Mibvundzo Inacitwa na Anyakuleri

Mbani akhali apolixa a mu templo Yaciyuda? Pontho ndi mabasa api akhacita iwo?

Alevi anango akuti nee akhatumikira ninga anyantsembe akhaphata basa ninga apolixa. Iwo akhatsogolerwa na muyang’aniri wa templo. Nyakulemba unango Waciyuda anacemerwa Philo alonga mabasa anango akhacita apolixa anewa kuti: “Anango mwa Alevi anewa akhaonera pa misuwo ya templo. Anango akhaonera kutsogolo kwa mbuto yakucena ya templo, pontho akhacita pyonsene pinakwanisa iwo toera munthu akhonde kupita ku mbuto ineyi yakucena. Anango akhaonera kunja kwa templo yonsene. Iwo akhaphata basa masiku namasikati mbacinjana na anango.”

Anyakutonga miseru akhaphemba apolixa anewa toera aaonere. Ndi amuna anewa basi ene akhadatawiriswa na utongi Waciroma toera kuphata basa na pida pya nkhondo.

Nyakudziwisa pya Bhibhlya anacemerwa Joachim Jeremias alonga kuti “mu ndzidzi udamangwa Yezu, iye aabvundza kuti thangwi yanji mwakhonda kundimanga mu ndzidzi ukhapfundzisa ine mu templo. Yezu nee mbadabvundza amuna anewa khala iwo nee akhaphata basa ninga apolixa a mu templo.” (Mat. 26:55) Nyakudziwisa pya Bhibhlya m’bodzi ene alongambo kuti ale akhadatumwa pakutoma toera kuenda kamanga Yezu akhali apolixa abodzi ene a mu templo. (Juwau 7:32, 45, 46) Mukupita kwa ndzidzi, Anyakutonga miseru atuma ayang’aniri na apolixa anango toera aende kamanga apostolo. Panango akhali apolixa abodzi ene adaphata mpostolo Paulu mbam’bulusa mu templo.​—Mabasa 4:1-3; 5:17-27; 21:27-30.