Kuphiwa Kwa Munthu Pa Phwando Yakubalwa

Mu ndzidzi ukhamwaza mphangwa apostolo a Yezu ku Galileya, Juwau M’batizi wakuti akhalonga pya Yezu, nee akhali na ufulu toera kumwaza mphangwa. Iye akhali n’kaidi cifupi na pyaka piwiri.

Juwau alonga pakweca kuti Mambo Herodhi adawa mu kukwata nkazi wa Filipi wakuti ndi kunyado wace toera akhale nkazace. Herodhi amwalana na nkazace wakutoma toera kumanga banja na Herodhiya. Mwakubverana na Mwambo wa Mose, pyenepi pikhali upombo na pyakukhonda tawirika. Mukufuna kutawira Juwau, Herodhi aikhisa n’kaidi Juwau, panango thangwi akakamizwa na Herodhiya.

Herodhi nee asadziwa kuti anacitanji na Juwau, thangwi anthu ‘akhamuona ninga mprofeta.’ (Mateu 14:5) Mbwenye Herodhiya, nee asapenula kuti anacitanji, thangwi ‘akhaipirwa kakamwe’ na Juwau, pontho akhasaka njira toera kumupha. (Marko 6:19) Pakumalisa waoneka mwai.

Cifupi na Paskwa ya 32 N.W., Herodhi akhunganya phwando ikulu ya ntsiku yace yakubalwa. Atsogoleri onsene a anyankhondo a Herodhi na anthu a mbiri a ku Galileya, abwerambo. Pikhacitika phwando, Salome, mwana ntsikana wa Herodhiya adabala iye na Filipi, abvinira alendo. Anthu adzumatirwa na kubvina kwace.

Herodhi akomerwa kakamwe na kubvina kwa Salome mbalonga: ‘Ndiphembe cinthu consene cinafuna iwe, ine ndinakupasa.’ Iye adumbira: ‘Consene cinafuna iwe kundiphemba ine ndinakupasa, ngakhale phindi ya umambo wanga.’ Mbadzati kutawira, Salome aenda kabvundzisa mai wace: “Ndiphembenji?”—Marko 6:22-24.

Unoyu ukhali mwai ukhasaka Herodhiya! Iye alonga: ‘Kaphembe nsolo wa Juwau M’batizi.’ Mwakukhonda dembuka, Salome abwerera kuna Herodhi mbaphemba: ‘Ndisafuna kuti mundipase cincino pano nsolo wa Juwau M’batizi m’mbale.’—Marko 6:24, 25.

Pyenepi pyatsukwalisa kakamwe Herodhi, mbwenye ale adacemera iye abva dumbiro idacita iye kuna Salome. Iye mbadakhala na manyadzo mbadakhonda kukwanirisa pikiro yace, ngakhale pikhaphemba kuphiwa kwa munthu wakusowa mulando. Na thangwi ineyi, atuma nyakuonera n’kaidi na pitsogolero pyakutsukwalisa kakamwe. Mwakukhonda dembuka abweresa nsolo wa Juwau m’mbale. Iye apasa Salome, buluka penepo Salome aenda kapasambo mai wace.

Pidabva anyakupfundza a Juwau pinthu pyenepi, iwo abwera kakwata manungo ace toera kaaikha nthumbi. Iwo adziwisambo Yezu pyenepi.

Mukupita kwa ndzidzi, pidabva Herodhi kuti Yezu akhawangisa anthu mbabulusa madimonyo, iye agopa kakamwe. Iye akhadzudzumika khala Yezu, mamuna anacita pyenepi, ndi Juwau M’batizi ‘alamuswa muli akufa.’ (Luka 9:7) Natenepa Herodhi Antipa akhafuna kakamwe kuona Yezu. Mbwenye tayu toera kubva mphangwa zikhamwaza Yezu. M’mbuto mwace, Herodhi akhafuna kuona khala akhafunika kupitiriza kudzudzumika na Yezu peno nkhabe.