“Ona, Nkhalamu Ya Dzindza Ya Yuda”

1-3. Ndi pinthu pipi pyakugopswa pidathimbana na Yezu, pontho iye acitanji?

MWINJI ukhafuna kumanga Yezu. Pakhalimbo anyankhondo na anthu anango akuti akhali na masupada na mitcamu. Iwo akhali na cifuniro cibodzi cene. Iwo agumanyikana pabodzi namasiku mu nseu wakuenda ku Yerusalemu mbawambuka Gowa ya Sidhroni mpaka pa Phiri ya Milivera. Maseze kukhali mwezi, iwo akwata nyale. Panango iwo akhafuna nyale thangwi makole akhadaphimbira mwezi. Panango iwo anyerezera kuti munthu akhasaka iwo abisala. Khala alipo adanyerezera kuti Yezu abisala thangwi yakugopa, pisapangiza kuti munthu unoyu nee asadziwa mwadidi Yezu.

² Yezu akhadziwa kuti iwo akhabwera kam’manga, mbwenye iye nee athawa. Mwinji wa anthu wafika, pontho Yuda wakuti akhali m’bodzi mwa axamwali akunyindirika a Yezu, ndiye akhaatsogolera. Mwakusowa manyadzo, Yuda apereka Yezu wakuti akhali Mbuyace mbam’mwanyika mwaumpfakafaka mbampswompswona. Ngakhale tenepo, Yezu nee agopa. Iye alimira patsogolo pa mwinji, mbabvundza: “Mbani anasaka imwe?” Iwo atawira: “Yezu wa ku Nazareti.”

³ Anthu azinji mbadagopa kakamwe pakuona mwinji unoyu na pida. Panango anthu anewa akhanyerezera kuti Yezu mbadagopa. Mbwenye Yezu nee agopa, iye nee athawa, pontho nee alonga uthambi. Mbuto mwace, iye alonga: “Ndine pano.” Mafala anewa aalonga mwakukhurudzika na mwacipapo, natenepa anthu anewa adzumatirwa kakamwe, abwerera nduli mbagwa pantsi.—Juwau 18:1-6; Mateu 26:45-50; Marko 14:41-46.

4-6. (a) Mwana wa Mulungu alandaniswa nanji, pontho thangwi yanji? (b) Ndi pinthu pipi pitatu pidacita Yezu pinapangiza kuti iye akhali wacipapo?

⁴ Thangwi yanji Yezu apitiriza kukhala wakukhurudzika? Iye acita pyenepi thangwi akhali wacipapo. Cipapo ndi nkhaliro wakufunika kakamwe wakuti ntsogoleri asafunika kukhala nawo, pontho nkhabepo adapangiza cipapo kakamwe ninga Yezu. Mu nsolo udamala ife tapfundza kuti Yezu akhali wakucepeseka kakamwe. Ndi thangwi yace athema kucemerwa “Mwanabira.” (Juwau 1:29) Mbwenye, cipapo cace cancitisambo kupaswa dzina inango. Bhibhlya isalonga tenepa thangwi ya Yezu: “Ona! Nkhalamu ya Dzindza ya Yuda.”—Apokalipse 5:5.

⁵ Nkhalamu kazinji kene isadziwika na cipapo. Kodi imwe mwalimira kale kutsogolo kwa nkhalamu ikulu imuna? Khala pyakucitikirani, panango nkhalamu ineyi ikhadafungirwa na mpanda. Ngakhale kuiona nkati mwa mpanda ndi pyakugopesa. Mungayang’ana cinyama ceneci cikulu na camphambvu, ico mbacikuyang’ananimbo, imwe musaona kuti cinyama ceneci nkhabe gopa peno kuthawa cinthu. Bhibhlya isalonga kuti ‘nkhalamu ndi yamphambvu kupiringana pinyama pinango, iyo nkhabe kugopa munthu mbibwerera nduli.’ (Misangani 30:30) Kristu ndi wacipapo ninga nkhalamu.

⁶ Tendeni tione pinthu pitatu pidacita Yezu pinapangiza kuti iye akhali na cipapo ninga ca nkhalamu: Pidatsidzikiza iye undimomwene, pidaphedzera iye ulungami na pidapirira iye pakutcingwa. Ife tinaonambo khala tiri na cipapo peno nkhabe, pontho tinatowezera tani Yezu mbatipangiza cipapo.

