Cidikhiro Candimomwene Kwa Anyakufunika Anu Adafa

1-3. Kodi ife tonsene tikutowererwa na nyamalwa upi, na thangwi yanji kudinga pinalonga Bhibhlya kunadzatisudzula?

NYEREZERANI kuti mukuthawa nyamalwa wansumankha. Iye ndi wamphambvu na wakucimbiza kakamwe kupiringana imwe. Imwe musadziwa kuti iye nkhabe ntsisi thangwi mwamuona mbakapha axamwali anu. Mwakukhonda tsalakana kuwangisira kwanu kunthawa, iye asafika dhuzi basi. Musaona ninga nkhabe cidikhiro. Mwakukhonda dikhira, asafika munthu toera kukupulumusani. Iye ndi wamphambvu kakamwe kupiringana nyamalwa wanu, pontho apikira kukuphedzani. Imwe musakhala wakusudzuka kakamwe.

² Munjira inango, imwe mukutowererwa na nyamalwa unoyu. Ife tonsene tikutowererwa. Ninga tapfundza mu nsolo udamala, Bhibhlya isacemera kufa ninga nyamalwa. Nee m’bodzi wa ife anakwanisa kuthawa peno kumenyana na iye. Azinji a ife aona nyamalwa unoyu mbapha anyakufunika athu. Mbwenye Yahova ndi wamphambvu kakamwe kupiringana kufa. Iye ndi Mpulumusi waufuni adapangiza kuti anakwanisa kukunda nyamalwa unoyu. Pontho iye asapikira kufudza nyamalwa unoyu, kufa, kwenda na kwenda. Bhibhlya isalonga: “Nyamalwa anadzamalisira kukundwa ndi kufa.” (1 Akorinto 15:26) Izi ndi mphangwa zadidi!

³ Tendeni tione mwacigwagwa kuti nyamalwa unoyu kufa asatikhuya tani angatifikira. Kucita pyenepi kunadzatiphedza kubvesesa cinthu cakuti cinadzatitsandzayisa. Yahova asapikira kuti anyakufa anadzakhala pontho maso. (Izaiya 26:19) Iwo anadzabwereswa pontho ku umaso. Ceneci ndi cidikhiro ca kulamuswa muli akufa.

ANGAFA NYAKUFUNIKA

4. (a) Thangwi yanji mabvero a Yezu thangwi ya kufa kwa nyakufunika asatipfundzisa pya mabvero a Yahova? (b) Ndi axamwali api akupambulika akhali na Yezu?

⁴ Kodi imwe mwaluza nyakufunika mu kufa? Kutsukwala na kusowa cakucita pisaoneka ninga pyakukhonda kupiririka. M’midzidzi ineyi, tisafunika kudinga Mafala a Mulungu toera tigumane cibalangazo. (Lerini 2 Akorinto 1:3, 4.) Bhibhlya isatiphedza kubvesesa kuti Yahova na Yezu asabva tani thangwi ya kufa. Yezu, wakuti akhali cipangizo caungwiro ca Babace, anentseka kakamwe thangwi yakuluza nyakufunika mu kufa. (Jwau 14:9) Mukhakhala iye mu Yerusalemu, Yezu akhaenda kaona Lazaro na anakazi ace, Mariya na Marta, akuti akhakhala mu nzinda wacifupi wa Betanya. Iwo adzakhala axamwali apantima. Bhibhlya isalonga: ‘Yezu akhafuna Marta na m’bale wace na Lazaro.’ (Jwau 11:5) Ninga tapfundza mu nsolo udamala, Lazaro afa.

5, 6. (a) Kodi Yezu apibva tani mudaona iye acibale na axamwali a Lazaro akutsukwala? (b) Thangwi yanji kutsukwala kwa Yezu kusatiwangisa?

