Tinapitiriza Tani Kukhala Na “Nzimu Wakudikhira”?

“Ndinadzapangiza nzimu wakudikhira.”​—Mik. 7:7, Tradução do Novo Mundo.

MUNATAWIRA TANI?

Tisapfundzanji kubulukira ku citsandzo ca Mikeya?

Kodi ndi pyakucitika pipi pinadikhira ife toera kuona?

Ndi njira zipi zinango zakuti tinakwanisa kupereka takhuta thangwi ya kupirira kwa Yahova?

1. Thangwi yanji m’midzidzi inango tisacimwana kupirira?

MUDAKHAZIKISWA Umambo wa Mesiya mu caka 1914, makhaliro akuipa a dziko ya Sathani atoma kupita mu ntsiku zakumalisa. Pyenepi pyacitisa kuoneka kwa nkhondo kudzulu, Yezu aponya Dyabo na mademonyo cifupi na dziko yapantsi. (Lerini Apokalipse 12:7-9.) Sathani asadziwa kuti “ndzidzi wache ndi ung’ono basi.” (Apok. 12:12) Natenepa, “ndzidzi” unoyu watoma kale mu pyaka madzana ndulimu, anango asanyerezera kuti ntsiku zakumalisa zamala kalene. Nakuti tisadikhira Yahova toera kucita pinthu, kodi tisakhala wakukhonda kupirira?

2. Kodi nsolo uno unadzadinganji?

² Kukhonda kupirira kungakwanise kukhala ngozwi, na kuticitisa kucita pinthu mwakukhonda nyerezera mwadidi. Tinakwanisa tani kukhala na nzimu wakudikhira? Nsolo uno unadzatiphedza toera kucita pyenepi mu kutawira mibvundzo iyi inatowera. (1) Tisapfundzanji kubulukira ku citsandzo cakupirira ca mprofeta Mikeya? (2) Ndi pyakucitika pipi pinadzapangiza kumala kwa ndzidzi wathu wakudikhira? (3) Tinapereka tani takhuta thangwi ya kupirira kwa Yahova?

TINAPFUNDZANJI KUBULUKIRA KU CITSANDZO CA MIKEYA?

3. Mu ntsiku za Mikeya, kodi makhaliro a Israele akhali tani?

³ Lerini Mikeya 7:2-6. Mikeya, mprofeta wa Yahova aona makhaliro auzimu a Israele mbakafudzika mpaka iwo adzakhala pantsi pa utongi wakuipa wa Mambo Ahazi. Mikeya alandanisa kukhonda khulupirika kwa Aisraele na ‘tsamba ya minga,’ pontho na ‘malinga a miti ya minga.’ Ninga tsamba ya minga peno malinga a miti ya minga isaphekesa onsene anapita na pana iyo, Aisraele anewa akuipa akhaphekesa anthu onsene akhabverana na iwo. Uipi wadzakula kakamwe kwakuti ngakhale kubverana pa banja kukhafudzika. Nakuona kuti nee mbadakwanisa kucita pinthu toera kucinja makhaliro anewa, Mikeya aphembera kwa Yahova. Buluka penepo, iye adikhira mwakupirira toera Mulungu acite pinthu. Mikeya akhanyindira kuti Yahova mbadacinja makhaliro anewa pa ndzidzi Wace.