Iye Atsidzikiza Undimomwene Mwacipapo

7-9. (a) Ninji pidacitika pikhali Yezu na pyaka 12, pontho thangwi yanji musanyerezera kuti pidacita iye pikhali pyakugopesa? (b) Yezu apangiza tani cipapo pikhalonga iye na apfundzisi mu templo?

⁷ Mu dziko ino yakutongwa na Sathani, wakuti ndi “baba wa uthambi,” kazinji kene munthu asafunika kukhala na cipapo toera atsidzikize undimomwene. (Juwau 8:44; 14:30) Yezu atsidzikiza undimomwene kutomera mu uwana wace. Pikhali iye na pyaka 12 pyakubalwa, pakumala phwando ya Paskwa Yezu asalikira ku Yerusalemu. Zuze na Mariya ansaka mwakusowa cidikhiro mu ntsiku zitatu. Buluka penepo iwo an’gumana mu templo. Iye akhacitanji mwenemu? “Akhali nawa pakati pa apfundzisi, iye akhaabvesera mbaacita mibvundzo.” (Luka 2:41-50) Nyerezerani pidacitika pa ndzidzi unoyu.

⁸ Anyakufufudza alonga kuti atsogoleri a mauphemberi akulemedzwa kakamwe akhali na nsambo wakusalikira mu templo pakumala maphwando na kupfundzisa pa mbuto ikulu ikhagumanika mwenemo. Anthu mbadakhala pantsi toera kuabvesera na kuacita mibvundzo. Apfundzisi anewa akhali amuna adapfundza kakamwe. Iwo akhadziwa mwadidi Mwambo wa Mose, pontho akhadziwambo misambo mizinji idakhazikiswa na anthu mu pyaka pizinji. Kodi imwe mbamudaagopa? Anewa ndi mabvero acibaliro. Mbamudakhala na mabvero api mbidakhala mwacita pyenepi na pyaka 12 basi pyakubalwa? Anapiana azinji ali na manyadzo. (Yeremiya 1:6) Anango asacita pyonsene toera akhonde kudziwika pa xikola, asagopa kucitwa mibvundzo, asagopa kuyang’anwa, pontho asagopa kusingirirwa.

⁹ Mbwenye, penepo tisagumana Yezu, akhala pantsi pakati pa amuna akupfunza anewa, mokhonda gopa aacita mabvunzo akufuna kudziwa piri m’mitima yawo. Na iye acita pizinji. Mbiri isatipanga: “Onsene adambva, adzuma nzeru zache na kutawira kwache.” (Luka 2:47) Biblya nee isatipanga pidalonga iye m’nzidzi unoyu, mbwenye tingakwanise kukhala na cinyindiro cakuti iye hadabwerezera unthawatawa ukhagumanika pakati pa apfunzisi aneale auphemberi tayu. (1 Pedro 2:22) Nkhabe, iye atsidzikiza undimomwene wa Mafala a Mulungu, na abveseri ace adzumatirwa kakamwe na kamphale ka piaka 12 basi pyakubalwa mbakalonga mwanzeru na mwacipapo.

10. Aphale na atsikana Acikristu lero asatowezera tani cipapo ca Yezu?

¹⁰ Lero aphale na atsikana azinji Acikristu asatowezera citsandzo ca Yezu. Ndimomwene kuti iwo ndi akusiyana na Yezu, thangwi ndi akusowa ungwiro. Mbwenye ninga Yezu, iwo nee asadikhira kukula toera atsidzikize undimomwene. Mwacitsandzo, kuxikola peno mu cisa cawo, iwo asacita mibvundzo anthu, asabvesera mitawiro yawo, pontho mwacilemedzo iwo asaapanga undimomwene. (1 Pedhru 3:15) Iwo asaphedza andzawo a ku xikola, apfundzisi awo na andzawo a pacisa toera akhale atowereri a Kristu. Yahova asatsandzaya kakamwe na cipapo cawo. Bhibhlya isalandanisa aphale na atsikana anewa ninga bume inagwa namacibese yakuti ndi yakutonthola, yakutsandzayisa na yakunjipa.—Masalmo 110:3.

11, 12. Pidakula Yezu, apangiza tani cipapo toera kutsidzikiza undimomwene?

