Programu Ipswa Ya Nsonkhano Wa Cisa

Dziko ino isafuna kuti titawire kuti makhaliro ano a pinthu anadzakhala kwenda na kwenda. Mbwenye, Mafala a Mulungu asatipanga pinthu pyakusiyana. (1 Jwau 2:15-17) Iwo asatiphedza kudzindikira kuti kukoya ‘mpfuma pa dziko yapantsi’ ndi kwapezi. Towera kuwangisa mbumba ya Mulungu, programu ya nsonkhano wa cisa wa caka ca basa ca 2007 inadzafokotoza nsolo wakuti: Koyani ‘Mpfuma Kudzulu.’—Mat. 6:19, 20.

Manyerezero a kufuna mpfuma aphatanizwa m’pinthu pinalongwa pa Aefesi 2:2 ninga “anatonga n’dziko ya mphepo, nzimu ule unaonesa mphambvu zache mwa ana akukhonda kutawira.” Tenepa ninga mphepo yandimomwene iri konsene kwene, kuti anthu apume, natenepa “nzimu wa anthu a pantsi pano” usatonga makhaliro ano. (1 Akor. 2:12) Nakuti kukhuya kwawo ndi kwamphambvu kakamwe, na thangwi ineyi iwo usalongwa kuti ‘usatonga.’ Programu ipswa ya nsonkhano wa cisa inadzatiphedza kucalira manyerezero a kufuna mpfuma a dziko na kukoya mwadidi m’manyerezero pinthu pyakufunika kakamwe. (Mat. 6:33) Mwakuthimizira, programu ineyi inadzatiphedza kunyindira Yahova munakwanirisa ife utumiki wathu ngakhale na pikakamizo na mayesero anathimbana na ife.

Citani pyonsene towera mugumanike pa nsonkhano m’ntsiku ziwiri na ‘koyani pyadidi pinabva imwe.’ (Aheb. 2:1) Lembani mwacigwagwa ntsonga zinafuna imwe kuziphatisira m’umaso na m’utumiki wanu. M’kugumanika pakutoma mpaka kumala kwa programu yakudzala na mpfuma zauzimu, kunadzakukulumizani na kukuwangisani kupitiriza ‘kukoya mpfuma kudzulu’!