Towezerani N’dida Wa Ndalama Mu Utumiki Wanu

‘Pyonsene pinafuna imwe kuti anthu akucitireni, muacitirembo andzanu.’​—MAT. 7:12.

MBAMUDATAWIRA TANI?

Tisafunika kutsalakana tani m’bodzi na m’bodzi anacedza na ife mu utumiki wathu?

Kodi lemba ya Mateo 7:12 isatipfundzisanji thangwi ya mbuto, ndzidzi na njira inalonga ife na anthu?

Ndi maonero api adadinga ife mu nsolo uno akuti musanyerezera kuaphatisira?

1. Kodi njira inatsalakanira ife anthu mu utumiki ndi yakufunika tani? Perekani citsandzo. (Onani cithundzithundzi cakutoma.)

Mu pyaka pingasi pidapita, banja ibodzi Yacikristu ku Fiji ikhacita khundu mu kampanya yakucemera anthu toera kugumanika pa Cikumbuso ca kufa kwa Kristu. Mukhalonga iwo na nkazi unango kunja kwa nyumba yace, madzi atoma kubvumba. M’bale apasa nkazi unoyu sumbulero, iye na nkazace mbaphatisira sumbulero ibodzi ene. Iwo akomerwa kakamwe pidaona iwo nkazi unoyu namaulo pa ntsiku ya Cikumbuso. Nkazi unoyu alonga kuti nee akhakumbuka pizinji pidacedza iye na m’bale na nkazace. Mbwenye akhuyiwa kakamwe na citsalakano cidapangizwa iye, natenepa atonga kugumanika pa Cikumbuso. Ninji cidankulumiza toera kutawira mwadidi? Banja ineyi yatowezera ntemo unacemerwa N’dida wa Ndalama.

2. Kodi N’dida wa Ndalama ninji, mphapo tinauphatisira tani?

² Kodi N’dida wa Ndalama ninji? Ndi uphungu udapereka Yezu mudalonga iye kuti: “Pyonsene pinafuna imwe kuti anthu akuchitireni, muachitirembo andzanu.” (Mat. 7:12) Tinaphatisira tani n’dida unoyu? Tinakwanisa kuuphatisira munjira ziwiri. Pakutoma tisafunika kubvundzika: ‘Mbidakhala ndine, mbidafuna kuti nditsalakanwe tani?’ Buluka penepo, tisafunika kuwangisira toera kutsalakana munthu munjira ineyi.​—1 Akor. 10:24, Mphangwa Zadidi.

3, 4. (a) Fokotozani thangwi yanji N’dida wa Ndalama nee usafunika kuphatisirwa basi ene pakutsalakana anyakukhulupira andzathu. (b) Tinadzadinganji mu nsolo uno?

³ Ife tisaphatisira N’dida wa Ndalama pakutsalakana anyakukhulupira andzathu. Mbwenye Yezu nee alonga kuti tisafunika kupangiza citsalakano ceneci basi ene kwa anyakukhulupira andzathu. Mwandimomwene, iye alonga N’dida wa Ndalama mukhalonga iye kuti tisafunika kutsalakana tani anthu onsene, ngakhale anyamalwa athu. (Lerini Luka 6:27, 28, 31, 35.) Khala tisafunika kuphatisira N’dida wa Ndalama kwa anyamalwa athu, tisafunikambo kuuphatisira kakamwe pakupereka umboni kwa anthu, akuti azinji a iwo ‘ali na cifuno cakukhala na umaso wakukhonda mala’!​—Mach. 13:48.

⁴ Cincino tendeni tidinge mibvundzo minai yakuti tisafunika kuikumbukira pakucita khundu mu utumiki: Mbani analonga na ine? Ndi mbuto ipi inalonga ine nawo? Ndi ndzidzi upi wadidi toera kulonga na anthu? Ndisafunika kulonga nawo tani? Ninga tinadzaona, mibvundzo ineyi inatiphedza toera kutsalakana mabvero a anthu anamwazira ife mphangwa, natenepa tinakwanisa kudzindikira kuti tinalonga tani na m’bodzi na m’bodzi.​—1 Akor. 9:19-23.

