Nsolo Wakutoma
Kuphatana Kwa Ulambiri M’nzidzi Wathu—Kodi Kusabvekanji?
1, 2. (a) Kodi ndi basa ipi yakukomeresa inacitwa m’nzidzi wathu uno? (b) Kodi ndi cidikhiro cipi cakudzumatirisa ciri na anthu akuona ntima?
M’DZIKO yonsene yapantsi musacitwa basa yakukomeresa towera kuphataniza ulambiri. Basa ineyi isagumanya pikwi na pikwi pya anthu a madziko onsene, madzinza onsene na pilongero pyonsene. Anthu azinji asagumanywa pa caka. Iwo asadzindikirwa m’Biblya ninga “mboni” za Yahova na asacemerwa “[mwinji] ukulu.” Iwo ‘asaimirira [peno asatumikira] Mulungu masikati na masiku.’ (Izaiya 43:10-12; Apokalipse 7:9-15) Thangwi yanji iwo asacita pyenepi? Thangwi iwo adzadziwa Yahova ninga Mulungu mbodzi basi wandimomwene. Pyenepi pisaakulumiza kukhala maso mwakubverana na midida yace yakulungama. Pontho, iwo apfunza kuti tisakhala ‘m’ntsiku zakumalisa’ za dziko ino yakuipa, yakuti mwakukhonda dembuka Mulungu anadzaifudza. Asadziwambo kuti mbuto mwa dziko ino yakuipa Mulungu anadzabweresa dziko ipswa ya paradizu.—2 Timoti 3:1-5, 13; 2 Pedro 3:10-13.
2 Mafala a Mulungu asapikira: ‘Thimize pang’ono anyakuipa anadzambazika [peno hanadzakhalapobve]. Mbwenye anyakupfulika anakhala m’dziko, mbakomerwa na ntendere ukulu kakamwe.’ (Masalmo 37:10, 11) “Anyakulungama anatambira dziko, mbakhala [mwenemo] kuenda na kuenda.” (Masalmo 37:29) ‘Mulungu anadzapukuta misozi yonsene m’maso mwawo. Kufa hakunadzakhala’po pontho tayu, nee kutsukwala, nee kulira, nee nyatwa, thangwi pya kale pyamala.’—Apokalipse 21:4.
3. Kodi kusakwanisika tani kuphatana kwandimomwene kwa ulambiri?
3 Ale anaphatanizwa cincino m’ulambiri wandimomwene ndi akhali akutoma a dziko ineyi ipswa. Iwo apfunza cifuno ca Mulungu na asacicita m’njira inakwanisa iwo. M’kupangiza kufunika kwa kupfunza cifuno ca Mulungu na kucicita, Yezu alonga: “Moyo wakukhalirathu ndi uyu: anthu akudziweni kuti ndimwe mwekha Mulungu wa maso, adziwembo Yezu Kristu [adatuma] imwe.” (Jwau 17:3) Mpostolo Jwau alemba: “Pantsi pano na pyonsene pinasirira anthu a penepo, pinamala. Mbwenye anacita pinafuna Mulungu, hanamala tayu.”—1 Juwau 2:17, Mphangwa Zadidi.
Mwandimomwene Pyenepi Pisabvekanji
4. (a) Kodi mwandimomwene kugumanywa kwa anthu azinji m’ulambiri wakuphatana m’nzidzi wathu kusabvekanji? (b) Kodi Biblya isafokotoza tani kugumanywa kweneku?
4 Kodi mwandimomwene kugumanywa kwa anthu azinji m’ulambiri wakuphatana m’nzidzi wathu kusabvekanji? Ndi cipangizo capakweca cakuti tiri cifupi kakamwe na kumala kwa dziko ino yakuipa, na kuti dziko ipswa ya Mulungu inadzatoma munadzamala kwene dziko ino yakuipa. Tisaona na maso athu kukwanirisika kwa maprofesiya a Biblya adalongeratu pya kugumanywa kweneku kwakupambulika. Ibodzi ya maprofesiya anewa isalonga: “Pa ntsiku zinafuna kudza [ntsiku zino zakumalisa], phiri idamangwa nyumba ya Mulungu [ulambiri wace ukulu wandimomwene] inadzapabswa mbiri ikulu kupita mapiri anango onsene [mitundu inango ya ulambiri] . . . Anthu a madziko mazinji anadzaendako, mbalonga: ‘Tendeni pa phiri ya Mbuya na ku nyumba ya Mulungu Mbuya wa Israele. Iye anadzatipfundisa pinafuna Iye, ife mbatifamba pa njira zache.’”—Mikeya 4:1, 2; Masalmo 37:34.
