NSOLO 7
“Nyerezerani Mwadidi Ule Adapirira”
1-3. (a) Ninji pinapangiza kuti Yezu akhali wakudzudzumika kakamwe pikhali iye m’munda wa Getsemani, pontho thangwi yanji? (b) Tisapfundzanji na kupirira kwa Yezu, pontho pyenepi pisabweresa mibvundzo ipi?
YEZU akhali pa mayesero akunentsa kakamwe. Iye akhali m’midzidzi yakumalisa ya umaso wace pa dziko yapantsi. Iye aenda na apostolo ace pa mbuto yakuti iwo akhaidziwa kakamwe, yakuti ndi munda wa Getsemani. Kazinji kene iye akhagumanyikana nawo kweneko. Mbwenye, namasiku anewa, iye akhafuna ndzidzi pang’ono toera akhale ekhene. Iye asiya apostolo ace, mbaenda pakati pa munda, agodama, mbacita phembero. Iye acita phembero mwakudembetera, pontho akhali wakutsukwala kakamwe mpaka kaluma yace kukhala “ninga mathoto a ciropa akuti ali kugwa pantsi.”—Luka 22:39-44.
2 Thangwi yanji Yezu akhanentseka kakamwe? Yezu akhadziwa kuti mwakukhonda dembuka mbadathabuka maningi pakuphiwa, mbwenye nee ndi pyenepi pidancitisa kunentseka kakamwe. Yezu akhafuna kakamwe kucenesa dzina ya Babace, pontho Yezu akhadziwa kuti toera kupulumusa anthu iye akhafunika kukhala wakukhulupirika. Iye akhadziwa kuti akhafunikadi kupirira. Mbadacimwana kupirira,mbadatikanisa kakamwe dzina ya Yahova. Mbwenye Yezu nee acita pyenepi. Mukupita kwa ndzidzi pa ntsiku ibodzi ene mbadzati kufa, Yezu apangiza kuti awina pidalonga iye mafala awa: “Pyonsene pyakwanirisika!”—Juwau 19:30.
3 Bhibhlya isatikulumiza toera ‘tinyerezere mwadidi ule adapirira.’ (Ahebheri 12:3) Natenepa pali na mibvundzo yakufunika yakuti tisafunika kudziwa mitawiro yace: Ndi mayesero api mangasi adapirira Yezu? Ninji pidamphedza toera kupirira? Tinatowezera tani citsandzo cace? Mbatidzati kutawira mibvundzo ineyi, tendeni tione kuti pisabvekanji kupirira.
Kupirira Ninji?
4, 5. (a) “Kupirira” kusabvekanji? (b) Ndi citsandzo cipi cinapangiza kuti kupirira nee kusabveka kuthimbana na nyatwa?
4 Kazinji kene, tonsene tisatsukwala “thangwi ya pinentso pyakusiyana-siyana.” (1 Pedhru 1:6) Khala tiri kuthimbana na pinentso pisabveka kuti tiri kupirira? Nkhabe. Fala Yacigerego yakuti “kupirira” isabveka “kukhonda kubwerera nduli pa kutamba nyatwa.” Pakulonga thangwi yakupirira kunalongwa m’Bhibhlya, nyakudziwisa m’bodzi alonga: “Kupirira kusaphedza munthu tayu basi toera akunde pinentso, mbwenye toera apitirize kukhala na cidikhiro cakuwanga . . . Nkhaliro unoyu usaphedza munthu toera akhale na cipapo angathimbana na nyatwa. Munthu wakupirira nee asanyerezera kakamwe nyatwa zace, mbwenye asanyerezera nkhombo zinafuna kukhala na iye angapirira.”
5 Kupirira nee kusabveka kuthimbana na nyatwa zakukhonda dikhira. Fala yakuti kupirira m’Bhibhlya isabveka munthu wakuti asapitiriza dzololo mwakukhonda tsalakana nyatwa. Iye asakhala na maonero adidi thangwi ya nyatwa zace mbakhonda kuluza cidikhiro. Onani citsandzo ici: Amuna awiri aikhwa nkaidi ibodzi ene, mbwenye na miseru yakusiyana kakamwe. M’bodzi ndi phanga, pontho ali wakuipirwa kakamwe thangwi yakukhala nkaidi. Unango ndi m’bodzi mwa abale athu Acikristu wakuti aikhwa nkaidi thangwi yakulambira Yahova. Mbwenye ali wakutsandzaya, pontho asapitiriza kukhala wakukhulupirika thangwi asadziwa kuti mayesero anewa asam’phedza toera apangize cikhulupiro cace kuna Yahova. Phanga nee apangiza kupirira kwandimomwene, mbwenye m’bale wathu apangiza kupirira kwandimomwene.—Tiyago 1:2-4.