4. Ndi mipingizo ipi inathimbana na ife?

⁴ Ninga Mikeya, ife tisakhala pakati pa anthu akucenama. Anthu azinji ndi ‘akukhonda kupereka takhuta, akukhonda kulungama, akukhonda kufunana.’ (2 Tim. 3:2, 3) Tisaona pyenepi kukhala pyakutsukwalisa khala andzathu a pa basa, a kuxikola, na anyakuendekana athu asapangiza n’khaliro waumbirimi. Ngakhale atumiki anango a Mulungu asathimbana na pinentso pizinji kakamwe. Yezu alonga kuti atowereri ace mbadathimbana na mipingizo ya acibale, na aphatisira mafala mabodzi ene adalembwa pa Mikeya 7:6 toera kufokotoza kufunika kwa mphangwa zace. Yezu alonga: ‘Ndabwera dzamwaza munthu na babace, mwanankazi na mace, nkwenya na mebzwalace. Mwandimomwene, munthumbo wa kunyumba ibodzibodzi anadzakhala nyamalwa wace.’ (Mat. 10:35, 36) Ndi kwakunentsa kakamwe kupirira kusingirirwa na mipingizo ya acibale akuti nee ndi akukhulupira andzathu! Tingathimbana na nyatwa zenezi, nee tisafunika kutawira mikakamizo ya acibale. Mbuto mwace, tisafunika kukhala akukhulupirika mbatidikhira Yahova mwakupirira toera kumalisa nyatwa zenezi. Tingaphemba ciphedzo cace ndzidzi onsene, iye anadzatipasa mphambvu na ndzeru toera kupirira.

5, 6. Kodi Yahova apasa tani nkhombo Mikeya, mbwenye ninji pidakhonda iye kuona?

⁵ Yahova apasa nkhombo Mikeya thangwi ya kupirira kwace. Mikeya aona kuphiwa kwa Mambo Ahazi na kufudzwa kwa utongi wace wakuipa. Iye aona mwana wa Ahazi, Mambo wadidi Ezekiya mbaikhwa ninga mambo na kukhazikiswa papswa ulambiri wandimomwene. Pontho mphangwa za Yahova zakufudzwa kwa Samariya zidalongwa kubulukira mwa Mikeya zakwaniriswa pa ndzidzi udapomokera Asirya umambo wakunkwiriro kwa Israele.​—Mik. 1:6.

⁶ Natenepa, Mikeya nee aona kukwaniriswa kwa pyonsene pidapumirwa iye na Yahova toera kupilonga. Mwacitsandzo, Mikeya alemba: ‘Pa ntsiku zakumalisa, phiri idamangwa nyumba ya Yahova inadzapaswa mbiri ikulu kupita mapiri anango onsene makulu na mang’ono ene. Anthu a madziko mazinji anadzaendako, mbalonga: Tendeni pa phiri ya Yahova.’ (Mik. 4:1, 2) Mikeya afa profesiya ineyi mbidzati kukwaniriswa. Ngakhale tenepa, iye atonga kukhala wakukhulupirika kwa Yahova mpaka kufa, mwakukhonda tsalakana pikhacita anango. Mu njira ineyi, Mikeya alemba: “Anthu a madziko anango analambira mbatoweza pya alungu awo mbwenye ife tinalambira mbatitoweza pya Mulungu [Yahova] kwenda na kwenda.” (Mik. 4:5) Mikeya mbadadikhira mwakupirira m’midzidzi ya nyatwa thangwi iye akhanyindira mwakukwana kuti Yahova mbadakwanirisa mapikiro Ace onsene. Mprofeta wakukhulupirika anyindira Yahova.

7, 8. (a) Thangwi yanji tiri na thangwi yakukhala na cinyindiro? (b) Ninji pinafuna kucitisa kuti ndzidzi upite mwakucimbiza?

⁷ Kodi tiri na cinyindiro cibodzi cene kwa Yahova? Tiri na thangwi yadidi toera kukhala na cinyindiro ceneci. Ninga taona kukwanirisika kwa profesiya ya Mikeya. ‘Pa ntsiku zakumalisa,’ mamiliyau a anthu akubuluka ku madzindza onsene, mbumba na pilongero pyonsene asakwira pa ‘phiri idamangwa nyumba ya Yahova.’ Ngakhale kuti asabuluka m’madzindza akusiyana-siyana, alambiri anewa ‘anadzasasanya matalasada awo mbakhala pyakulima napyo,’ pontho nee ‘anadzapfundza pya nkhondo.’ (Mik. 4:3) Ndi mwai tani uli na ife kucita khundu ya mbumba ya ntendere ya Yahova!

