Kodi Mwambo Usatawirisa Kucitanji pa Ntsiku Ya Sabudu?

Ntsiku inango ya Sabudu, Yezu aenda ku sinagoga, panango ku Galileya. Kweneko iye agumana mamuna unango akhali na djanja ya madyo yakulamala. (Luka 6:6) Apfundzisi a mwambo na Afarisi akhayang’ana pikhafuna kucita Yezu. Thangwi yanji? Iwo apangiza pikhali muntima mwawo, mbabvundza Yezu: ‘Pisatawiriswa kuwangisa munthu pa ntsiku ya Sabudu?’—Mateu 12:10.

Atsogoleri auphemberi Aciyuda akhakhulupira kuti mwambo usatawirisa kuwangisa pa ntsiku ya Sabudu basi ene khala umaso uli pangozwi. Mwacitsandzo, mwambo ukhakhondesa kubwezera gogodo pa mbuto payo pa ntsiku ya Sabudu peno kumanga cironda, thangwi pyenepi nee pisaikha umaso pangozwi. Mwandimomwene, apfundzisi a mwambo na Afarisi nee akhapokanya Yezu thangwi yakubvera ntsisi mamuna unoyu wa djanja yakulamala. Iwo akhasaka njira yakupasa mulando Yezu.

Mbwenye Yezu akhadziwa manyerezero awo akuphonyeka. Iye adzindikira kuti iwo akhali na maonero akukhonda bverana na malemba analonga pya mabasa anakhondeswa ntsiku ya Sabudu. (Eksodo 20:8-10) Yezu akhadasandikwa kale thangwi ya mabasa adidi akhacita iye. Penepo Yezu alonga kuna mamuna wa djanja yakulamala: ‘Lamuka bwera pakati.’—Marko 3:3.

Yezu apanga apfundzisi a mwambo na Afarisi: ‘Mbani mwa imwe angakhala na bira yace mbigwera n’djenje pa ntsiku ya Sabudu, nee anaiphata mbaibulusa n’djenje?’ (Mateu 12:11) Bira ikhaimirira mpfuma, na thangwi ineyi, iwo nee mbadaisiya n’djenje mpaka ntsiku inango. Thangwi mbadacita pyenepi, iyo mbidafa mbaluza kobiri. Kusiyapo pyenepi Malemba asalonga: ‘Munthu wadidi asatsalakana pinyama pyace.’—Misangani 12:10.

Toera kulandanisa, Yezu athimiza: ‘Munthu ndi wakufunika kakamwe kupiringana bira. Natenepa, pisatawiriswa kucita cinthu cadidi pa ntsiku ya Sabudu.’ (Mateu 12:12) Yezu nee akhapwaza mwambo unalonga pya Sabudu pidawangisa iye mamuna. Atsogoleri auphemberi acimwana kupokanya undimomwene unoyu. Na thangwi ineyi iwo amatama.

Mwakutsukwala, Yezu adzindikira maonero awo akuphonyeka, ayang’ana n’khundu, buluka penepo mbapanga mamuna: ‘Fungula djanja yako.’ (Mateu 12:13) Iye awangiswa mu ndzidzi udafungula iye djanja yace mbatsandzaya kakamwe. Mphapo pyenepi pyakhuya tani ale akhaipirwa na Yezu?

M’mbuto mwakutsandzaya na kuwangiswa kwa mamuna unoyu wakulamala, Afarisi aipirwa kakamwe ‘mbabverana mwakucimbiza na anyakuphedzera a Herodhi toera kuona kuti anapha tani Yezu.’ (Marko 3:6) Natenepa nsoka unoyu wa ndale usaphataniza ale anacemerwa Asadhuki. Mwandimomwene, Asadhuki na Afarisi nee asabverana, mbwenye tomera ndzidzi unoyu akhali pabodzi toera kutcinga Yezu.