MBANI ANALONGA NA INE?

5. Ndi mibvundzo ipi isafunika ife kucitika tekhene?

⁵ Mu utumiki wathu, ife tisacedza na anthu akusiyana-siyana. M’bodzi na m’bodzi wa iwo ali na makhaliro ace na nyatwa zace. (2 Pya dziko. 6:29, 30) Munayesera imwe kulonga na anthu thangwi ya mphangwa zadidi, bvundzikani: ‘Khala ndine anafuna kumwazirwa mphangwa, mbidafuna kutsalakanwa tani? Mbidafuna kuti iye andione kwene ninga munthu wapacisa basi? Peno mbidafuna kuti pakutoma andidziwe?’ Kucita mibvundzo ninga ineyi pinatikumbusa toera kutsalakana m’bodzi na m’bodzi ninga munthu paekha.

6, 7. Tisafunika kucitanji tingagumana munthu mu utumiki wathu wakuti asapangiza ninga ndi waukali?

⁶ Nkhabe munthu anafuna kuoniwa ninga “munthu wakuipa.” Mwacitsandzo: Ninga Akristu, tisawangisira toera kuphatisira uphungu wa Bhibhlya wakuti ndzidzi onsene ‘mafala athu adzipe ninga munyu.’ (Akol. 4:6) Mbwenye ninga anthu akusowa ungwiro, midzidzi inango tisalonga pinthu pyakuti mukupita kwa ndzidzi tisatsumbikika napyo. (Tgo. 3:2) Pyenepi pingacitika tisadikhira kuti andzathu adzindikire kuti si nsambo wathu tayu kulonga munjira ineyi, mbwenye kuti panango piripo pidaticitikira. Nee mbitidafuna kuti iwo atione ninga munthu wakuipa. Kodi nee tisafunika kupangiza citsalakano cibodzi cene kwa anango?

⁷ Mu utumiki wanu, mungagumana munthu wakuti asaoneka ninga ndi waukali, nee mbapidakhala pyadidi kusaka kubvesesa thangwi yanji apangiza makhaliro anewa? Ndi thangwi yakuti akuthimbana na mikakamizo kubasa peno kuxikola? Kodi akuthimbana na utenda wakunentsa? Kazinji kene, anaciro nyumba akuti pakutoma apangiza kuti ali akuipirwa, atawira mwadidi mudatsalakanwa iwo na Mboni za Yahova munjira yadidi na yacilemedzo.​—Mis. 15:1; 1 Ped. 3:15.

8. Thangwi yanji nee tisafunika kunyinyirika toera kumwaza mphangwa za Umambo kwa ‘anthu a mitundu yonsene’?

⁸ Ife tisamwaza mphangwa kwa anthu a mitundu yonsene. Mwacitsandzo, mu pyaka pingasi pidapita, mbiri zakukwana 60 za umaso wa anthu za misolo yakuti “A Bíblia Muda a Vida das Pessoas,” zabuluswa mu Ncenjezi. Anango mwa anthu anewa kale akhali mambava, anyakuledzera, mapanga, peno anyakuphatisira mitombwe yakuledzeresa. Anango akhali anyandale, atsogoleri a mauphemberi, peno a cifuno cakukhala anthu ambiri. Anango akhali na umaso waulukwali. Mbwenye onsene abva mphangwa zadidi, atawira kupfundza Bhibhlya, acinja makhaliro a umaso wawo mbapita mu undimomwene. Natenepa, nee tisafunika kunyerezera kuti anthu anango cipo anadzatawira mphangwa za Umambo. (Lerini 1 Akorinto 6:9-11.) Mbuto mwace, ife tisadziwa kuti ‘anthu a mitundu yonsene’ anakwanisa kutawira mphangwa zadidi.​—1 Akor. 9:22.

NDI MBUTO IPI INALONGA INE NA ANTHU?

