MBVUNDZO 6
Ninji pidalongeratu Bhibhlya thangwi ya Mesiya?
PROFESIYA
“Iwe Bhetelehemu Efrata, . . . mwa iwe munadzabuluka ule wakuti anadzakhala ntongi wa Izraeli.”
KUKWANIRISIKA
“Pidamala Yezu kubalwa ku Bhetelehemu wa ku Yudeya mu ntsiku za mambo Herodhi, anyakudziwisa pya nyenyezi adabuluka Kumabulukiro a Dzuwa afika ku Yerusalemu.”
PROFESIYA
“Iwo agawana nguwo zanga, pontho acita pyakulotera thangwi ya nguwo yanga.”
KUKWANIRISIKA
“Anyankhondo pidamala iwo kukhomera Yezu pamuti, akwata nguwo zace mbazigawa mapindi manai . . . Mbwenye tunika ineyi nee ikhali na nsono, ikhali nguwo ibodzi ene buluka padzulu mpaka pantsi. Natenepa iwo alonga okha-okha: ‘Mbatilekeni kuipandula, mbwenye tendeni ticite pyakulotera toera tione kuti inakhala na ani.’”
PROFESIYA
“Iye asatsidzikiza magogodo ace onsene; nee gogodo ibodzi yaswiwa.”
KUKWANIRISIKA
“Mbwenye pidafika iwo pana Yezu, aona kuti iye akhadafa kale, natenepa iwo nee akhumula miyendo yace.”
PROFESIYA
“Iye alaswa thangwi ya madawo athu.”
KUKWANIRISIKA
“Nyankhondo mʼbodzi amulasa na dipa pakhundu pace, mu ndzidzi ubodzi ene, penepo pabuluka ciropa na madzi.”
PROFESIYA
“Iwo andilipa, andipasa kobiri 30 za parata.”
KUKWANIRISIKA
“Buluka penepo, mʼbodzi wa apostolo 12 akhacemerwa Yuda Iskariyoti aenda kuna akulu a anyantsembe, mbalonga: ‘Munandipasanji ndingampereka kuna imwe?’ Iwo apikira kumpasa kobiri 30 za parata.”