Mibvundzo Inacitwa Na Anyakuleri

Kodi Yezu akhafuna kulonganji pidalonga iye kuti: “Lekani kunyerezera kuti ndabweresa ntendere”?

Yezu apfundzisa anthu toera akhale muntendere na anango. Mbwenye ntsiku inango iye apanga anyakupfundzace: “Lekani kunyerezera kuti ndabweresa ntendere pa dziko yapantsi; ine nee ndabweresa ntendere, mbwenye ndabweresa kumwazana. Ine ndabwera kudzamwaza mwana wamamuna na babace, mwana wankazi na mace, pontho nkwenya na mebzwalace.” (Mat. 10:34, 35) Yezu akhafuna kulonganji na mafala anewa?

Yezu nee akhafuna kuti anthu a pabanja ibodzi ene amwazane, mbwenye iye akhadziwa kuti pipfundziso pyace mbapidacitisa kuti anthu a pabanja ibodzi ene akhonde kubverana. Natenepa, ale akhafuna kukhala anyakupfundza a Kristu mbabatizwa, akhafunika kudziwa kuti midzidzi inango anthu a pabanja pawo nee mbadakomerwa thangwi ya cisankhulo cawo. Midzidzi inango, ndzawo wa m’banja peno abale awo mbadaakhondesa kutumikira Mulungu, mbapikhala pyakunentsa kuna iwo toera kupitiriza kubvera pipfundziso pya Kristu.

Bhibhlya isalonga kuti Akristu “asafunika kukhala muntendere na anthu onsene.” (Aroma 12:18) Mbwenye pipfundziso pya Yezu pinakhala ninga “supada” m’mabanja anango. Pyenepi pisacitika khala m’bodzi wa pabanja atawira pipfundziso pya Yezu, mbwenye anango mbakhonda. Na thangwi ineyi, anthu a panyumba ibodzi ene asakhala “anyamalwa” a ule anapfundza undimomwene.—Mat. 10:36.

Anyakupfundza a Kristu anakhala na anthu ali mu uphemberi wakusiyana na wawo, midzidzi inango asafunika kusankhula kukomeresa Yahova na Yezu peno anthu a pabanja pawo. Mwacitsandzo, anthu a pabanja pawo akuti nee asatumikira Mulungu, panango anaakakamiza toera kucita maphwando a uphemberi wauthambi. Pyenepi pingacitika, iwo asafunika kusankhula munthu anafunika iwo kukomeresa. Yezu alonga: “Ule anafuna kakamwe babace peno mace kupiringana ine, nee athema kukhala nyakupfundza wanga.” (Mat. 10:37) Yezu, nee akhafuna kulonga kuti ale anafuna kukhala anyakupfundzace nee asafunika kufuna kakamwe anyakubalawo. Mbwenye iye aapfundzisa kuti anasankhula tani cinthu cakufunika kakamwe mu umaso wawo. Anthu a pabanja pathu angatikhondesa kutumikira Yahova, ife tinapitiriza kuafuna, mbwenye tisafunika kudzindikira kuti pakutoma tisafunika kufuna Mulungu.

Mwakukhonda penula, ife tisatsukwala kakamwe tingatcingwa na anthu anakhala na ife. Mbwenye anyakupfundza a Yezu asafunika kukumbuka mafalace akuti: “Ule anakhonda kupirira kutcingwa, pontho mbakhonda kunditowera, nee athema kukhala nyakupfundza wanga.” (Mat. 10:38) Akristu angatcingwa na anthu a pabanja pawo, asafunika kuona pyenepi ninga nyatwa zakuti anyakupfundza a Kristu asafunika kuzipirira. Mu ndzidzi ubodzi ene, iwo asadikhira kuti thangwi ya makhaliro awo adidi, anthu a pabanja pawo anacinja manyerezero awo mbatawira kupfundza Bhibhlya.—1 Ped. 3:1, 2.