¹¹ Pidakula iye, Yezu apitiriza kupangiza cipapo pakutsidzikiza undimomwene. Mwandimomwene utumiki wace watoma munjira yakunentsa yakuti anango nee mbadakwanisa kukhala na cipapo. Iye akhali munthu, tayu arkanju wamphambvu, pontho akhafunika kuthimbana na Sathani wakuti ndi wamphambvu na wakugopswa kakamwe pakati pa anyamalwa onsene a Yahova. Yezu akhonda Sathani, pontho apokanya njira yakuphonyeka idaphatisira iye Malemba. Yezu amalisa makani anewa akusowa basa na mafala awa acipapo: “Coka Sathani!”—Mateu 4:2-11.

¹² Yezu apangiza citsandzo cadidi kakamwe mu utumiki wace, mwacipapo, iye atsidzikiza Mafala a Babace kuna ale akhayesera kuaphatisira mwakuipa. Atsogoleri azinji a mauphemberi a mu ndzidzi wakale akhapfundzisa uthambi ninga pinacitikambo lero. Natenepa, Yezu aapanga: “Imwe musacitisa mafala a Mulungu kukhala akusowa basa thangwi ya mwambo wanu udapereka imwe kuna anango.” (Marko 7:13) Iwo akhalemedzwa kakamwe na anthu, mbwenye Yezu aapanga mwacipapo kuti iwo ndi maboliboli anatsogolera maboliboli andzawo, pontho ndi apfakafaka.a (Mateu 23:13, 16) Tinatowezera tani cipapo ceneci ca Yezu?

13. Tisafunika kukumbukanji mu ndzidzi unatowezera ife Yezu, pontho tiri na mwai upi?

¹³ Ife nee tiri na luso ninga ya Yezu yakudziwa piri muntima mwa munthu peno mphambvu yakutonga. Mbwenye tinakwanisa kutowezera njira idatsidzikiza iye undimomwene mwacipapo. Mwacitsandzo, tingapangiza pakweca uthambi unapfundzisa mauphemberi thangwi ya Mulungu, cifuniro cace na Mafalace, tisaphedza anthu toera aone ceza ca undimomwene mwakukhonda tsalakana uthambi unamwaza Sathani. (Mateu 5:14; Apokalipse 12:9, 10) Tisaphedzambo anthu toera asudzuke ku ubitcu wa pipfundziso pyauthambi pinaacitisa kugopa mbacimwana kukhala axamwali a Mulungu. Tiri na mwai ukulu kakamwe wakuona kukwanirisika kwa mafala awa a Yezu: “Undimomwene unadzakusudzulani”!—Juwau 8:32.

Iye Aphedzera Ulungami Mwacipapo

14, 15. (a) Yezu aphedza tani anthu toera kudziwa “ulungami wa Mulungu”? (b) Ndi manyerezero api adacalira Yezu pidacedza iye na nkazi wa ku Samariya?

¹⁴ Profesiya ya m’Bhibhlya ikhadalonga kale kuti Mesiya mbadaphedza anthu a madzindza toera kudziwa “ulungami wa Mulungu.” (Mateu 12:18; Izaiya 42:1) Mwandimomwene, Yezu acita pyenepi pikhali iye pa dziko yapantsi. Iye apangiza cipapo mbatsalakana anthu onsene mwaulungami. ­Mwacitsandzo, iye nee atowezera misambo yakuipa na nkhaliro wakudzikuza ukhaoneka mu ndzidzi wace.

¹⁵ Pidacedza Yezu na nkazi wa ku Samariya pa ncera wa ku Sikari, anyakupfundzace adzumatirwa kakamwe. Thangwi yanji? Mu ndzidzi unoyu, Ayuda nee akhabverana na Asamariya; kukhonda bverana kweneko kwatoma kale kakamwe Yezu mbadzati kubwera pa dziko yapantsi. (Esdhra 4:4) Kusiyapo pyenepi, atsogoleri anango Aciyuda akhapwaza kakamwe akazi. Mukupita kwa ndzidzi iwo alemba mitemo yakuti ikhakhondesa amuna kucedza na akazi; iwo akhalonga kuti akazi nee athema kupfundziswa Mwambo wa Mulungu, akhalongambo kuti akazi a ku Samariya akhali akukhonda cena. Mbwenye Yezu nee atowezera manyerezero anewa, mwapakweca iye apfundzisa nkazi wa ku Samariya (wakuti akhali waulukwali), pontho ampanga kuti iye ndi Mesiya.—Juwau 4:5-27

16. Thangwi yanji Akristu asafunika kukhala acipapo toera akhonde kukhala na tsankhulo?

¹⁶ Mwakhala kale pakati pa anthu akuti ali na tsankhulo kakamwe? Panango iwo asasingirira anthu a madzindza peno madziko anango, asalonga pinthu pyakusowa cilemedzo kuna amuna peno akazi andzawo, peno asapwaza anthu anaoneka ninga akupwazika peno atcerengi. Anyakupfundza a Kristu asacalira makhaliro anewa, pontho asacita pyonsene pinakwanisa iwo toera abuluse mabvero onsene a tsankhulo muntima mwawo. (Mabasa 10:34) Tisafunika kukhala acipapo toera tikhale akusowa tsankhulo.