⁵ Kodi Yezu apibva tani thangwi yakuluza xamwali wace? Mbiri isatipanga kuti Yezu aenda kagumanyikana na acibale na axamwali a Lazaro mukhatsukwala iwo thangwi ya kufa kwa Lazaro. Mudaaona iye, Yezu akhuyiwa kakamwe. Iye ‘adzuma mu ntima mwace, mbatsukwala kakamwe.’ Buluka penepo, mbiri isalonga kuti “Yezu alirambo.” (Jwau 11:33, 35) Kodi kutsukwala kwa Yezu kukhabveka kuti iye nee akhali na cidikhiro? Nkhabe. Mwandimomwene, Yezu akhadziwa kuti cinthu cakudzumatirisa mbicidacitika. (Jwau 11:3, 4) Mbwenye iye abva kupha na kutsukwala kunabwereswa na kufa.

⁶ Munjira inango, kutsukwala kwa Yezu kusatiwangisa. Kusatipfundzisa kuti Yezu na Babace, Yahova, asaida kufa. Mbwenye Yahova Mulungu ali na mphambvu yakumenyana na kukunda nyamalwa unoyu! Tendeni tione kuti Mulungu apasa Yezu mphambvu toera kucitanji.

“LAZARO, BULUKA!”

7, 8. M’maonero a anthu, thangwi yanji pidacitikira Lazaro pikhali ninga pyakusowa cidikhiro, mbwenye Yezu acitanji?

⁷ Lazaro akhadaikhwa m’mphako, Yezu aphemba kuti mwala ukhadafunga mphako ubuluswe. Marta akhonda thangwi pakhadapita ntsiku zinai, panango manungo a Lazaro akhadatoma kubvunda. (Jwau 11:39) M’maonero a anthu, nee pakhali na cidikhiro.

⁸ Mwala wabuluswa, Yezu akhuwa mwakugaluza: “Lazaro, buluka!” Ninji cidacitika? “Penepale nyakufa abuluka.” (Jwau 11:43, 44) Kodi munakwanisa kunyerezera kukomerwa kudakhala na anthu penepo? Khala Lazaro akhali m’bale wawo, wacibale, xamwali peno nyakuendekana wawo, iwo akhadziwa kuti iye akhadafa. Mbwenye iye akhali penepo, mamuna m’bodzi ene wakufunika, mbalimira pontho pakati pawo. Pyenepi pikhali pyadidi kakamwe kwakuti nee pikhaoneka ninga pyandimomwene. Mwakukhonda penula, azinji akhumbatira Lazaro mwakukomerwa. Kufa kwakundwa!

9, 10. (a) Yezu apangiza tani kudabuluka mphambvu yace toera kulamusa Lazaro muli akufa? (b) Kuleri mbiri za Bhibhlya za kulamuswa kwa anthu kusabweresa maphindu api?

⁹ Yezu nee alonga kuti acita cirengo ceneci cakudzumatirisa na mphambvu yace. Phembero idacita iye mbadzati cemera Lazaro, yapangiza pakweca kuti amulamusa na Mphambvu ya Yahova. (Lerini Jwau 11:41, 42.) Nee ukhali ulendo unoyu basi udaphatisira Yahova mphambvu yace munjira ineyi. Kulamuswa kwa Lazaro ndi cibodzi mwa pirengo pipfemba pya ntundu uyu pidalembwa m’Mafala a Mulungu.a Kuleri na kupfundza mbiri zenezi ndi kwakutsandzayisa. Izo zisatipfundzisa kuti Mulungu nkhabe tsankhulo, thangwi anyakulamuswa muli akufa asaphataniza ana na akulu, amuna na akazi, Aisraele na akukhonda khala Aisraele. Mbiri zenezi zisafokotoza kutsandzaya kukulu kudakhala na anthu! Mwacitsandzo, mudalamusa Yezu ntsikana muli akufa, anyakubalace ‘adzumatirwa kakamwe.’ (Marko 5:42) Inde, Yahova akhadaapasa thangwi yakukomerwa yakuti cipo mbadaiduwala.

¹⁰ Mwandimomwene, ale adalamuswa na Yezu muli akufa adzafa pontho. Kodi pyenepi pisabveka kuti kualamusa muli akufa kukhali kwakusowa basa? Nkhabe. Mbiri zenezi za Bhibhlya zisapangiza undimomwene wakufunika na zisatipasa cidikhiro.

MBIRI ZA KULAMUSWA MULI AKUFA ZISATIPFUNDZISANJI?

