Iwo Aperekeka Na Ntima Onsene​—Ku Rusiya

MU CAKA 1991, Mboni za Yahova zakomerwa kakamwe pidamala mpingizo wa pyaka pizinji wa kukhondeswa kwa basa yawo mbakhala akutawirika na utongi. Pa ndzidzi unoyu, azinji nee mbadatawira kuti Mboni za Yahova mbazidathimizirika kakamwe mpaka 170.000 lero. Mwa amwazi mphangwa aphinga anewa, anango ndi Mboni za Yahova zidabuluka m’madziko anango toera kuphedza basa ya kubvuna mwauzimu ku Rusiya. (Mat. 9:37, 38) Tendeni tidziwe angasi a iwo.

ABALE AKUPEREKEKA APHEDZA KUWANGISA MIPINGO

Mu caka cidatawiriswa basa yakumwaza mphangwa ku Rusiya, Matthew wa ku Grã-Bretanha akhali na pyaka 28 pyakubalwa. Pa nsonkhano wa gawo wa caka ceneci, nkhani ibodzi yagomezera kuti kukhafunika ciphedzo m’mipingo ya Kumabulukiro a Dzuwa ku Europa. Mwacitsandzo, nyakucita nkhani alonga pya mpingo wa St. Petersburg, ku Rusiya wakuti nee ukhali na akulu a mpingo, mbwenye ukhali na ntumiki wakutumikira m’bodzi basi. Ngakhale tenepo, amwazi mphangwa akhacitisa mapfundziro a Bhibhlya mazinji kakamwe! Matthew alonga: “Pidamala nkhani ineyi, ndikhanyerezera kakamwe pya Rusiya, natenepa, ndacita phembero kuna Yahova makamaka thangwi ya cifuno canga toera kuenda kweneku.” Iye akoya kobiri pang’ono, agulisa pinthu pyace pizinji mbaenda ku Rusiya mu caka 1992. Ndi api maphindu adakhala na iye?

Matthew alonga: “Cilongero cikhali cinentso. Nee ndikhakwanisa kucedza mwadidi thangwi ya pinthu pyakuzika pyauzimu.” Cinentso cinango cikhali kugumana mbuto yakukhala. “Nee ndisakumbukabve kuti ndacinja kangasi mbuto yakukhala mwakukhonda dikhira.” Mwakukhonda tsalakana mipingizo ineyi yakutoma, Matthew alonga: “Kuenda ku Rusiya ndi cisankhulo cadidi kakamwe cidacita ine mu umaso wanga.” Iye afokotoza: “Kutumikira kuno kwandiphedza toera kupfundza kunyindira kakamwe Yahova na kuona citsogolero cace munjira zizinji.” Mukupita kwa ndzidzi Matthew akhazikiswa ninga nkulu wa mpingo na mpainiya wakupambulika, lero asatumikira ku ofesi ya filiali cifupi na St. Petersburg.

Mu caka 1999, Hiroo amalisa mapfundziro a Xikola Yakupfundzisa Basa Ya Utumiki ku Japau pikhali iye na pyaka 25 pyakubalwa. M’bodzi wa apfundzisi ace amuwangisa toera kutumikira ku dziko yakunja. Hiroo akhadabva kuti ku Rusiya kusafunika ciphedzo kakamwe, iye atoma kupfundza cilongero ca ku Rusiya. Iye acitambo thanyo inango. Iye alonga: “Ndaenda ku Rusiya mbandimala nthanda zitanthatu. Nakuti ndzidzi wa khoni ndi wakutonthola kakamwe kweneku, ndaenda mu nthanda ya Bingu toera kuona khala mbidapirira kutonthola.” Pidamala ndzidzi unoyu wakutonthola, iye abwerera ku Japau mbatoma kukhala na umaso wakululupa kakamwe toera akwanise kukoya kobiri yakukwana kuti abwerere pontho ku Rusiya toera kukhaliratu kweneku.

