Tingafa Tisaenda Kupi?

1-3. Ndi mibvundzo ipi inacita anthu thangwi ya kufa, pontho mauphemberi anango asatawira tani mibvundzo ineyi?

BHIBHLYA isatipanga kuti ‘kufa nee kunadzaonekabve tayu.’ (Apokalipse 21:4) Mu Nsolo 5, tapfundza kuti ciomboli cinatiphedza toera kukhala na umaso wakukhonda mala. Mbwenye anthu asapitiriza kufa. (Koelete 9:5) Natenepa, mbvundzo wakufunika kakamwe wakuti tisaucita ndi uyu, Ninji pinacitika kwa ife tingafa?

² Ntawiro wa mbvundzo unoyu ndi wakufunika kakamwe mu ndzidzi unaferwa ife na nyakufunika wathu. Panango tinabvundzika: ‘Kodi iye aenda kupi? Kodi iye akutiona? Kodi iye anakwanisa kutiphedza? Tinadzamuona pontho?’

³ Mauphemberi asatawira mibvundzo ineyi munjira zakusiyana-siyana. Anango asapfundzisa kuti khala ndimwe munthu wadidi, munadzaenda kudzulu, khala ndimwe munthu wakuipa, munadzapiswa mu infernu. Anango asalonga kuti mungafa, munadzakhala nzimu mbamukhala pabodzi na anthu a pabanja yanu adafa kale. Anangombo asalonga kuti munthu angafa asatongwa, mbabalwa pontho, peno asakhala pontho maso na manungo akusiyana, panango ninga munthu unango peno cinyama.

4. Ndi cipfundziso cipi cakulandana cakuti mauphemberi asacipfundzisa thangwi ya kufa?

⁴ Mauphemberi asaoneka ninga asapfundzisa pinthu pyakusiyana kakamwe. Mbwenye onsene ali na cipfundziso cibodzi cakulandana. Iwo asapfundzisa kuti munthu angafa, khundu ibodzi yace isapitiriza kukhala maso. Kodi pyenepi mphyandimomwene?

TINGAFA TISAENDA KUPI?

5, 6. Ninji pinacitika kwa ife tingafa?

⁵ Yahova asadziwa pisacitika kwa ife tingafa, pontho iye asatipanga kuti munthu angafa, umaso wace usamala. Kufa ndi kusiyana na kukhala maso. Natenepa munthu angafa, mabvero ace na manyerezero ace nkhabe kupitiriza kukhala maso ku mbuto inango.a Tingafa ife nkhabe kwanisa kuona, kubva, nee kunyerezera pontho.

⁶ Mambo Salomoni alemba kuti ‘anyakufa nkhabe cibodzi cinadziwa iwo.’ Anyakufa nkhabe kufuna peno kuida, pontho ‘mu Nthumbi nkhabebve basa, nee pyakunyerezera, nee udziwisi, nee pya ndzeru.’ (Lerini Koelete 9:5, 6, 10.) Pontho pa Masalmo 146:4, Bhibhlya isatipanga kuti munthu angafa, ‘manyerezero ace’ asafa.

PIDALONGA YEZU THANGWI YA KUFA

7. Kodi Yezu alonganji thangwi ya kufa?

⁷ Pidafa xamwali wace wapantima Lazaro, Yezu alonga kuna anyakupfundzace: “Lazaro xamwali wathu, ali kugona.” Mbwenye Yezu nee akhafuna kulonga kuti Lazaro akupuma. Patsogolo pace Yezu alonga: “Lazaro afa.” (Jwau 11:11-14) Natenepa, Yezu alandanisa kufa na kugona. Iye nee alonga kuti Lazaro ali kudzulu peno kuti ali pabodzi na anthu a pabanja yace adafa kale. Pontho iye nee alonga kuti Lazaro akhathabuswa mu infernu peno kubalwa pontho ninga munthu unango peno ninga cinyama. Nkhabe, pyenepi pyakhala ninga Lazaro akhali n’citulo cikulu. Malemba anango asalandanisa kufa na citulo cikulu. Bhibhlya isalonga kuti pidaphiwa Estevau, iye “agona n’citulo cakufa.” (Machitiro 7:60, Tradução do Novo Mundo) Mpostolo Paulu alembambo kuti Akristu anango ‘akhagona n’citulo cakufa.’​—1 Akorinto 15:20.

8. Tisadziwa tani kuti Mulungu nee acita anthu kuti afe?

⁸ Kodi Mulungu acita Adhamu na Eva toera mukupita kwa ndzidzi afe? Nkhabe! Yahova aacita toera akhale maso kwenda na kwenda na ungumi waungwiro. Mudacita Yahova anthu, iye aapasa cifuno cakukhala kwenda na kwenda. (Koelete 3:11) Anyakubala nkhabe funa kuona anawo kukalamba na kufa, natenepa Yahova ali na mabvero mabodzi ene thangwi ya ife. Mphapo khala Mulungu aticita toera kukhala kwenda na kwenda, thangwi yanji tisafa?

