweresa utcerengi. Nyatwa inango yabwera mudafa ana khumi a Yobe na condzi. Mbwenye, mwakukhonda tsalakana nyatwa zenezi, ‘Yobe hadadawa tayu, nee apambizira Mulungu kuti amuonesa nyatwa.’—Yobe 1:22.
11. (a) Ndi kupambizira kupi kwaciwiri kudacita Sathani kuna Yobe, na Yahova acitanji? (b) Kodi Yobe acitanji mukhathimbana iye na utenda wace wakupha kakamwe?
11 Sathani hadamuleka tayu. Panango iye anyerezera kuti ngakhale Yobe apirira kuluza mpfuma yace, anyabasa na anace, iye angaduwala anasandukira Mulungu. Yahova asiya Sathani kuti athabuse Yobe na utenda wakugoswa na wakupha kakamwe. Ngakhale tenepa, pyenepi nee pyacitisa Yobe kuluza cikhulupiro kwa Mulungu. M’mbuto mwace, iye alonga mwacinyindiro: “Mpaka ine kufa nkhabe kudzasiya umumphu wanga!”—Yobe 27:5, NM.
Yobe apaswa nkhombo thangwi yakukhulupirika kwace
12. Kodi Yobe atawira tani upomokeri wa Dyabo?
12 Yobe nee akhadziwa kuti Sathani ndiye akhacitisa nyatwa zace. Nakuti iye nee akhadziwa pyonsene pikhaphatanizwa mu upomokeri wa Dyabo ku utongi ukulu wa Yahova, Yobe anyerezera kuti akhacitisa nyatwa zace ndi Mulungu. (Yobe 6:4; 16:11-14) Ngakhale tenepa, iye akoya umumphu wace kwa Yahova. Natenepa kukhulupirika kwa Yobe kwapangiza kuti mafala a Sathani akuti Yobe akhatumikira Mulungu thangwi ya maphindu akhali authambi!
13. Ndi ninji cidacitika thangwi ya khulupirika kwa Yobe kuna Mulungu?
13 Kukhulupirika kwa Yobe kwaphedza Yahova kupereka ntawiro wamphambvu ku upomokeri wakuxola wa Sathani. Yobe akhalidi xamwali wa Yahova, na Mulungu ampasa nkhombo thangwi ya kukhulupirika kwace.—Yobe 42:12-17.
IMWE MUSAKHUYIWA TANI
14, 15. Thangwi yanji tinakwanisa kulonga kuti upambiziri wa Sathani kwa Yobe usakhuya anthu onsene?
14 Upomokeri udalamusa Sathani thangwi ya kukhulupirika kwa Mulungu nee kukhaphataniza Yobe basi. Imwe musakhuyiwambo. Pyenepi pisapangizwa pakweca m’Mafala a Yahova pa Misangani 27:11 inalonga: ‘Mwananga khala na ndzeru, mbukomeresa ntima wanga, ine ndinadzakwanisa kutawira kuli ule anandixola.’ Mafala anewa, adalembwa pyaka pizinji Yobe mbadafa kale, asapangiza kuti Sathani asapitiriza kuxola Mulungu mbapambizira atumiki Ace. Munakhala ife maso munjira inakomeresa Yahova, tisaphedza kutawira kupambizira kwaunthawatawa kwa Sathani. Munjira ineyi tisakomeresa ntima wa Mulungu. Kodi pyenepi pisakucitisani kupibva tani? Kodi si pyakukomeresa tayu kucita khundu mu kutawira kuti pidalonga Dyabo ndi uthambi, ngakhale kuti kucita pyenepi kunaphemba kucinja pinthu pinango mu umaso wanu?
15 Onani pidalonga Sathani: ‘munthu anapereka pyonsene pina iye toera akhale maso.’ (Yobe 2:4) Mudalonga Sathani “munthu,” iye apangiza pakweca kuti nee akhalonga pya Yobe basi, mbwenye pya anthu onsene. Ineyi ndi ntsonga yakufunika kakamwe. Sathani asapokanya umumphu wanu kwa Mulungu. Dyabo asafuna kuti mukhonde bvera Mulungu, pontho musiye njira yakulungama mungagwerwa na nyatwa. Kodi Sathani anayesera tani kucita pyenepi?