17. Yezu acitanji mu templo, pontho thangwi yanji acita pyenepi?

¹⁷ Cipapo caphedzambo Yezu toera acenese mbumba ya Mulungu na ulambiri wakucena. Pidatoma iye utumiki wace, Yezu aenda mu templo ya Yerusalemu, iye aipirwa kakamwe pidaona iye anthu mbakacita malonda na kucinjisa kobiri mwenemo. Iye aipirwa na pyenepi mbaathamangisa mu templo na malonda awo. (Juwau 2:13-17) Kunkhomo kwa utumiki wace, iye acita pinthu pibodzi pyene. (Marko 11:15-18) Anthu anango atoma kumuida kakamwe thangwi ya pyenepi, mbwenye iye nee agopa. Thangwi yanji? Thangwi kutomera mu uwana wace iye akhalonga kuti templo ndi nyumba ya Babace, pontho unoyu ukhali undimomwene. (Luka 2:49) Pikhapswipisa ulambiri wandimomwene mu templo pikhali kusowa ulungami kwakuti iye nee mbadatawirisa. Phinga yace yampasa cipapo toera kucita pinthu pyadidi.

18. Akristu anapangiza tani cipapo lero toera mpingo ukhale wakucena?

¹⁸ Ninga Yezu, anyakupfundza a Kristu lero asafunambo kuti makhaliro awo na ulambiri wawo kuna Mulungu ukhale wakucena. Angadzindikira kuti m’bale peno mulongo acita madawo makulu iwo nee asamatama. M’mbuto mwace, iwo asalonga na munthu unoyu mwacipapo. (1 Akorinto 1:11) Iwo asakhala na cinyindiro cakuti akulu a mpingo adziwiswa pidacitika. Akulu a mpingo anakwanisa kuphedza ale anaduwala mwauzimu, pontho anakwanisambo kuphedza mpingo toera upitirize kukhala wakucena.—Tiyago 5:14, 15..

19, 20. (a) Ndi pinthu pipi pyakusowa ulungami pikhacitika mu ntsiku za Yezu, pontho anthu azinji akhafuna kuti Yezu acitenji? (b) Thangwi yanji anyakupfundza a Kristu nee asacita khundu ya ndale za dziko na uphanga, pontho ndi nkhombo zipi inakhala na iwo thangwi yakukhala akukhulupirika?

¹⁹ Pyenepi pisabveka kuti Yezu akhafuna kumalisa kusowa ulungami? Nkhabe. Thangwi pinthu pyakusowa ulungami pikhacitika m’mbuto zonsene. Dziko idabalwa iye ikhatongwa na Aroma. Iwo akhaphatisira anyankhondo awo toera kuponderera Ayuda, akhaaphemba misonkho, pontho akhapingiza ulambiri wawo. Ndi thangwi yace Ayuda azinji akhafuna kuti Yezu acite khundu ya ndale toera akhale mambo wawo. (Juwau 6:14, 15) Paulendo unoyu, Yezu akhafunika kupangiza pontho cipapo.

²⁰ Yezu alonga kuti Umambo wace nkhabe kucita khundu ya dziko. Na citsandzo cace, iye apfundzisa atowereri ace toera akhonde kucita khundu ya dziko, mbwenye akhafunika kumwaza mphangwa zadidi za Umambo wa Mulungu. (Juwau 17:16; 18:36) Yezu apangiza citsandzo cikulu cakukhala wakukhulupirika pidabwera anthu toera kum’manga. Mwakucimbiza, mpostolo Pedhru abulusa supada mbaphekesa mamuna m’bodzi. Tisabvesesa thangwi yanji Pedhru acita pyenepi. Panango munanyerezera kuti iye akhafunikadi kucita pyenepi, nakuti kukhali masiku, pontho Mwana wa Mulungu wakusowa mulando akhafuna kumangwa. Mbwenye pa ntsiku ineyi, Yezu apangiza citsandzo cakuti cisaphata basa mpaka lero kuna atowereri ace: “Ikha supada yako pa mbuto payo, thangwi onsene anaphatisira supada anadzafa na supada.” (Mateu 26:51-54) Atowereri a Yezu akhafunika kupangiza cipapo toera kucita pinthu mwantendere mu ndzidzi unoyu, kuphatanizambo lero. Thangwi yakukhulupirika, atumiki a Mulungu nee asaphedzera nkhondo, kupha anthu, kusandukira utongi peno kucita uphanga. Pyenepi pisakwanisika basi ene thangwi ya cipapo.