THANGWI YANJI TISAFA?

9. Thangwi yanji ntemo udapereka Yahova kuna Adhamu na Eva ukhali wakulinganira?

⁹ M’munda wa Edheni, Yahova apanga Adhamu: ‘Dya misapo yonsene ya m’munda. Mbwenye, leka kudya nsapo wa muti wakudziwa pyadidi na pyakuipa, thangwi ntsiku inadzaudya iwe, unadzafa.’ (Genesi 2:9, 16, 17) Ntemo unoyu nee ukhali wakunentsa toera kuubvera, pontho ndi Yahova akhadathema kupanga Adhamu na Eva pinthu pyadidi na pyakuipa. Mukubvera kwawo Yahova, iwo mbadapangiza kuna iye kuti asalemedza utongi wace. Iwo mbadapangizambo kupereka kwawo takhuta thangwi ya pyonsene pidapaswa iwo.

10, 11. (a) Kodi Sathani apeusa tani Adhamu na Eva? (b) Thangwi yanji nkhabe thangwi toera kulekerera pidacita Adhamu na Eva?

¹⁰ Mwakutsukwalisa, Adhamu na Eva asankhula kukhonda bvera Yahova. Sathani alonga kuna Eva: ‘Ndimomwene kuti Mulungu akukhondesani kudya misapo ya miti yonsene ya m’munda?’ Eva atawira: ‘Tinadya misapo ya miti yonsene ya m’munda. Mbwenye nsapo wa muti uli pakati pa munda, Mulungu alonga: ‘Nee musafunika kudya nsapo wa muti uyu, nee kuukhuya, mungapicita, munadzafa.’​—Genesi 3:1-3.

¹¹ Buluka penepo Sathani alonga: ‘Munadzafa tayu. Mulungu asadziwa kuti, ntsiku inadzadya imwe, maso anu anadzafunguka, imwe munadzakhala sawasawa na Mulungu, munadzadziwa pyadidi na pyakuipa.’ (Genesi 3:4-6) Sathani akhafuna kuti Eva anyerezere kuti mbadadzindikira ekha pinthu pyadidi na pyakuipa. Pa ndzidzi unoyu, Sathani alonga uthambi wa pinthu pyakuti mbapidancitikira angakhonda kubvera. Sathani apanga Eva kuti nee mbadadzafa, natenepa Eva adya nsapo mbapasambo mamunace. Adhamu na Eva akhadziwa kuti Yahova akhadaapanga toera akhonde kudya nsapo unoyu. Pidadya iwo nsapo unoyu, iwo asankhula kukhonda bvera ntemo wakubveka na wakulinganira. Mukudya nsapo, iwo apangiza kuti nee alemedza Babawo wakudzulu. Natenepa, iwo nkhabe thangwi toera kulekererwa pidacita iwo.

12. Thangwi yanji mphyakutsukwalisa kakamwe pidakhonda Adhamu na Eva kubvera Yahova?

¹² Mphyakutsukwalisa kakamwe pidacita anyakubala anthu akutoma thangwi yakukhonda kulemedza Nciti wawo! Mbamudapibva tani khala mwacita basa mwakuwanga toera kukuza mwananu wacimuna peno wacikazi, buluka penepo mbakhonda kukubverani mbacita pinthu pyakusiyana na pidampanga imwe toera kucita? Kodi pyenepi nee mbipidakuphani ntima?

13. Kodi Yahova akhafuna kubvekesanji mudapanga iye Adhamu kuti ‘unabwerera pontho ku pfumbi’?

¹³ Mudakhonda iwo kubvera, Adhamu na Eva aluza mwai wakukhala maso kwenda na kwenda. Yahova apanga Adhamu: ‘Iwe ndiwe pfumbi, unabwerera pontho ku pfumbi.’ (Lerini Genesi 3:19.) Pyenepi pisabveka kuti Adhamu mbadakhala pontho pfumbi, ninga ndzidzi ukhali iye mbadzati kucitwa. (Genesi 2:7) Pidadawa Adhamu, iye afa mbakhonda pontho kukhala maso.

14. Thangwi yanji tisafa?

¹⁴ Adhamu na Eva mbadabvera Mulungu, iwo mbadapitiriza kukhala maso lero. Mbwenye mudakhonda iwo kubvera, iwo adawa, mbafa. Madawo akhala ninga utenda wakugopswa wakupasirwa na anyakubala athu akutoma. Ife tonsene tisabalwa na madawo, ndi thangwi yace tisafa. (Aroma 5:12) Mbwenye ceneci nee ndi cifuniro ca Mulungu kuna anthu. Mulungu nee akhafuna kuti anthu afe, pontho Bhibhlya isacemera kufa ninga “nyamalwa.”​—1 Akorinto 15:26.