16. (a) Ndi njira zipi zisaphatisira Sathani toera kupeusa anthu kwa Mulungu? (b) Sathani anaphatisira tani njira zenezi kwa imwe?
16 Ninga taona mu Nsolo 10 wa bukhu ino, Sathani asaphatisira njira zakusiyana-siyana toera kuyesera kupeusa anthu kwa Mulungu. Njira ibodzi, iye asapomokera ‘ninga nkhalamu yakulira, mbisaka munthu toera kumudya.’ (1 Pedro 5:8) Natenepa, macitiro a Sathani anakwanisa kupangizwa na axamwali, acibale, peno anango mu ndzidzi unayesera iwo kupingiza kuwangisira kwanu kupfundza Bhibhlya na kuphatisira pinapfundza imwe.a (Jwau 15:19, 20) Munjira inango, Sathani ‘asasangizira kukhala anju wa ceza.’ (2 Akorinto 11:14) Dyabo anakwanisa kuphatisira njira zakubisalika toera kukunyengetani na kukupeusani kuti mukhonde kukomeresa Mulungu. Iye anakwanisambo kuphatisira kufewa manungo, panango kukucitisani kunyerezera kuti nee mwathema toera kukomeresa Mulungu. (Misangani 24:10) Ngakhale kuti Sathani akhale “ninga nkhalamu yakulira” peno aoneke ninga ‘anju wa ceza,’ kupomokera kwace ndi kubodzi kwene: Iye asalonga kuti mungagwerwa na pinentso na mayesero, munadzasiya kutumikira Mulungu. Kodi munatawira tani kupokanya kwa Sathani na kupangiza umumphu wanu kwa Mulungu, ninga Yobe?
BVERANI MATONGERO A YAHOVA
17. Ndi thangwi ipi yakufunika toera kubvera matongero a Yahova?
17 Munakwanisa kutawira upomokeri wa Sathani mungakhala maso munjira inakomeresa Mulungu. Pyenepi pisaphatanizanji? Bhibhlya isatawira: ‘Funani Yahova Mulungu wanu, na ntima wanu onsene, na moyo wanu onsene, na mphambvu zanu zonsene.’ (Deuteronomyo 6:5) Ufuni wanu kwa Mulungu ungakula, imwe munadzadzala na cifuno cakucita pinaphemba iye. Mpostolo Jwau alemba: ‘Thangwi kufuna Mulungu ndi kutawira matongero ace.’ Mungafuna Mulungu na ntima wanu onsene, munadzaona kuti ‘matongero ace hananentsa tayu.’—1 Jwau 5:3.
18, 19. (a) Ndi api matongero mangasi a Yahova? (Onani bokosi, “Calirani Pinaida Yahova.”) (b) Tisadziwa tani kuti Mulungu nkhabe phemba pizinji kakamwe kwa ife?
18 Kodi matongero a Yahova ndi api? Anango a iwo asaphataniza macitiro anafunika ife kuacalira. Mwacitsandzo, onani bokosi ya nsolo “Calirani Pinaida Yahova.” Mwenemo munagumana ndandanda wa macitiro anakhondeswa m’Bhibhlya mwapakweca. Macitiro anango adalembwa mwenemo, pakutoma asaoneka ninga nee ndi akuipa maka. Mbwenye mungadinga mwacidikhodikho malemba anagumanika mwenemo, panango munadzaona kuti matongero a Yahova ndi a ndzeru. Kucinja macitiro anu panango kuoneka ninga cinthu cakunentsa kakamwe kupiringana pyonsene. Ngakhale tenepa, kukhala maso munjira inakomeresa Mulungu kusabweresa kutsandzaya kukulu. (Izaiya 48:17, 18) Ici ndi cinthu cakuti imwe munakwanisa kucicita. Tisadziwa tani pyenepi?