Iye Apirira Kutcingwa Mwacipapo

21, 22. (a) Ndi ciphedzo cipi cidatambira Yezu mbadzati kuthimbana na mayesero akunentsa kakamwe? (b) Yezu apangiza tani cipapo mpaka kufa?

²¹ Mwana wa Yahova akhadziwa kale kuti mbadatcingwa kakamwe pa dziko yapantsi. (Izaiya 50:4-7) Anthu azinji akhafuna kupha Yezu, pontho iwo adzamuphadi ninga pidalonga ife pakutoma kwa nsolo uno. Yezu acitanji toera apitirize kukhala wacipapo mu ndzidzi unoyu wakugopswa? Yezu akhacitanji mwinji wa anthu mbudzati kufika toera kum’manga? Iye akhacita phembero yabulukira muntima kuna Yahova. Mphapo Yahova acitanji? Bhibhlya isalonga kuti Yahova abva “maphembero ace.” (Ahebheri 5:7) Yahova atuma anju buluka kudzulu toera awangise Mwanace wacipapo.—Luka 22:42, 43.

²² Pidamala iye kuwangiswa, Yezu apanga anyakupfundzace: “Lamukani, tendeni.” (Mateu 26:46) Mafala anewa asapangiza kuti Yezu akhali wacipapo kakamwe. Maseze iye alonga kuti “Lamukani, tendeni,” Yezu akhadziwa kuti mbadapanga mwinji toera ukhonde kutcinga anyakupfundzace akuti adzanthawa, Yezu mbasala ekha. Iye akhali ekhene pidatongwa iye mwakusowa ulungami, kupambizirwa, kupwazwa, kuthabuswa, ngakhale pidaphiwa iye munjira yakutsukwalisa kakamwe. Mwakukhonda tsalakana nyatwa zenezi, Yezu apitiriza kukhala wacipapo.

23. Fokotozani kuti thangwi yanji pidacita Yezu pikhali iye pangozwi yakuphiwa nee pisapangiza kuti iye akhali wakusowa ndzeru.

²³ Kodi Yezu akhacita pinthu mwakusowa ndzeru? Nkhabe, thangwi cipapo casiyana kakamwe na kusowa ndzeru. Mwandimomwene, Yezu apfundzisa anyakupfundzace toera acite mphole-mphole, peno akhale andzeru mbacalira pinthu pyakugopswa toera apitirize kutumikira Mulungu. (Mateu 4:12; 10:16) Mu ndzidzi unoyu Yezu akhadziwa kuti nee akhafunika kusiya kukhala wakukhulupirika, pontho akhadziwa pikhafuna Mulungu toera iye acite. Yezu akhali dzololo toera apitirize kukhala wakukhulupirika, natenepa iye akhafunika kupirira nyatwa.

24. Thangwi yanji tinakwanisa kukhala na cinyindiro cakuti tinakhala acipapo tingathimbana na mayesero?

²⁴ Kazinji kene anyakupfundza a Yezu asatowezera citsandzo ca Mbuyawo mwacipapo. Azinji apitiriza kukhala akukhulupirika mwakukhonda tsalakana kusingirirwa, kutcingwa, kumangwa, kuikhwa nkaidi, kumenywa ngakhale kuphiwa. Iwo asakwanisa tani kupangiza cipapo ceneci? Iwo nee asanyindira mphambvu zawo. Mulungu adaphedza Yezu, ndiye anaphedzambo anyakupfundzace. (Afilipi 4:13) Natenepa, lekani kugopa pinthu pyakuti panango pinakucitikirani ntsogolo. Khalani akutonga toera mupitirize kukhala akukhulupirika, pontho Yahova anakuphedzani toera mukhale acipapo. Pitirizani kutowezera citsandzo ca Ntsogoleri wathu Yezu wakuti alonga: “Khalani na cipapo! Ine ndakunda dziko.”—Juwau 16:33