BHIBHLIYOTEKA MU INTERNETI ya Torre de Vigia
Ncenjezi
ya Torre de Vigia
Cisena
  • BHIBHLYA
  • MABUKHU
  • MISONKHANO
  • w15 15/2 matsa. 10-14
  • Towezerani Cipapo Ca Yezu Na Luso Yace Yakudzindikira

Nkhabe kugumanika vidhyu pa khundu ino.

Munatilekerera, paoneka madodo pakupangiza vidhyu.

  • Towezerani Cipapo Ca Yezu Na Luso Yace Yakudzindikira
  • Ncenjezi Wakudziwisa Umambo Wa Yahova (Wa Pfundziro)—2015
  • Misolo Ming'ono
  • Mphangwa Zakulandana
  • YEZU NDI WACIPAPO
  • TOWEZERANI CIPAPO CA YEZU
  • YEZU ALI NA LUSO YAKUDZINDIKIRA
  • TOWEZERANI LUSO YAKUDZINDIKIRA YA YEZU
  • “Ona! Nkhalamu ya Dzindza ya Yuda”
    “Bwera Ukhale Nyakupfundza Wanga”
  • ‘Khalani Acipapo Mbamuphata Basa’
    Ncenjezi Wakudziwisa Umambo Wa Yahova (Wa Pfundziro)—2017
  • Kukhala Wacipapo Nee Ndi Kwakunentsa Kakamwe
    Umaso Wathu Wacikristu na Utumiki—Programu ya Misonkhano—2021
Ncenjezi Wakudziwisa Umambo Wa Yahova (Wa Pfundziro)—2015
w15 15/2 matsa. 10-14

Towezerani Cipapo Ca Yezu Na Luso Yace Yakudzindikira

“Maseze imwe cipo mwamuona, imwe musanfuna. Maseze nee mukumuona cincino, mbwenye imwe musankhulupira.”​—1 PED. 1:8, Tradução do Novo Mundo.

MBAMUDATAWIRA TANI?

Ninji cinafuna kukuphedzani toera kupitiriza mu ulendo wanu toera kupulumuka?

Munatowezera tani Yezu mu kupangiza cipapo?

Munatowezera tani Yezu mu kupangiza luso yakudzindikira?

1, 2. (a) Tinakwanisa tani kuwina umaso wakukhonda mala? (b) Ninji cinafuna kutiphedza toera kupitiriza mu ulendo wathu toera kupulumuka?

MU NDZIDZI unakhala ife Akristu, ndi ninga tikutoma ulendo. Ulendo unoyu unakwanisa kutitsogolera ku umaso​—kudzulu peno pa dziko yapantsi. Yezu alonga: “Ale anapirira mpaka kumala kwa pyonsene [kumala kwa umaso wa munthu peno kumala kwa makhaliro ano akuipa a pinthu]” anadzapulumuswa. (Mat. 24:13) Inde, tingapitiriza kukhala akukhulupirika, tinadzakhala akuthema toera kupulumuka. Mbwenye mu ulendo unoyu, tisafunika kucita mpholemphole toera tikhonde kudzudzumiswa peno kutayika. (1 Jwau 2:15-17) Tinakwanisa tani kupitiriza kucita ulendo wathu?

2 Yezu apereka citsandzo cadidi kakamwe kwa ife. Ulendo wace walembwa m’Bhibhlya. Kupfundza kwathu mbiri ineyi, kunatiphedza toera kudziwa makhaliro a Yezu. Tinakwanisa kunfuna na kunkhulupira. (Lerini 1 Pedro 1:8, 9.) Mpostolo Pedhro alonga kuti Yezu atisiyira citsandzo toera kutowezera. (1 Ped. 2:21) Tingatowezera mwacidikhodikho citsandzo cace, tinadzakwanirisa ‘cifuniro’ ca cikhulupiro cathu toera kupulumuka.a Mu nsolo udamala, tadinga kuti tinatowezera tani citsandzo ca Yezu mu kukhala akucepeseka na akukoma ntima. Cincino, tendeni tidinge kuti tinatowezera tani citsandzo cace mu kupangiza cipapo na luso yakudzindikira.