19 Yahova cipo asatiphemba pinthu pyakuti ife nkhabe kwanisa kupicita. (Lerini Deuteronomyo 30:11-14.) Iye asadziwa mwadidi pinakwanisa ife na pinacimwana ife kucita kupiringana ife ene. (Masalmo 103:14) Kusiyapo pyenepi, Yahova anatipasa mphambvu toera tim’bvere. Mpostolo Paulu alemba: ‘Mulungu ngwakukhulupirika. Anadzatawirabve tayu kuti mudzayeserwe na manyengerero anapiringana mphambvu zanu. Manyengerero angabwera, Mulungu anakupasanimbo ndzeru zakuakunda.’ (1 Akorinto 10:13) Toera kukuphedzani kupirira, Yahova anakwanisa kukupasani ‘mphambvu zikulu maningi.’ (2 Akorinto 4:7) Pakumala kupirira mayesero mazinji, Paulu alonga: “Ine ndinakwanisa pyonsene mwa uyu anandipasa mphambvu.”—Afilipi 4:13.
SAKULIRANI MAKHALIRO ANAKOMERESA MULUNGU
20. Ndi makhaliro api anakomeresa Mulungu anafunika imwe kusakulira, na thangwi yanji ndi akufunika?
20 Mwandimomwene, kukomeresa Yahova kusaphataniza pizinji kupiringana kucalira pinaida iye. Imwe musafunikambo kufuna pinafuna iye. (Aroma 12:9) Kodi imwe mbamudafuna tayu kukhala cifupi na ale akuti ali na maonero, pifuno na makhaliro mabodzi ene na imwe? Yahova asafunambo. Natenepa pfundzani kufuna pinthu pinafuna Yahova. Pingasi pya ipyo pisafokotozwa pa Masalmo 15, inalonga pya anthu anaona iye ninga axamwali ace. (Lerini Masalmo 15:1-5.) Axamwali a Yahova asapangiza makhaliro a ‘nsapo wa nzimu.’ Ipi pisaphataniza makhaliro ninga “kufuna andzako, kusekera, ntendere, kupirira, kukoma ntima, udidi, kukhulupirika, kupfulika na kudzitonga.”—Agalata 5:22, MZ.
21. Ndi ninji cinafuna kukuphedzani kusakulira makhaliro anakomeresa Mulungu?
21 Kuleri na kupfundza Bhibhlya mwakukhonda phonya kunadzakuphedzani kusakulira makhaliro anakomeresa Mulungu. Pontho, kupfundza pinafuna Mulungu kunadzakuphedzani kubveranisa manyerezero anu na manyerezero a Mulungu. (Izaiya 30:20, 21) Mungathimizira kuwangisa ufuni wanu kwa Yahova, cifuno canu cakukhala maso munjira inakomeresa Mulungu cinadzakula kakamwe.
22. Kodi kukhala kwanu maso munjira inakomeresa Mulungu kunadzatawiranji?
22 Pasafunika kuwangisira toera kukhala maso munjira inakomeresa Yahova. Bhibhlya isalandanisa kucinja umaso na kudula umunthu wakale mbamubvala umunthu upswa. (Akolose 3:9, 10) Mbwenye nyamasalmo alemba pya matongero a Yahova kuti: ‘Onsene anaakoya anapaswa muoni ukulu.’ (Masalmo 19:11) Imwembo munadzaona kuti kukhala maso munjira inakomeresa Mulungu kusaphindulisa kakamwe. Mukucita pyenepi, munadzapasa ntawiro ku upomokeri wa Sathani na kukomeresa ntima wa Yahova!
a Pyenepi nee pisabveka kuti ale anakupingizani ali kutsogolerwa na Sathani. Mbwenye Sathani ndi mulungu wa makhaliro ano a pinthu, na dziko yonsene iri m’manja mwace. (2 Akorinto 4:4; 1 Jwau 5:19) Natenepa tinakwanisa kudikhira kuti anthu anango anadzakupingizani kukhala maso mwakubverana na cifuno ca Mulungu.