Munatumikira Tani Yahova Mu ‘Ntsiku Za Nyatwa’?

ERNSTa wakuti ali nkati mwa pyaka 70 pyakubalwa alonga: “Nyatwa zanga za ungumi zisapitiriza kundipingiza kakamwe.” Musathimbanambo na makhaliro mabodzi ene? Khala muli kugwesera mbamubva kuti mukuluza mphambvu na ungumi wanu, panango munabvesesa mwadidi mafala adalembwa pa Koelete kapitulu 12. Pa vesi 1, ntsiku za unkhalamba zisacemerwa ‘ntsiku za nyatwa.’ Mbwenye pyenepi nee pisabveka kuti umaso wanu ndi wakutsukwalisa ndzidzi onsene. Imwe munakwanisa kukhala na umaso wakuphindulisa mbamutumikira Yahova mwakukomerwa.

PITIRIZANI KUKHALA NA CIKHULUPIRO CAKUWANGA

Abale na alongo akugwesera akufunika, imwe nee muli mwekha mu nyatwa zanu. Atumiki akugwesera a Yahova mu ndzidzi wakale athimbana na nyatwa zibodzi zene. Mwacitsandzo, Izaki, Yakobe na Ahiya nee akhaonabve mwadidi. (Gen. 27:1; 48:10; 1 Am. 14:4) Sara akhabva ninga ‘pace pakhadamala.’ (Gen. 18:11, 12) Mambo Dhavidhi nee ‘akhapisirwa tayu.’ (1 Am. 1:1) Nyakupfuma Berzelai nee akhakwanisabve kubva kukoma kwa cakudya na pyakumwa peno nyimbo. (2 Sam. 19:32-36) Abrahamu na Naomi athimbana na nyatwa yakuferwa na andzawo a m’banja.​—Gen. 23:1, 2; Rute 1:3, 12.

Ninji pidaphedza m’bodzi na m’bodzi wa iwo toera kupitiriza kukhala akukhulupirika kwa Yahova na akutsandzaya? Mu unkhalamba wace, Abrahamu akhakhulupira mapikiro a Mulungu ‘mbakhala wakuwanga thangwi ya cikhulupiro cace.’ (Arom. 4:19, 20) Ife tisafunikambo kukhala na cikhulupiro cakuwanga. Toera kukhala na cikhulupiro ceneci nee pisanyindira thunga, maluso peno makhaliro athu. Mwacitsandzo, maseze Yakobe nee akhali na mphambvu, nee akhaona mwadidi, pontho akhali pa talimba, iye apangiza cikhulupiro cakuwanga ku mapikiro a Mulungu. (Gen. 48:1-4, 10; Aheb. 11:21) Lero, Ines wa pyaka 93 asathimbana na utenda wakufewesa uzingo. Ngakhale tenepo, iye alonga: “Ndisaona nkhombo za Yahova ntsiku zonsene. Ntsiku zonsene ndisanyerezera pya Paradizu. Pyenepi pisandipasa cidikhiro.” Iye ndi citsandzo cadidi kakamwe!

Tinakwanisa kuwangisa cikhulupiro cathu tingacita phembero, kudinga Mafala a Mulungu na kugumanika pa misonkhano Yacikristu. Mprofeta Dhanyeli akhadagwesera, ngakhale tenepo, iye akhacita phembero katatu pa ntsiku mbapitiriza kupfundza Mafala a Mulungu. (Dan. 6:10; 9:2) Nzice wakugwesera Yana nee ‘akhabuluka mu templo tayu.’ (Luka 2:36, 37) Mungagumanika pa misonkhano mbamupereka matawiro anu ninga munakwanisira imwe, nee munabalangizika mwekhene basi, mbwenye munabalangazambo ale adagumanika. Ndzidzi onsene Yahova asakomerwa kakamwe na maphembero anu, ngakhale kuti nee musakwanisa kucita pizinji.​—Mis. 15:8.