Hiroo ali ku Rusiya mu pyaka 12, iye atumikira m’mipingo mizinji. M’midzidzi inango akhali ekha basi ninga nkulu wa mpingo mbatsalakana amwazi mphangwa 100. M’mpingo unango, akhacita ekhene makhundu mazinji a Nsonkhano wa Basa, akhatsogolera Xikola ya Utumiki wa Mulungu, Pfundziro ya Ncenjezi na Mapfundziro a Bukhu ya Mpingo maxanu. Akhacitambo maulendo mazinji akucedzera abale. Angakumbuka pyaka pyenepi, Hiroo asalonga: “Pikhali pyakutsandzayisa kakamwe kuphedza abale na alongo toera kukhala akuwanga mwauzimu.” Kodi kutumikira ku mbuto inafunika ciphedzo kwankhuya tani? Iye alonga: “Mbandidzati kuenda ku Rusiya, ndikhatumikira ninga nkulu wa mpingo na mpainiya, mbwenye ndisabva ninga ndakulisa uxamwali upswa na Yahova pidabwera ine kuno. Ndapfundza kunyindira kakamwe Yahova m’makhundu onsene a umaso wanga.” Mu caka 2005, Hiroo amanga banja na Svetlana, iwo asapitiriza kutumikira pabodzi ninga apainiya.

Matthew, wa pyaka 34 na m’bale wace wa pyaka 28 anacemerwa Michael, abuluka ku Kanada. Uwiri wawo akhadaenda kaona Rusiya mbadzuma na kuona kuti anthu azinji akhapangiza cifuno mbagumanika pa misonkhano, mbwenye nee kukhali na abale azinji toera kupfundza Bhibhlya na iwo. Matthew alonga: “Mpingo udaenda ife kaona, anthu 200 akhagumanika pa misonkhano, mbwenye misonkhano yonsene ikhatsogolerwa na nkulu wa mpingo m’bodzi basi wakugwesera na mphale akhatumikira ninga ntumiki wakutumikira. Kuona makhaliro anewa kwandicitisa kukhala na cifuno cakwenda kweneku toera kuphedza abale anewa.” Iye aenda ku Rusiya mu caka 2002.

Mudapita pyaka pinai, Michael aenda ku Rusiya mbaona mwakucimbiza kuti kukhafunika kakamwe abale. Ninga ntumiki wakutumikira, iye aphembwa toera kutsalakana makobiri a mpingo, mabukhu na pisa pyakumwaza mphangwa. Iye apaswambo mabasa akuti kazinji kene asacitwa na mulembi wa mpingo, akhacita nkhani zapakweca, kuphedza kukhunganya misonkhano ya cisa na kumangwa kwa Nyumba za Umambo. Mwandimomwene, mpaka lero ciphedzo cisapitiriza kufunika m’mipingo. Maseze akutsalakana mabasa mazinji akuwanga, Michael wakuti cincino asatumikira ninga nkulu wa mpingo alonga: “Kuphedza abale kusandibweresera kutsandzaya kakamwe. Ndi njira yadidi kakamwe yakuphatisira umaso wanga!”

Mukupita kwa ndzidzi, Matthew amanga banja na Marina, Machael amanga banja na Olga. Mabanja anewa pabodzi na abale na alongo azinji akuperekeka, asapitiriza kuphedzera mipingo yakuti isapitiriza kuthimizirika.

ALONGO APHINGA ASAPHEDZERA BASA YAKUBVUNA

Mu caka 1994, pa ndzidzi wakuti Tatyana akhali na pyaka 16 pyakubalwa, apainiya akupambulika atanthatu adabuluka ku República Tcheca, Polônia, na Eslováquia atoma kutumikira m’mpingo wawo ku Ukraniya. Iye asaakumbuka mwakukomerwa mbalonga: “Iwo akhali apainiya aphinga na adidi akuti akhacedza na anthu, iwo akhadziwa mwadidi Bhibhlya.” Iye aona kuti Yahova apasa nkhombo kakamwe kuperekeka kwawo. Iye anyerezera: ‘Ndisafunambo ndikhale ninga iwo.’

