• Imwe Munatawirisa Kuti Pinthu Pinango Pikucimwaniseni Kutowera Yezu?
    Ncenjezi (Wa Pfundziro)—2021 | Maio

    • (2) YEZU AKHONDA KUCITA PIRENGO TOERA KUPANGIZA KUTI NDI MESIYA

      Yezu ali kulonga na mwinji wa anthu.

      Anthu azinji akhonda kutowera Yezu thangwi iye akhonda kupangiza pidzindikiro. Kodi pyenepi pisacitikambo kuna anthu anango lero? (Onani ndima 9-10)c

      9. Kodi anthu acitanji pidakhonda Yezu kuapangiza cidzindikiro?

      9 Anthu anango a mu ntsiku za Yezu nee akhakomerwa na pinthu pikhapfundzisa iye. Thangwi iwo akhafuna kuti iye acite pizinji kupiringana pire pikhapfundzisa iye. Mwacitsandzo, iwo am’phemba toera acite ‘cidzindikiro cibodzi mu dzina ya Mulungu’ toera apangize kuti akhali Mesiya. (Mat. 16:1) Panango iwo aphemba Yezu toera kucita pyenepi thangwi yakubvesesa mwakuphonyeka mafala adalembwa pa Danyele 7:13, 14. Mbwenye unoyu nee ukhali ndzidzi wakuthema kuna Yahova toera profesiya ineyi ikwanirisike. Mwandimomwene pinthu pikhapfundzisa Yezu pikhafunika kuaphedza toera kudzindikira kuti iye akhali Mesiya. Mbwenye pidakhonda Yezu kucita cidzindikiro cidaphemba iwo, iwo asiya kuntowera.—Mat. 16:4.

      10. Kodi Yezu akwanirisa tani pidalemba Izaiya thangwi ya Mesiya?

      10 Kodi Bhibhlya isalonganji? Mprofeta Izaiya alonga thangwi ya Mesiya kuti: ‘Iye nee anadzakhuwa peno kugaluza fala yace, pontho iye nee anadzacitisa kuti fala yace ibveke mu nseu.’ (Iza. 42:1, 2) Mu ndzidzi ukhacita Yezu basa yace yakumwaza mphangwa na kupfundzisa anthu, iye nee akhasaka mbiri. Iye nee amanga matemplo makulu, nee abvala nguwo zakupambulika, pontho iye nee akhafuna kuti anthu ancemere na madzina a cidzo. Mu ndzidzi ukhathabuswa iye, Yezu akhonda kucita cirengo toera kukomeresa Mambo Herodhi, maseze umaso wace ukhali pangozwi. (Luka 23:8-11) Ndimomwene kuti Yezu acita pirengo pingasi, mbwenye cinthu cakufunika kakamwe kuna iye cikhali kumwaza mphangwa zadidi. Na thangwi ineyi, iye apanga anyakupfundzace: “Ine ndadzera pyenepi.”—Marko 1:38.

  • Imwe Munatawirisa Kuti Pinthu Pinango Pikucimwaniseni Kutowera Yezu?
    Ncenjezi (Wa Pfundziro)—2021 | Maio

    • (3) YEZU NEE ATOWEZERA PIPFUNDZISO PIZINJI PYA AYUDA

      Anthu azinji akhonda kutowera Yezu thangwi iye acalira pipfundziso pyakuti nee pikhabverana na Malemba. Kodi pyenepi pisacitikambo kuna anthu anango lero? (Onani ndima 13)d