⁸ Mwandimomwene, tisafuna kuti Yahova afudze mwakucimbiza makhaliro ano akuipa. Khala tisadikhira mwakupirira, tisafunika kuona pinthu mu njira inaonera Yahova. Iye akhazikisa ntsiku toera kufudza anthu akuipa mu kuphatisira, ‘munthu m’bodzi adasankhula iye,’ Yezu Kristu. (Mach. 17:31) Mbwenye, mbidzati kufika ntsiku ineyi, Mulungu asapasa mwai anthu onsene kuti ‘adziwe mapfundzisiro andimomwene,’ mbacita pinthu mwakubverana na mapfundzisiro anewa toera kupulumuswa. Umaso wakufunika wa anthu uli pangozwi. (Lerini 1 Timoti 2:3, 4.) Khala tikuphedza anango toera kukhala na cidziwiso candimomwene ca Mulungu, ndzidzi udasala toera Yahova afudze anthu akuipa unadzapita mwakucimbiza kakamwe. Mwakukhonda dembuka, ngakhale mwakututumusa, ndzidzi wa makhaliro ano akuipa unadzamala. Ntsiku ineyi ingafika, tinakomerwa kakamwe thangwi tisapitiriza kumwaza mphangwa za Umambo!

NDI PINTHU PIPI PINAPANGIZA KUMALA KWA NDZIDZI WATHU WAKUDIKHIRA?

9-11. Kodi lemba ya 1 Atesalonika 5:3 yakwaniriswa? Fokotozani.

⁹ Lerini 1 Atesalonika 5:1-3. Mwakukhonda dembuka ntsogolo, madzindza anadzalonga “Ulipo ntendere, nkhabepo pano anyakugopswa!” Khala nee tisafuna kututumuswa na mafala anewa, tisafunika ‘kukhala maso, na kunyerezera mwadidi.’ (1 Ates. 5:6) Toera kutiphedza kukhala maso mwauzimu, tendeni tidinge mwacigwagwa pyakucitika pyakuti pinatsogolera ku malongero anewa.

¹⁰ Mu pyakucitika pya nkhondo ziwiri za dziko, madzindza akhafuna ntendere. Pakumala nkhondo yaciwiri ya dziko, wasasanywa nsoka wa Liga das Nações na cidikhiro cakubweresa ntendere. Mu kupita kwa ndzidzi, pakumala kwa nkhondo yaciwiri, nsoka wa Nações Unidas wadzakhala cidikhiro ca anthu azinji toera kubweresa ntendere pa dziko yapantsi. Utongi na atsogoleri auphemberi asadikhira misoka ineyi toera kubweresa ntendere kwa anthu. Mwacitsandzo, mu caka 1986, nsoka wa Nações Unidas wabvekesa caka ceneci ninga Caka ca Ntendere kwa Mitundu Yonsene. Caka ceneci, atsogoleri akubuluka ku madzindza mazinji na mauphemberi aphatana pabodzi na Uphemberi Wacikatolika mu nzinda wa Assis ku Italya toera kucita maphembero thangwi ya ntendere.

¹¹ Natenepa, nee mafala akuti ntendere, nkhabepo pano anyakugopswa, nee mafala anango ninga anewa asakwanirisa profesiya idalembwa pa 1 Atesalonika 5:3. Thangwi yanji? Thangwi ‘kugomolwa peno kufudzwa’ kwakututumusa kudalongweratu nee kudzati kucitika.

12. Tisadziwanji thangwi ya mafala “ntendere, nkhabepo pano anyakugopswa”?

¹² Mbani anafuna kudzalonga “ntendere, nkhabepo pano anyakugopswa?” Kodi atsogoleri Acikristu Caunthawatawa na atsogoleri a mauphemberi anango anadzacita basa yanji? Kodi atsogoleri a mautongi akusiyana-siyana anadzacita tani khundu mu kulonga kweneku? Bhibhlya nee isatipanga pyenepi. Pinadziwa ife ndi pyakuti, mwakukhonda tsalakana ntundu wa malongero peno kuoneka kwapyo ninga pyandimomwene, mbwenye pinadzakhala pya ndzidzi wakucepa. Makhaliro ano akale anadzapitiriza kutsogolerwa na Sathani. Makhaliro ano ndi akubvunda nkati mwace na anadzapitiriza mu njira ineyi. Mphyakutsukwalisa tani khala m’bodzi wa ife asakhulupira uthambi wa Sathani na kuswa umumphu wathu Wacikristu!