6. Tinakhala tani akupirira?
6 Toera tipulumuswe tisafunika kupirira. (Mateu 24:13) Mbwenye ife nee tabalwa na nkhaliro unoyu. Tisafunika kuupfundza. Munjira ipi? Lemba ya Aroma 5:3 isalonga: “Nyatwa isabala kupirira.” Tingafuna kukhala akupirira nee tisafunika kugopa mayesero onsene a cikhulupiro cathu. Mbuto mwace, tisafunika kuakunda. Tisakhala akupirira tingakunda mayesero makulu peno mang’ono anathimbana na ife ntsiku na ntsiku. Tingapirira mayesero kabodzi pisatiphedza toera kupirira mayesero anango. Tekhene nee tinakwanisa kukhala akupirira, mbwenye tisafunika kupitiriza “kunyindira mphambvu za Mulungu.” (1 Pedhru 4:11) Toera kutiphedza kuti tikhale akukhulupirika, Yahova atipasa Mwanace, wakuti ndi citsandzo cadidi kakamwe ca kukhulupirika. Cincino tendeni tipfundze thangwi yakupirira kudapangiza Yezu.
Mayesero Adapirira Yezu
7, 8. Ndi nyatwa zipi zidapirira Yezu mbadzati kufa?
7 Mbadzati kuphiwa, Yezu atsalakanwa mwakuipa kakamwe. Kusiyapo kudzudzumika kakamwe, nyerezeranimbo kupaswa manyadzo na kupwazwa kudacitwa iye pa ntsiku ineyi. Mwacitsandzo, xamwali wace ansandukira, axamwali ace anango apantima anthawa, atongwa mwakusowa mulando, pontho apambizirwa. Pikhatongwa iye na anyakutonga a mu Thando Ikulu Yakutongera Miseru Yaciyuda, ansingirira, am’phulira mata, pontho am’menya. Ngakhale tenepo, Yezu apitiriza kupirira pyonsene mwakukhurudzika na mwacipapo.—Mateu 26:46-49, 56, 59-68.
8 Mbadzati kuphiwa, Yezu apirirambo nyatwa zinango zizinji. Iye akwapulwa kakamwe. Bukhu inango isalonga tenepa thangwi ya pyenepi: “Mitcamu ineyi ikhancitisa kukhala na pironda m’manungo mwace mbaluza ciropa cizinji.” Kusiyapo pyenepi, iye akhomerwa pamuti mbaphiwa munjira yakuti yancitisa “kubva kupha kakamwe.” Nyerezerani kubva kupha kudakhala na Yezu mu ndzidzi ukhapholwa manjace na miyendo yace na kukhomerwa pa muti na maperego makulu. (Juwau 19:1, 16-18) Nyerezerani kubva kupha kukulu kudabva Yezu mu ndzidzi udalamuswa muti wakusikimizira na kupandulwa khanda yace na maperego thangwi yakulemera kwa manungo ace pa muti. Iye apirira nyatwa zenezi zonsene kuphatanizambo kunentseka kakamwe m’manyerezero ninga pidalongwa pa khundu yakutoma ya nsolo uno.
9. Pisabvekanji kukwata ‘muti wathu wakusikimizira’ mbatitowera Yezu?
9 Ninga atowereri a Kristu, tisafunika kupiriranji? Yezu alonga: “Munthu anafuna kunditowera, . . . akwate muti wace wakusikimizira mbapitiriza kunditowera.” (Mateu 16:24) Fala yakuti “muti wakusikimizira” isaphatisirwa munjira yakuphiphirisa toera kulonga nyatwa, manyadzo, ngakhale kufa. Kutowera Yezu kusaphemba cipapo. Ife tasiyana na anthu anango thangwi tisatowezera pinalonga Bhibhlya, pontho dziko isatiida thangwi nee tisacita khundu yace. (Juwau 15:18-20; 1 Pedhru 4:4) Mbuto mwakusiya kutowera Yezu, ife tiri akukhunganyika toera kuthabuka, ngakhale kufa thangwi ya iye.—2 Timoti 3:12.
10-12. (a) Thangwi yanji kusowa ungwiro kwa anthu a mu ndzidzi ukhali Yezu pa dziko yapantsi kwayesera kupirira kwace? (b) Ndi mayesero api anango adapirira Yezu?
