“Tumikirani Yahova Ninga Bitcu”

1. Siyanisani maonero akudziwika a ubitcu na maonero akuwangisa anagumanika pa Aroma 12:11, NM.

UBITCU Wacikristu ndi wakusiyana kakamwe na pinanyerezera anthu azinji thangwi ya ubitcu. M’manyerezero awo, kukhala bitcu kusabveka kupondererwa, kubvuyiwa, na kutsalakanwa mwakuipa. Mbwenye Mafala akupumirwa a Mulungu asalonga pya ubitcu wakuti usaphataniza kucita basa mwakufunisisa kuna Mbuya waufuni. Mwandimomwene, mudacenjeza mpostolo Paulu Akristu a pyaka dzana yakutoma toera ‘kutumikira Yahova ninga bitcu,’ iye akhalonga toera kucita basa yakucena yakukulumizwa na kufuna Mulungu. (Arom. 12:11, NM) Ubitcu unoyu usaphatanizanji? Tinacalira tani kukhala bitcu wa Sathani na wa dziko yace? Pontho, ndi nkhombo zipi zinaoneka m’basa yakukhulupirika ninga bitcu wa Yahova?

‘NDISAFUNA KAKAMWE MBUYANGA’

2. (a) Ninji mbicidakulumiza bitcu Waciisraele toera kuluza mwai wace wakusudzulwa? (b) Kodi pikhabvekanji kuphola khutu ya bitcu wakufunisisa?

² Kubulukira ku Mwambo udapasa Yahova Aisraele, tisapfundza ntundu wa ubitcu unaphemba Yahova kwa ife. Bitcu Wacihebere akhafunika kukhala na ufulu mu caka cacinomwe ca ubitcu wace. (Eks. 21:2) Mbwenye, Yahova acita masasanyiro adidi kwa bitcu wakuti akhafuna kakamwe mbuyace na kupitiriza m’basa yace. Mbuyace akhaenda na bitcu unoyu pansuwo peno nkhundu-nkhundu mbaphola khutu yace na ntsingano. (Eks. 21:5, 6) Pyenepi pikhabveka kuti ncitiro unoyu ukhaphataniza khutu. Mu cilongero ca Cihebere, kubvera kusapangizwa na mafala, kubva na kubvesera. Bitcu wakufunisisa akhafuna kupitiriza kubvera mbacita basa ya mbuyace. Pyenepi pisatiphedza kuona kuti ninji pinaphatanizwa mu kuperekeka kwathu kwa Yahova​—kubvera mwakubulukira mu ntima kunakulumizwa na kufuna kwathu Yahova.

3. Ndi ipi phata yakuperekeka kwathu kwa Mulungu?

³ Tingaperekeka toera kubatizwa, tatonga kale toera kutumikira Yahova ninga bitcu wace. Kuperekeka kwathu kusatoma na cifuno cathu toera kubvera Yahova na kucita cifuno cace. Nee munthu m’bodzi atikakamiza kucita pyenepi. Mwandimomwene, ngakhale aphale na atsikana anabatizwa asacita pyenepi angamala kucita cisankhulo cawo ca kuperekeka kwa Yahova, tayu basi ene toera kukomeresa anyakubalawo. Phata yakuperekeka kwa Nkristu ndi kufuna Mbuya wathu wakudzulu, Yahova. Mpostolo Jwau alemba: “Kufuna Mulungu ndi kutawira matongero ache.”​—1 Jwau 5:3.

