Pa dziko yonsene yapantsi, anthu ali na maonero akusiyana-siyana thangwi ya pyakumwa pyakuledzeresa. Anango asakomerwa kumwa na axamwali awo m’midzidzi inango. Anango asasankhula pyawo kukhonda kumwa, anangombo asamwa mpaka kuledzera. Mphapo Bhibhlya isalonganji thangwi ya pyakumwa pyakuledzeresa?

1. Mphyakuipa kumwa pyakumwa pyakuledzeresa?

Bhibhlya nkhabe khondesa kumwa pyakumwa pyakuledzeresa. Bhibhlya isalonga kuti Mulungu atipasa miyoni mizinji, ubodzi mwa miyoni ineyi ndi “vinyu yakuti isatsandzayisa ntima wa munthu.” (Masalmo 104:14, 15) Amuna na akazi anango akukhulupirika analongwa m’Bhibhlya akhamwa pyakumwa pyakuledzeresa.—1 Timoti 5:23.

2. Ndi uphungu upi unapereka Bhibhlya kuna ale anasankhula kumwa?

Yahova asakhondesa kumwa kakamwe na kuledzera. (Agalata 5:21) Bhibhlya isalonga: “Leka kukhala pabodzi na anthu anamwa kakamwe vinyu.” (Misangani 23:20) Natenepa, ife tingasankhula kumwa, mwakukhonda tsalakana khala tiri kumwa pabodzi na anango peno tiri kumwa tekhene, tisafunika kukhala na madire. Nee tisafunika kumwa mpaka kucimwana kunyerezera mwadidi, kucimwana kulonga mwadidi peno kucita pinthu pyakukhonda thema. Kusiyapo pyenepi, kumwa mwakupiringana midida kusaikhambo pangozwi ungumi wa munthu. Mbwenye khala tingamwa tisapiringana midida, mphyadidi kusiya kwene kumwa.

3. Tinapangiza tani kuti tisalemedza cisankhulo ca anango thangwi ya pyakumwa pyakuledzeresa?

M’bodzi na m’bodzi asafunika kucita cisankhulo cace khala anamwa pyakumwa pyakuledzeresa peno nkhabe. Ife nkhabe funika kutonga munthu angasankhula kumwa mwakukhonda kupiringana midida, pontho khala munthu asankhula kukhonda kumwa, ife nkhabe funika kunkakamiza toera amwe. (Aroma 14:10) Kusiyapo pyenepi, ife tingaona kuti tingamwa anango anatsukwala peno tinaabweresa nyatwa, ife tinasankhula kukhonda kumwa. (Lerini Aroma 14:21.) Ife tisawangisira toera kucita ‘pinthu pinakomerwa na anango, tayu pinakomerwa na ife basi.’—Lerini 1 Akorinto 10:23, 24.

DZIWANI PIZINJI

4. Sankhulani khala munamwa peno nkhabe

Yezu akhaona tani pyakumwa pyakuledzeresa? Toera kutawira mbvundzo unoyu, tendeni tione cirengo cakutoma cidacita Yezu. Lerini Juwau 2:1-11, buluka penepo cedzani thangwi ya mibvundzo iyi:

• Tisapfundzanji na cirengo cidacita Yezu thangwi ya pyakumwa pyakuledzeresa na ale anasankhula kumwa?

• Nakuti Yezu nee akhondesa kumwa, kodi Nkristu asafunika kuona tani munthu anasankhula kumwa?

Ndimomwene kuti Nkristu ali na ufulu wakusankhula kumwa, mbwenye nee pisabveka kuti mphyadidi kumwa ndzidzi onsene. Lerini Misangani 22:3, buluka penepo onani kuti makhundu anatowera anakuphedzani tani toera kudziwa khala musafunika kumwa peno nkhabe:

• Khala musafuna kutekenya peno kuphatisira mitcini inango.

• Khala muli na mimba.

• Dotoro angakupangani kuti nee musafunika kumwa.

• Khala muli na nkandzo wakumwa mwakupiringana midida.