YEZU NDI WACIPAPO

3. Kodi cipapo ninji? Tinakwanisa tani kukhala na cipapo?

3 Cipapo ndi ntundu wacinyindiro cakuti cinaticitisa kukhala akuwanga na akupirira. Kukhala wacipapo kusalongwa ninga “kupirira pakuthimbana na nyatwa,” “kutsidzikiza cilungamo,” na “kuona nyatwa thangwi ya udidi peno cikhulupiro.” Cipapo cisafamba pabodzi na kugopa, cidikhiro, na ufuni. Munjira yanji? Kugopa Mulungu kusatipasa cipapo toera kukhonda kugopa munthu. (1 Sam. 11:7; Mis. 29:25) Cidikhiro candimomwene cisatiphedza toera kuona pizinji kupiringana nyatwa za lero, mbitidikhira pinthu pya ntsogolo na cinyindiro. (Sal. 27:14) Ufuni wakudzimana usatikulumiza toera kupangiza cipapo, ngakhale mu ndzidzi unatcingwa ife. (Jwau 15:13) Ife tisakhala na cipapo tinganyindira Mulungu na kutowezera citsandzo ca Mwanace.​—Sal. 28:7.

4. Kodi Yezu apangiza tani cipapo ‘pakati pa apfundzisi’ mu templo? (Onani cithundzithundzi cakutoma.)

4 Pikhali iye na pyaka 12 pyakubalwa, Yezu atsidzikiza cilungamo. Onani pidacitika mu ndzidzi ukhali Yezu ‘mu templo pakati pa apfundzisi.’ (Lerini Luka 2:41-47.) Apfundzisi anewa akhadziwa mwadidi Mwambo wa Mose, na miyambo Yaciyuda. Mbwenye Yezu nee aagopa mbapitiriza kukhala wakumatama; iye ‘akhaacita mibvundzo.’ Mwandimomwene, iye nee akhacita mibvundzo yaciuwana yakusaka kudziwa pinthu. Mbuto mwace, tinakwanisa kun’nyerezera mbakacita mibvundzo yakuti mbidacitisa apfundzisi anewa kubvesera na kunyerezera. Khala apfundzisi anewa ayesera kupingiza Yezu mu kuncita mibvundzo yakunentsa, iwo nee ankwanisa. Thangwi anthu onsene akhambvesera​—kuphatanizambo apfundzisi—​‘adzuma ndzeru zace na matawiro ace’​—matawiro akuti mwakukhonda penula atsidzikiza Mafala a Mulungu!

5. Kodi Yezu apangiza tani cipapo nkati mwa utumiki wace?

5 Nkati mwa utumiki wace, Yezu apangiza cipapo munjira zakusiyana-siyana. Mwacipapo iye apangiza pakweca kuti atsogoleri a mauphemberi akhapeusa anthu na pipfundziso pyauthambi. (Mat. 23:13-36) Yezu nee atawirisa kuthaphuliswa na manyengerero a dziko. (Jwau 16:33) Iye apitiriza kumwaza mphangwa mwakukhonda tsalakana mikakamizo ya anyakupingiza. (Jwau 5:15-18; 7:14) Yezu acenesa templo kawiri, mbathamangisa mwenemu ale akhapswipisa ulambiri wandimomwene.​—Mat. 21:12, 13; Jwau 2:14-17.