5, 6. (a) Kodi ndi m’njira ipi madzinza ali kuenda kwa Yahova? (b) Kodi ndi mabvunzo api anafunika ife kucitika?
5 Maseze si madzinza amumphu tayu anaenda ku nyumba yauzimu ya kulambira ya Yahova, mamiliyau a anthu akubulukira m’madzinza anewa asacita pyenepi. Munapfunza iwo pya cifuniro cakufuna na makhaliro akukomeresa a Yahova Mulungu, mitima yawo isakhuyiwa kakamwe. Mwakucepeseka iwo asasaka kudziwa pinafuna Mulungu kwa iwo. Phembero yawo ndi sawasawa na ya nyamasalmo adalonga: “Ndipfundziseni kuchita kufuna kwanu, thangwi ndimwe Mulungu wanga.”—Masalmo 143:10.
6 Kodi munganyerezera musaona kuti muli pakati pa mwinji ukulu wa anthu unagumanywa cincino na Yahova m’ulambiri wakuphatana? Kodi kutawira kwanu pipfunziso pinatambira imwe kubulukira m’Mafala ace kusapangiza kuti musakhulupira kuti Yahova ndi Ncera wa pipfunziso pyenepi? Kodi ‘munadzafamba pa njira zace’ mpaka kupi?
Kuphatana Kwa Ulambiri Kusakwanisika Tani
7. (a) Kodi kuphatana kwa ulambiri kunadzafika mpaka kupi? (b) Thangwi yanji munthu asafunika kucimbiza kukhala mulambiri wa Yahova cincino, na tinakwanisa tani kuphedza anango kucita cibodzibodzi?
7 Cifuniro ca Yahova ndi cakuti pyakucitwa pyonsene pyanzeru piphatane m’ulambiri wandimomwene. Tisafuna tani kuona ntsiku yakuti anthu onsene ali maso anadzalambira Mulungu mbodzi basi wandimomwene! (Masalmo 103:19-22) Mbwenye pyenepi mbipisati kucitika, Yahova asafunika kufudza anthu onsene anakhonda cifuno cace cakulungama. Mwatsisi, iye asadziwisa mwanyapantsi pinafuna iye kudzacita, towera anthu konsene kwene akhale na mwai wa kucinja makhaliro awo. (Izaiya 55:6, 7) Natenepa, m’ntsiku zathu ‘mbumba zonsene na madzindza onsene, pilongero pyonsene na mitundu ya anthu onsene’ asapaswa cenjezo iyi yakucimbiza: “Gopani Mulungu mbamum’pasa mbiri thangwi wafika ndzidzi wa kutonga kwache. Mumulambire uyu adachita thambo na pantsi pano, bara na mphuno zinabuluka madzi pantsi.” (Apokalipse 14:6, 7) Kodi imwe mwatawira kucemererwa kweneku? Khala mwatawira, muli na mwai wa kucemerera anango towera adziwe na alambire Mulungu wandimomwene.
8. Pakumala kupfunza pipfunziso pyakutoma pya Biblya, kodi tisafunika kuwangisira kucitanji pontho?
8 Si cifuniro ca Yahova tayu kuti alambirwe na anthu analonga kuti asankhulupira mbwenye mbapitiriza kusaka pifuno pyawo pyene. Mulungu asafuna kuti anthu ‘adziwe kakamwe pinafuna’ iye na kupangiza pyenepi m’umaso wawo. (Akolose 1:9, 10) Natenepa, anthu akupereka takhuta anapfunza pipfunziso pyakutoma pya Biblya asafuna kukula mpaka kukhala Akristu akukola. Cifuno cawo ndi kudziwa mwadidi Yahova, kukulisa kubvesesa kwawo Mafala ace, na kuaphatisira mwakukwana m’umaso wawo. Iwo asasaka kupangiza makhaliro a Baba wathu wakudzulu na kuona pinthu ninga munapionera iye. Pyenepi pisaakulumiza kusaka njira za kucita khundu m’basa yakupulumusa inacitwa pa dziko yapantsi m’ntsiku zathu. Kodi muna cifuno cibodzibodzi?—Marko 13:10; Ahebere 5:12–6:3.