• Khala ntemo wa dziko yanu nkhabe kukutawirisani kumwa.

• Khala muli na munthu wakuti asankhula kukhonda kumwa thangwi kale akhamwa mwakupiringana midida.

Kodi musafunika kugulira anthu pyakumwa pyakuledzeresa pa phwando yanu yakumanga banja peno pa maphwando anango mang’ono? Toera kudziwa pinafunika imwe kucita, onani VIDHYU.

VIDHYU: Kodi Panadzakhala na Pyakumwa Pyakuledzeresa? (2:41)

Lerini Aroma 13:13 na 1 Akorinto 10:31, 32. Mungamala kuleri lemba ibodzi na ibodzi, cedzani thangwi ya mbvundzo uyu:

• Kuphatisira uphungu unoyu kunakuphedzani tani toera kucita cisankhulo cakuti cinatsandzayisa Yahova?

5. Dziwani kuti musafunika kumwa mpaka papi

Khala imwe mwasankhula kumwa pyakumwa pyakuledzeresa, kumbukani ipi: Ndimomwene kuti Yahova nkhabe khondesa pyakumwa pyakuledzeresa, mbwenye iye asakhondesa kumwa kakamwe. Thangwi yanji? Lerini Ozeya 4:11, 18, buluka penepo cedzani thangwi ya mbvundzo uyu:

• Ninji pinafuna kucitika munthu angamwa kakamwe?

Ninji pinafuna kutiphedza toera tikhonde kumwa kakamwe? Tisafunika kudziwa madire athu, mbatikhonda kuapitirira. Lerini Misangani 11:2, buluka penepo cedzani thangwi ya mbvundzo uyu:

• Thangwi yanji musafunika kukhazikisa madire kuti munamwa mpaka papi?

6. Ninji cinafuna kuphedza munthu toera kusiya kumwa mwakupiringana midida

VIDHYU: ‘Ine Ndikhadaneta na Makhaliro a Umaso Wanga’ (6:32)

• Mwakubverana na vidhyu, ninji pikhacita Dmitry angaledzera?

• Pidayesera iye kusiya kumwa, kodi pakutoma iye akwanisa?

• Ninji cidam’phedza toera asiye kumwa mwakupiringana midida?

Lerini 1 Akorinto 6:10, 11, buluka penepo cedzani thangwi ya mibvundzo iyi:

• Thangwi yanji kuledzera ndi madawo makulu?

• Ninji pinapangiza kuti munthu anamwa kakamwe pyakumwa pyakuledzeresa anakwanisa kucinja?

Lerini Mateu 5:30, buluka penepo cedzani thangwi ya mbvundzo uyu:

• Mu nsangani udalonga Yezu thangwi yakugwanda djanja, iye apangiza kuti tisafunika kuwangisira toera kukomeresa Yahova. Mphapo munacitanji khala imwe musanentseka toera kusiya nsambo wakumwa mwakupiringana midida?a

Lerini 1 Akorinto 15:33, buluka penepo cedzani thangwi ya mbvundzo uyu:

• Ninji pinafuna kucitika kuna imwe mungacita uxamwali na anthu akuti asamwa kakamwe?

TAPFUNDZANJI

Pyakumwa pyakuledzeresa pisacita khundu ya miyoni mizinji idatipasa Yahova, mbwenye iye asakhondesa kumwa kakamwe na kuledzera.

Mibvundzo yakubwereza

• Bhibhlya isalonganji thangwi ya pyakumwa pyakuledzeresa?

• Ndi ipi ngozwi yakumwa kakamwe?

• Tinacitanji toera kulemedza pisankhulo pya anango?

TOERA KUDZIWA PINANGO

Aphale na atsikana anacita tani pisankhulo pyadidi thangwi ya pyakumwa pyakuledzeresa?

Kodi Ndisafunika Kumwa Pyakumwa Pyakuledzeresa? (2:31)

Onani pinafunika imwe kucita toera musiye nsambo wakumwa mwakupiringana midida.