6. Kodi Yezu apangiza tani cipapo pa ntsiku yakumalisa ya umaso wace pa dziko yapantsi?

6 Kudinga cipapo ca Yezu kusawangisa cikhulupiro pakuthimbana na nyatwa. Nyerezerani cipapo cidapangiza iye pa ntsiku yakumalisa ya umaso wace pa dziko yapantsi. Yezu akhadziwa pinthu pyonsene pikhafuna kucitwa na nyakunsandukira. Ngakhale tenepo, pa ndzidzi wa Paskwa, Yezu apanga Yuda: ‘Pinafuna iwe kucita, upicite mwansanga-nsanga.’ (Jwau 13:21-27) M’munda wa Getsemani, mwacipapo Yezu apangizika kwa anyankhondo adabwera kudzam’manga. Maseze umaso wace ukhali pangozwi, iye apangizika toera kutsidzikiza anyakupfundzace. (Jwau 18:1-8) Pikhabvundzwa iye pa Thando Yakutonga Miseru, mwacipapo Yezu atawira kuti akhali Kristu, Mwana wa Mulungu, maseze akhadziwa kuti nyantsembe wankulu akhasaka mathangwi toera kumupha. (Marko 14:60-65) Mwacipapo, Yezu apitiriza kukoya umumphu wace mpaka kuphiwa pamuti wakusikimiza. Pikhali iye cifupi na kufa, Yezu alonga mwakugaluza: ‘Pyonsene pyakwanirisika!’​—Jwau 19:28-30.

TOWEZERANI CIPAPO CA YEZU

7. Aphale na atsikana, musapibva tani thangwi yakucemerwa na dzina ya Yahova? Munapangiza tani kuti ndimwe acipapo?

7 Tinatowezera tani Yezu mu kupangiza cipapo? Kuxikola. Aphale na atsikana, imwe musapangiza kuti ndimwe acipapo, mungadziwisa andzanu akuxikola na anango kuti ndimwe m’bodzi wa Mboni za Yahova, ngakhale kuti anango anakusingirirani. Natenepa, munapangiza kuti musadzikuza thangwi yakucemerwa na dzina ya Yahova. (Lerini Masalmo 86:12.) Panango munathimbana na mikakamizo yakutawira cipfundziso ca kusanduka kwa pinthu. Mbwenye mwakubverana na pidapfundza imwe, muli na mathangwi adidi toera kunyindira pinalonga Bhibhlya kuti alipo adacita pinthu. Munakwanisa kuphatisira bruxura A Origem da Vida​—Cinco Perguntas Que Merecem Resposta, toera kutawira mwadidi ale akuti asafuna kudziwa pya “cidikhiro canu.” (1 Ped. 3:15) Natenepa, munadzakhala akutsandzaya mu kudziwa kuti mukutsidzikiza Mafala a Mulungu.

8. Ndi mathangwi api ali na ife toera kumwaza mphangwa mwacipapo?

8 Mu utumiki wathu. Ninga Akristu andimomwene, tisafunika kupitiriza ‘kulonga mwacipapo na mphambvu ya Yahova.’ (Mach. 14:3) Ndi mathangwi api ali na ife toera kumwaza mphangwa mwakukhonda kugopa peno mwacipapo? Ife tisadziwa kuti mphangwa zinamwaza ife ndi undimomwene thangwi zisabuluka m’Bhibhlya. (Jwau 17:17) Ife tisadzindikira kuti “ndife anyakuphedza a Mulungu,” pontho tiri na ciphedzo ca nzimu wakucena. (1 Akor. 3:9; Mach. 4:31) Tisadziwa kuti tingapereka umboni mwaphinga, tisapangiza kuperekeka kwathu kwa Yahova na ufuni wathu kwa anyakuendekana athu. (Mat. 22:37-39) Tingadzala na cipapo, nee tinadzasiya kumwaza mphangwa. Mbuto mwace, tiri akutonga toera kulonga pakweca uthambi wa mauphemberi wakuti usaphopha maso a anthu toera akhonde kudzindikira undimomwene. (2 Akor. 4:4) Kusiyapo pyenepi, ife tinadzapitiriza kumwaza mphangwa zadidi mwakukhonda tsalakana khala anthu asatawira, asatisingirira, peno kutitcinga.​—1 Ates. 2:1, 2.