KHALANI A UFULU, MBWENYE NINGA MABITCU

4. Ninji pinafunika toera kukhala ‘mabitcu akutawira pyakulungama’?

⁴ Tisapereka takhuta kakamwe kuna Yahova thangwi yakuticita toera kukhala mabitcu ace! Kukhulupira kwathu ciomboli ca ntsembe ya Kristu kusaticitisa kubuluka ku goli ya madawo. Ngakhale kuti ndife akusowa ungwiro, tisafuna kakamwe kutongwa na Yahova, pabodzi na Yezu. Paulu afokotoza mwadidi pyenepi mu tsamba yace yakupumirwa: “Imwembo munyerezere kuti kuli madawo ndimwe akufa, mbwenye muli maso kuli Mulungu mwa Kristu Iye Mbuyathu.” Buluka penepo, iye acenjeza: ‘Munadziwa kale kuti mungasankhula munthu m’bodzi kuti munakhala anzakazi ace mbamuntawira, munacitika anzakazi ace kakamwe. Munansankhuliranji mphapo? Ndimwe mabitcu a madawo toera kufa nawo, peno ndimwe anzakazi a udidi toera kulungama m’mitima mwanu? Tinapereka takhuta kuna Mulungu thangwi kale mukhakhala anzakazi akhatawira pya madawo, cincino munabvera m’mitima mwanu matongero adapfundziswa imwe. Mwaleka madawo mbamucitika mabitcu akutawira pyakulungama.’ (Arom. 6:11, 16-18) Onani kuti mpostolo Paulu alonga ‘kubvera kwakubulukira mu ntima.’ Mwandimomwene, kuperekeka kwathu kwa Yahova kusaticitisa kukhala ‘anzakazi peno mabitcu akutawira pyakulungama.’

5. Ndi nkhondo ipi inathimbana na ife m’manungo mwathu, na thangwi yanji?

⁵ Ngakhale tenepa, pana mipingizo toera kuikunda kuti tikhale mwakubverana na kuperekeka kwathu. Tisathimbana na pinthu piwiri. Cakutoma, mipingizo idathimbana na Paulu. ‘Mu ntima mwanga ndinakomerwa na mwambo wa Mulungu, mbwenye ndinaonambo m’maphindi a manungo anga mwambo unango unapokanya mwambo ule wa mu ntima mwanga, mbundisanduza kudza nzakazi wakutawira mwambo wa madawo uli m’maphindi a manungo anga.’ (Arom. 7:22, 23) Kusowa ungwiro kwakubalwa nako kusapitirizambo kwa ife. Natenepa, tisathimbana na pifuno pya manungo athu. Mpostolo Pedhru aticenjeza: “Mukhale anthu a ufulu, si ninga ale tayu anabisa na ufulu wawo pinthu pyakuipa pyawo, mbwenye khalani anthu a ufulu ninga [anzakazi] a Mulungu.”​—1 Ped. 2:16.

6, 7. Kodi Sathani asacitisa tani dziko ino kukhala yakutundusa?

⁶ Tiri na nkhondo yaciwiri yakuthimbana na dziko ino inatongwa na demonyo. Sathani, ntongi wa dziko ino asatiteyera misampha toera kufudza kukhulupirika kwathu kuna Yahova na Yezu. Iye asafuna kuti tikhale mabitcu ace mu kutiyesera toera kutawira manyengerero ace akuipa. (Lerini Aefesi 6:11, 12.) Njira ibodzi inaphatisira Sathani toera kucita pyenepi ndi kucitisa dziko yace kukhala yakutundusa. Mpostolo Jwau acenjeza: ‘Munthu anafuna pinthu pya pantsi pano kufuna kwa Baba kunakhala tayu mwa iye, thangwi pyonsene pinakhala pantsi pano, kusirira kwa manungo, kusirira kwa maso athu, kugaya kwa moyo. Ipi pyonsene hapidabuluka kwa Baba tayu, mbwenye kwa anthu a pantsi pano.’​—1 Jwau 2:15, 16.