11. Mbiri yakulamuswa kwa Lazaro muli akufa, isatiphedza tani kutawira undimomwene udalembwa pa Koelete 9:5?

¹¹ Bhibhlya isapfundzisa kuti anyakufa ‘nkhabe cibodzi cinadziwa iwo.’ (Koelete 9:5) Iwo nee ali maso, nkhabe dziwa cinthu, pontho nee ali ku mbuto inango. Mbiri ya Lazaro isatawira undimomwene unoyu. Pakumala kulamuswa, kodi Lazaro afokotozera anthu pinthu pyakudzumisa pyakudzulu? Kodi alonga pithankano pyakugopswa pya djenje ya moto? Nkhabe. Bhibhlya nkhabe longa kuti Lazaro alonga mafala anewa. Nkati mwa ntsiku zinai zikhali iye wakufa, ‘nkhabe cibodzi’ cikhadziwa iye. Lazaro akhagona basi mu kufa.​—Jwau 11:11.

12. Thangwi yanji tiri na cinyindiro cakuti kulamuswa kwa Lazaro muli akufa kwacitikadi?

¹² Mbiri ya Lazaro isatipfundzisambo kuti kulamuswa muli akufa ndi cinthu candimomwene, tayu cithankano. Yezu alamusa Lazaro pamaso pa mwinji. Ngakhale atsogoleri auphemberi, akuti akhaida Yezu, hadakhonda cirengo ceneci tayu. M’mbuto mwace, iwo alonga: ‘Ticitenji, thangwi munthu uyu Yezu ali kucita pirengo pizinji?’ (Jwau 11:47) Anthu azinji aenda kaona mamuna adalamuswa muli akufa. Thangwi ya pyenepi, azinji a iwo akhulupira Yezu. Iwo aona Lazaro ninga cipangizo camaso cakuti Yezu atumwa na Mulungu. Cipangizo ceneci cikhali camphambvu kakamwe mpaka atsogoleri anango auphemberi Aciyuda akuuma ntima, anyerezera kupha Yezu pabodzi na Lazaro.​—Jwau 11:53; 12:9-11.

13. Tinaphata yanji toera tikhulupire kuti Yahova anakwanisadi kulamusa anyakufa?

¹³ Kodi nkhwapezi kutawira kulamuswa muli akufa ninga kwandimomwene? Nkhabe, thangwi ntsiku inango Yezu apfundzisa kuti “onsene anagona mu nthumbi” anadzalamuswa muli akufa. (Jwau 5:28) Yahova ndi Nciti wa umaso onsene. Kodi kunakhala kwakunentsa kukhulupira kuti iye anakwanisa kucita papswa umaso? Mwandimomwene, pizinji mbapidanyindira manyerezero a Yahova. Kodi iye anakwanisa kukumbuka anyakufunika athu adafa? Nyenyezi zakukhonda lengeseka zisadzadza thambo, mbwenye Mulungu asadziwa dzina ya ibodzi na ibodzi! (Izaiya 40:26) Natenepa Yahova Mulungu anakwanisa kukumbuka pyonsene pidacita anyakufunika athu adafa na kuabweresa pontho ku umaso.

14, 15. Ninga mudalonga Yobe, kodi Yahova asapibva tani thangwi yakulamusa anyakufa?

¹⁴ Mphapo, Yahova asapibva tani thangwi yakulamusa anyakufa? Bhibhlya isalonga kuti iye asafuna kakamwe kulamusa anyakufa. Mamuna wakukhulupirika Yobe abvundza: ‘Munthu angafa, anakwanisa kukhala pontho maso?’ Yobe akhalonga pya kudikhira mu nthumbi mpaka kufika ndzidzi wakuti Mulungu ankumbuke. Iye alonga kwa Yahova: ‘Munadzakumbuka mabasa adacita imwe, imwembo mbumundicemera pontho inembo mbandikutawirani.’​—Yobe 14:13-15.

¹⁵ Nyerezerani basi! Yahova asafuna kulamusa anyakufa. Kodi nee mphyakutsandzayisa kudziwa kuti Yahova asapibva tenepa? Mbwenye ndiye tani pya kulamuswa muli akufa ntsogolo? Mbani anadzalamuswa, toera kukhala kupi?

