Tumikirani Yahova Mwakukhonda Dzudzumiswa

‘Mariya . . . apitiriza kubvesera mafala a Yezu. Marta, . . . akhadadzudzumika na mabasa mazinji.’​—LUKA 10:39, 40.

NYIMBO: 40, 55

MUNATAWIRA TANI?

Kodi Marta na Mariya akhazikisa tani citsandzo cadidi kwa ife?

Pisabvekanji kukhonda phatisira kakamwe dziko?

Kodi azinji asatowezera tani citsandzo ca Yezu na ca Paulu mu kutumikira Mulungu mwakukhonda dzudzumiswa?

1, 2. Thangwi yanji Yezu akhafuna Marta, mbwenye ninji cinapangiza kuti Marta akhali wakusowa ungwiro?

NINJI pinakumbuka imwe munganyerezera pya Marta analongwa m’Bhibhlya? Maseze Bhibhlya isalonga kuti Marta akhali xamwali wakufunika wa Yezu, siye basi tayu akhafuniwa na Yezu, alipombo akazi anango akhafuniwa na Yezu, ninga Mariya m’bale wace Marta. Yezu akhafunambo mai wace. (Jwau 11:5; 19:25-27) Mphapo thangwi yanji Bhibhlya isalonga kuti Yezu akhafuna Marta?

² Yezu akhafuna Marta thangwi akhali wakukoma ntima, akhaphata basa mwaphinga, akhapasa mwakudzala manja, pontho akhali na makhaliro adidi auzimu. Iye akhakhulupira na ntima onsene pipfundziso pya Yezu. Marta akhali na cikhulupiro cakuwanga kuna Yezu ninga Mesiya wakupikirwa. (Jwau 11:21-27) Mbwenye ninga ife tonsene, Marta nee akhali waungwiro. Mwacitsandzo, ntsiku inango Yezu akhali panyumba pawo, Marta akhadaipirwa na m’bale wace, iye anyerezera kuti Mariya akhadaphonya, natenepa apanga Yezu toera ansandike. Marta alonga: ‘Mbuya, nee mukuona kuti m’bale wanga akundisiya ndekha na mabasa? Mpangeni, mphapo toera andiphedze.’ (Lerini Luka 10:38-42.) Ninji pinapfundza ife m’mbiri ineyi?

MARTA ADZUDZUMIKA

3, 4. Ndi munjira ipi Mariya asankhula “phindi yadidi kakamwe”? Mphapo ninji pidapfundza Marta?

³ Yezu apereka takhuta thangwi yakucemerwa na Marta na Mariya toera kuenda kunyumba kwawo. Natenepa, Yezu aphatisira ndzidzi unoyu toera kuapfundzisa undimomwene wakufunika kakamwe. Mariya abandza mwai unoyu toera kupfundziswa na Mpfundzisi Wankulu, iye akhala pantsi ‘dhuzi na miyendo ya Mbuya mbabva mafalace.’ Marta akhafunikambo kucita pyenepi. Mwakukhonda penula, Yezu mbadansimba kakamwe thangwi ya n’khaliro unoyu wakudzimana.

⁴ Mbwenye Marta akhadaphatika na basa toera kukhunganya cakudya cadidi kakamwe, akhacitambo mabasa anango toera kutambira mwadidi Yezu. Mbwenye mabasa anewa adzudzumisa kakamwe Marta mpaka kuipirwa na Mariya. Yezu aona kuti Marta akhayesera kucita pizinji kakamwe, natenepa, iye alonga mwaufuni: ‘Marta, Marta, ukudzudzumika mbucita mabasa mazinji.’ Buluka penepo, Yezu apereka maonero akuti panango mbale ibodzi ya cakudya mbidakwana. Pidamala iye kulonga pyenepi, Yezu asimba Mariya thangwi yakubvesera mwacidikhodikho. Iye alonga: ‘Mariya asankhula phindi yadidi kakamwe, anaipokoserwa tayu.’ Mwakukhonda dembuka, Mariya mbadaduwala cakudya cidadya iye pa ndzidzi unoyu wakupambulika, mbwenye iye cipo mbadaduwala pinthu pyauzimu pidapfundziswa iye na kusimbwa kudacitwa iye. Mudapita pyaka 60, mpostolo Jwau alemba: ‘Yezu akhafuna Marta na m’bale wace.’ (Jwau 11:5) Mafala anewa asapangiza kuti Marta atawira uphungu waufuni udampasa Yezu, mbawangisira toera kutumikira Yahova mwakukhulupirika mu umaso wace onsene.