10 Yezu pikhali iye pa dziko, athimbana na mayesero anango thangwi yakusowa ungwiro kwa anthu akakhala na iye. Kumbukani kuti Yezu akhali “nyabasa waluso,” adaphatisira Yahova toera kucita dziko yapantsi na pyonsene piri mwenemu. (Misangani 8:22-31) Natenepa, Yezu akhadziwa pinthu pikhafuna Yahova kuna anthu; iye akhafuna kuti anthu apangize makhaliro Ace mbatsandzaya na umaso waungwiro. (Genesi 1:26-28) Mbwenye pidabwera Yezu pa dziko, iye akhali na mabvero ninga a anthu mbaona nyatwa zawo zikhatamba iwo thangwi yakusowa ungwiro. Yezu atsukwala kakamwe pidaona iye kuti anthu ndi akusowa ungwiro, angalandanisa na umaso ukhali na Adhamu na Eva. Pyenepi pyacitisa Yezu kuthimbana na mayesero mazinji akuti akhafunika kuapirira. Kodi Yezu afewa manungo mbanyerezera kuti anthu anewa cipo anacinja? Tendeni tione.
11 Kukhonda kubvera kwa Ayuda kwacitisa Yezu kutsukwala mpaka iye kulira. Kodi kuuma mitima kwa anthu anewa kwancitisa kuluza phinga yace peno kwancitisa kusiya kumwaza mphangwa? Nkhabe, “iye apitiriza kupfundzisa anthu mu templo ntsiku zonsene.” (Luka 19:41-44, 47) Iye “atsukwala kakamwe” thangwi yakusowa ntsisi kwa Afarisi akuti akhamuyang’ana toera kuona khala iye mbadawangisa munthu pa ntsiku ya Sabudu. Kodi Yezu agopa apingizi anewa akuti akhadziona ninga akulungama? Mwandimomwene nkhabe! Iye akhala wacipapo mbawangisa mamuna unoyu mu sinagoga.—Marko 3:1-5.
12 Yezu atsukwalambo kakamwe na madodo akhacita anyakupfundzace apantima. Ninga pidapfundza ife mu Nsolo 3, iwo akhafuna kakamwe kukhala na cidzo. (Mateu 20:20-24; Luka 9:46) Yezu aapasa uphungu kazinji kene toera akhale akucepeseka. (Mateu 18:1-6; 20:25-28) Mbwenye iwo nee aphatisira uphungu wa Yezu mwakucimbiza. Ngakhale pa ntsiku yakumalisa ya Yezu pa dziko yapantsi, iwo ‘aketesana kakamwe kuti mbani akhali nkulu kakamwe pakati pawo.’ (Luka 22:24) Kodi Yezu asiya kuanyindira mbanyerezera kuti iwo nee mbadacinja? Nkhabe. Yezu akhaapirira mbanyindira kuti anacinja. Yezu akhaona makhaliro awo adidi, akhadziwa kuti anyakupfundzace akhafuna Yahova, pontho akhadziwa kuti iwo akhafuna kucita cifuniro Cace.—Luka 22:25-27.
Anthu angatitcinga, nee tisafunika kubwerera nduli, mbwenye tisafunika kupitiriza kumwaza mphangwa mwaphinga
13. Ndi mayesero api adathimbana na Yezu akuti panango tinathimbanambo nawo?
13 Ninga Yezu, ife tinathimbanambo na mayesero mabodzi ene. Mwacitsandzo, anthu anango nee anabvesera mphangwa za Umambo zinamwaza ife peno anayesera kutilimirisa. Kodi tinabwerera nduli peno tinapitiriza kumwaza mphangwa mwaphinga? (Tito 2:14) Kusowa ungwiro kwa abale na alongo athu kunakwanisambo kutiyesera. Panango iwo analonga peno kucita pinthu pyakuti pinatitsukwalisa. (Misangani 12:18) Kodi tinanyerezera basi ene madodo awo mbationa kuti iwo cipo anacinja, peno tinapirira mbatipitiriza kuona makhaliro awo adidi?—Akolose 3:13.