Mu kukulumizwa na citsandzo ca apainiya, Tatyana akhaphatisira ndzidzi wace wa maferya toera kuenda na anango ku pisa pyakutali ku Ukraniya na Belarus kwakuti nee kukhamwazwa mphangwa na Mboni za Yahova. Iye akhakomerwa kakamwe na maulendo anewa akumwaza mphangwa, acita masasanyiro toera kuthimizira utumiki wace mbaenda ku Rusiya. Pakutoma iye aenda kweneku toera kumala ntsiku zingasi mbaona mulongo wakuti akhadacinja mbaenda kakhala kweneku na kusaka basa yakuti mbidamphedza m’basa yace ya upainiya. Mu caka 2000, iye acinja mbaenda ku Rusiya. Kodi pikhali pyakunentsa kucinja?

Tatyana alonga: “Nakuti nee ndikhali na kobiri toera kulugari nyumba, ndikhalugari kwartu panyumba za anango. Makhaliro anewa akhali akunentsa. Pakhali midzidzi yakuti ndikhafuna kubwerera kunyumba. Mbwenye Yahova andiphedza ndzidzi onsene toera kuona kuti mbidaphindula mu kupitiriza m’basa yanga.” Lero, Tatyana asatumikira ninga misionaryo ku Rusiya. Iye alonga: “Pyaka pyonsene pidakhala ine kunja kwa dziko yanga yacibaliro ndakhala na pyakugumana napyo pyadidi kakamwe na axamwali azinji. Mwa pyonsene, pyaka pyenepi pyawangisa cikhulupiro canga.”

Masako wa ku Japau, wakuti ali nkati mwa pyaka 50 akhali na cifuno cakutumikira ninga misionaryo kutomera kalene, mbwenye acimwana kucita pyenepi thangwi ya nyatwa za ungumi. Ngakhale tenepo, pidacita iye mbwenye pang’ono, atonga kuenda ku Rusiya toera kuphedza basa yakubvuna. Maseze pikhali pyakunentsa kugumana nyumba yakukhala na basa yakuthema, iye akhapfundzisa anthu Cijapau mbacita mabasa akucenesa toera kuphedzeka m’basa yace ya upainiya. Ninji pidamphedza toera kupitiriza m’basa yace?

Angakumbuka pyaka 14 pya basa yace ku Rusiya, Masako asalonga: “Kukomerwa kunakhala na ine mu utumiki kusapiringana nyatwa zonsene zinaona ine. Kumwaza mphangwa m’mbuto zakuti kusafunika kakamwe amwazi mphangwa a Umambo, kusacitisa umaso kukhala wakuwangisa na wakutsandzayisa.” Iye athimiza: “Kwa ine, pisakhala ninga ndi cirengo ca ntsiku zino kuona na maso anga Yahova mbakandipasa cakudya, cakubvala na pakukhala mu pyaka pyenepi.” Kusiyapo kutumikira m’mbuto zinafunika ciphedzo ku Rusiya, Masako atumikirambo ku Quirguistão. Mwakuthimizira, iye akwanisa kuphedzera misoka ya cilongero ca Cingerezi, Cixina na Uigur. Lero, mulongo unoyu asatumikira ninga mpainiya ku St. Petersburg.

MABANJA ASAPEREKA CIPHEDZO MBATAMBIRA NKHOMBO

Na thangwi ya kugwa kwa mpfuma, kazinji kene mabanja asafuluka mbaenda ku madziko anango toera kuthimizira makhaliro a umaso wawo. Mbwenye ninga Abrahamu na Sara, mabanja anango asaenda ku madziko akunja thangwi ya pifuno pyawo pyauzimu. (Gen. 12:1-9) Dingani citsandzo ca Mikhail na Inga banja ibodzi ya ku Ukraniya idaenda ku Rusiya mu caka 2003. Mwakukhonda dembuka, iwo agumana anthu akuti akhasaka undimomwene wa Bhibhlya.