5. Thangwi yanji pisanentsa kakamwe lero kuikha manyerezero athu ku pinthu pyakufunika? Ndi mbvundzo upi unafuna ife kutawira?

⁵ Mwakusiyana na ndzidzi wa Bhibhlya, ife tisatawira kuti lero dziko iri na pinthu pizinji pyakuti pinakwanisa kutidzudzumisa m’basa yathu yakutumikira Yahova. “Cipo anthu adzikuza thangwi ya mitcini yapadzulu kakamwe yakupita nayo ncibverano, marevista akutundusa akudziko, radyo, mafilimu na Televizau. . . . Pinthu pyenepi pisapereka mphangwa zipswa toera kudzudzumisa anthu ntsiku zonsene . . . Mu pyaka pidapita, anthu akhanyerezera kuti ukhali ‘Ndzidzi Wakuthambaruka.’ Mbwenye pisaoneka pakweca kuti wadzakhala ‘Ndzidzi Wakudzudzumisa.’” Mafala anewa apangwa anyakupfundza a xikola yapadzulu ku Estados Unidos mu pyaka 60 nduli. A Sentinela ya 15 de Setembro de 1958 yacenjeza abale na alongo kuti “pinthu pyakudzudzumisa pinadzathimizirika mu ndzidzi unafendedzera ife kumala kwa makhaliro ano akuipa.” Pyenepi pikucitikadi! Mbwenye pana mbvundzo wakufunika kakamwe: Tinacitanji toera kucalira kudzudzumiswa, mbatikhala ninga Mariya mu kupitiriza kuikha manyerezero athu ku pinthu pyauzimu?

KUKHONDA KUPHATISIRA KAKAMWE DZIKO

6. Kodi atumiki a Yahova asaphatisira tani tekinolojiya ya dziko?

⁶ Atumiki a Yahova asaphatisira tekinolojiya ya dziko toera kumwaza mphangwa zadidi. Mwacitsandzo, dingani “Fotodrama da Criação,” ikhali vidyu ya pithundzithundzi na mafoto, mbiphataniza kore na dzumbi. Mbidzati kutoma Nkhondo Yakutoma ya Dziko Yonsene na nkati mwa nkhondo ineyi, pikwi na pikwi pya anthu pa dziko yonsene atambira cibalangazo kubulukira mu vidyu ineyi yakuti pakumalisa ikhafokotoza Utongi wantendere wa Yezu Kristu wa Pyaka Cikwi. Mukupita kwa ndzidzi, mphangwa za Umambo zikhamwazwa mu radyo mbazibviwa na mamiliyau a anthu pa dziko yonsene. Lero, mitcini ya ndzeru na Interneti pisaphatisirwa mwadidi kakamwe toera kumwaza mphangwa zadidi, kuphatanizambo kwa ale anakhala mu pisa pyakutali kakamwe pa dziko yonsene.

7. (a) Thangwi yanji mphyakugopswa kuphatisira kakamwe pinthu pya dziko? (b) Ndi pinthu pipi pisafunika ife kutsalakana kakamwe? (Onani cidzindikiro capantsi.)

⁷ Mbwenye Bhibhlya isaticenjeza toera kucalira kuphatisira kakamwe dziko. Pyenepi pisaphataniza kumala ndzidzi uzinji mu kuphatisira pinapereka dziko. (Lerini 1 Akorinto 7:29-31.) Panango Nkristu anabvunga ndzidzi uzinji kakamwe mu pinthu pyakuti nee ndi pyakuipa, ninga ubalangazi, kuleri mabukhu, kuona Televizau, kuenda kaona mbuto zakubalika, kuona mphangwa zinapangiza malonda, kusaka mitcini ipswa idabuluka cincino na pinango. Anthu azinji asakomerwa kuphatisira Interneti toera kucedza na anango, kutumiza mphangwa mu ntokodzi na e-mail, kuona mphangwa zipswa na mphangwa za masendzekero. Pyenepi pinakwanisa kubvunga ndzidzi wathu, peno kukhala nsambo.a (Koel. 3:1, 6) Tingabvunga ndzidzi uzinji mu pinthu pyakukhonda kufunika, tinaduwala kutsalakana pinthu pyakufunika kakamwe​—kulambira kwathu Yahova.​—Lerini Aefesi 5:15-17.