Ninji Pidaphedza Yezu Toera Kupirira
14. Ndi pinthu pipi piwiri pidaphedza Yezu toera apitirize kukhala wakupirira?
14 Ninji pidaphedza Yezu toera kupirira mbapitiriza kukhala wakukhulupirika mu ndzidzi ukhatsalakanwa iye mwakuipa? Pana pinthu piwiri pidamphedza. Cakutoma, iye ayang’ana kudzulu, mbacita phembero kuna “Mulungu wakuti . . . asatiwangisa toera kupirira.” (Aroma 15:5) Caciwiri, Yezu ayang’ana ntsogolo mbanyerezera nkhombo zikhafuna kutambira iye angapirira. Tendeni tione pinthu pyenepi.
15, 16. (a) Ninji pinapangiza kuti Yezu nee akhanyindira mphambvu zace toera kupirira mayesero? (b) Ndi cinyindiro cipi cikhali na Yezu kuna Babace, pontho thangwi yanji?
15 Maseze Yezu akhali Mwana waungwiro wa Mulungu, iye nee anyindira mphambvu zace toera kupirira. Mbwenye iye akhacita phembero kuna Babace wakudzulu toera am’phedze. Mpostolo Paulu alemba: “Kristu acita maphembero akudembetera na akuphemba pinthu kuna Ule wakuti mbadakwanisa kumpulumusa mu kufa, iye acita maphembero anewa mwakugaluza mbagwisa misozi.” (Ahebheri 5:7) Pidacita Yezu phembero, iye nee acita phembo basi kuna Mulungu, mbwenye acita phembero na ntima onsene, pontho mwakudembetera toera kuphemba ciphedzo. Iye acita pyenepi kazinji kene. Mwandimomwene, m’munda wa Getsemani Yezu acita maphembero mazinji mwakudembetera.—Mateu 26:36-44.
16 Yezu akhali na cinyindiro cakuti Yahova mbadatawira maphembero ace akudembetera, thangwi iye akhadziwa kuti Babace ndi “Nyakubva phembero.” (Masalmo 65:2) Mbadzati kubwera pa dziko, Mwana wautombo akhaona Babace mbakatawira maphembero a atumiki ace akukhulupirika. Mwacitsandzo, Mwana unoyu akhalipo mu ndzidzi udatuma Yahova anju toera atawire phembero ya mprofeta Dhanyeli, maseze iye akhadzati kumala kucita phembero. (Dhanyeli 9:20, 21) Ninga Mwana wa Mulungu, Yezu akhali na cinyindiro cakuti Babace mbadantawira angam’phemba ciphedzo “mwakugaluza mbagwisa misozi.” Yahova atawira maphembero a Mwanace, mbatuma anju toera ampase mphambvu kuti akwanise kupirira mayesero.—Luka 22:43.
17. Thangwi yanji tisafunika kuphemba ciphedzo ca Mulungu toera tipirire, pontho tinacita tani pyenepi?
17 Toera tipirire tisafunika kuphemba ciphedzo kuna Mulungu ‘ule anatipasa mphambvu.’ (Afilipi 4:13) Khala Mwana waungwiro wa Mulungu adzindikira kuti akhafunika kudembetera kuna Yahova toera am’phedze, ndiye tani ife anthu akusowa ungwiro? Ninga Yezu, tisafunikambo kudembetera kuna Yahova kazinji kene. (Mateu 7:7) Nee tisadikhira kuti Yahova atume anju toera alonge na ife. Mbwenye tisanyindira kuti Yahova anatawira maphembero a atumiki ace akukhulupirika akuti ‘asapitiriza kudembetera kuna iye, mbacita maphembero masiku na masikati.’ (1 Timoti 5:5) Maseze tithimbane na mayesero mazinji ninga utenda, kuferwa, peno kutcingwa, Yahova anadzatawira maphembero athu akubulukira mu ntima toera kuphemba udziwisi, cipapo na mphambvu toera kupirira.—2 Akorinto 4:7-11; Tiyago 1:5.
Yahova anadzatitawira maphembero athu akubulukira pantsi pa ntima, tingamphemba ciphedzo toera kupirira
18. Ninji pontho pidaphedza Yezu toera kupirira?
18 Cinthu caciwiri cidaphedza Yezu ndi cakuti iye akhayang’ana ntsogolo, tayu nyatwa zace. Bhibhlya isalonga: “Thangwi ya kutsandzaya kudaikhwa patsogolo pace, iye apirira pamuti wakusikimizira.” (Ahebheri 12:2) Citsandzo ca Yezu cisapangiza kuti tisafunika kukhala na cidikhiro mbatitsandzaya toera tikwanise kupitiriza kupirira. (Aroma 15:13; Akolose 1:11) Yezu akhadziwa kuti angapirira mbadatambira nkhombo zizinji kakamwe. Iye akhadziwa kuti angakhala wakukhulupirika, mbadacenesa dzina ya Babace, pontho Yahova mbadasudzula anthu m’madawo na kufa. Yezu akhalimbo na cidikhiro cakutonga ninga Mambo na kutumikira ninga Nyantsembe Wankulu mbabweresa nkhombo kuna anthu akubvera. (Mateu 20:28; Ahebheri 7:23-26) Yezu akhanyerezera nkhombo zizinji na cidikhiro cikhali na iye, pyenepi pyamphedza toera kutsandzaya mbapitiriza kupirira.
