NSOLO WA REVISTA | KODI KUFA NDI KUMALA KWA PYONSENE?
Kuwangisira kwa Anthu Toera Kumalisa Kufa
Kufa ndi nyamalwa wakugopswa. Ife tisathimbana nako na mphambvu zathu zonsene. Tingaferwa, panango nee tinatawira kuti nyakufunika wathu afadi. Panango, mu uphale wathu, tinakwanisa kunyerezera kuti nyamalwa unoyu cipo anatifikira—anewa ndi maonero akuphonyeka asakhala na ife mpaka panakwanisa ife.
Ndi anthu akucepa adanyerezera kakamwe kuti iwo nkhabe kufa, kupiringana Afarao akale. Iwo aphatisira ndzidzi uzinji mu umaso wawo—kuphatanizambo umaso wa pikwi na pikwi pya anyabasa—toera kuyesera kumalisa kufa. Nthumbi zidasasanya iwo zisapangiza kuwangisira kwawo na kucimwana kwawo.
Atongi a ku Xina akhalimbo na maonero mabodzi ene akuti iwo nkhabe kufa, maseze akhaphatisira njira yakusiyana—ninga elixir, ntombwe wa umaso wakukhonda dziwika. Ntongi Qin Shi Huang aphemba nkondzi wace toera asasanye ntombwe wakuti mbudacitisa kufa kukhala kutali na iye. Mbwenye pinthu pikhabvungaza iwo pikhaphataniza venenu ya mercúrio, pisaoneka kuti iye aphiwa na ubodzi mwa mitombwe ikhabvungaza iwo.
Mu pyaka madzana 16 N.W., nyakusaka-saka wa ku Espanya, Juan Ponce de León, awambuka bara ya Karibe mu kusaka pfuli ya uphale. Mu kusaka kwace, iye afika ku Florida, E.U.A., mbwenye mudapita pyaka pingasi iye afa pakumala kuthimbana na Akhali a ku Amerika. Natenepa, nkhabe pfuli ya uphale idagumaniwa.
Afarao, atongi, na anyakusaka-saka, onsene ayesera kumalisa kufa. Pontho, mbani mwa ife mbadapwaza cifuno cawo, ngakhale kuti nee tisatawira njira zawo? Na ntima onsene, tonsene tisafuna kakamwe kupitiriza kukhala maso.
KODI KUFA KUNAMALA?
Thangwi yanji ife nkhabe funa kufa? Bhibhlya isafokotoza thangwi yanji. Mu kulonga pya Nciti wathu, Yahova Mulungu,a iyo isalonga: ‘Iye acita pyonsene mwakubalika pa ndzidzi wapyo. Pontho, aikha muntima mwawo [mwa anthu] cifuno cakukhala kwenda na kwenda.’ (Koelete 3:11, Tradução do Novo Mundo) Ife tisafuna kutsandzaya na kubalika kwa dziko kwenda na kwenda, tayu mu pyaka 80 peno pyakucepa. (Masalmo 90:10) Ceneci ndi cifuno ca ntima wathu.
Thangwi yanji Mulungu aikha m’mitima yathu cifuno cakukhala ‘kwenda na kwenda’? Basi ene toera kutiphatisa mwala? Nee pang’ono pene. Mbuto mwace, Mulungu asatipikira kuti kufa kunadzakundwa. Mwakubwereza-bwereza, Bhibhlya isalonga pya kumaliswa kwa kufa, na pikiro ya Mulungu ya umaso wakukhonda mala.—Onani bokosi inatowerera, “Kukundwa kwa Kufa.”
Yezu Kristu alongeratu pakweca kuti: ‘Umaso wakukhonda kumala ndi uyu, anthu akudziweni imwe mwekha Mulungu wandimomwene, adziwembo Yezu Kristu adatuma imwe.’ (Jwau 17:3, NM) Natenepa, kuthimbana na kufa nee ndi kwakusowa cidikhiro. Yezu alonga kuti basi ene Mulungu anakwanisa kukunda kuthimbana kwathu na kufa.
[Cidzindikiro capantsi]
a Yahova ndi dzina ya Mulungu ninga munapangizwa iyo m’Bhibhlya.
[Bokosi pa tsamba 4]
Kukundwa kwa Kufa
‘Mulungu anadzafudza kufa pa kukhaliratu! Anadzapukuta misozi ya m’maso mwonsene.’—Isaiah Izaiya 25:8
‘Baba wanga asafuna kuti: munthu anaona Mwana mbankhulupira akhale na umaso wakukhaliratu.’—Jwau 6:40, NM
“Nyamalwa anadzamalisira kundwa ndi kufa.”—1 Akorinto 15:26
“[Tiri na cidikhiro ca] umaso wakukhonda kumala, udapikirwa pa ndzidzi wa kale na kale na Mulungu wakukhonda kunyengeza.”—Tito 1:2
‘Iye ene Mulungu anadzapukuta misozi yonsene m’maso mwawo. Kufa hakunadzakhalapo pontho tayu.’—Apokalipse 21:4