“ONSENE ANAGONA MU NTHUMBI”

16. Kodi anyakufa anadzalamuswa toera kukhala m’makhaliro api?

¹⁶ Mbiri za Bhibhlya za anthu adalamuswa muli akufa zisatipfundzisa pizinji pya kulamuswa muli akufa kunafuna kudza. Anthu ale adalamuswa muli akufa pano pa dziko yapantsi akhala pontho pabodzi na anyakufunika awo. Kulamuswa muli akufa ntsogolo kunadzakhala sawasawa​—mbwenye kwadidi kakamwe. Ninga tapfundza mu Nsolo 3, cifuniro ca Mulungu ndi cakuti dziko yonsene yapantsi idzakhale paradizu. Natenepa anyakufa nkhabe kudzalamuswa mu dziko yakudzala na nkhondo, upandu na utenda. Iwo anadzakhala na mwai wakukhala maso kwenda na kwenda pa dziko ino yapantsi m’makhaliro antendere na akutsandzaya.

17. Mbani anadzalamuswa muli akufa?

¹⁷ Mbani anadzalamuswa? Yezu alonga kuti ‘onsene anagona mu nthumbi anadzabva mafalace. Penepo iwo anadzalamukambo.’ (Jwau 5:28, 29) Munjira ibodzi ene, Apokalipse 20:13 isalonga: ‘Bara yabweza anyakufa akhadakhalamo. Mbuto ya akufa a masiye yabwezambo anyakufa akhali na iyo.’ “Mbuto ya akufa a masiye” isabveka nthumbi ya anthu onsene. (Onani N’thimiziro, “Kodi Sheole Na Hade Ndi Ninji?”) Nthumbi ineyi inadzakhala yapezi. Anthu azinji anagona mwenemo anadzakhala pontho maso. Mpostolo Paulu alonga: “Kunadzaoneka kulamuka muli akufa kwa anthu adidi na kwa akuipambo [akukhonda kulungama].” (Machitiro 24:15) Kodi pyenepi pisabvekanji?

18. Mbani anaphatanizwa mwa “anthu adidi” anafuna kudzalamuswa muli akufa, na cidikhiro ceneci cisakukhuyani tani?

¹⁸ “Anthu adidi” asaphataniza anthu azinji anapfundza ife m’Bhibhlya, ale adakhala maso Yezu mbadzati kubwera pa dziko yapantsi. Munakwanisa kunyerezera Nowa, Abrahamu, Sara, Mose, Rute, Estere na anango azinji. Angasi a amuna na akazi anewa akukhulupirika asalongwa mu kapitulu 11 ya Ahebhere. Mbwenye “anthu adidi” asaphatanizambo atumiki a Yahova anafa mu ndzidzi wathu. Thangwi ya cidikhiro ca kulamuswa muli akufa, nee tisafunika gopa kufa.​—Ahebere 2:15.

19. Mbani anthu ‘akukhonda kulungama’, na Yahova anadzaapasa mwai upi?

¹⁹ Ndiye tani pya anthu onsene akuti nee atumikira peno kubvera Yahova thangwi cipo iwo adziwa pya iye? Anthu azinji anewa ‘akukhonda kulungama’ nkhabe kudzaduwaliwa. Iwombo anadzalamuswa mbapaswa ndzidzi wakupfundza pya Mulungu wandimomwene na kuntumikira. Nkati mwa pyaka cikwi, anyakufa anadzalamuswa mbapaswa mwai wakutumikira Yahova pabodzi na atumiki akukhulupirika pa dziko yapantsi. Unadzakhala ndzidzi wakutsandzayisa kakamwe. Ndzidzi unoyu ndi ule unacemera Bhibhlya ninga Ntsiku Yakutonga Miseru.b

20. Kodi Djehena ndi ninji, na mbani anaenda mwenemo?

²⁰ Kodi ipi pisabveka kuti anthu onsene adakhala maso anadzalamuswa muli akufa? Nkhabe. Bhibhlya isalonga kuti anyakufa anango ali mu “Djehena.” (Luka 12:5, MZ) Djehena ndi dzina ya djenje ikhagumanika kunja kwa Yerusalemu wakale. Mitembo na pirombo pikhapiswa mwenemo. Anyakufa akuti mitembo yawo ikhaponywa mwenemo akhaoniwa na Ayuda ninga akukhonda thema kufikirwa na kulamuswa muli akufa. Natenepa Djehena ndi cipangizo cakuthema ca kufudzwa kwa kwenda na kwenda. Maseze Yezu anadzakhala na basa mu kutonga amaso na akufa, Yahova ndi Ntongi wakumalisira. (Machitiro 10:42) Iye cipo anadzalamusa ale anatonga iye kukhala akuipa na akukhonda funa kucinja.