9. Thangwi yanji tisafunika kulemedza nyumba za anango?

⁹ Ndi m’mbuto zipi zinalonga ife na anthu mu utumiki wathu? Kazinji kene tisalonga na anthu m’mamidzi mwawo. (Mat. 10:11-13) Ife tisakomerwa anthu angalemedza nyumba yathu na pinthu pyathu. Kusiyapo pyenepi, nyumba yathu ndi yakufunika kwa ife. Tisafuna kuti ikhale mbuto yakuti tinakwanisa kubisa pinthu pyathu, mbatikhala akutsidzikizika. Tisafunika kupangiza cilemedzo cibodzi cene kwa anyakuendekana athu. Natenepa, mu utumiki wathu wa nyumba na nyumba, mphyadidi kunyerezera njira inatsalakanira ife nyumba zawo.​—Mach. 5:42.

10. Tinacalira tani kudzudzumisa anango mu utumiki wathu?

¹⁰ Lero dziko yadzala na uphanga, anaciro nyumba azinji asanyingwa angaona anthu akuti nee asaadziwa. (2 Tim. 3:1-5) Nee tisafunika kuthimizira kunyingwa kweneku. Mwacitsandzo, nyerezerani kuti tafika panyumba, tacita odi peno kumenya nsuwo wakutsogolo kwa nyumba. Khala nkhabe adatawira, panango tinayesera kusuzumira na pajanela peno kuzungulira panyumba, toera kusaka mwanaciro nyumba. Kodi mu cisa canu, pyenepi mbapidadzudzumisa mwanaciro nyumba? Kodi anyakuendekana ace mbadanyerezeranji? Ndimomwene kuti tisafunika kupakasa cisa cathu pakumwaza mphangwa. (Mach. 10:42) Tisafuna kakamwe kumwaza mphangwa zadidi, cifuno ceneci ntcadidi. (Arom. 1:14, 15) Ngakhale tenepo, ife tisacalira kucita cinthu cakuti mwakukhonda funa mbacidadzudzumisa anthu mu cisa cathu. Mpostolo Paulu alemba: ‘Ife tikhonde kucita cinthu cakuti cinagwegwedusa ndzathu, gopa anthu ananyoza utumiki wathu.’ (2 Akor. 6:3) Tingalemedza nyumba na pinthu pya anthu mu cisa cathu, makhaliro athu anakwanisa kutundusa anango toera kutawira undimomwene.​—Lerini 1 Pedro 2:12.

NDI NDZIDZI UPI WADIDI TOERA KULONGA NA ANTHU?

11. Thangwi yanji tisakomerwa anthu angalemedza ndzidzi wathu?

¹¹ Ninga Akristu, azinji a ife tiri na umaso wakudzala na mabasa. Toera kukwanirisa mabasa athu, mwacidikhodikho tisacita masasanyiro mbatiikha pinthu pa mbuto yakutoma. (Aef. 5:16; Afil. 1:10) Khala ciripo cidadzudzumisa ndandanda wathu, tisanentseka. Natenepa, tisakomerwa anthu angalemedza ndzidzi wathu, mbadzindikira kuti panango nee tiri na ndzidzi uzinji toera kucedza na iwo. Mu kuphatisira N’dida wa Ndalama, tinapangiza tani kuti tisalemedza ndzidzi wa anthu anamwazira ife mphangwa?

12. Tinakwanisa tani kudzindikira ndzidzi wakuthema toera kucedza na anthu mu cisa cathu?

¹² Tisafunika kuyesera kusaka ndzidzi wadidi toera kucedza na anaciro nyumba. Kodi mu cisa cathu, ndi ndzidzi upi unagumanika anthu panyumba? Ndi ndzidzi upi wakuti anakhala na cipendamiro cakubvesera? Mphyadidi kusaka njira yakusasanyira ndandanda wathu toera kulonga nawo m’midzidzi ineyi. M’madziko anango, basa yathu ya nyumba na nyumba ndi yakuphindulisa kakamwe cakumaulo peno camasiku. Khala pyenepi ndi sawasawa mu cisa canu, munakwanisa kucita masasanyiro toera kucita basa yanu yakumwaza mphangwa nyumba na nyumba m’midzidzi ineyi? (Lerini 1 Akorinto 10:24.) Tisanyindira kuti Yahova anadzapasa nkhombo kuwangisira konsene kunacita ife toera kuenda mu utumiki pa ndzidzi wakuthema kwa anthu a mu cisa cathu.