9. Kodi kuphatana kwandimomwene kusakwanisika tani lero?
9 Biblya isapangiza kuti ale anatumikira Yahova asafunika kukhala anthu akuphatana. (Aefesi 4:1-3) Kuphatana kweneku kulipo lero, ngakhale kuti tisakhala m’dziko yakugawika na tikupitiriza kuthimbana na kusowa kwathu ungwiro. Yezu aphembera mwakuwanga kuti anyakupfunza ace akhale akuphatana ninga mbodzi basi, atsanzaye na kuphatana kwandimomwene. Kodi pyenepi mbipidabvekanji? Cakutoma, iwo mbadakhala na uxamwali wadidi na Yahova na Mwanace. Caciwiri, iwo mbadakhala akuphatana unango na nzace. (Jwau 17:20, 21) Towera kufikira cifuno ceneci, mpingo Wacikristu usaphata basa ninga cigawiko cinaphatisirwa na Yahova towera kupfunzisa mbumba yace.
Kodi Ndi Pinthu Pipi Pinaphedza Kuphatana?
10. (a) Kodi tisakulisanji munaphatisira ife Biblya towera kugumana matawiro a mabvunzo anatikhuya? (b) Dingani ntsonga zinaphedza kuphatana Kwacikristu m’kutawira mabvunzo adalembwa pa ndima ino.
10 Pinthu pinomwe pyakufunika pinaphedza kuphatana kwa ulambiri pyalembwa pantsiapa. Munatawira imwe mabvunzo anatowerera ntsonga zenezi, onani kuti ntsonga ibodzi na ibodzi isakhuya tani uxamwali wanu na Yahova pabodzi na Akristu anzanu. Kunyerezera ntsonga zenezi na kudinga malemba akusowa mafala m’ndima kunadzakuphedzani kuthimizira cidziwiso canu caumulungu, mphambvu ya manyerezero na nzeru—makhaliro akuti asafunika kwa ife tonsene. (Misangani 5:1, 2; Afilipi 1:9-11) Dingani ntsonga zenezi ibodzi na ibodzi.
(1) Tisadzindikira kuti Yahova ndiye adathema kuikha midida ya kusiyanisa cadidi na cakuipa. “Khulupira Mulungu na ntima wako wonsene mbuleka kukhulupira nzeru zako. Unnyerezere kuenda na kuenda, iye anadzazereza njira zako.”—Misangani 3:5, 6.
Thangwi yanji tisafunika kusaka uphungu na citsogolero ca Yahova munacita ife pyakusankhula? (Masalmo 146:3-5; Izaiya 48:17)
(2) Tina Mafala a Mulungu towera kutitsogolera. “Mwatambira mafala a mphangwa zadidi za Mulungu, zidafotokoza ife; hamudaatambira tayu ninga mafala a anthu mbwenye ninga mafala a Mulungu, ande ndiwo mafala a Mulungu kakamwe.”—1 Atesalonika 2:13.
Kodi pana ngobzi yanji m’kucita pinthu “pinaona” ife kukhala pyakulungama? (Misangani 14:12; Yeremiya 10:23, 24; 17:9)
Khala nee tisadziwa uphungu unapasa Biblya pa cinthu cinango, kodi tisafunika kucitanji? (Misangani 2:3-5; 2 Timoti 3:16, 17)
(3) Ife tonsene tisaphindula na ndandanda ubodzi ene wa kutambira cakudya cauzimu. “Ine ndekha [Yahova] ndinapfunzisa anthu.” (Izaiya 54:13) “Mbatilangane [peno tionerane] na andzathu towera tifunane, mbatichita pinthu pyadidi pizinji. Lekani kuchalira nsonkhano wanu, ninga munachitira anango, mbwenye mulangane [peno muwangisane] pyadidi, makamaka pakuona kuti ntsiku ya [kufudza] iri duzi.”—Ahebere 10:24, 25.