⁷ Cifuno cakukhala na pinthu pizinji pyakumanungo cadzala mu dziko ino. Sathani asakulumiza anthu kutawira kuti kobiri isabweresa kutsandzaya. Maloja makulu ndi akunjipa. Nyakumwaza mphangwa za malonda asakulumiza umaso wakukhala na pinthu pizinji na ndzidzi wakupuma. Misoka inatsalakana pya kucita ulendo isapasa miyai anthu toera kuenda kaona mbuto zakudzumatirisa, kazinji kene asaperekerwa na anthu akuti asadziwa mwadidi mbuto zenezi. Inde, pinthu pyonsene pinatizungulira pinatibweresera udidi, mbwenye kazinji kene pisabverana na midida ya dziko.

8, 9. Kodi ndi ngozwi ipi yandimomwene iripo, na thangwi yanji?

⁸ Pedhro acenjeza anthu a mpingo Wacikristu wa pyaka dzana yakutoma akuti akakhala na maonero a dziko: ‘Ndiwo anthu akupswipa na a midonthi, anasekera pa kukunyengererani na pa kudya maphwando awo pabodzi na imwe. Iwo analonga na kugaya mafala akusowa ndzeru, mbanyengerera nawo anthu adapulumuka cincino mwa andzawo akudodomeka, toera kucita na manungo awo pyakuzuda na pyakunyanyasa. Mbwenye pa kukhala iwo mabitcu akutayika, anthu ale anapikirira ufulu andzawo; thangwi munthu ndi bitcu wa uyu, adankunda.’​—2 Ped. 2:13, 18, 19.

⁹ Kukwanirisa “kusirira kwa maso” nkhabe kucitisa munthu kukhala na ufulu. Mbuto mwace, iye asakhala bitcu wa mbuya wakukhonda kuoneka wa dziko ino, Sathani Dyabo. (1 Jwau 5:19) Pana ngozwi yandimomwene yakukhala bitcu wakufuna kakamwe mpfuma, ubitcu wakuti ndi wakunentsa kuuthawa.

BASA YAKULIPWA KOBIRI IZINJI

10, 11. Makamaka, mbani lero anayeserwa na Sathani, na mapfundziro a dziko anabweresa tani cinentso kwa iwo?

¹⁰ Ninga pidacita iye m’munda mwa Edeni, lero Sathani asayesera anyakusowa udziwisi wakukwana. Kazinji kene Sathani asayesera aphale na atsikana. Iye nee asatsandzaya angaona aphale na atsikana, peno anthu onsene anaperekeka toera kukhala mabitcu a Yahova. Nyamalwa wa Mulungu asafuna kuti ale onsene anapereka umaso wawo kwa Yahova acimwane kukwanirisa kuperekeka kwawo na kukhulupirika kwawo.

¹¹ Tidingeni pontho citsandzo ca bitcu adatawira kupholwa khutu yace. Bitcu unoyu anabva kupha mu ndzidzi wakucepa; mbwenye, mwakucimbiza kunamala, mbakhala na cidzindikiro ca kwenda na kwenda ca ubitcu wace. Kusankhula njira yakuti ndi yakusiyana na ya axamwali athu kunakhala kwakunentsa, pontho pisadzidzida aphale na atsikana. Sathani asamwaza manyerezero akuti basa yakulipwa kobiri izinji mu dziko ino inadzatsandzayisa munthu, mbwenye Akristu asafunika kukwanirisa pyakufuna pyawo pyauzimu. Yezu apfundzisa kuti, “Anyakutsandzaya ndi ale anadziwa pyakufuna pyawo pyauzimu.” (Mat. 5:3, NM) Akristu akuperekeka asacita cifuno ca Mulungu tayu ca Sathani. Iwo asakomerwa na mwambo wa Yahova mbaudinga mwacidikhodikho masikati na masiku. (Lerini Masalmo 1:1-3.) Mbwenye, makursu mazinji a xikola lero asapereka ndzidzi wakucepa kwa ntumiki wa Yahova toera kunyerezera mwacidikhodikho na kukwanirisa pifuno pyace pyauzimu.

