UDZIWISI WAKALE, MBWENYE WAKUPHINDULISA LERO

Kulekerera Na Ntima Onsene

N’DIDA WA BHIBHLYA: ‘Pitirizani kulekererana na ntima onsene, khala munthu ali na mathangwi toera kusumira ndzace. Ninga mudakulekererani Yahova na ntima onsene, citanimbo pyenepi.’​—Akolose 3:13.

Pyenepi Pisabvekanji? M’Bhibhlya madawo asalandaniswa na mangawa, kulekerera kusalandaniswa na kumalisa mangawa. (Luka 11:4) Bukhu inango isalonga kuti m’Malemba fala ya Cigerego idathumburuzwa kuti “kulekerera” isabveka “kumalisa mangawa mwakukhonda kuakumbuka pontho.” Natenepa tingasankhula kulekerera munthu adatidawira, nee tisafunika kupikumbuka pontho. Cifuno cathu cakulekerera, nee pisabveka kuti tisatawira pinthu pyakuipa peno kumalisa kupha kunabva ife. M’mbuto mwace, basi ene tisatonga kukhonda koya pinthu muntima, maseze tiri na ‘mathangwi toera kusuma.’

Ndi Wakuphedza Lero? Ninga anthu akusowa ungwiro, tonsene tisadawa. (Aroma 3:23) Natenepa, mphyadidi kukhala na cipendamiro ca kulekerera anango, thangwi cincino peno ntsiku inango tinadzafunambo anango atilekerere. Kusiyapo pyenepi, tingasankhula kulekerera, tisaphindula tekhene. Munjira ipi?

Tingakoya mathangwi muntima, mbatiipirwa na kukhonda kulekerera, tisaphekeka tekhene. Mabvero anewa akuphonyeka anakwanisa kutibera ntendere, kugwandira umaso wathu na kuticitisa kukhala akutsukwala. Pyenepi pisaikha ungumi pangozwi. Lipoti ya Journal of the American College of Cardiology, ya Dr. Yoichi Chida na mpfundzisi wa Psicologia Andrew Steptoe, alonga: “Kufufudza kudacitwa cincino kusapangiza kuti anthu anacimbiza kuipirwa na anakoya mathangwi, kazinji kene asaduwala utenda wa ntima.”

Onani maphindu anabwera thangwi ya kulekerera. Tingalekerera anango na ntima onsene, tisakhazikisa kubverana na ntendere, pontho tisawangisa uxamwali. Cakufunika kakamwe, tisapangiza kukhala anyakutowezera Mulungu, wakuti asalekerera anyakutcunyuka na ntima onsene mbadikhira toera tilekererembo anango na ntima onsene.​—Marko 11:25; Aefesi 4:32; 5:1.