Azinji a imwe abale na alongo akukhulupirika musafuna kakamwe kuona toera kuleri na kukhala na mphambvu toera kugumanika pa misonkhano, mbwenye musaona kuti pisapitiriza kunentsa kwa imwe, peno nkhabe kwanisika. Munacitanji mphapo? Phatisirani mwadidi miyai yonsene iri na imwe. Anthu azinji akuti nkhabe kwanisa kugumanika pa misonkhano, asaphatisira ntokodzi toera kubvesera. Inge wa pyaka 79 pyakubalwa nkhabe kuona mwadidi, ngakhale tenepo, iye asaphatisira matsamba akudhindwa na maletra makulu anapaswa iye na m’bale unango toera kukhunganyika misonkhano.

Panango imwe muli na cinthu cakuti munakwanisa kucipasa anango​—ndzidzi wanu. Thangwi yanji nkhabe kuuphatisira toera kubvesera audyo ya Bhibhlya, mabukhu athu, nkhani na madrama? Panango munakwanisa kumenyera ntokodzi Akristu andzanu toera kucedza pinthu pyauzimu mbamukwanisa ‘kuwangisana unango na ndzace.’​—Arom. 1:11, 12.

KHALANI WAPHINGA M’BASA YA MULUNGU

Christa wakuti ali nkati mwa pyaka 85 alonga mwakutsukwala: “Mphyakunentsa kakamwe kudziwa kuti nee usakwanisabve kucita pizinji ninga pikhacita iwe kale.” Abale na alongo akugwesera, munakwanisa tani kupitiriza kukhala akutsandzaya? Peter wa pyaka 75 pyakubalwa alonga: “Mu kukhala na maonero akulinganira, mbukhonda kunyerezera ndzidzi onsene pinthu pyakuti nee usakwanisabve kupicita, mbwenye kukomerwa na pinakwanisa iwe kucita.”

Munakwanisa kunyerezera njira zakupereka umboni zakuti munakwanisa kuziphatisira? Heidi nee asakwanisabve kuenda mu utumiki wa nyumba na nyumba ninga pikhacita iye kale. Maseze ali nkati mwa pyaka 80, iye apfundza kuphatisira ntcini wandzeru toera kulemba matsamba. Amwazi mphangwa anango akugwesera asatomesa mapfundziro a Bhibhlya mu ndzidzi unakhala iwo pa bhanku ya parque peno pa mbuto yakudikhira motokala. Khala cincino musakhala pa mbuto inatsalakanwa ankhalamba, munakwanisa kumwaza mphangwa kuna madotoro anakutsalakanani na andzanu anakhala na imwe.

Mu pyaka pyakumalisa pya umaso wace, Mambo Dhavidhi aphedzera ulambiri wakucena mwaphinga. Iye apereka kobiri na pinango mbagumanya anyabasa toera kumanga templo. (1 Pya dziko. 28:11–29:5) Munjira ibodzi ene, imwe munakwanisa kupangiza cifuno canu m’mabasa akumwaza mphangwa anacitwa mu ntsiku zino pa dziko yonsene. Kodi munakwanisa kuphedza apainiya peno amwazi mphangwa aphinga mu mpingo wanu mu kulonga mafala akuwangisa, kuapasa miyoni yakucepa, peno ciwangiso cauzimu? M’maphembero anu, munakwanisa kuphataniza aphale na atsikana, mabanja, atumiki a ndzidzi onsene, anyakuduwala na ale anatsalakana mabasa mazinji.

Imwe na basa yanu muli na ntengo kakamwe. Babathu wakudzulu cipo anadzakusiyani imwe abale na alongo akugwesera. (Sal. 71:9) Yahova asakufunani, pontho asakupasani ntengo kakamwe. Mwakukhonda dembuka, tonsene tinadzapitiriza kukula, mbwenye nkhabe kudzathabuka na nyatwa peno makhaliro akutsukwalisa. Mbuto mwace, tinadzakhala na mphambvu na ungumi waungwiro mbatipitiriza kutumikira Yahova, Mulungu wathu waufuni, kwenda na kwenda!

[Cidzindikiro capantsi]