“Lekani Kumwa Mwakupiringana Midida” (Ncenjezi, 1 ya Janeiro 2010)

Kodi Akristu asafunikambo kucita nsambo wakukhuyisana makopo pakumwa?

“Mibvundzo Inacitwa na Anyakuleri” (Ncenjezi, 15 ya Fevereiro 2007)

Lerini nsolo wakuti “Ndikhali Ninga Tambori Yakuphoka,” toera kuona kuti mamuna unango akwanisa tani kusiya nsambo wakumwa kakamwe.

“Bhibhlya Isacinja Umaso wa Anthu” (Ncenjezi, 1 ya Maio 2012)

M’bodzi na m’bodzi wa ife ali na njira yace yakubvala na yakubalikisa manungo ace. Mbwenye pana midida mizinji ya m’Bhibhlya yakuti inatiphedza toera kubvala nguwo zinakomerwa na ife, mbatikhonda kutsukwalisa Yahova. Tendeni tione mingasi mwa midida ineyi.

1. Ninji cinafuna kutiphedza toera kusankhula nguwo zinafuna ife kubvala na njira yakubalikisa manungo athu?

Ife ndife atumiki a Yahova, ndi thangwi yace tisafunika tikhale na maonekero akucena, ‘tibvale nguwo zakuthema mbatibalikisa manungo athu mwakulinganira.’ Tingacita pyenepi, tinapangiza kuti ‘tisalemedza Mulungu.’ (1 Timoti 2:9, 10) Tendeni tione midida minai: (1) Nguwo zathu zisafunika kukhala ‘zakuthema.’ Panango imwe mwaona kuti pa misonkhano yathu ya mpingo, atumiki a Yahova asabvala nguwo zakusiyana, mbwenye nguwo zathu na tsisi yathu isapangiza kuti tisalemedza Mulungu wathu, Yahova. (2) Kubvala ‘nguwo zakuthema’ pisabveka kuti nee tisafunika kubvala nguwo zakuti zinacitisa anthu kukhala na cifuno cakupita m’mabonde peno zinapangiza kuti tisafuna pinakomerwa na ife basi. (3) Ife tisapangiza kuti ndife ‘akulinganira’ tingakhonda kutowezera mabvaliro a anthu a dziko. (4) Ndzidzi onsene maonekero athu asafunika kupangiza kuti tisalemedza Mulungu, pontho asafunika kupangiza pakweca kuti tisatumikira Mulungu wandimomwene.—1 Akorinto 10:31.

2. Pakusankhula nguwo toera kubvala, thangwi yanji tisafunika kunyerezera abale athu?

Ndimomwene kuti ife tiri na ufulu wakusankhula nguwo zinafuna ife kubvala, mbwenye tisafunika kuona kuti anango ananyerezeranji thangwi ya nguwo zathu. Ife tisacita pyonsene pinakwanisa ife toera tikhonde kutsukwalisa anango, mbwenye tisafuna ‘kukomeresa andzathu, mbaticita pinthu pyadidi toera kuawangisa.’—Lerini Aroma 15:1, 2.

3. Kodi mabvaliro athu anaphedza tani anango toera atome kupfundza pya Yahova?

Ife tisawangisira toera kubvala mwadidi m’midzidzi yonsene, mbwenye tisafunika kubvala mwadidi kakamwe tingaenda ku misonkhano peno kamwaza mphangwa. Nee tisafunika kubvala nguwo zakuti zinadzudzumisa anthu, mbakhonda kubvesera mphangwa zathu. Mbwenye tisafunika kubvala munjira yakuti ‘inabalikisa cipfundziso ca Mulungu, Mpulumusi wathu,’ mbatiphedza anthu toera kupfundza pya Yahova.—Tito 2:10.

DZIWANI PIZINJI

4. Maonekero adidi asapasa mbiri Yahova

Ndi ipi thangwi yakufunika kakamwe toera tidzudzumike na maonekero athu? Lerini Masalmo 47:2, buluka penepo cedzani thangwi ya mibvundzo iyi:

• Ife tisaimirira Yahova. Kodi pyenepi pinatiphedza tani toera kubvala munjira yadidi?