9. Tinapangiza tani cipapo pakuthimbana na nyatwa?

9 Pakuthimbana na nyatwa. Kunyindira Yahova kusatipasa cikhulupiro na cipapo toera kuthimbana na nyatwa. Tingaferwa na nyakufunika wathu, ife tisatsukwala, mbwenye nee tisaluza cidikhiro. Ife tisasaka ciphedzo ca Mulungu “anabalangaza anthu onsene.” (2 Akor. 1:3, 4; 1 Ates. 4:13) Tingathimbana na utenda wakugopswa peno kugwerwa na cidengwa, panango tinatsukwala, mbwenye ife nkhabe kuswa midida ya Bhibhlya. Tisacalira ntundu onsene wa ukondzi wakuti nkhabe kubverana na midida ya Bhibhlya. (Mach. 15:28, 29) Tingatsukwala, panango ‘mitima yathu inatikonwesa,’ mbwenye nakuti tisanyindira Mulungu wakuti ali cifupi na anthu a ‘ntima wakutsukwala,’ ife nee tisabwerera nduli.b​—1 Jwau 3:19, 20; Sal. 34:18.

YEZU ALI NA LUSO YAKUDZINDIKIRA

10. Kodi luso yakudzindikira ninji? Akristu a luso yakudzindikira asalonga tani na asacita tani pinthu?

10 Kudzindikira ndi luso yakubvesesa mwadidi kusiyana kwa cinthu cadidi na cakuipa, buluka penepo munthu mbasankhula kucita cinthu cadidi. (Aheb. 5:14) Kudzindikira kusafokotozwa ninga “luso yakucita pisankhulo pyadidi mu pinthu pyauzimu.” Nkristu wa luso yakudzindikira asalonga na kucita pinthu munjira inakomeresa Mulungu. Munthu unoyu asasankhula mafala akuwangisa, mbuto mwakulonga mafala akuphekesa anango. (Mis. 11:12, 13) Iye ‘nkhabe cimbiza na kuipirwa.’ (Mis. 14:29) Iye “asaenda kutsogolo,” asapitiriza kufamba munjira yadidi mu ulendo wace toera kugumana umaso. (Mis. 15:21, NM) Tinakhala tani na luso yakudzindikira? Tisafunika kupfundza Mafala a Mulungu na kuphatisira pinapfundza ife. (Mis. 2:1-5, 10, 11) Makamaka tisafunika kudinga citsandzo ca Yezu, munthu waluso yakudzindikira kakamwe kupiringana onsene adakhalapo.

11. Kodi Yezu apangiza tani luso yakudzindikira m’mafalace?

11 Yezu apangiza luso yakudzindikira mu pyonsene pidacita iye na pidalonga iye. M’mafalace. Iye akhaphatisira mafala adidi pakumwaza mphangwa zadidi, akhasankhula ‘mafala adidi’ akuti akhadzumatirisa anyakubvesera ace. (Luka 4:22; Mat. 7:28) Ndzidzi onsene Yezu akhasiya kuti Mafala a Mulungu alonge—mu kualeri, kualonga, peno kuphatisira lemba yakuthema toera kubvekesa ntsonga ikhafuna iye. (Mat. 4:4, 7, 10; 12:1-5; Luka 4:16-21) Yezu afokotozambo Malemba munjira yakuti ikhakulumiza mitima ya anyakubvesera ace. Pakumala kulamuswa muli akufa, pikhalonga iye na anyakupfundza awiri mu nseu wa kuenda ku Emawusi, Yezu ‘aatcululira mafala onsene a m’bukhu ya Mulungu akhalonga pya iye.’ Buluka penepo, anyakupfundza anewa alonga: ‘Simomwene tayu kuti ife tikhabva kupisa muntima mwathu, pikhalonga iye na ife n’njira, mbatitcululira pya Mafala a Mulungu?’​—Luka 24:27, 32.

12, 13. Ndi pitsandzo pipi pinapangiza kuti Yezu nee akhaipirwa mwakucimbiza, pontho kuti akhali na maonero akulinganira?