8. Thangwi yanji nee tisafunika kufuna pinthu pya dziko?

⁸ Sathani asacita pyonsene toera kutitundusa na dziko yace, mbatidzudzumisa toera tikhonde kutumikira Yahova. Pyenepi pyacitika mu pyaka dzana yakutoma, mbwenye lero pikuthimizirika kakamwe. (2 Tim. 4:10) Natenepa, tisafunika kubvera uphungu uyu: “Lekani kufuna pinthu pya pantsi pano [peno pya dziko.]” Tingasasanyira umaso wathu ndzidzi onsene toera ubverane na uphungu unoyu, tinakwanisa kucalira kudzudzumiswa, pontho tinakwanisa kuthimizira ‘ufuni wathu kwa Babathu.’ Natenepa, pinakhala pyakukhonda nentsa kakamwe kucita cifuno ca Mulungu mbatipitiriza kukhala akutawirika kwa iye kwenda na kwenda.​—1 Jwau 2:15-17.

IKHANI PINTHU PYAKUFUNIKA PA MBUTO YAKUTOMA

9. Kodi Yezu apanga anyakupfundzace toera kuikhanji pa mbuto yakutoma? Kodi iye apangiza tani citsandzo cadidi?

⁹ Uphungu wadidi udapereka Yezu kuna Marta ukhabverana na citsandzo ca Yezu na pikhapfundzisa iye. Iye awangisa anyakupfundzace toera diso yawo yakuphiphirisa igake, toera akwanise kuikha Umambo pa mbuto yakutoma mbakhonda kudzudzumiswa na pinango. (Lerini Mateo 6:22, 33.) Yezu apangiza citsandzo cadidi kakamwe. Iye nee akhali na pinthu pizinji pyakumanungo; pontho nee akhali na nyumba nee taliyau.​—Luka 9:58; 19:33-35.

10. Ndi citsandzo cipi cidakhazikisa Yezu pakutoma kwene kwa utumiki wace?

¹⁰ Pinthu pizinji pyacitika pikhali Yezu mu utumiki wace pyakuti mbipidakwanisa kundzudzumisa, mbwenye iye nee atawirisa pyenepi. Pakutoma kwene kwa utumiki wace, pidamala iye kupfundzisa mwinji wa anthu mbacita pirengo ku Kafarnau, anthu an’dembetera toera akhonde kubuluka mu nzinda unoyu. Kodi Yezu atawira tani phembo ineyi? Iye alonga: ‘Pisafunika kuti ine ndipfundzisembo anthu a mizinda inango mphangwa zadidi za Umambo wa Mulungu. Thangwi ya ipyo ine ndatumiwa.’ (Luka 4:42-44) Mu kutowezera mafalace, Yezu afamba misindzo yakulapha toera kumwaza mphangwa zadidi na kupfundzisa anthu azinji. Maseze akhali waungwiro, Yezu akhali na pifuno ninga piri na anthu, midzidzi inango akhaneta kakamwe thangwi yakucita pizinji m’basa ya Mulungu.​—Luka 8:23; Jwau 4:6.

11. Thangwi yanji Yezu acalira kugwanda nseru wa mamuna unango? Ndi cenjezo ipi idapereka iye?

¹¹ Pa ndzidzi unango, Yezu akhapfundzisa anyakupfundzace kuti anathimbana tani na mitcingo, mbwenye mamuna unango am’matamisa mbalonga: ‘Mpfundzisi, panga m’bale wanga toera agawane na ine upfumi udatisiira babathu.’ Mbwenye Yezu akhonda kutonga nseru unoyu. Iye antawira: ‘Munthuwe, mbani adandikhalisa nyakutonga peno nyakugawa wanu?’ Buluka penepo, Yezu apitiriza kupfundzisa, mbacenjeza anyakubvesera ace toera acalire ngozwi ya kudzudzumiswa m’basa ya Mulungu thangwi yakufuna pinthu pyakumanungo.​—Luka 12:13-15.