      13. Thangwi yanji anthu azinji asiya kutowera Yezu?

      13 Mu ntsiku za Yezu, anyakupfundza a Juwau M’batizi akhadzudzumika kakamwe thangwi anyakupfundza a Yezu nee akhacita jejuu. Yezu afokotoza kuti iwo nee akhali na mathangwi toera kucita jejuu mu ndzidzi wakuti iye akhali m’maso. (Mat. 9:14-17) Ngakhale tenepo, Afarisi na anyamalwa anango a Yezu akhantcinga thangwi iye nee akhatowezera pipfundziso pyawo. Iwo akhaipirwa kakamwe pikhawangisa Yezu anthu pa ntsiku ya Sabudu. (Marko 3:1-6; Juwau 9:16) Iwo akhalonga mwakudzikuza kuti asabvera mwambo wa Sabudu mu ndzidzi ubodzi ene mbacita malonda awo mu templo. Iwo aipirwa kakamwe pidaasandika Yezu thangwi yakucita pyenepi. (Mat. 21:12, 13, 15) Kusiyapo pyenepi, mu ndzidzi ukhapfundzisa Yezu mu sinagoga ku Nazareti, anthu aipirwa kakamwe pidaphatisira Yezu citsandzo ca pinthu pidacitika mu Izraeli toera kupangiza kuti iwo ndi anthu aumbirimi na akusowa cikhulupiro. (Luka 4:16, 25-30) Anthu azinji asiya kutowera Yezu thangwi iye nee akhacita pinthu pikhafuna iwo.—Mat. 11:16-19.

      14. Thangwi yanji Yezu akhacalira pipfundziso pya anthu?

      14 Kodi Bhibhlya isalonganji? Mukuphatisira mprofeta Izaiya, Yahova alonga: ‘Anthu awa asandifendedzera na milomo yawo, pontho asandilemedza na milomo yawo basi, mbwenye mitima yawo iri kutali kakamwe na ine; Iwo asandilambira mwakubverana na mitemo ya anthu, ire idapfundziswa iwo.’ (Iza. 29:13) Yezu akhali na mathangwi adidi toera kucalira pipfundziso pyakuti nee pikhabverana na Malemba. Ale akhanyerezera kuti pipfundziso pya anthu ndi pyakufunika kakamwe kupiringana pinalonga Malemba, akhakhonda Yahova pabodzi na Mesiya adatuma iye.

  • Imwe Munatawirisa Kuti Pinthu Pinango Pikucimwaniseni Kutowera Yezu?
    Ncenjezi (Wa Pfundziro)—2021 | Maio

    • (4) YEZU NEE ACITA KHUNDU MU PINTHU PYA NDALE ZA DZIKO

      Anthu azinji akhonda kutowera Yezu thangwi iye akhonda kucita khundu ya ndale za dziko. Kodi pyenepi pisacitikambo kuna anthu anango lero? (Onani ndima 17)e

      17. Kodi anthu anango mu ntsiku za Yezu akhadikhira kuti Mesiya mbadacitanji?

      17 Anthu anango a mu ndzidzi wa Yezu akhafuna kuti paoneke macinjo thangwi ya utongi wa mu ndzidzi unoyu. Iwo akhadikhira kuti Mesiya mbadaasudzula mu utongi ukhaaponderera Waciroma. Mbwenye pidayesera iwo kukhazikisa Yezu ninga Mambo wawo iye akhonda. (Juwau 6:14, 15) Anthu anango kuphatanizambo anyantsembe akhagopa Yezu thangwi akhanyerezera kuti iye mbadacinja utongi. Buluka penepo, Aroma mbadaipirwa mbabulusa cidzo cikhali na anyantsembe. Nakuti iwo akhadzudzumika kakamwe na pinthu pyenepi pya ndale, asiya kutowera Yezu.

      18. Ndi maprofesiya api analonga pya Mesiya akuti anthu azinji akhaapwaza?

      18 Kodi Bhibhlya isalonganji? Maseze maprofesiya mazinji alonga mwanyapantsi kuti Mesiya mbadakhala nyankhondo wakuwina, maprofesiya anango asapangiza kuti iye mbadafa thangwi ya madawo athu. (Iza. 53:9, 12) Mphapo thangwi yanji Ayuda akhali na maonero akuphonyeka thangwi ya Mesiya? Anthu azinji a mu ndzidzi wa Yezu akhapwaza maprofesiya akuti nee akhalonga pya kumalisa nyatwa zawo mu ndzidzi unoyu.—Juwau 6:26, 27.