KULAMUKA MULI AKUFA TOERA KUENDA KUDZULU

21, 22. (a) Ndi ntundu upi unango wa kulamuswa muli akufa? (b) Mbani adatoma kulamuswa toera kukhala na umaso wauzimu?

²¹ Bhibhlya isalongambo pya kulamuka kunango, toera kakhala maso kudzulu ninga cakucitwa cauzimu. Citsandzo cibodzi ca ntundu unoyu wa kulamuka muli akufa cidalembwa m’Bhibhlya ndi ca Yezu Kristu.

²² Mudaphiwa Yezu ninga munthu, Yahova nee atawirisa Mwanace wakukhulupirika kukhaliratu mu nthumbi. (Masalmo 16:10; Machitiro 13:34, 35) Mulungu alamusa Yezu, mbwenye tayu ninga munthu. Mpostolo Pedhro asafokotoza kuti Kristu “aphiwa na manungo aunyama, mbwenye alamuswa na manungo auzimu.” (1 Pedro 3:18) Mwandimomwene, ceneci cikhali cirengo cikulu. Yezu akhala pontho maso ninga munthu wauzimu wamphambvu! (Lerini 1 Akorinto 15:3-6.) Yezu akhali wakutoma kulamuswa munjira ineyi yakulemedzeka. Mbwenye nee akhali wakumalisa.​—Jwau 3:13

23, 24. Mbani anacita khundu ya “nkumbi ung’onong’ono” wa Yezu, na iwo ndi angasi?

²³ Na kudziwa kuti mwakukhonda dembuka iye mbadabwerera kudzulu, Yezu apanga atowereri ace akukhulupirika kuti iye mbadaenda ‘kaasasanyira mbuto’ kweneku. (Jwau 14:2) Yezu alonga pya ale adathema kuenda kudzulu ninga “nkumbi ung’onong’ono.” (Luka 12:32) Kodi mbangasi anafuna kucita nkhundu ya nsoka uyu ung’ono wa Akristu akukhulupirika? Mwakubverana na Apokalipse 14:1, mpostolo Jwau asalonga: ‘Ndaona Mwanabira, Yezu Kristu, wakulimira padzulu pa Phiri ya Sioni. Pabodzi na iye akhali anthu 144.000, akukhala na dzina yace na dzinambo ya Babace, idalembwa pa nkhope pawo.’

²⁴ Akristu anewa 144.000, kuphataniza apostolo akukhulupirika a Yezu, asalamuswa toera kakhala maso kudzulu. Kodi kulamuswa kwawo kusacitika ndzidzi upi? Mpostolo Paulu alemba kuti mbakudacitika mu ndzidzi wakukhalapo kwa Kristu. (1 Akorinto 15:23) Ninga munadzapfundza mu Nsolo 9, cincino tisakhala mu ndzidzi unoyu. Natenepa akucepa adasala a 144.000 anafa mu ntsiku zathu zino asalamuswa mu ndzidzi ubodzi ene ku umaso wakudzulu. (1 Akorinto 15:51-55) Mbwenye, mwinji ukulu wa anthu, usadikhira kulamuswa toera kukhala na umaso mu Paradizu pa dziko yapantsi.

25. Tinadzapfundzanji mu nsolo unatowera?

²⁵ Inde, Yahova anadzakundadi nyamalwa wathu kufa, na anadzafudzwa kwenda na kwenda! (Lerini Izaiya 25:8.) Panango munabvundzika: ‘Kodi anewa anafuna kudzalamuswa toera kuenda kudzulu anadzacitanji kweneku?’ Iwo anadzacita khundu ya utongi wa Umambo wakudzumatirisa wa kudzulu. Tinadzapfundza pizinji pya utongi unoyu mu nsolo unatowera.