Kodi ndi maphindu anji anatambira ale anatowerera mwakukwana masasanyiro a Yahova a kutambira cakudya cauzimu? (Izaiya 65:13, 14)
(4) Ntsogoleri wathu ndi Yezu Kristu, tayu munthu. “Imwe lekani kuthuliwa apfundisi na anthu, thangwi mpfundisi wanu alipo mbodzi ekha, mbwenye imwe mwonsene ndimwe abale. Lekani kuthula baba munthu mbodzi wa pantsi pano, thangwi Baba wanu ndi mbodzi ekha, ndiye ali kudzulu. Lekanimbo kuthulwa apfundisi, thangwi mpfundisi wanu ndi mbodzi ekha, ndiye Kristu.”—Mateo 23:8-10.
Kodi mbodzi na mbodzi wa ife asafunika kuoneka ninga wankulu kupiringana anango? (Aroma 3:23, 24; 12:3)
(5) Tisaona utongi wa Umambo wa Mulungu ninga cidikhiro cibodzi basi ca anthu. “Mbwenye imwe longani maphembero ninga tenepa: ‘Baba wathu muli kudzulu, dzina yanu ikhale na mbiri [peno iceneswe]. Dziko [peno umambo] yanu mbidze kuna ife. Pinafuna imwe mbapichitwe pantsi pano ninga kudzulu.’ Mphapo tomani kusaka dziko ya kudzulu na udidi wayo.”—Mateo 6:9, 10, 33.
Kodi ‘kutoma kusaka dziko ya kudzulu’ kusaphedza tani kutsidzikiza kuphatana kwathu? (Mikeya 4:3; 1 Jwau 3:10-12)
(6) Nzimu wakucena usabala mwa alambiri a Yahova makhaliro akuti ndi akufunika towera kuphatana Kwacikristu. “Mbwenye misapo inabalwa na Nzimu wa Mulungu ndiyo: kufuna andzako, kusekera, ntendere, kupirira, kukoma ntima, udidi, kukhulupirika, kupfulika na kudzitonga.”—Agalata 5:22, 23, MZ.
Kodi tisafunika kucitanji kuti nzimu wa Mulungu ubale misapo yace mwa ife? (Machitiro 5:32)
Kodi kukhala na nzimu wa Mulungu kusakhuya tani kubverana kwathu na Akristu anzathu? (Jwau 13:35; 1 Jwau 4:8, 20, 21)
(7) Alambiri andimomwene onsene a Mulungu asacita khundu m’kumwaza mphangwa zadidi za Umambo. “Mphangwa zadidi za dziko [peno umambo] ya kudzulu zinadzapangwa pantsi ponsene, towera [mupereke umboni] pakati pa anthu a mitundu yonsene. Pingamala ipi inadzabwera nthawi ya kumalisirathu pyonsene.”—Mateo 24:14.
Kodi ndi ninji cinatikulumiza kufuna kucita khundu mwakukwana m’basa ineyi ya kumwaza mphangwa? (Mateo 22:37-39; Aroma 10:10)
11. Kodi ndi maphindu api anatambira ife m’kuphatisira undimomwene wa Biblya m’umaso wathu?
11 Kulambira Yahova mwakuphatana kusaticitisa kukhala duzi kakamwe na iye na kusaticitisa kukomerwa na kufambirana kwakukomeresa na anyakukhulupira anzathu. Masalmo 133:1 asalonga: “Mphyadidi na pyakukomerathu kugumanyikana ninga abale.” Ndi kwakukomeresa tani kuthawa dziko na kucenama kwayo konsene, ulukwali, na uphanga towera kugumanyikana na ale anafunadi Yahova na kubvera miyambo yace!