Mikhail alonga: “Pa ndzidzi unango tamwaza mphangwa mu cisa cakuti cikhadzati kumwazwa mphangwa na Mboni za Yahova. Mamuna unango wakugwesera afungula nsuwo mbabvundza: ‘Ndimwe amwazi mphangwa?’ Pidatawira ife kuti inde, iye alonga: ‘Ndikhadziwa kuti ntsiku yace mbamudafika kuno? Nkhabe citika kuti mafala a Yezu akhonde kukwanirisika.’ Buluka penepo, mamuna unoyu alonga mafala a Mateo 24:14.” Mikhail athimiza: “Mu cisa ceneci, tagumanambo nsoka wa akazi khumi a uphemberi wa Batista, akhali anthu a ntima wadidi akuti akhali na nyota ya undimomwene. Iwo akhali na bukhu Viva Para Sempre. Iwo akhaphatisira bukhu ineyi toera kupfundza Bhibhlya pakumala kwa sumana. Tamala midzidzi mizinji mbatikatawira mibvundzo yawo na kuimba nyimbo za Umambo na iwo mbatisiyali pabodzi na iwo. Ulendo unoyu ndi cibodzi mwa pinthu pyadidi kakamwe pinakumbukira ine.” Mikhail na Inga asatawira kuti kutumikira ku mbuto zinafunika kakamwe amwazi mphangwa a Umambo kwaafendedzeresa kakamwe kuna Yahova, kwathimizira ufuni wawo kwa anthu na kwaapasa nkhombo ya umaso wadidi kakamwe. Lero, iye asatumikira ninga muyang’aniri wa cisa pabodzi na nkazace.

Yury na Oksana, ndi banja idabuluka ku Ukraniya, ali nkati mwa pyaka 30. Mu caka 2007, pabodzi na mwanawo Aleksey wa pyaka 13, aenda kaona ofesi ya filiali ku Rusiya. Kweneku iwo aona mapa a Rusiya anapangiza mbuto zizinji zakuti zidzati kumwazwa mphangwa. Oksana alonga: “Pidamala ife kuona mapa anewa, tadzindikira kuti kusafunika kakamwe amwazi mphangwa a Umambo. Pyenepi pyatiphedza toera kucita masasanyiro akuenda ku Rusiya.” Ninji pontho pidaaphedza toera kucita pyenepi? Yury athimiza: “Kuleri misolo ya mabukhu athu ninga ‘Pode servir num território estrangeiro?’ kwatiphedza kakamwe.a Taenda kaona cisa cidasankhula filiali ku Rusiya mbatisaka nyumba na basa yakudziko.” Mu caka 2008, iwo afuluka mbaenda kakhala ku Rusiya.

Pakutoma pikhanentsa kuona basa, kazinji kene iwo acinja nyumba yakukhala. Yury alonga: “Kazinji kene tikhacita phembero toera tikhonde kufewa manungo, natenepa tapitiriza m’basa yakumwaza mphangwa, mbatinyindira ciphedzo ca Yahova. Taona kuti Yahova asatitsalakana tingaikha Umambo wace pa mbuto yakutoma. Basa ineyi yawangisa banja yathu.” (Mat. 6:22, 33) Kodi pyenepi pyakhuya tani mphale Aleksey? Oksana alonga: “Pyamphedza kakamwe. Iye aperekeka kwa Yahova mbabatizwa na pyaka pipfemba. Na kuona kufunika kakamwe kwa amwazi mphangwa pisankulumiza toera kutumikira ninga mpainiya wakuphedza mu ndzidzi wa maferya akuxikola. Tisatsandzaya kakamwe tingaona ufuni wace na phinga yace mu utumiki.” Lero, Yury na Oksana asatumikira ninga apainiya akupambulika.

“CIBODZI BASI CINATSUMBIKIKA NA INE”

Mafala a amwazi mphangwa anewa akuperekeka asapangiza pakweca kuti kuenda ku mbuto inango toera kuthimizira utumiki wanu, pisaphemba kunyindira kakamwe Yahova. Ndimomwene kuti ale anatumikira mu cisa cinafunika kakamwe amwazi mphangwa asathimbana na pinentso, mbwenye iwo asatsandzaya kakamwe thangwi yakumwaza mphangwa zadidi za Umambo kwa anthu a mitima yadidi. Kodi imwe munakwanisa kuphedzera basa yakubvuna mu cisa cinafunika kakamwe amwazi mphangwa a Umambo? Mungacita pyenepi, mwakukhonda dembuka munapibva ninga Yury, adalonga thangwi ya cisankhulo cace cakutumikira ku cisa cinafunika kakamwe amwazi mphangwa: “Cibodzi basi cinatsumbikika na ine, ndi thangwi yakuti ndacita pyenepi mwakudembuka.”

[Cidzindikiro capantsi]