13. Tinapangiza tani cilemedzo kwa mwanaciro nyumba?

¹³ Tinakwanisa tani kupangiza cilemedzo cakuthimizirika kwa anthu? Tingagumana munthu adapangiza cifuno, tisafunika kupereka umboni wadidi, mbwenye nee tisafunika kudembuka kakamwe panyumba. Panango mwanaciro nyumba asankhula ndzidzi unoyu toera kucita cinthu cakufunika kwa iye. Angalonga kuti aphatika na basa, tinakwanisa kulonga kuti tinalonga mwacigwagwa​—natenepa tisafunika kucita pidalonga ife. (Mat. 5:37) Pakumala kucedza, mphyadidi kumbvundza kuti ndi ndzidzi upi wakuthema toera kucedza naye pontho. Amwazi mphangwa anango asapembera kakamwe angalonga kuti: “Kwa ine, mbidakomerwa kakamwe kucedza pontho na imwe. Mbapidakhala pyadidi kukumenyerani ntokodzi peno kukutumizirani mphangwa mbandidzati kubwera?” Tingacita pinthu mwakubverana na ndandanda wa anthu a mu cisa cathu, tisatowezera citsandzo ca Paulu wakuti ‘nee akhasaka maphindu ace, mbwenye maphindu a anthu azinji toera akwanise kupulumuka.’​—1 Akor. 10:33.

NDISAFUNIKA KULONGA TANI NA ANTHU?

14-16. (a) Thangwi yanji tisafunika kulonga cifuniro ca ulendo wathu kwa mwanaciro nyumba? Perekani citsandzo. (b) Ndi maperekero api aumboni akuti muyang’anira wa cisa unango aaona kukhala akuphindulisa?

¹⁴ Nyerezerani kuti alipo adakumenyerani ntokodzi, mbwenye nee mwakwanisa kudzindikira fala yace. Imwe nkhabe kundziwa, mbwenye iye akubvundzisani ntundu wa cakudya cinafuna imwe. Imwe musafuna kakamwe kudziwa adakumenyerani ntokodzi, na cifuniro cace. Mu kupangiza cilemedzo, panango munayesera kucedza naye pang’ono, mbwenye mbamudafuna kuti makani anu akhale na madromero. Munjira inango, nyerezerani kuti adakumenyerani ntokodzi akupangani dzina yace mbalonga kuti asatsalakana pyakudya pinapasa ungumi wadidi, pontho kuti ali na mphangwa zadidi zinalonga pyenepi. Panango mbamudafuna kudziwa pizinji. Kusiyapo pyenepi, ife tisakomerwa anthu angakhonda bisa uunthu wawo pakucedza na ife. Tinapangiza tani cilemedzo cibodzi cene kwa ale anacedza na ife mu utumiki wathu?

¹⁵ Mu pisa pizinji, tisafunika kulongeratu cifuniro ca ulendo wathu kuna mwanaciro nyumba. Ndimomwene kuti tiri na mphangwa zakufunika kakamwe kwa mwanaciro nyumba, mbwenye nyerezerani kuti nee talonga kuti ndife ani, mbatitoma kulonga makani athu mu kucita mbvundzo ninga uyu: “Mbamudakwanisa kumalisa nyatwa zinaoneka pa dziko, mbamudamalisa ipi?” Ife tisadziwa kuti cifuniro ca mbvundzo unoyu ndi kusaka kudziwa maonero a munthu, buluka penepo, mbationa pinalonga Bhibhlya. Mbwenye mwanaciro nyumba panango anasaka kudziwa: ‘Kodi munthu unoyu mbani, thangwi yanji iye andicita mbvundzo unoyu? Kodi iye asafunanji?’ Natenepa, tisafunika kucitisa mwanaciro nyumba kukhala wakusudzuka. (Afil. 2:3, 4) Tinacita tani pyenepi?