12. Ndi cisankhulo cipi cinathimbana na aphale na atsikana azinji lero?

¹² Mbuya wa dziko ino asacitisa umaso wa ubitcu Wacikristu kukhala wakunentsa. Mu tsamba yace yakutoma kwa Akorinto, Paulu abvundza: ‘Wacemerwa mbukhala nzakazi?’ Buluka penepo, iye aapasa uphungu: ‘Leka kuipirwa na ipi tayu. Ungakwanisa kubuluka mu unzakazi wako, longa: ndinafuna.’ (1 Akor. 7:21) Kukhala waufulu ninga bitcu kukhali kwakufunika. Lero, m’madziko mazinji, kupfundza xikola ndi nkakamizo mpaka kufika pa thunga yakuthema. Buluka penepo, anyakupfundza asapaswa mwai toera kusankhula. Kupitiriza na kupfundza toera kukhala na basa yakulipwa kobiri izinji mu dziko ino mbukudacimwanisa munthu kukhala na ufulu toera kucita basa ya ndzidzi onsene.​—Lerini 1 Akorinto 7:23.

MAPFUNDZIRO A MABUKHU MAKULU

13. Ndi ntundu wanji wa mapfundziro wakuti unadzaphindulisa kakamwe atumiki a Yahova?

¹³ Paulu acenjeza Akristu a ku Kolose: ‘Cenjerani gopa munadzanyengererwa na anthu a ndzeru zapezi na zakunama, zinabuluka pa mwambo wa anthu na pa mitemo ya pantsi pano, mbwenye zakukhonda kubuluka pa ndzeru za Kristu.’ (Akol. 2:8) ‘Ndzeru zapezi na zakunama, zinabuluka pa mwambo wa anthu’ zisamwazika lero m’manyerezero a dziko kubulukira kwa anyakudziwisa azinji. Mapfundziro a mabukhu makulu, na kugomezerwa kwa mapfundziro ace, kazinji kene asacitisa anyakumalisa kupfundza akuti ali na maluso akucepa peno akusowa maluso, mbakhala akukhonda khunganyika toera kuthimbana na undimomwene wa umaso. Mwakusiyana, atumiki a Yahova asasankhula cipfundziso cakuti cisaaphedza kukhala na maluso akufunika toera kukhala na umaso wakukhonda kufuna pinthu pizinji mu kutumikira Mulungu. Iwo asaphatisira na ntima onsene uphungu udapereka Paulu kuna Timoti: “Kulemedza Mulungu ndi chinthu chakupasa upfumi ale anakwana na pinthu pyawo. Ngakhala tiri na chakudya na chakubvala, tikwane napyo.” (1 Tim. 6:6, 8) Mbuto mwa kusaka mapfundziro apadzulu na kukhala na pidzo, Akristu andimomwene asaikha manyerezero toera kukhala na ‘matsamba anaacitisa kusimbwa’ mu kucita khundu mwakukwana m’basa ya m’munda.​—Lerini 2 Akorinto 3:1-3.

14. Mwakubverana na Afilipi 3:8, kodi Paulu aona tani mwai wace wakukhala bitcu wa Mulungu na wa Kristu?

¹⁴ Dingani pya mpostolo Paulu. Iye apfundziswa m’Mwambo Waciyuda na Gamalyele. Cipfundziso cidatambira Paulu cisalandana lero na ca maxikola a universidade. Kodi Paulu aona tani cipfundziso ceneci mu kulandanisa na mwai wace wakukhala bitcu wa Mulungu na wa Kristu? Iye alemba: “Ndinanyerezera kuti pinango pyonsene mphyapezi ndingapisangizira na mfuma ikulu kakamwe ya kudziwa Kristu, Mbuya wanga. Thangwi ya Kristu ine ndasiya pyonsene ninga matosi towera ndiphate Kristu.” (Afil. 3:8) Kudinga kweneku kusaphedza aphale na atsikana Acikristu na anyakubalawo akugopa Mulungu toera kucita cisankhulo candzeru thangwi ya mapfundziro a dziko. (Onani pithundzithundzi.)