13. Thangwi yanji aanju asaphatirira mphepo zakufudza?

¹³ Lerini Apokalipse 7:1-4. Mu ndzidzi unadikhira ife kukwaniriswa kwa 1 Atesalonika 5:3, aanju amphambvu asaphatirira mphepo zakufudza za nyatwa ikulu. Kodi iwo asadikhiranji? Cakucitika cibodzi cakufunika kakamwe cisalongwa na mpostolo Jwau, kuikhwa cidzindikiro kwakumalisa kwa ‘atumiki a Mulungu’ akudzodzwa.a Pakumala kwene kuikhwa cidzindikiro ceneci, aanju anadzasiya mphepo zakufudza. Kodi ninji pinafuna kudzacitika?

14. Ninji pinapangiza kuti kufudzwa kwa Babilonya Wankulu kuli cifupi?

¹⁴ Babilonya Wankulu, utongi wa dziko yonsene wa uphemberi waunthawatawa, anadzafudzwa. ‘Mbumba, mwinji, mitundu na pyilongero pyonsene’ anadzacimwana kuphedza Babilonya Wankulu. Taona kale pipangizo pyakuti kufudzwa kwace kuli cifupi. (Apok. 16:12; 17:15-18; 18:7, 8, 21) Mwandimomwene, kusowa kwace ciphedzo kusaoneka cincino mu pyakupereka mphangwa, pyakuti pisapangiza kuthimizirika kumenyana kunaoneka pakati pa uphemberi na atsogoleri auphemberi. Ngakhale tenepa, atsogoleri a Babilonya Wankulu asapibva kuti nee ali pangozwi yandimomwene. Iwo ndi akudodomeka kakamwe! Pakumala kulonga “ntendere, nkhabepo pano anyakugopswa!” mwakukhonda dikhira misoka ya ndale ya dziko ya Sathani inadzasandukira uphemberi waunthawatawa mbaufudza. Cipo anadzaoneka pontho Babilonya Wankulu! Mwandimomwene, mphyakufunika kudikhira mwakupirira midzidzi ya pyakucitika pyenepi.​—Apok. 18:8, 10.

TINAPEREKA TANI TAKHUTA THANGWI YA KUPIRIRA KWA MULUNGU?

15. Thangwi yanji Yahova nee asacita pinthu mwakucimbiza?

¹⁵ Ngakhale kuti anthu asapwaza dzina yace, Yahova asadikhira mwakupirira ndzidzi wakuthema toera kucita pinthu. Yahova nkhabe funa kufudza anthu akulungama. (2 Ped. 3:9, 10) Kodi ife tisapibva mu njira ibodzi ene? Mbidzati kufika ntsiku ya Yahova, tinakwanisa kupereka takhuta thangwi ya kupirira kwace mu njira zinatowerera.

16, 17. (a) Thangwi yanji tisafunika kuphedza ale adalimira kutumikira Yahova? (b) Thangwi yanji ale adalimira kutumikira asafunika kubwerera kuna Yahova mwakucimbiza?

¹⁶ Phedzani ale adalimira kutumikira Yahova. Yezu alonga kuti ali kudzulu asakomerwa kakamwe nyakudawa m’bodzi angatcinyuka. (Mat. 18:14; Luka 15:3-7) Mwakukhonda penula, Yahova asatsalakana kakamwe ale onsene anafuna dzina yace, ngakhale kuti nee asantumikira mwaphinga cincino. Tingaphedza anthu anewa toera kubwerera m’mpingo, tisakomeresa Yahova na aanju.