¹⁶ Muyang’aniri wa cisa unango asacita tepa: Pakumala kumwanyika mwanaciro nyumba, asantambiza tratado Kodi Musafuna Kudziwa Undimomwene?, mbalonga: “Lero, tikugawira tratado ineyi kwa anthu onsene mu cisa cino. Iyo isatawira mibvundzo mitanthatu yakuti anthu asaicita. Iyi ndi tratado yanu.” M’bale alonga kuti anthu azinji asakhala akusudzuka pang’ono angadziwa cifuniro ca ulendo wathu. Munjira ineyi ndi kwakukhonda nentsa kupitiriza kucedza. Buluka penepo, muyang’aniri wa cisa asabvundza munthu: “Mwa mibvundzo ineyi, ulipo udacita imwe kale?” Mwanaciro nyumba angasankhula ubodzi, m’bale asafungula tratado mbadinga pinalonga Bhibhlya thangwi ya mbvundzo unoyu. Angakhonda kusankhula, m’bale asasankhula mbvundzo, mbapitiriza makani, mbakhonda kucitisa mwanaciro nyumba kukhala na manyadzo. Mwandimomwene, pana njira zizinji zakutomesa makani. M’mbuto zinango, mbatidzati kulonga cifuniro ca ulendo wathu, anaciro nyumba panango asadikhira cilemedzo cakuthimizirika. Cinthu cakufunika kakamwe ndi kucinja maperekero athu aumboni mwakubverana na citsalakano cinafuna anthu a mu cisa cathu.

PITIRIZANI KUTOWEZERA N’DIDA WA NDALAMA MU UTUMIKI WANU

17. Mwakubverana na pidapfundza ife mu nsolo uno, ndi zipi njira zingasi zakuti tinakwanisa kutowezera N’dida wa Ndalama?

¹⁷ Mphapo, ndi zipi njira zidapfundza ife zakuti tinakwanisa kutowezera N’dida wa Ndalama mu utumiki wathu? Ife tisatsalakana mwanaciro nyumba ninga munthu paekha. Tisalemedza nyumba za anthu ana pinthu pyawo. Tisawangisira toera kuenda mu utumiki pa ndzidzi wakuti anthu asagumanika panyumba, pontho ali na cipendamiro cakubvesera. Tisalongambo mphangwa zathu munjira yakuti zinatambirwa mwadidi pacisa cathu.

18. Ndi maphindu api anaoneka kubulukira mu kutsalakana anthu ninga munafunira ife kuti iwo atitsalakane?

¹⁸ Maphindu mazinji asaoneka kubulukira mu kutsalakana anthu ninga munafunira ife kuti iwo atitsalakane. Tingacita pinthu munjira yadidi na mwacilemedzo, tisapangiza ceza cathu, tisapangiza midida ya Bhibhlya, na tisapasa mbiri Babathu wakudzulu. (Mat. 5:16) Tinakwanisa kutundusa anthu azinji ku undimomwene kubulukira mu njira inacedza ife na iwo. (1 Tim. 4:16) Mwakukhonda tsalakana khala anthu anacedza na ife asatambira mphangwa za Umambo peno nkhabe, tiri akutsandzaya kudziwa kuti tikucita pyonsene pinakwanisa ife toera kukwanirisa utumiki wathu. (2 Tim. 4:5) Tendeni tonsene titowezere mpostolo Paulu adalemba kuti: ‘Ndinaphata mabasa onsene thangwi ya mphangwa zadidi toera ndizigawirembo anango.’ (1 Akor. 9:23) Toera kukwanirisa pyenepi, ndzidzi onsene tendeni titowezere N’dida wa Ndalama mu utumiki wathu.