12, 13. (a) Ntsiku zingasi Yezu mbadzati kuphiwa, ninji pidacitisa Agerego anango kufuna kuonana na iye? (b) Kodi Yezu atsalakana tani makhaliro anewa akuti akhafuna kundzudzumisa?

¹² Sumana yakumalisa ya umaso wa Yezu pa dziko yapantsi ikhali yakunentsa kakamwe. (Mat. 26:38; Jwau 12:27) Iye akhali na pinthu pizinji toera kucita, iye athimbana na mayesero akunentsa kakamwe, mbaphiwa mwausumankha. Mwacitsandzo, onani pidacitika n’Dimingu pa ntsiku 9 ya Nisane ya caka 33 N.W. Ninga pidapikirwa, Yezu apakira padzulu pa mwana buru mbapita mu Yerusalemu, mwinji wa anthu ansimba ninga ‘Mambo anadza na dzina ya Yahova.’ (Luka 19:38) Mangwana mwace, Yezu apita mu templo, mwacipapo iye athamangisa anyamalonda aumbirimi akhaphatisira nyumba ya Mulungu toera kugulisa pinthu na ntengo ukulu kakamwe mbabera Ayuda andzawo.​—Luka 19:45, 46.

¹³ Anthu anango Acigerego akhadabwera ku Yerusalemu toera kukumbuka Paskwa, iwo aona pidacita Yezu mbadzumatirwa kakamwe. Natenepa, iwo apanga mpostolo Filipi kuti iwo akhafuna kuonana na Yezu. Mbwenye Yezu akhonda, thangwi nee akhafuna kudzudzumiswa mu pinthu pikhadikhira iye. Iye nee akhafuna kukomeresa anthu azinji toera kucalira kuphiwa na anyamalwa a Mulungu. Pidamala iye kufokotoza kuti mbadaphiwa mwakukhonda dembuka, Yezu apanga Andreya na Filipi: “Ule anafuna kakamwe umaso wace anaufudza, mbwenye ule anaida umaso wace mu dziko ino akuukoya toera kukhala na umaso wakukhonda mala.” Mbuto mwakukomeresa Agerego anewa, Yezu apangiza citsandzo ca nzimu wakudzimana mbapikira: “Munthu onsene ananditumikira, Baba anadzamulemedza.” Mwakukhonda penula, Filipi afikisa mafala anewa adidi kakamwe kuna Agerego.​—Jwau 12:20-26, Tradução do Novo Mundo.

14. Maseze Yezu aikha basa yakumwaza mphangwa pa mbuto yakutoma, ninji cinapangiza kuti iye akhali na maonero akulinganira?

¹⁴ Maseze Yezu akhonda kudzudzumiswa m’basa yace yakufunika kakamwe yakumwaza mphangwa, iye nee akhanyerezera basa ineyi ndzidzi onsene. Iye atawira kugumanika pa phwando yakumanga banja mbaphedzera toera phwando ikhale yakutsandzayisa mu kusanduza madzi kudza vinyu. (Jwau 2:2, 6-10) Iye atawirambo micemerero toera kuenda kadya na axamwali ace kuphatanizambo kwa ale akhafuna mphangwa zadidi. (Luka 5:29; Jwau 12:2) Mbwenye cakufunika kakamwe ndi cakuti Yezu akakhazikisa ndzidzi toera kucita phembero, kukhala ekhene toera kunyerezera mwacidikhodikho na kupuma.​—Mat. 14:23; Mko. 1:35; 6:31, 32.