PHINDULANI KUBULUKIRA KU CIPFUNDZISO CA MULUNGU

15, 16. Ndi cipfundziso cipi cinaperekwa na gulu ya Yahova, na cifuniro cipi?

¹⁵ Ndi makhaliro api anagumanika m’maxikola mazinji a universidade a dziko ino? Kodi nee ndi pyakudzolowereka kwa anyakupfundza kucita pyaulukwali na kumwa pyakumwa pyakuledzeresa? Pontho pipfundziso pya maxikola anewa nkhabe kumwaza mbiri ya kusanduka kwa pinthu? (Aef. 2:2) Mwakusiyana, gulu ya Yahova isapereka cipfundziso capadzulu kakamwe m’makhaliro a ntendere m’mpingo Wacikristu. Tonsene tiri na mwai toera kuphindula na Xikola Ya Utumiki Wa Mulungu masumana onsene. Mbwenye pana maxikola akupambulika kwa abale akuti ndi apainiya akukhonda manga banja (Xikola Ya Bhibhlya Kwa Abale Akukhonda Kumanga Banja) na kwa anyakumanga banja (Xikola ya Bhibhlya kwa Akristu Akumanga Banja). Maxikola anewa asatiphedza toera kubvera Yahova, Mbuyathu wakudzulu.

¹⁶ Tinakwanisa kukumba toera kugumana mpfuma zauzimu mu Índice das Publicações da Torre de Vigia peno m’Biblioteca da Torre de Vigia em CD-ROM. Kulambira Yahova ndi cifuniro ca cipfundziso ceneci. Isatipfundzisa kuti tinaphedza tani anango kukhala xamwali wa Mulungu. (2 Akor. 5:20) Pyenepi pinadzaaphedzambo toera kupfundzisa anango.​—2 Tim. 2:2.

SAGWATI WA BITCU

17. Kodi kusankhula cipfundziso ca Mulungu kusabweresa nkhombo zanji?

¹⁷ Mu nsangani wa Yezu wa ndalama, mabitcu awiri akunyindirika, pontho aphinga asimbwa mbakomerwa pabodzi na mbuya wawo mu kupaswa mabasa akunjipa. (Lerini Mateo 25:21, 23.) Kusankhula cipfundziso ca Mulungu lero kusabweresa kutsandzaya na nkhombo. Onani citsandzo ca Michael. Iye akhapembera kuxikola, apfundzisi ace ancemera toera kugumanika pa nsonkhano toera kulonga pya cidikhiro cace cakuenda ku universidade. Mwakukhonda dikhira kwa apfundzisi, Michael asankhula kucita kursu ya ndzidzi wakucepa yakuti kupita kwa ndzidzi yamphedza ninga mpainiya wa ndzidzi onsene. Kodi iye apibva kuti aluza pinthu? Iye alonga: “Cipfundziso ca Mulungu cidatambira ine ninga mpainiya, pontho cincino ninga nkulu wa mpingo cisapitiriza kukhala cakufunika kakamwe. Nkhombo na miyai inakhala na ine isapiringana kobiri yonsene yakuti mbindidakhala nayo. Ndiri wakutsandzaya kuti nee ndasankhula kuenda ku universidade.”

18. Ninji cinakukulumizani toera kusankhula cipfundziso ca Mulungu?

¹⁸ Cipfundziso ca Mulungu cisatipfundzisa cifuno ca Mulungu na cisatiphedza kutumikira Yahova ninga bitcu. Cisaikha patsogolo pathu cidikhiro ‘cakuomboliwa mu ubichu wakuipa’ na mu kupita kwa ndzidzi kukhala na “ufulu wa mbiri wa ana a Mulungu.” (Arom. 8:21) Kusiyapo pyonsene, tisapfundza toera kupangiza mwadidi kuti tisafunadi Mbuyathu wakudzulu, Yahova.​—Eks. 21:5.