Anyindirwa Mpfuma
1 Mpostolo Paulu alemedza kakamwe basa idapaswa iye na Mulungu ya kumwaza mphangwa na afika pa kuilonga ninga ‘mpfuma.’ (2 Akor. 4:7) Iye apirira nyatwa na ntcingo m’kukwanirisa basa ineyi. Mwakukhonda neta iye amwaza mphangwa kwa munthu onsene akhagumanikana na iye. Iye acita maulendo mazinji akunensa na akugopswa ku ntunda na m’bara. Kodi tinakwanisa tani kusangizira Paulu na kupangiza kuti tisatsalakana utumiki wathu? (Arom. 11:13) Kodi ndi ninji cinacitisa utumiki wathu kukhala mpfuma yokhonda landanisika?
2 Mpfuma Ikulu Kakamwe: Mpfuma za dziko yapantsi kazinji kene zisaphesa ntima na kubweresa maphindu akucepa peno a nzidzi ung’ono. Kukhundu inango, utumiki wathu usabweresa maphindu a kwenda na kwenda kwa ife na kwa anango. (1 Tim. 4:16) Usaphedza anthu akuona ntima kudziwa Yahova, kucita macinjiro akufunika m’umaso wawo, na kuwina cidikhiro candimomwene ca umaso wa kwenda na kwenda. (Arom. 10:13-15) M’kulemedza kakamwe utumiki wathu, tisagumana cifuniro cakutsanzayisa m’umaso, kupibva kuti tacita pinthu, na kukhala na cidikhiro cakuwanga ca ntsogolo.—1 Akor. 15:58.
3 Pangizani Kuti Musalemedza Mpfuma Yanu: Ntengo unapasa ife cinthu kazinji kene usapangizwa m’pire pinacita ife kwa ico. Ndi mwai ukulu tani kubvunga nzidzi na mphambvu yathu towera kulemedza Yahova! (Aef. 5:16, 17) Njira inabvunga ife nzidzi wathu isafunika kupangiza kuti tisapasa ntengo ukulu pinthu pyauzimu kupiringana pinthu pyakumanungo. Nakuti tiri na cinthu cakufunika kakamwe towera kugawana na anango, tinadzafuna kumwaza mphangwa mwakugalamuka na kukhala maso towera kulonga mphangwa zadidi m’nzidzi onsene.
4 Mpfuma za ntengo ukulu kazinji kene nkhabe biswa mbwenye zisaikhwa pakweca towera anango azione. Khala tisaona utumiki wathu ninga mpfuma, unadzakhala khundu yakufunika m’umaso wathu. (Mat. 5:14-16) Na ntima wakupereka takhuta, tinakwanisa m’nzidzi onsene kusangizira mpostolo Paulu na kubanza mwai onsene towera kupangiza kuti mwandimomwene tisapasa ntengo utumiki wathu na kuulemedza ninga mpfuma.