TAYANI MITOLO YONSENE YAKULEMERA

15. Ndi uphungu upi udapereka mpostolo Paulu, mphapo iye akhazikisa tani citsandzo cadidi?

¹⁵ Mpostolo Paulu alemba: ‘Titaye mphapo mitolo yonsene inatilemera.’ Iye alandanisa umaso wa Nkristu wakubatizwa ninga anyakuthamanga pa mapika a nsindzo wakulapha. (Lerini Ahebere 12:1.) Mwandimomwene, Paulu akhacita pikhapfundzisa iye. Ninga ntsogoleri Waciyuda, Paulu mbadakwanisa kukhala wakupfuma na wakubvekera, mbwenye iye asiya miyai ineyi toera kuikha pa mbuto yakutoma ‘pinthu pyakufunika kakamwe.’ Iye acita pizinji m’basa ya Mulungu, mbaenda m’mbuto zizinji ninga ku Sirya, Azya Menori, Masedonya na ku Yudeya. Thangwi ya cidikhiro cace ca umaso wakukhonda mala kudzulu, Paulu alemba: ‘Ndinaduwala cakhomo piri nduli mwanga, mbandiyang’ana piri kutsogolo basi.’ (Afil. 1:10; 3:8, 13, 14) Paulu aphatisira mwadidi mwai wace ninga nzice, mbacita pizinji ‘mu kutumikira Mbuya ndzidzi onsene mwakusowa pyakudzudzumisa.’​—1 Akor. 7:32-35.

16, 17. Ninga anyakumanga banja peno akukhonda kumanga banja, tinakwanisa tani kutowezera citsandzo ca Paulu? Longani citsandzo cibodzi.

¹⁶ Ninga Paulu, atumiki anango a Yahova asasankhula kukhonda manga banja toera kucita pizinji m’basa ya Yahova. (Mat. 19:11, 12) Atumiki akumanga banja ali na pizinji toera kutsalakana m’mabanja awo kupiringana ale adakhonda kumanga banja. Mbwenye mwakukhonda tsalakana khala ndife anyakumanga banja peno nkhabe, tonsene tinakwanisa ‘kutaya mitolo inatilemera’ mbatitumikira Mulungu na pinthu pyakucepa kakamwe pyakuti panango pinatidzudzumisa. Pyenepi pisaphemba kusiya pinthu pinatibvungira ndzidzi, mbatikhazikisa pifuno pyauzimu toera kuthimizira ndzidzi unaphatisira ife m’basa ya Mulungu.

¹⁷ Dingani citsandzo ca Mark na Claire adakula ku dziko ya Wales, iwo atoma basa ya upainiya pidamalisa iwo mapfundziro akuxikola iwo amanga banja mbapitiriza na upainiya. Mark afokotoza: “Takwanisa kululupisa umaso wathu mu kusiya nyumba yathu ya makwartu matatu na basa ikhacita ife toera kupita m’basa yakumanga Nyumba za Umambo pa dziko yonsene.” Mu pyaka 20 pidapita, iwo aenda m’mbuto zizinji mu Afrika, mbaphedza kumangwa kwa Nyumba za Umambo. Midzidzi inango iwo akhali na kobiri yakucepa kakamwe, mbwenye Yahova aatsalakana ndzidzi onsene. Claire alonga: “Mphyakutsandzayisa kakamwe kwa ife kutumikira Yahova ntsiku zonsene. Tacita uxamwali na anthu azinji m’mbuto zidaenda ife, pontho nkhabe cinasowa ife. Pinthu pyakucepa pidasiya ife nkhabe kulandana na kutsandzaya kuli na ife mu kutumikira Yahova m’basa ya ndzidzi onsene.” Atumiki azinji a ndzidzi onsene akhalambo na pyakugumana napyo ninga pyenepi.b

18. Ndi mibvundzo ipi yakuti anango asafunika kuidinga?

¹⁸ Ndiye tani kwa imwe? Munacitanji mungaona kuti nee musapangizabve phinga ibodzi ene m’basa ya Yahova ninga pikhacita imwe kale? Kodi piripo pinakudzudzumisani? Khala ndi tenepo, musafunika kuleri Bhibhlya na kupfundza munjira yakuphindulisa. Munacita tani pyenepi? Nsolo unatowerera unadzafokotoza pyenepi.

[Pidzindikiro pyapantsi]