19. Tingathimbana na mayesero, cidikhiro na kutsandzaya pinatiphedza tani toera kupirira?
19 Ninga Yezu, tisafunikambo kukhala na cidikhiro mbatitsandzaya toera tikwanise kupirira. Mpostolo Paulu alonga: “Tsandzayani thangwi ya cidikhiro canu.” Buluka penepo, iye athimiza: “Pirirani pakuthimbana na nyatwa.” (Aroma 12:12) Kodi cikhulupiro canu ciri kuyeserwa? Khala ndi tenepo, nyerezerani pinthu pyadidi pinafuna kucitika mungapirira. Kumbukani kuti mungapirira munadzapasa mbiri dzina ya Yahova. Pitirizani kudikhira Umambo wa Mulungu. Nyerezerani kuti muli mu dziko ipswa, pontho muli kutsandzaya na nkhombo zinafuna kukhala na imwe m’Paraizu. Kunyerezera kukwanirisika kwa mapikiro akutsandzayisa a Yahova, ninga kuceneswa kwa dzina yace, kumaliswa kwa uipi, mautenda na kufa, pinatiphedza toera titsandzaye, pontho kutsandzaya kunatiphedza toera tipirire mayesero onsene anathimbana na ife. Tingalandanisa nkhombo zinadzafuna kukhala na ife mu Umambo wa Mulungu na nyatwa zonsene zinatamba ife mu dziko tisaona kuti nyatwa zenezi ndi “za ndzidzi wakucepa na zakululupa.”—2 Akorinto 4:17.
‘Towezerani Manyalo Ace Mwakukhulupirika’
20, 21. Yahova asadikhiranji kuna ife, pontho tisafunika kukhala akutonga toera kucitanji?
20 Yezu akhadziwa kuti toera kukhala nyakupfundzace pikhaphemba kupirira. (Juwau 15:20) Iye apirira thangwi akhadziwa kuti citsandzo cace mbicidawangisa anango. (Juwau 16:33) Yezu apangiza citsandzo cadidi kakamwe cakupirira, mbwenye ife ndife akusowa ungwiro. Yahova asadikhiranji kuna ife? Pedhru afokotoza: “Kristu aona nyatwa thangwi ya imwe, mbapangiza kuna imwe kuti munatowezera tani manyalo ace mwakukhulupirika.” (1 Pedhru 2:21) Njira idapirira iye mayesero, Yezu atipangiza citsandzo toera kutowezera.a Pinthu pidacita Yezu na pidalonga iye na njira idapirira iye mayesero pyakhala ninga “manyalo.” Ife nee tinakwanisa kutowezera manyalo anewa mwakukhonda dodoma, mbwenye tinakwanisa kutowera “mwakukhulupirika.”
21 Natenepa, tendeni ticite pyonsene pinakwanisa ife toera titowezere kupirira kwa Yezu. Cipo tisafunika kuduwala kuti tingatowezera manyalo a Yezu, tinakhala akukhunganyika toera kupirira “mpaka kunkhomo” kwa makhaliro ano a dziko peno mpaka kufa kwathu. Mwa pinthu pyenepi piwiri, ife nkhabe dziwa cinafuna kutoma kucitika, mbwenye pinadziwa ife ndi ipi: Tingapitiriza kupirira mpaka kunkhomo, Yahova anadzatipasa nkhombo zizinji za kwenda na kwenda.—Mateu 24:13.
a Fala Yacigerego idathumburuzwa “citsandzo” isabveka “pinthu pidalembwa toera kutowezerwa.” Ndi mpostolo Pedhru basi adaphatisira fala ineyi m’Malemba Acigerego Acikristu toera kufokotoza “pinthu pinalemba mpfundzisi mu kadhernu wa mwanang’ono, toera mwana unoyu apfundze kukopyari mwadidi kakamwe pidalemba mpfundzisi wace.”