12 Mabvero ace na maonero ace. Luso yakudzindikira yaphedza Yezu toera kutonga mabvero ace, mbincitisa kukhala wakukhonda ‘cimbiza kuipirwa.’ (Mis. 16:32) Iye akhali wa “ntima wadidi.” (Mat. 11:29) Ndzidzi onsene Yezu akhali wakupirira na anyakupfundzace mwakukhonda tsalakana madodo awo. (Marko 14:34-38; Luka 22:24-27) Iye apitiriza kukhala wakupfulika ngakhale pikhatsalakanwa iye mwakuipa.​—1 Ped. 2:23.

13 Luso yakudzindikira yaphedzambo Yezu toera kukhala na maonero akulinganira. Iye akhabvesesa midida ya Mwambo wa Mose; pyenepi pyakhuya njira ikhatsalakanira iye anthu. Mwacitsandzo, onani pinalongwa pa Marko 5:25-34. (Lerini.) Nkazi wakuti akhali na utenda wakubuluka ciropa apita pa mwinji wa anthu, akhuya nguwo ya Yezu mbawangiswa. Mwakubverana na Mwambo, iye akhali wakupswipa, natenepa nee akhafunika kukhuya munthu. (Lev. 15:25-27) Mbwenye Yezu​—adzindikira kuti cifuniro cikulu ca “Mwambo” cikhaphataniza ‘kubvera anthu ntsisi na kukhulupirika’—​natenepa, iye nee antcunyusa thangwi yakukhuya nguwo yace. (Mat. 23:23) Mbuto mwace, iye alonga mwaufuni: ‘Mwananga, kukhulupira kwako kwakupulumusa. Ndoko mwantendere mbuwangiswa mu utenda wako.’ Mphyakuwangisa kakamwe kudziwa kuti luso yakudzindikira yakulumiza Yezu toera kupangiza udidi unoyu!

14. Kodi Yezu asankhula kucitanji? Kodi iye apitiriza tani kuikha manyerezero ace mu utumiki wace?

14 Pisankhulo pya umaso wace. Yezu apangiza luso yakudzindikira mu kusankhula njira yadidi ya umaso, mbapitiriza na umaso unoyu. Iye asankhula kuphatisira umaso wace m’basa yakumwaza mphangwa zadidi. (Luka 4:43) Yezu apitirizambo munjira yadidi mbacita pisankhulo pyakuti pyamphedza toera kuikha manyerezero ace m’basa idapaswa iye na kuimalisa. Mwandzeru, Yezu asankhula kukhala na umaso wakululupa toera akwanise kuphatisira ndzidzi wace na mphambvu zace mu utumiki. (Luka 9:58) Iye adzindikira kuti akhafunika kupfundzisa anango toera apitirize na basa yakumwaza mphangwa pakumala kufa kwace. (Luka 10:1-12; Jwau 14:12) Yezu apikira atowereri ace kuti iye mbadapitiriza kuaphedza m’basa ineyi ‘mpaka kumala kwa makhaliro ano a pinthu.’​—Mat. 28:19, 20.

TOWEZERANI LUSO YAKUDZINDIKIRA YA YEZU

15. Tinapangiza tani luso yakudzindikira m’mafala athu?

15 Onani njira inango yakuti tinakwanisa kutowezera Yezu. M’mafala athu. Pakucedza na Akristu andzathu, mbuto mwakulonga mafala akuphekesa, ife tisaphatisira mafala akuti anawangisa anango. (Aef. 4:29) Pakulonga na anango pya Umambo wa Mulungu, ife tisalonga mafala akudzipa ninga akuikhwa “munyu.” (Akol. 4:6) Ife tisayesera kudzindikira makhaliro na pifuno pya anaciro nyumba, mbatisankhula mafala athu mwakubverana na makhaliro awo. Tisakumbuka kuti mafala adidi anaphedza munthu toera kukhala na cifuno cakubvesera na kukhuya ntima wace. Kusiyapo pyenepi, pakufokotoza pikhulupiro pyathu, ife tisatawirisa kuti Bhibhlya ilonge. Natenepa, ife tisaphatisira malemba na cinyindiro, mbatileri Bhibhlya ndzidzi onsene unakhala ife na mwai. Ife tisadzindikira kuti Bhibhlya iri na mphambvu kakamwe kupiringana cinthu consene cakuti tinakwanisa kucilonga mu kuphatisira maluso athu.​—Aheb. 4:12.

