Yezu Awangisa M’phale Akhali na Dimonyo

Pikhatcita Yezu, Pedhru, Tiyago na Juwau paphiri, agumanikana na mwinji wa anthu. Ciripo cidadodomeka. Apfundzisi a mwambo agumanyikana mbazungulira anyakupfundza a Yezu toera kuketesana nawo. Anthu azinji akomerwa mudaona iwo Yezu, natenepa aenda kam’mwanyika. Iye aabvundza: ‘Ninji pinapokanyisana imwe na iwo?’—Marko 9:16.

Mamuna unango agodamira Yezu mbalonga: ‘Mpfundzisi, ndabweresa mwananga wamamuna kuna imwe thangwi ali na dimonyo wakuti asancimwanisa kulonga. Konsene kwene kunam’phata dimonyo unoyu, asamponya pantsi. Penepo mwana asabulusa mapobvu nkanwa, asakikiriza mano mbaluza mphambvu. Ine ndaphemba anyakupfundza anu toera abuluse dimonyo, mbwenye iwo nee akwanisa.’—Marko 9:17, 18.

Pisaoneka kuti apfundzisi a mwambo akhapokanyisana na kusingirira anyakupfundza thangwi yakucimwana kuwangisa mwana. Natenepa, mbuto mwakutawira pai wace mwana, Yezu apanga anthu: ‘Imwe anthu akuipa na akusowa cikhulupiro, ine ndinapitiriza na imwe mpaka lini? Ndinapirira na pinacita imwe mpaka lini?’ Mwandimomwene mafala anewa akhaphatisirwa makamaka kuna apfundzisi a mwambo, akuti akhacitisa nyatwa mu ndzidzi wakuti Yezu nee akhalipo. Buluka penepo Yezu apanga pai wace mwana: ‘M’bwereseni pano.’—Mateu 17:17.

Pikhaenda mwana kuna Yezu, dimonyo yakuti ikhali na iye yan’gwisa pantsi mbapfukunyuka-pfukunyuka. Mwana atoma kubulumunda pantsi mbakabuluka mapobvu. Yezu abvundza babace: ‘Pyenepi pyatoma lini?’ Iye antawira: ‘Kutomera mu uwana wace, kazinji kene dimonyo isamponya pa moto na m’madzi toera kumupha.’ Mamuna unoyu adembetera mbalonga: ‘Khala munakwanisa kumuwangisa, tibvereni ntsisi, pontho tiphedzeni.’—Marko 9:21, 22.

Babace mwana akhali wakusowa cidikhiro, thangwi anyakupfundza a Yezu acimwana kuwangisa mwanace. Pakutawira pidalonga mamuna unoyu, Yezu amuwangisa mukumpanga: ‘Thangwi yanji ukulonga kuti, khala munakwanisa? Kuna munthu wacikhulupiro pinthu pyonsene pisakwanisika.’ Mwakukhonda dembuka babace mwana adembetera: ‘Ndiri na cikhulupiro. Ndiphedzeni toera kuwangisa cikhulupiro canga!’—Marko 9:23, 24.

Yezu adzindikira kuti mwinji wa anthu ukhabwera. Patsogolo pa mwinji unoyu, iye apanga dimonyo: ‘Iwe dimonyo unacitisa munthu kukhonda kubva na kukhonda longa, ndiri kukupanga, buluka muna iye mbuleka kupita pontho muna iye!’ Pikhabuluka dimonyo, yacitisa mwana kukhuwa na kupfukunyuka-pfukunyuka. Na thangwi ineyi, mwana agona pantsi nee tekenyeka. Anthu pakuona pyenepi alonga: ‘Iye afa!’ (Marko 9:25, 26) Mbwenye pidaphata Yezu manja a m’phale, ‘mu ndzidzi ubodzi ene iye awanga.’ (Mateu 17:18) Natenepa, anthu adzumatirwa na pinthu pidacita Yezu.

Mbapidzati kucitika pyenepi, Yezu akhadatuma anyakupfundzace toera kumwaza mphangwa, iwo akwanisa kubulusa madimonyo. Na thangwi ineyi, iwo abandza mwai toera kubvundza Yezu pikhali iwo okha kuti: ‘Thangwi yanji ife nee takwanisa kubulusa dimonyo?’ Yezu aatawira kuti ndi thangwi yakusowa kwawo cikhulupiro, iye alonga: ‘Ntundu unoyu wa dimonyo usabuluka basi ene na phembero.’ (Marko 9:28, 29) Akhafunika kukhala na cikhulupiro cakuwanga na kuphemba ciphedzo ca Yahova toera kubulusa dimonyo ineyi ya mphambvu.

Pakumalisa, Yezu alonga: ‘Thangwi cikhulupiro canu ndi cakucepa. Mwandimomwene ndinakupangani kuti imwe mungakhala na cikhulupiro cakulandana na mbeu ya mostardha, munakwanisa kupanga phiri iyi kuti: Buluka pano ndoko kule, iyo inabulukadi. Nkhabe cinthu cinafuna kucimwanika kuna imwe.’ (Mateu 17:20) Pyenepi pisapangiza kuti cikhulupiro cisafunika kukhala cakuwanga kakamwe.

Ife tinakwanisa kuona pinthu pinapingiza kuthambaruka kwathu m’basa ya Yahova ninga pyakukhonda kupiririka, ninga phiri yakuti nkhabe kubuluka pa mbuto payo. Mbwenye ife tingawangisa cikhulupiro cathu, tinakwanisa kukunda mipingizo na nyatwa zonsene.