Pa Sinagoga Ya Nazareti

Anthu a ku Nazareti akomerwa kakamwe. Caka cibodzi Yezu mbadzati kubatizwa na Juwau, iye akhadziwika pa cisa cace ninga nyakupala matabwa. Mbwenye cincino asadziwika ninga mamuna wakucita mabasa akudzumisa. Anthu apacisa akhafuna kuona Yezu mbakacita mabasa anewa kwa iwo.

Cifuno ca anthu cathimizirika mu ndzidzi udaenda Yezu mu sinagoga ninga pikhacita iye. Mwakubverana na pikhacitwa mu sinagoga, pa ntsiku ya Sabudu, anthu akhaphembera na kuleri ‘bukhu ya Mose.’ (Mabasa 15:21) Kusiyapo pyenepi, pakhalerwimbo mabukhu akhalonga pya profesiya. Pidalamuka Yezu toera kuleri, panango adzindikira anthu azinji akhaenda na iye ku sinagoga. Yezu apaswa mpukutu wa mprofeta Izaiya mbasaka mbuto inalonga pya Ule adadzodzwa na nzimu wa Yahova. Khundu ineyi, cincino isagumanika pa Izaiya 61:1, 2.

Yezu aleri pya Ule adapikirwa toera kumwaza mphangwa zacisudzulo kwa anthu akhali mu ubitcu, kuwangisa maboliboli na kulonga pya caka cakutawirika ca Yahova. Yezu apereka mpukutu kwa m’bodzi wa nyakubvesera mbaenda kakhala. Anthu onsene akhamuyang’ana mwacidikhodikho. Buluka penepo, panango Yezu atoma kulonga mu ndzidzi uzinji mafala awa: ‘Lero, lemba iyi idamala imwe kubva yakwanirisika.’—Luka 4:21.

Anthu adzumatirwa na “mafala akuphata ntima akhabuluka pa mulomo wace.” Iwo akhalonga kwa unango na ndzace: “Kodi uyu nee ndi mwana wa Zuze?” Mbwenye pidaona iye kuti anthu akhadikhira kuti iye acite mabasa akudzumisa adabva iwo, Yezu alonga: ‘Mwakukhonda penula imwe mwaphatisira nsangani uyu kuna ine: Dotoro, kondzeka wekha. Citambo kuno kucisa cako pinthu pidabva ife kuti wapicita ku Kafarnau.’ (Luka 4:22, 23) Anyakuendekana a Yezu akhanyerezera kuti pirengo pikhafunika kucitwa pakutoma mu cisa cace toera kuphedza mbumba yace. Ndi thangwi yace, iwo akhaona ninga akupwaziwa na Yezu.

Pidadzindikira Yezu manyerezero awo, iye alonga pidacitikira Aizraeli. Mu ntsiku za Eliya pakhali na azice azinji mu Izraeli, mbwenye iye nee atumwa toera kuenda kwa azice anewa. M’mbuto mwace, iye aenda kuna nzice wakuti nee ndi Muizraeli, wa nzinda ukhali cifupi na Sidhoni. Mu nzinda unoyu, Eliya acita cirengo cakulamusa munthu muli akufa. (1 Amambo 17:8-16) Pontho m’midzidzi ya Elizeu, kukhali na anthu azinji a matanya, mbwenye mprofeta awangisa basi ene Naamani wa ku Siriya.—2 Amambo 5:1, 8-14.

Panango anthu a cisa cikhali Yezu aona kuti kulandanisa kweneku kwa mbiri zakale kukhala kwakukhonda funika, pyenepi pikhapangiza kudzikuza na kusowa kwawo cikhulupiro. Mphapo iwo acitanji? Onsene akhali mu Sinagoga aipirwa, alamuka mbakwekweta Yezu mpaka kunja kwa nzinda. Iwo aenda naye padzulu pa phiri, padamangwa nzinda wa Nazareti mbayesera kumponya pantsi. Mbwenye Yezu athawa mwakutsidzikizika. Buluka penepo, aenda ku Kafarnau cifupi na kumadokero a dzuwa a Bara ya Galileya.