16, 17. (a) Tinapangiza tani kuti ndife anthu akukhonda cimbiza kuipirwa na maonero akulinganira? (b) Tinapitiriza tani kuikha utumiki wathu pa mbuto yakutoma?

16 Mabvero athu na maonero athu. Luso yakudzindikira isatiphedza toera kutonga mabvero athu, mbatikhonda ‘cimbiza kuipirwa.’ (Tgo. 1:19) Anango angatitsalakana mwakuipa, ife tisayesera kudzindikira pidaacitisa kulonga peno kucita pinthu munjira ineyi. Maonero anewa anakwanisa kutiphedza toera kukhala akukhurudzika mbatikwanisa ‘kulekerera madodo.’ (Mis. 19:11) Luso yakudzindikira isatiphedzambo toera kukhala na maonero akulinganira. Natenepa, tisayesera kukhala na maonero akulinganira mwa pire pinadikhira ife kwa Akristu andzathu, mbatikumbuka kuti panango iwo asathimbana na nyatwa zakuti nee tisazidziwa mwadidi. Ife tiri dzololo toera kuabvesera, pingakhala pyakuthema mbatitawira maonero awo.​—Afil. 4:5.

17 Pisankhulo pya umaso wathu. Ninga atowereri a Yezu, tisadzindikira kuti mwai ukulu kakamwe uli na ife ndi kumwaza mphangwa zadidi. Natenepa, tisapitiriza mu ulendo wathu mu kucita pisankhulo pyakuti pisatiphedza toera kuikha manyerezero athu mu utumiki. Tisasankhula kuikha pinthu pyauzimu pa mbuto yakutoma, mbatipitiriza na umaso wakululupa toera tikwanise kucita pizinji m’basa yakufunika kakamwe yakumwaza mphangwa kumala mbakudzati kufika.​—Mat. 6:33; 24:14.

18. Tinakwanisa tani kupitiriza munjira ya ulendo wathu toera kupulumuka? Kodi muli wakutonga toera kucitanji?

18 Nee musatawira kuti pikhali pyakutsandzayisa kakamwe kudinga makhaliro mangasi akutundusa a Yezu? Tisatawira kuti pinadzakhala pyakutsandzayisa kakamwe kudinga makhaliro ace anango na kupfundza kuti tinakwanisa tani kukhala akulandana kakamwe na iye. Natenepa, tendeni tikhale akutonga toera kutowezera mwakukwana mathanyo a Yezu. Tingacita pyenepi, tinadzapitiriza munjira ya ulendo wathu toera kupulumuka, mbatikhala na uxamwali wakuwanga na Yahova, Wakuti Yezu antowezera mwakukwana.

[Pidzindikiro pyapantsi]

a Lemba ya 1 Pedro 1:8, 9 yalemberwa Akristu akuti ali na cidikhiro ca kuenda kudzulu. Mbwenye mafala anewa asaphatisirwambo kwa ale anadikhira kukhala pa dziko yapantsi.​—1 Ped. 1:3, 4.

b Toera kuona pitsandzo pinapangiza cipapo pakuthimbana na nyatwa, onani A Sentinela ya 1 de Dezembro de 2000, matsamba 24-28; Despertai! ya 22 de Abril de 2003, matsamba 18-21, na ya 22 de Janeiro de 1995, matsamba 11-15.

    Mabukhu Acisena (1982-2025)
    Bulukani
    Fungulani
    • Cisena
    • Tumizirani Anango
    • Sankhulani Pinafuna Imwe
    • Copyright © 2025 Watch Tower Bible and Tract Society of Pennsylvania
    • Pinafunika Imwe Kutowezera
    • Cibisobiso
    • Configurações de Privacidade
    • JW.ORG
    • Fungulani
    Tumizirani Anango