UNDIMOMWENE USATISUDZULA

15. Ndi munjira ipi undimomwene unalonga pya anyakufa usatisudzula?

¹⁵ Undimomwene usatisudzula ku maonero mazinji akuphonyeka. Bhibhlya isatipfundzisa kuti anyakufa nkhabe kubva kupha peno kutsukwala. Ife nkhabe kwanisa kulonga nawo, pontho iwo nkhabe kwanisa kulonga na ife. Ife nkhabe kwanisa kuphedza anyakufa, pontho anyakufa nkhabe kwanisa kutiphedza. Iwo nkhabe kwanisa kutiphekesa, natenepa ife nkhabe funika kuagopa. Mbwenye mauphemberi mazinji asapfundzisa kuti anyakufa ali maso ku mbuto inango, pontho thangwi ya pyenepi, tinakwanisa kuaphedza tingalipa kobiri kuna anyantsembe peno kuna ale anaoneka ninga anthu akucena. Mbwenye tingadziwa undimomwene thangwi ya anyakufa, nee tinanyengezwa na uthambi unoyu.

16. Ndi uthambi upi unapfundzisa mauphemberi mazinji thangwi ya anyakufa?

¹⁶ Sathani asaphatisira uphemberi wauthambi toera kutinyengeza na kuticitisa kunyerezera kuti anyakufa asapitiriza kukhala maso. Mwacitsandzo, mauphemberi anango asapfundzisa kuti ife tingafa, khundu ibodzi yathu isapitiriza kukhala maso ku mbuto inango. Kodi uphemberi wanu usapfundzisa pyenepi, peno usapfundzisa pinalonga Bhibhlya thangwi ya anyakufa? Sathani asaphatisira uthambi toera kucitisa anthu kukhala kutali na Yahova.

17. Thangwi yanji manyerezero akuti anthu asapiswa mu infernu asatikanisa Yahova?

¹⁷ Pinapfundzisa mauphemberi mazinji pisaphesa ntima. Mwacitsandzo, anango asapfundzisa kuti anthu akuipa anadzapiswa kwenda na kwenda mu infernu. Uthambi unoyu usatikanisa Yahova. Iye cipo asafuna kuti anthu athabuke. (Lerini 1 Jwau 4:8.) Mbamudapibva tani khala munthu unango akutcunyusa mwana mukupisa manja ace pa moto? Imwe mbamudanyerezera kuti iye ndi nsumankha kakamwe. Imwe nee mbamudafuna kudziwa mamuna unoyu. Mwandimomwene, ndi pyenepi pinafuna Sathani toera tinyerezere thangwi ya Yahova!

18. Thangwi yanji nee tisafunika kugopa anyakufa?

¹⁸ Mauphemberi anango asatipanga kuti anthu angafa, iwo asakhala mizimu. Mauphemberi anewa asapfundzisa kuti tisafunika kulemedza na kugopa mizimu ineyi thangwi iyo inakwanisa kukhala axamwali a mphambvu peno anyamalwa akugopswa. Anthu azinji asakhulupira uthambi unoyu. Iwo asagopa anyakufa, natenepa asaalambira mbuto mwakulambira Yahova. Kumbukani kuti anyakufa nkhabe mabvero peno kunyerezera cinthu, natenepa nee tisafunika kuagopa. Yahova ndi Nciti wathu. Iye ndi Mulungu wandimomwene, pontho tisafunika kulambira iye basi.​—Apokalipse 4:11.

19. Ndi munjira ipi kudziwa undimomwene thangwi ya kufa kusatiphedza?

¹⁹ Tingadziwa undimomwene thangwi ya kufa, tisakhala akusudzuka ku mauthambi a mauphemberi. Undimomwene unoyu usatiphedza toera kubvesesa pikiro yakutsandzayisa ya Yahova thangwi ya umaso wathu na tsogolo yathu.

20. Tinadzapfundzanji mu nsolo unatowera?

²⁰ Kale kakamwe, ntumiki wa Mulungu wakucemerwa Yobe abvundza tenepa: ‘Munthu angafa, anakwanisa kukhala pontho maso?’ (Yobe 14:14) Kodi mphyakukwanisikadi munthu wakufa kukhala pontho maso? Ntawiro unatipasa Mulungu m‘Bhibhlya ndi wakutsandzayisa kakamwe. Mu nsolo unatowera tinadzaona pyenepi.