Tinapfundzanji Kubulukira Kwa Jwana
ANTHU azinji asadziwa kuti Yezu akhali na apostolo 12. Mbwenye panango iwo nkhabe dziwa kuti anyakupfundzace akhaphatanizambo akazi akhantowerera. Jwana akhali m’bodzi wa akazi anewa.—Mat. 27:55; Luka 8:3.
Ndi basa ipi idacita Jwana mu utumiki wa Yezu, pontho tinapfundzanji kubulukira mu citsandzo cace?
JWANA AKHALI ANI?
Jwana akhali ‘nkazi wa Kuza akhaphata basa panyumba ya Herode.’ Panango Kuza akhayang’anira pinthu panyumba ya Herode Antipa. Jwana akhali m’bodzi wa akazi azinji adawangiswa na Yezu. Pabodzi na akazi anango, Jwana acita ulendo na Yezu pabodzi na apostolo ace.—Luka 8:1-3.
Atsogoleri auphemberi Waciyuda akhapfundzisa kuti akazi nee akhafunika kucita uxamwali na amuna akuti nee ndi acibale awo, nee kucita ulendo na iwo. Mwandimomwene, amuna Aciyuda nee akhacedza maningi na akazi. Yezu nee abvera miyambo ineyi, mbatawirisa Jwana na akazi anango akukhulupira toera kupita mu nsoka wace.
Thangwi yakutowerera Yezu na anyakupfundzace, Jwana aikhika pangozwi ya kukhondwa pacisa. Onsene akhatowerera Yezu akhafunika kukhunganyika toera kucita macinjo mu umaso wawo wa ntsiku zonsene. Thangwi ya atowereri anewa, Yezu alonga: ‘Mai wanga na abale anga ndi ale anabva mafala a Mulungu mbaatoweza.’ (Luka 8:19-21; 18:28-30) Kodi nee musawangiswa mu kudziwa kuti Yezu asafuna kakamwe ale anasiya pyonsene toera kuntowerera?
IYE APHEDZERA NA MPFUMA YACE
Jwana pabodzi na akazi anango aphatisira ‘mpfuma zawo’ toera kuphedza Yezu na apostolo 12. (Luka 8:3) Nyakulemba unango alonga: “Luka nee akupanga anyakuleri ace kuti akazi akhaphika cakudya, kutsuka maparato na kusona nguwo. Panango iwo akhacita pyenepi . . . , mbwenye si pyenepi tayu pidalonga Luka.” Panango akazi anewa aphatisira kobiri yawo na pinthu pyawo toera kutsalakana pifuno pya andzawo.
Nee Yezu nee apostolo ace akhacita basa yakudziko mu ndzidzi ukhacita iwo maulendo awo akumwaza mphangwa. Panango iwo nee akhali na kobiri toera kugula cakudya na pinthu pinango pyakufunika pa nsoka wawo, panango wa anthu 20. Maseze iwo akhatambirwa m’manyumba mwa anthu, mbwenye thangwi yakukhala na ‘cikhwama ca kobiri’ pisapangiza kuti nee akhanyindira kutambirwa na anthu ntsiku zonsene. (Jwau 12:6; 13:28, 29) Jwana na akazi anango panango acita pyakupereka toera kuphedzera pikhafunika.
Anango asapokanya kuti akazi Aciyuda akhali na pinthu pizinji peno mpfuma. Mbwenye mphangwa za ndzidzi unoyu zisapangiza kuti pakati pa Ayuda, nkazi akhakwanisa mpfuma munjira zizinji: (1) unthaka wakusiyiwa na baba angafa mbakhonda kusiya ana acimuna, (2) unthaka ukhapaswa iwo, (3) kobiri ikhalipwa iwo pakumala kumwalana, (4) kobiri idasiya mamuna adafa, peno (5) kobiri ya munthu paekha.
Mwakukhonda penula, atowereri a Yezu aphedzera na pire pikhakwanisa iwo. Panango mwa atowereri a Yezu, akhalipo akazi akupfuma. Na thangwi yakuti Jwana akhali nkazi wa nyabasa wa panyumba ya Herode, anango asalonga kuti iye akhali wakupfuma. Panango ndi munthu ninga iye adapasa Yezu nguwo ya ntengo ukulu kakamwe na yakukhonda soniwa ikhabvala iye. Nyakulemba unango wacikazi alonga kuti: “Akazi a asodzi a m’madzi nee mbadakwanisa kumpasa” nguwo ninga ineyi.—Jwau 19:23, 24.
Bhibhlya nee isalonga pakweca kuti Jwana akhacita pyakupereka. Mbwenye iye acita pidakwanisa iye, pyenepi pisatipfundzisa ntsonga yadidi. M’bodzi na m’bodzi wa ife anakwanisa kusankhula pinafuna iye kupereka toera kuphedzera basa ya Umambo. Pinafuna Mulungu ndi kucita pinakwanisa ife mwakukomerwa.—Mat. 6:33; Marko 14:8; 2 Akor. 9:7.
PAKUFA KWA YEZU NA PATSOGOLO PACE
Panango, Jwana aona nanthu kuphiwa kwa Yezu, pabodzi na akazi anango ‘akuti akhantowerera mbantumikira pikhali iye ku Galileya; na akazi anangombo azinji adabwera na iye ku Yerusalemu.’ (Marko 15:41) Pidabuluswa manungo a Yezu pamuti toera kuikhwa, ‘akazi akhadabuluka na Yezu ku Galileya aenda ku nthumbi mbaona kuti manungo a Yezu akhadagoneswa tani. Iwo abwerera toera kuenda kasasanya mafuta akununkhira.’ Luka alonga kuti akazi anewa akhali ‘Mariya Madalena, Jwana na Mariya mace Tyago.’ Pidapita ntsiku ya Sabudu iwo abwerera mbaona aanju adaapanga kuti Yezu alamuswa muli akufa.—Luka 23:55–24:10.
Pisaoneka kuti Jwana akhali pabodzi na anyakupfundza, kuphatanizambo mama wa Yezu na abaleace, adagumanyikana pa Pentekoste ya caka 33 N.W. ku Yerusalemu. (Mach. 1:12-14) Nakuti mamunace akhaphata basa panyumba ya Herode Antipa, panango Jwana ndiye adapanga Luka mphangwa zinalonga pya Herode Antipa, makamaka thangwi ndi Evanjelyu ya Luka basi inalonga dzina ya Jwana.—Luka 8:3; 9:7-9; 23:8-12; 24:10.
Mbiri ya Jwana isatipfundzisa ntsonga zakufunika kakamwe. Iye acita pyonsene pidakwanisa iye toera kutumikira Yezu mwakukwana. Khala pyakupereka pyace pyaphedza Yezu na anyakupfundzace 12 toera kucita ulendo na kumwaza mphangwa pabodzi, mwakukhonda penula iye akomerwa kakamwe. Jwana atumikira Yezu mbakhala wakukhulupirika kwa iye mu ndzidzi wa nyatwa. Mphyadidi kuti akazi Acikristu atowezere cikhulupiro cace cadidi.