¹⁷ Kodi ndimwe m’bodzi wa ale akuti cincino nee asatumikira Mulungu mwaphinga? Panango m’bale peno mulongo m’mpingo akudawisirani, na thangwi ineyi mwasiya kugumanyikana na gulu ya Yahova. Nakuti mu ndzidzi unango pyenepi pinadwalika, bvundzikani: ‘Kodi umaso wanga cincino uli na cifuniro, na ndiri wakutsandzaya? Kodi ndi Yahova adandidawira, peno ndi munthu wakusowa ungwiro? Kodi Yahova Mulungu asacita pinthu toera kundionesa nyatwa?’ Mwandimomwene, ndzidzi onsene iye asacita pinthu pyadidi kwa ife. Ngakhale kuti ife nee tikukhala mwakubverana na kuperekeka kwathu kwa iye, mbwenye iye asatawirisa kuti titsandzaye na pinthu pyadidi pinapereka iye. (Tgo. 1:16, 17) Mwakukhonda dembuka, ntsiku ya Yahova inafika. Uno ndi ndzidzi toera kubwerera m’manja mwa Babathu waufuni wakudzulu na ku mpingo, wakuti ndi mbuto ibodzi basi yakukoyeka mu ntsiku zino zakumalisa.​—Deut. 33:27; Aheb. 10:24, 25.

18. Thangwi yanji tisafunika kuphedza na ntima onsene ale anatitsogolera?

¹⁸ Phedzani na ntima onsene ale anatitsogolera. Ninga nkumbizi waufuni, Yahova asatitsogolera na kutitsidzikiza. Iye asankhula mwana wace ninga Nkumbizi Wankulu wa mabira. (1 Ped. 5:4) Akulu a mipingo yakupingana 100.000 asakumbiza mabira a Mulungu mbatsalakana ibodzi na ibodzi. (Mach. 20:28) Tingaphedza na ntima onsene ale anatitsogolera, tisapangiza kupereka takhuta kwa Yahova na Yezu mu pyonsene pinacita iwo kwa ife.

19. Kodi tinakhala tani akuphatana?

¹⁹ Fendedzeranani unango na ndzace. Pyenepi pisabvekanji? Nyankhondo wakupfundziswa mwadidi angazungulirwa na nyamalwa, anyankhondo anango asaphatana toera kuphedzana. Natenepa, pinakhala pyakunentsa kukundwa na anyamalwa. Sathani asathimizira kupomokera kwace mbumba ya Mulungu. Uno nee ndzidzi wakuthimbana na Sathani mwakukhonda kuphatana na andzathu. Mbuto mwace, ndi ndzidzi toera kufendedzerana unango na ndzace, kulekerera kudodoma kwa anango, na kupangiza cinyindiro ku utsogoleri wa Yahova.

20. Kodi tisafunika kucitanji cincino?

²⁰ Tonsene tisafunika kupitiriza kukhala akucenjera mwauzimu na kupangiza nzimu wakudikhira. Tendeni tidikhire mwakupirira mafala akuti “ntendere, nkhabepo pano anyakugopswa!” na kuikhwa cidzindikiro kwakumalisa kwa ‘atumiki a Mulungu’ akudzodzwa. Buluka penepo, aanju anai anadzasiya mphepo zakufudza za nyatwa ikulu, pontho Babilonya Wankulu anadzafudzwa. Nakuti tisadikhira kucitika kwa pinthu pyenepi, tisafunika kutawira kutsogolerwa na ale adasankhulwa toera kutsogolera gulu ya Yahova. Tisafunika kufendedzerana unango na ndzace toera kuthimbana na Sathani na mademonyo ace! Uno ndi ndzidzi toera kubvesera ciwangiso ca nyamasalmo: “Wangisani, khalani na ntima wachipapo, imwe mwonsene munakhulupira Mbuya [Yahova].”​—Sal. 31:24.

[Cidzindikiro capantsi]

[Foto pa tsamba 14]

Mbumba ya Yahova isawangisira kakamwe kuphedza adalimira kuntumikira toera kubwerera kuna iye (Onani ndima 16, 17)

[Foto pa tsamba 16]

Uno ndi ndzidzi kwa ife toera tifendedzerane unango na ndzace kuti tithimbane na Sathani na mademonyo ace (Onani ndima 19)