MIBVUNDZO INACITWA NA ANYAKULERI

Kodi mafala a Dhavidhi pa Masalmo 37:25 na mafala a Yezu pa Mateo 6:33 asapangiza kuti Yahova cipo mbadatawirisa kuti Akristu asowe cakudya?

▪ Dhavidhi alemba: ‘Sidzati kuona munthu wakulungama, peno kuti anace aenda kasundza pyakudya.’ Mbwenye iye alonga mafala anewa mwakubverana na pyakugumana napyo pyace. Iye akhadziwa mwadidi pya citsalakano ca Mulungu. (Sal. 37:25) Natenepa, mafala a Dhavidhi nee asabveka kuti nee mulambiri m’bodzi asasowa peno anadzasowa cakudya.

Pana midzidzi yakuti Dhavidhi athimbana na makhaliro akunentsa. Ubodzi wa midzidzi ineyi ndi ndzidzi ukhathawa iye mambo Sauli. Pyakudya pya Dhavidhi pikhadamala, natenepa iye aphemba nkate toera kutsalakana umaso wace na wa ale akhali na iye. (1 Sam. 21:1-6) Natenepa, pa ndzidzi unoyu, Dhavidhi akhadaenda “kasundza pyakudya.” Maseze ukhali ndzidzi wakunentsa, Dhavidhi akhadziwa kuti Yahova nee akhadanduwala. Mbwenye undimomwene ndi wakuti Dhavidhi akhadaenda kaphemba cakudya cikhafuna iye toera kupulumuka.

Pa Mateo 6:33 tisagumana cinyindiro cidapereka Yezu cakuti Mulungu anadzatsalakana atumiki ace akukhulupirika akuti asaikha pifuno pya Umambo pa mbuto yakutoma mu umaso wawo. Yezu alonga: ‘Mphapo tomani kusaka Umambo na cilungamo cawo, pinango pyonsene kuphataniza cakudya, cakumwa, na cakubvala munadzapibayirwa.’ Mbwenye Yezu alongambo kuti na thangwi yakutcingwa, “abale” ace mbadatamba njala. (Mat. 25:35, 37, 40) Pyenepi pyacitika kuna mpostolo Paulu. Midzidzi inango iye akhala na njala na nyota.​—2 Akor. 11:27.

Yahova asatipanga kuti ife tinadzatcingwa munjira zakusiyana-siyana. Iye anakwanisa kutawirisa kuti tithimbane na kusowa pinthu pyakufunika mu ndzidzi unaphedzera ife kupereka ntawiro ku uthambi wa Dyabo. (Yobe 2:3-5) Mwacitsandzo, anango mwa Akristu andzathu, ninga ale adaendeswa ku mazunde mu ndzidzi wa Nazi, aona kuti akhali panyatwa thangwi yakutcingwa. Kukhonda paswa pinthu pyakufunika ikhali njira ibodzi idaphatisira Dyabo toera kufudza umumphu wa Mboni za Yahova. Mboni zakukhulupirika zapitiriza kubvera Yahova; iye cipo aaduwala. Yahova atawirisa kuti iwo athimbane na nyatwa, ninga munatawirisa iye Akristu azinji kuthimbana na nyatwa zakusiyana-siyana. Mbwenye nkhabe thangwi toera kupenula kuti Yahova asaphedza onsene anathabuka thangwi ya dzina yace. (1 Akor. 10:13) Tinakwanisa kukumbuka mafala anagumanika pa Afilipi 1:29: ‘Imwe hamudapaswa nkhombo zakubvera Kristu basi tayu, mbwenye mwapaswambo nkhombo zakupirira nyatwa thangwi ya iye.’

Yahova asapikira kuti anadzakhala na atumiki ace. Mwacitsandzo, lemba ya Izaiya 54:17 isalonga: ‘Pida pyonsene pinacimwana kukulasani.’ Pikiro ineyi na anango ninga ineyi, asapasa cinyindiro atumiki onsene a Mulungu ninga nsoka. Mbwenye m’bodzi na m’bodzi wa Akristu panango anadzathimbana na mayesero, ngakhale kufikira pa kufa.