• Kodi imwe musaona kuti mphyakufunikadi kubvala mwadidi pakuenda ku misonkhano peno pakumwaza mphangwa? Thangwi yanji?

5. Ninji pinafuna kutiphedza toera tibvale na kubalikisa manungo athu munjira yadidi

Onani VIDHYU.

VIDHYU: ‘Citani Pinthu Pyonsene Toera Kupasa Mbiri Mulungu’ (10:18)

Mwakukhonda tsalakana khala nguwo zathu ndi zakudhula peno nkhabe, izo zisafunika kukhala zakuthema na zakucena mwakubverana na mbuto inagumanika ife. Lerini 1 Akorinto 10:24 na 1 Timoti 2:9, 10, buluka penepo cedzani kuti thangwi yanji nee tisafunika kubvala nguwo zakuti . . .

• nee zafuliwa peno zakukhonda thema.

• ndi zakutimba, zakusiya khundu ikulu ya diti panja, zakuphenekera peno zakuti zinacitisa anango kukhala na cifuno cakupita m’mabonde.

Mu ndzidzi wakale Yahova aphatisira Mose toera kupereka mitemo yakusiyana-siyana kuna mbumba yace. Akristu nee asakakamizwa toera kubvera mitemo ineyi, mbwenye iyo isatiphedza toera kudziwa pinanyerezera Yahova. Lerini Dheuteronomyo 22:5, buluka penepo cedzani thangwi ya mbvundzo uyu:

• Thangwi yanji tisafunika kucalira kubvala nguwo peno kukhala na maonekero akuti anacitisa mamuna kuoneka ninga nkazi, nkazimbo mbaoneka ninga mamuna?

Lerini 1 Akorinto 10:32, 33 na 1 Juwau 2:15, 16, buluka penepo cedzani thangwi ya mibvundzo iyi:

• Thangwi yanji mphyadidi kudinga makhaliro athu khala asatsukwalisa anthu mu mpingo peno pacisa cinakhala ife?

• Pacisa cinakhala imwe anthu asabvala tani, pontho asabalikisa tani manungo awo?

• Kodi mphyakuthema kuna Nkristu kubvala na kubalikisa manungo ace munjira ineyi? Thangwi yanji?

TAPFUNDZANJI

Tingasankhula mwadidi nguwo zinabvala ife, mbatibalikisa mwadidi manungo athu, tinapangiza kuti tisalemedza Yahova na anthu anango.

Mibvundzo yakubwereza

• Thangwi yanji njira inabvala ife na inabalikisa ife manungo athu ndi yakufunika kuna Yahova?

• Ndi midida ipi ya m’Bhibhlya yakuti inakwanisa kutiphedza toera kusankhula nguwo zinafuna ife kubvala na njira yakubalikisa manungo athu?

• Maonekero athu anapereka tani umboni wadidi peno wakuipa thangwi ya Yahova?

TOERA KUDZIWA PINANGO

Onani kuti anthu ananyerezeranji thangwi ya imwe angaona nguwo zanu.

“Nguwo Zanu Zisalonganji Thangwi ya Imwe?” (Nsolo wa mu jw.org)

Onani kuti thangwi yanji musafunika kunyerezera mwadidi, mbamudzati kucita tatuaje.

“Bhibhlya Isalonganji Thangwi Yakucita Tatuaje?” (Nsolo wa mu jw.org)

Onani midida inango ya m’Bhibhlya yakuti inakuphedzani toera kusankhula mwadidi nguwo zinafuna imwe kubvala.

“Kodi Nguwo Zanu Zisapangiza Kuti Musatumikira Mulungu?” (Ncenjezi, Setembro 2016)

Onani kuti ninji cidaphedza nkazi unango toera kutawira njira ikhabvala anthu anango?

“Mabvaliro na Maonekero Anga Akhagwegwedusa Anango?” (Lamukani!, 22 ya Dezembro 2003)