Calirani Pidzoloero Pyakumwaza
12. Thangwi yanji tisafunika kucalira nzimu wakukhonda bvera?
12 Towera tikhonde kufudza kuphatana kwathu kwakufunika kwa dziko yonsene yapantsi, tisafunika kucalira pidzoloero pyakumwaza. Cibodzi ca pidzoloero pyenepi ndi nzimu wakukhonda bvera Mulungu na miyambo yace. Yahova asatiphedza kucalira nzimu unoyu m’kupangiza ntomesi wace, Sathani Dyabo. (2 Akorinto 4:4; Apokalipse 12:9) Sathani ndiye adacitisa Adamu na Eva kupwaza pidaapanga Mulungu na kusankhula kucita pinthu mwakusiyana na cifuno ca Mulungu. Pyenepi pyabweresa nyatwa kwa iwo na kwa ife. (Genesi 3:1-6, 17-19) Dziko ino yadzala kakamwe na nzimu wakukhonda bvera Mulungu na miyambo yace. Natenepa tisafunika kukhondesa nzimu unoyu kutikhuya.
13. Kodi ndi ninji cinafuna kudzapangiza khala mwandimomwene tisakhunganyika towera kukhala maso m’dziko ipswa yakulungama ya Mulungu?
13 Mwacitsanzo, onani pikiro yakukomeresa ya Yahova yakudzabweresa kudzulu kupswa na pantsi papswa “panakhala ulungami” mbuto mwa dziko ino yakuipa. (2 Pedro 3:13) Kodi pyenepi nkhabe kutikulumiza kutoma kukhunganyika towera kukhala maso m’nzidzi unoyu unafuna kudzakhala ulungami? Pyenepi pisabveka kukoya uphungu wapakweca wa Biblya: “Lekani kufuna pinthu pya pantsi pano na pyonsenembo pya pantsi; thangwi kufuna kwa Baba kunakhala tayu mwa munthu anafuna pya pantsi pano.” (1 Jwau 2:15) Natenepa, tisacalira nzimu wa dziko ino—nkhaliro wayo wakutongeka, kudzudzumika kakamwe na pya munthu ekha, ulukwali na uphanga. Ife tisabvesera Yahova na kumbvera kubulukira m’ntima mwathu, maseze tiri na pipendamiro pyakusiyana thangwi ya manungo akusowa ungwiro. Makhaliro athu onsene a umaso asapangiza kuti manyerezero athu na pyakufuna pyathu ndi kucita cifuno ca Mulungu.—Masalmo 40:8.
14. (a) Thangwi yanji mphyakufunika cincino kuphatisisa mwai wa kupfunza na kutowerera njira za Yahova m’umaso wathu? (b) Kodi malemba akukhonda khala na mafala m’ndima asabvekanji kwa mbodzi na mbodzi wa ife?
14 Ungadzafika nzidzi udaikhwa towera Yahova afudze makhaliro ano apinthu akuipa na anthu onsene anatowerera njira zawo, iye hanadzadembuka tayu. Hanadzacinja nzidzi unoyu tayu peno kucinja midida yace towera kuphedza ale anayesera kuphatisisa dziko ino mbwenye na ntima unango asapfunza na kucita cifuno ca Mulungu. Uno ndi nzidzi wa kucita pinthu! (Luka 13:23, 24; 17:32; 21:34-36) Pisakomeresa tani ntima kuona kuti mwinji ukulu usaphatisisa mwai unoyu wakufunika, mbusaka mwakuwanga pipfunziso pinapasa Yahova kubulukira m’Mafala na gulu yace pabodzi na kufamba mwakuphatana m’njira zace kuenda ku dziko ipswa! Munapfunza ife mwadidi pya Yahova, tinadzanfuna na kuntumikira mwadidi.
Kubwerezera Pidapfunzwa
• Kodi ndi cipi cifuniro ca Yahova na ulambiri?
• Pakumala kupfunza pipfunziso pyakutoma pya Biblya, kodi tisafunika kuwangisira kucitanji pontho?
• Kodi mbodzi na mbodzi wa ife angakwanise kucitanji towera akhale wakuphatana na alambiri anango a Yahova?
[Foto pa tsamba 4]
‘Anyakupfulika anakhala m’dziko, mbakomerwa na ntendere ukulu kakamwe’