Yezu Apangiza Pinacitisa Munthu Kukhala Wakutsandzaya

Yezu akhadamala kubwerezera ntsonga zakufunika thangwi ya phembero. Mbwenye nee ndi pyenepi basi pidalonga iye mwakubwereza-bwereza mu utumiki wace. Pikhacita iye pirengo ku Galileya, anthu anango akhampambizira kuti akhacita pyenepi na mphambvu za ntongi wa madimonyo. Mu Yudeya iye apambizirwa pontho.

Mu ndzidzi udabulusa Yezu dimonyo ikhacitisa munthu kukhala bewewe, anthu adzumatirwa, mbwenye anango nee akomerwa. Iwo ampambizira mbalonga: ‘Iye asabulusa madimonyo na mphambvu za Bhelizebhu, ntongi wa madimonyo.’ (Luka 11:15) Anango akhafuna kudziwa kuti Yezu akhali ani. Iwo amphemba toera aapangize cidzindikiro cakudzulu.

Pidadziwa Yezu kuti iwo akhamuyesera, iye aatawira ninga pidacita iye kuna anthu anango adampambizira ku Galileya. Iye alonga kuti umambo ungagawika okhene, unafudzika. Iye aapanga: ‘Khala Sathani agawika ekhene, mphapo umambo wace unapitiriza tani kukhala wakuwanga?’ Buluka penepo, Yezu alonga: ‘Khala ndisabulusa madimonyo na cala ca Mulungu, pisabveka kuti Umambo wa Mulungu wafika kuna imwe.’—Luka 11:18-20.

Pidalonga Yezu thangwi ya ‘cala ca Mulungu’ panango pyakumbusa anyakubveserace thangwi ya pidacitikira na Aizraeli nduli. Anthu akhali pa mbuto yakutongera miseru ya Farau pidaona iwo pirengo pidacita Mose alonga: ‘Ici ndi cala ca Mulungu!’ Pontho ndi ‘cala ca Mulungu’ cidalemba Matongero Khumi pa miyala miwiri. (Eksodo 8:19; 31:18) Munjira ibodzi ene, ‘cala ca Mulungu’—nzimu wace wakucena peno mphambvu yace—ndiyo ikhaphedza Yezu toera kubulusa madimonyo na kuwangisa atenda. Natenepa, Umambo wa Mulungu wafika kuna anyamalwa thangwi Yezu, Mambo wa Umambo wa Mulungu akhacita mabasa anewa.

Kubulusa madimonyo kukhacita Yezu kukhapangiza kuti iye ali na mphambvu kakamwe kupiringana Sathani. Iye akhali ninga munthu wamphambvu anafika panyumba ya mambo mbamanga nyakuonera toera akwate pinthu n’nyumba. Yezu akumbukambo citsandzo cikhadalonga iye thangwi ya munthu adabuluswa nzimu wakuipa. Munthu unoyu angakhonda kuikha pinthu pyadidi m’manyerezero mwace, nzimu unoyu unadzabwerera na indzace minomwe. Makhaliro a mamuna unoyu anadzatekera kupiringana akale. (Mateu 12:22, 25-29, 43-45) Pyenepi ndipyo pidacitikira mbumba ya Izraeli.

Nkazi unango pikhabva iye mafala a Yezu, alonga: ‘Wakutsandzaya ndi nkazi adakubalani mbakuyamwisani!’ Akazi Aciyuda akhafuna kakamwe kukhala mai wa mprofeta, makamaka wa Mesiya. Natenepa nkazi unoyu akhanyerezera kuti Mariya ali na mathangwi adidi toera kutsandzaya thangwi yakukhala mai wa mpfundzisi ninga unoyu. Ngakhale tenepo, Yezu apanga nkazi unoyu pya cinthu cinacitisa munthu kutsandzaya. Iye alonga: ‘Anyakutsandzaya ndi ale anabva mafala a Mulungu mbaaphatisira!’ (Luka 11:27, 28) Yezu cipo alonga kuti Mariya akhafunika kulemedzwa munjira yakupambulika. M’mbuto mwace, toera mamuna peno nkazi akhale wakutsandzaya asafunika kukhala ntumiki wakukhulupirika wa Mulungu, tayu thangwi ya ubale peno pidacita munthu.

Yezu asumula anthu adaphemba cidzindikiro cakudzulu ninga pidacita iye ku Galileya. Iye alonga kuti nee mbadapangizwa cidzindikiro kusiyapo ‘cidzindikiro ca Yona.’ Nakuti Yona amala ntsiku zitatu m’mimba mwa ntsomba, pontho acita basa yakumwaza mphangwa mwacipapo yakuti yacitisa anthu a ku Ninive kutcunyuka. Yezu alonga: ‘Munthu wankulu kakamwe kupiringana Yona ali pano.’ (Luka 11:29-32) Pontho Yezu ndi nkulu kupita Salomoni, wakuti adzumatirisa nyanyi wa ku Sabha thangwi ya udziwisi wace.

Yezu apitiriza kulonga: ‘Munthu angagasa nyale nkhabe kuiikha pa mbuto yakubisalika nee kuigudumira na citundu, mbwenye asaiikha pakweca.’ (Luka 11:33) Panango iye akhafuna kulonga kuti kupfundzisa na kucita pirengo kwa anthu anewa ndi sawasawa na kubisa ceza ca nyale. Pyenepi ndi thangwi iwo nee akhabvesesa thangwi yanji Yezu akhacita mabasa anewa.

Yezu athamangisa dimonyo, pontho awangisa munthu wakuti akhali bewewe. Pyenepi mbapidakulumiza anthu kupasa mbiri Mulungu mbapanga anango thangwi ya pinthu pinacita Yahova. Natenepa Yezu acenjeza anthu akhampambizira: ‘Cita mphole-mphole toera ceza ciri muna iwe cikhonde kukhala cidima. Khala manungo ako onsene adzala na ceza, pontho nkhabe khundu ibodzi iri na cidima, manungo ako onsene anadzagaka kakamwe ninga ceza ca nyale cinakumwanikira.’—Luka 11:35, 36.